Aizaia 60:18 - Edo Bible (E Baibol Ẹdo) Version 1996

¹⁸ A i ghi họn ẹmwẹ ọkhọ vbọ ọvbehe, ọfuan i ghi ra dọlegbe rhia ẹvbo ruẹ ua I gha degue ruẹ I ghi vbe gbinna nuẹn zẹ vbe ekẹn ne a gbe lẹga ẹvbo. Wẹ gha rho mwẹ rhunmwuda, I miẹn ruẹn fan nẹ.

Aizaia 60:18 ပူးပေါင်းရင်းမြစ်များ

II Samuẹl 7:10

I gha hannọ ihe ọkpa ne Izrẹl ne emwa mwẹ, I ghi gbe iran ẹkun sotọ vbe evba, ehe ne iran gha ye, ne a i ghi ra na kpokpo iran ọvbehe. Ke ne iran ya sẹ otọ na gha dee, emwa dan ne piankhanrhan ni bun ọ re ọ he gu iran gbinna, sokpan, ọna i ghi ra dọlegbe sunu ọvbehe. I yan rẹn i ghẹ I gha degue ruẹ hin obọ eghian uwa hia rre, kevbe wẹ, u gha mwẹ uniẹn ruẹn.

Psalm 147:14

Ọ ruẹe ne ẹbe fo la ehe ne otọe uwa lae, ọ keghi vbe ye ọka ne ọ maa sẹẹ vuọn uwa ẹko.

Aizaia 11:9

A i ra miẹn emwi dan okpa ra emwi ne ọ kuan ọmwa egbe vbe Zaiọn, ne oke nọhuanrẹn ọghe Osanobua. A rẹn e Nọyaẹnmwa gha vuọn otọe nii zẹ vbene amẹ vuọn okun.

Aizaia 2:4

Ọ gha dọlọ avbe uhunmwu ẹvbo nekhua kugbe. Iran gha ya umozo iran dunmwu emwi ne ọ yevbe ẹguẹ kevbe asoro iran, iran gha ya dunmwu ikhu. Avbe uhunmwu ẹvbo ighi khọn okuo ọvbehe iran ighi mu egbe okuo ọvbehe.

Aizaia 26:1

Ẹdẹ dee ne emwa gha so ihuan na vbe otọ e Juda: Ẹvbo mwa wegbe. Osanobua tobọ ẹre ọre ọ wan ga ekẹn ọnrẹn.

Aizaia 26:2

Wa kie urho ẹvbo nii, ne uwa gie ẹvbo ẹmwata nii la owa, ẹvbo ne emwa rẹn ru emwi ne ọ kere.

Aizaia 51:19

Odekun eva ọ re u vbaa vbe egbe, okuo guọghọ otọe ruẹ hia ohanmwẹ gbe avbe emwa ruẹn. A ma miẹn ọmwa ne ọ tohan ruẹn.

Aizaia 54:14

Ẹmwata kevbe uhunmwu ẹmwẹ gha ya uwa wegbe. Wa gha fe vbe obọ ukpokpo kevbe ohan.

Aizaia 56:5

ẹghẹ nii, a gha ye eni ruẹn rre vbe Ọgua Osa mwẹ kevbe uwu ẹbu avbe emwa mwẹ kpẹe vbotọ ẹsẹse sẹẹ akpawẹ te u biẹlẹ emọ ikpia kevbe emọ ikhuo. A i mianmian an ẹdẹdẹmwẹdẹ.”

Aizaia 60:11

A gha kie urho ruẹ yotọ asọn kevbe avan ne avbe ọba avbe uhunmwu ẹvbo. Sẹtin gha viọ ẹfe iran guẹ.

Aizaia 60:17

“I gha viọ igoru guẹ ye ihe oze esiliva kevbe oze, ye ihe ematọn vbe erhan kevbe ematọn ye ihe okuta. Iran ni khaemwisẹ yan ruẹn i ghi ra wọ ruẹ uhunmwu ọvbehe, I gha ru ẹe ne iran ya ẹmwata kevbe ọfumwegbe gha khaemwisẹ.

Aizaia 61:11

Zẹ vbene ọ ye wẹ te emwiokọ gha zọ, ọ ghi vbe wan zẹẹ, erriọ zẹ ọ re Nọyaẹnmwa ne Udazi gha miẹn emwa rẹn fan. Avbe uhunmwu ẹvbo hia ghi gha rho ẹre.

Aizaia 62:10

Wa ne ivbi e Jerusalẹm, wa khian ladian adesẹ ore rre, ne uwa ya zẹ odẹ khẹ ivbi uwa ni werriegbe die owa. Wa zẹ odẹ ne ọ vbẹe, wa la okuta hia kua vbọ wa yi ama yọ, ne avbe uhunmwu ẹvbo miẹn ehe na rẹn.

Aizaia 62:4

A i ghi dọlegbe tie ruẹ “Evbahe.” Ra ne a gha tie otọe ruẹ “Ne Ọdọ He.” Eni ruẹn nọgbọn ghi gha re “Ẹko Ẹre Maa Osanobua.” A ghi gha tie otọe ruẹ “Ne Ọdọ Bọ,” rhunmwuda, ẹko rua maa e Nọyaẹnmwa ọ ghi vbe yevbe ọdọ ne otọe uwa.

Aizaia 62:7

Iran i ra gie ẹe hẹwẹ ọ te do rhie Jerusalẹm werriegbe ye ihe ẹre. Ne ọ ya ẹe khian okpẹvbo ne otọ agbọn hia go wan.

Ezikiẹl 42:20

Ekẹn nii keghi lẹga ehe ne ọ re ibata iyeva yan uri enẹ vbe igienenẹ. Ekẹn ni keghi wannọ ehe ne ọ huanrẹn hin ehe ne ọma huan rre.

Maika 4:3

Ọ gha bu ohiẹn ẹvbo ni mwẹ egbe ẹzọ. Avbe ẹvbo ni mwẹ ẹtin, ni sikẹ emwa kevbe ni rrei, iran gha ya umozo iran gbe ẹguẹ, kevbe asoro iran, erọ ulema. Uhunmwu ẹvbo i ghi mu okuo gie egbe ọvbehe, iran i ghi vbe mu egbe okuo ọvbehe.

Zẹfanaia 3:19

Ẹghẹ dee! I gha rri iran ni wọ uwa uhunmwu oya; I gha fannọ iran ne arọe ye otọ I ghi viọ iran ni rre iwe gha die owa, I gha ya ekhue iran khian uyi agbọn na hia ghi gha tian iran.

Zẹkaraia 2:5

E Nọyaẹnmwa tobọ ẹre tae nẹ wẹ te irẹn ra gha re ekẹn erhẹn lẹga ẹvbo nii ne irẹn gha degue ẹre, kevbe wẹ tẹ irẹn ra gha rre evba ke irẹn kevbe uyi irẹn hia.”

Zẹkaraia 2:9

“E Nọyaẹnmwa tobọ ẹre gha gu uwa gbinna, avbe emwa ni te ka gha re eguọmwadia uwa yi gha fu uwa emwi viọ.” Ọna ghẹ ghi sunu nẹ, emwa hia gha rẹn wẹ e Nọyaẹnmwa ọ re ọ gie mwẹ.

Zẹkaraia 9:8

I gha tobọ mwẹ gha gbe aro ghe ẹvbo mwẹ, I i ghi ra vbe gie ivbiyokuo gha la ẹe gberra. I i ghi ra kue ne emwa dan gha wọ emwa mwẹ uhunmwu ọvbehe. I miẹn vbene emwa mwẹ he rri oya sẹhẹ.”