Aizaia 61:1 - Edo Bible (E Baibol Ẹdo) Version 1996

¹ E Nọyaẹnmwa ne Udazi ya orhiọn rẹn vuọn mwẹ nẹ, ọ zẹ mwẹ nẹ, ọ keghi vbe gie mwẹ, ne I rhie iyẹn ne ọ maa gie ivbiogue ne I mu ne ẹko ẹre rhiae egbe rran, ne I na iyẹn afanvbirri ne iran ne oghunmwu kevbe afanfua ne iran ni rre ẹwẹdọ.

Aizaia 61:1 ပူးပေါင်းရင်းမြစ်များ

Psalm 102:20

Ọ họn eve ikhiẹkhiegbe ọghe iran ni rre ẹwẹdọ ọ na fannọ iran ne a bu ohiẹn uwu gbe kua.

Psalm 147:3

Ọ mu iran ne ekhọe ẹre rhiae egbe rran, ọ keghi vbe gbalọ iran ẹwẹn.

Psalm 149:4

E Nọyaẹnmwa sẹ ọyẹnmwẹ ye ẹmwẹ emwa irẹn, ọ ye akhọnmiotọ ye ọghọ ne emwa irẹn ni mu egbe rriotọ.

Psalm 2:6

Ọ keghi kha wẹẹ, “Mẹ rhie ọba mwẹ ye ẹkete nẹ, vbe Zaiọn ne oke mwẹ ne ọ huanrẹn.”

Psalm 22:26

Avbe ivbiogue gha re vbene iran ho, iran ni bu e Nọyaẹnmwa rre, gha rho ẹre, te agbọn gha ma iran ẹdẹdẹmwẹdẹ.

Psalm 25:9

Ọ su ọmẹhẹ, vbe odẹ ẹmwata, ọ kevbe ma iran iho ẹre.

Psalm 34:18

E Nọyaẹnmwa sikẹ iran, ne agbọn zẹ ọre ẹtin. Ọ vbe miẹn iran hia ne ẹtin emwi hia fo nẹ fan.

Psalm 45:7

Wẹ ho ẹmwẹ emwi ne ọgbae u keghi khuiwu emwi ne ẹ i maa ọnii ọ re ọ siẹe ne Osanobua awẹ Osanobua ruẹ na hannọ uẹn zẹ ọ na ya ọyẹnmwẹ wẹ uẹ sẹẹ avbe ọba nekpa hia.

Psalm 51:17

Izọese mwẹ, ọrọre ekhọe ne ọ mu egbe rriotọ Osanobua, wẹ i ra he ekhọe ne ọ mu egbe rriotọ, kevbe ne ọ roiro fi uyimwẹ werriẹ.

Psalm 68:7

Osanobua, ẹkpo ne u na viọ avbe emwa ruẹn ladian, ẹghẹ ne u na la ato gberra,

Psalm 69:32

Iran ne a zẹ kpokpo gha miẹn ọna, ẹko gha rhiẹnrhiẹn iran. Ọna gha rhie igiẹdu ne iran ni ga Nọyaẹnmwa.

Ẹksọdọs 28:41

U ghi yọ Errọn ne ọtuẹn ke ivbi ẹre nikpia ẹwu na, iyeke ọnii, u ghi nọnọ ori oliv ye iran uhunmwu, ma iran ohẹn, ne u ya iran fiohan, ne iran sẹtin gha ga mwẹ zẹ vbe ohẹn.

Ẹksọdọs 29:7

U ghi rhie ofigbọn ne a nọnọ ye ọmwa uhunmwu, u ghi tue ẹre yọ ẹre uhunmwu ne u ya zọe ye ughaẹn.

Aizaia 29:19

Avbe ivbiogue kevbe avbe emwa ni mu egberriotọ gha vbe dọlegbe miẹn ọyẹnmwẹ ne Nọyaẹnmwa ne ọmwa nọhuanrẹn Izrẹl rhie ne ọmwa.

Aizaia 30:19

Wa ne emwa ni rre Jerusalẹm i ghi ra dọlegbe viẹ ọvbehe. Ọmwa itohan ọ re Nọyaẹnmwa khin, wa gha tu bu ẹre ya nọ iyobọ, ọ gha zẹ ye uwa ẹre.

Aizaia 30:26

Uki ghi gha baa vbe owẹn, owẹn ghi rhie ukhukhu ihinrọn ba egbe vbene ọ ya yunmwu de yi, vbene a miẹn wẹ ne ọ gha te yunmwu vbe ikpẹdẹ ihinrọn ọ re ọ ghi wa rhie ye ikpẹdẹ okpa kẹkan. Ọna gha sunu, vbe ẹghẹ ne Nọyaẹnmwa gha na gbalọ, ọ ghi kpee rrie ighe ẹwẹn ne ọ te fian emwa rẹn re.

Aizaia 32:7

Ọmwa dan ọ re ọzuọ khin, emwi dan ọ re ọ vbe ru vbe ẹghẹ hia. Ọ ghi kun ẹẹn ne ọ ya ohoghe gbe ovbiogue hin oghẹn rre, kevbe ne ọ ghẹ vbe gie emwi ne ọ khẹ ke iran sẹ iran obọ.

Aizaia 40:9

E Jerusalẹm, hin oke ne ọ yo, ne u ya wewe iyẹn ne ọ maa nii! E Zaiọn, ya urhu ne ọ la datu, ta iyẹn ne ọ maa ni ladian, guan ladian, ghẹ gie ohan mu ẹẹn. Tama avbe ore nekhua ni rre Juda wẹ Osanobua iran dee.

Aizaia 42:1

E Nọyaẹnmwa khare wẹẹ, “Ọnọna ọrọre ọguọmwadia mwẹ ne I rhie ẹtin ye ọre iwu, ọmwa ne imẹ zẹe, ne ẹko mwẹ vbe rhiẹnrhiẹn ghe. Mẹ ya orhiọn mwẹ vuọn irẹn nẹ, ọ gha rhie ohiẹn ẹmwata la dọmwadẹ uhunmwu ẹvbo.

Aizaia 42:7

U gha rhan aro avbe arhuaro, u ghi fannọ iran ni tota ye ẹwẹdọ ne ọ so ebiebi kua.

Aizaia 48:16

“Banbanna nian, wa sikẹ mwẹ ne uwa họn ẹmwẹ ne I guan. Ke omuhẹn gha dee, te iwa ta ẹmwẹ mwẹ vbe azagba I keghi vbe gha ru ẹe ne ẹmwẹ mwẹ sẹ.” (Banbanna nian, e Nọyaẹnmwa ne Udazi rhie ẹtin ẹnrẹn mẹ nẹ, ọ na gie mwẹ.)

Aizaia 49:9

I gha tama avbe oleghan wẹẹ, ‘Wa kpao ighẹ a fannọ uwa kua nẹ kevbe iran ni rre uwu ebiebi wẹ wa ladian gha die uwu uwanmwẹ.’

Aizaia 52:7

U miẹn vbene ọ mose hẹ ne a bẹghe ọmwa ne a gie ẹre uhunmwu vbe ọ fian avbe oke ni rra dee do na iyẹn ne ọ maa, iyẹn ọfumwegbe! Ọ ya akhọnmiotọ wewe, ọ keghi tama Zaiọn wẹẹ, “Osanobua ọrọre ọba!”

Aizaia 52:9

Wa gha wee ne oghọghọ wa ne itowa ni rre Jerusalẹm! E Nọyaẹnmwa gha miẹn ẹvbo ẹre fan ọ ghi vbe fu avbe emwa rẹn ẹko rre.

Aizaia 57:15

“Mẹ ọrọre Osanobua ne ọ yo kevbe ne ọ kpọlọ ne ọ rrọ ẹdẹdẹmwẹdẹ. Ehe ne ọ yo kevbe ne ọ huanrẹn ọ re imẹ dia, sokpan mẹ vbe di ọghe iran ni mu egbe rriotọ, kevbe ni roiro fi uyinmwẹ werriẹ ya, ne imẹ miẹn ehe na rhie idaehọ kevbe imuẹntiyan ọghe iran werriegbe ye ihe.

Aizaia 57:18

“I miẹn vbene iran ru hẹ nẹ, sokpan, I gha mu iran egbe rran, I gha su iran gha khian I ghi ru iyobọ ne iran, I gha vbe fu iran ni khiẹ ẹko rre.

Aizaia 59:21

I rhie ẹtinmwẹ kevbe iruẹemwi mwẹ ne uwa, ne ọ gha re ọghe uwa ẹdẹdẹmwẹdẹ, ke ẹghẹ na gha rae te uwa ra gha họn ẹmwẹ mẹ, wa ghi ma ivbi uwa, kevbe ivbi uniẹn uwa ẹre ne iran gha họn ẹmwẹ mẹ ẹdẹdẹmwẹdẹ.”

Aizaia 66:2

Mẹ ọ re ọ tobọmwẹ yi agbọn na hia. Ẹko avbe emwa ni mu egbe rriotọ ke ni roiro fiwerriẹ wa ma mwẹ iran ni mu ohan mwẹ, ni vbe họn ẹmwẹ mẹ.

Jerimaia 34:8

E Zedekaia ne ọba kevbe avbe emwa ni rre Jerusalẹm keghi taa ẹe wẹ iran ra fannọ avbe eviẹn kua ke

Jerimaia 52:33

A keghi gie Jehoiakin bannọ ẹwu oleghan rẹn kua, kevbe ne ọ do gha rri evbare vbe eteburu ọghe ọba vbe ẹdagbọn rẹn ni ghi dekẹe hia.

Daniẹl 9:24

“Ukpo ekigbesiyenẹ vbe ihe ihinrọn ọ re Osanobua bu yọ ne ọ gha na do fannọ emwa ruẹn kevbe ẹvbo ruẹ nọhuanrẹn hin obọ orukhọ kevbe ọkhọ rre. A gha ya orukhọ bọ emwa, a ghi mu ẹmwata etẹbitẹ gbọọ, ẹghẹ nii umian nii, kevbe ẹmwẹ akhasẹ nii ghi do sẹ, a ghi do do ugie ya dọlegbe rhie Ọgua Osa ye ihe.

Hozia 6:1

Emwa ni khare wẹẹ, “Wa gie ima werriegbe bu e Nọyaẹnmwa. Ọ ru ima emwi nẹ, sokpan ẹ i mwẹ ọ ma mu ima egbe rran, ọ kuan ima nẹ, sokpan ọ gha gbalọ ima ẹwẹn ra u ma ro vberriọ?

Levitikọs 7:35

Ehe ne a viọ ne Nọyaẹnmwa vbe evbare nii, ne Nọyaẹnmwa ghi vbe viọ ne Errọn kevbe ivbi ẹre vbe ẹdẹ ne a ma iran ohẹn, ọre ena khin.

Maika 3:8

Sokpan, zẹ vbe ọghomwẹ e Nọyaẹnmwa ya orhiọn rẹn kevbe ẹtin ẹnrẹn vuọn mwẹ ọ vbe rhie mwẹ ne I gha rẹn emwi ne ọ re ohiẹn ẹmwata, kevbe udinmwẹ ne I gha ya gha tama ivbi Izrẹl orukhọ ne iran ru.

Matiu 11:5

Avbe arhu aro bẹghe odẹ, avbe uke khiaẹn, a khue avbe ekhọnmwoti huan, avbe ayin ehọ họn ẹmwẹ, a huẹn avbe ni wulo kpaegbe, a kporhu Iyẹn Ne ọ maa ma avbe ivbiogue.

Matiu 3:16

Ugbẹn vbe a ghi samẹn ne Jesu nẹ, vbene ọ wa ladian vbe uwu amẹ, ẹrinmwi keghi kie ye otọ, rẹn keghi miẹn Orhiọn Osanobua vbe ọ tuorre, ọ yevbe idu, ọ keghi rhuẹ yan rẹn.

Iyẹn ne ọ Maan Ọghe Luk 7:22

Rẹn keghi wanniẹn tama emwa ne Jọn gie wẹẹ, “Wa ya tama e Jọn emwi ne uwa họn ẹn kevbe ne aro uwa sẹe, avbe arhuaro bẹghe odẹ, avbe uke khiaẹn, a khue avbe ọkhọnmwoti huan, ayin ehọ họn ẹmwẹ, a huẹn ni wu kpaegbe vbe orinmwi, a kpe orhu Iyẹn Ne ọ Maa ma avbe ivbiogue.

Iyẹn ne ọ Maan Ọghe Jọn 1:41

Vbe ọwarọkpa nii, Andru keghi miẹn Saimọn ne ọtiọnrẹn, ọ keghi tama rẹn wẹẹ, “Ma miẹn nene Mẹzaia nẹ.” (Emwi ne a ya ọnii kha ọrọre “Kristi.”)

Iyẹn ne ọ Maan Ọghe Jọn 3:34

Ẹmwẹ Osanobua, ọre ọmwa ne Osa gie guan rhunmwuda te Osanobua rhie uvuọnmwẹ Orhiọn rẹn nẹẹn.

Iwinna 10:38

Wa vbe rẹn vbekpa ọghe Jesu Kristi ne ovbi e Nazarẹt vbene Osanobua hihiẹ Orhiọn Ne Ọ Huanrẹn kevbe ẹtin yan rẹn hẹẹ. Ọ kegha lele ehe hia khian, ọ na winna iwinna esi, ọ na gha sinmwi emwa hia ne Esu mu gba, rhunmwuda Osanobua yaba ẹre.

Iwinna 26:18

U ghi rhan iran aro ne u gban iran uhunmwu hin ebiebi rre la uwu uwanmwẹ, kevbe hin ẹtin Setan rre ghe Osanobua. Vbene a gha na miẹn wẹ vbekpa ne iran na mu ẹtin yan mwẹ, a ghi ye orukhọ iran bọ iran, iran ghi rhie ihe iran vbe uwu ẹbu emwa ne Osanobua hannọ zẹ.’

Iwinna 4:27

Vbe ẹmwata, Hẹrọd kevbe Pọntiọs Pailet deba iran Ni ma yayi kevbe emwa Izrẹl, ore ẹvbo na iran na ko iko Jesu ne Ọguọmwadia ruẹ Ne ọ huanrẹn ne uwẹ ya ru Mẹzaia.

II Kọrinti 3:17

Vbe ehe ne a tie re na, Orhiọn ọre a kha vbe a guan kan “Nọyaẹnmwa.” Eheikehe ne Orhiọn Nọyaẹnmwa a rhirhi gha ye, a yan egbe ọmwa rre evba.

II Kọrinti 7:6

Sokpan, Osanobua ne ọ rhie ẹtin ne ne egbe wọ fo nẹ, keghi ye urremwẹ Taitọs rhie ẹtin ye ima iwu.

Hibru 1:9

U hoẹmwẹ emwi ne a ru ẹse, u sọnnọ emwi ne a ma ru ẹse. Ọnii ọ si ẹe ne Osa, Osanobua ruẹ na hannọ uẹn zẹ, ọna rhie oghọghọ uyi ne ọ sẹ ne ọ rhie ne ihua ẹsẹse nuẹn.”