Aizaia 55:2 - Edo Bible (E Baibol Ẹdo) Version 1996

² Vbọzẹ ne uwa na lo igho ye avbe emwi ne ẹ i vuọn ẹko yi? Vbe uwa ghi na lo igho ne uwa miẹn hẹ, ohanmwẹ ghi ye gha gbe uwa? Wa danmwehọ mwẹ, ne uwa vbe ru vbene I khare, wa gha miẹn evbare ne ọ maa sẹ gha re.

Aizaia 55:2 ပူးပေါင်းရင်းမြစ်များ

Psalm 22:26

Avbe ivbiogue gha re vbene iran ho, iran ni bu e Nọyaẹnmwa rre, gha rho ẹre, te agbọn gha ma iran ẹdẹdẹmwẹdẹ.

Psalm 34:11

Wa larre, avbe igbama ne ọse mwẹ, ne uwa danmwehọ mwẹ, I gha ma uwa ẹre ne uwa gha ya ọghọ ne Nọyaẹnmwa.

Psalm 36:8

Evbare ọrhẹnrhẹn ne u hẹ ma ọ re ima re; u kevbe gie ima vbe gha wọn vbe ẹzẹ iruemwiẹse ruẹ.

Psalm 63:5

Orhiọn mwẹ gha rri evbare ẹko ghi vbe vuọẹn I gha so ihuan urhomwẹ oghọghọ ghe ruẹ.

Ẹksọdọs 15:26

Ọ keghi kha wẹẹ, “A deghẹ wa họn ẹmwẹ mwẹ, mẹ ne Osanobua rua, ne uwa gha ru emwi ne imẹ ye obọ yi ne uwa gha ye uhi mwẹ rre, ne uwa vbe gha rhie uhi mwẹ hia mwẹ, mẹ i ra ye avbe emianmwẹ ne I mu yan ivbi Igipt rhọkpa rri uwa oya. Mẹ ọrọre Nọyaẹnmwa ne ọ mu uwẹ egbe rran.”

Itan 1:33

Sokpan, ọmwaikọmwa ne ọ rhie ehọ mẹ ta yi, ẹkun gha sẹ ọre otọ. Ọ gha rrọ vbe a i mwẹ ẹbe, vbe ne emwi i na vbe rrọ ne ọ gha gie ohan gha mu ẹẹn.”

Itan 7:23

ehe ne ifẹnmwẹ gha na ha ẹre ẹkoko udu gberra. Ọ keghi yevbe ahianmwẹ ne ọ ra tin la ifi, ọ ma rẹn wẹ te irẹn rhie uhunmwu mwẹ atataobọ.

Itan 8:32

“Banbanna nian, wa danmwehọ mwẹ, wa ne igbama, wa gha ru vbene I khare, wa gha miẹn oghọghọ.

Itan 9:5

“Larre do rri evbare mwẹ ne u vbe da ayọn ne i guare.

Asan-Ibo 6:2

Osanobua ghi ya ẹfe ne ọmwa, deba ọghọ kevbe emwi ne a mwẹ, ne a wa kha wẹ emwi hia ne ọ ho, sokpan, ẹ i ghi gie ẹe ya ẹe ru, sokpan ẹrrẹe ghi do ya ẹe ru. ọna i zẹdẹ maa, ọ ma gba hiehiere.

Aizaia 1:19

Adeghẹ u gha họn ẹmwẹ mẹ, u gha rri avbe emwi esi ne otọe ni rhie rre,

Aizaia 10:27

Ẹghẹ nii gha sẹ I gha fannọ uwa yotọ hin obọ ẹtin Asiria rre, urọnghọn iran i ghi ra ye dọlegbe gha re ihẹ vbe izabọ uwa.”

Aizaia 25:6

Vbe emwamwa, vbe Oke Zaiọn, e Nọyaẹnmwa gha kpehe evbare nọkhua ne agbọn ẹvbo otọ agbọn hia, evbare nọkhua ọghe evbare ni maa sẹẹ ehia kevbe ayọn ni maa sẹe hia.

Aizaia 44:20

Ẹwaẹn ne ọ rre emwa ma vbe kpọlọsẹ ọghe ọmwa ne ọ rri emuẹn. Emwi akpa ne ọ rre ọre uhunmwu bibi ẹre odẹ sẹ vberriọ nẹ wẹ ẹ i ghi gia yọre obọ. Ẹ i sẹtin tae ma egbe ẹre wẹ amazẹ ne irẹn mu mwẹ obọ ighe ẹ i re Osanobua hiehiere.

Aizaia 46:6

Emwa ghi rhan ẹsiso iran iran ghi viọ igoru ladian, iran ghi ya mwa esiliva vbe esike iran ghi tie ogun ẹrọnmwọ ne ọ do dunmwu ẹbọ ne iran, iran ghi ya uhunmwu rhanmwẹ otọ iran ghi gha ya uhunmwu rhanmwẹ otọ iran ghi gha gho ẹre.

Aizaia 51:1

E Nọyaẹnmwa khare wẹẹ, “Wa danmwehọ mwẹ, wa ni ho ne a miẹn uwa fan, wa ni do nọ iyobọ vbe obọ mwẹ, wa roro ẹmwẹ okuta nọkhua ne uwa ke ladian. Ehe ne a na fian okuta ne a ke fian uwa ladian.

Aizaia 51:4

“Wa danmwehọ mwẹ wa ne emwa mwẹ wa danmwehọ vbene I khare mẹ ọ re ọ ma avbe uhunmwu ẹvbo emwi. Uhi mwẹ gha rhie uwanmwẹ gie iran.

Aizaia 51:7

“Wa danmwehọ mwẹ, wa ne ọ rẹn emwi ne ọ gbae ni rhie emwi ne I ma iran re mwẹ vbe ekhọe. Wa ghẹ gie ohan mu uwa vbe emwa a gha giẹ ighẹ iran vbe rhovbiẹ uwa;

Aizaia 62:8

E Nọyaẹnmwa yan eyan akekhọerre nẹ ọ gha ya ẹtin irọẹn mu ẹẹn sẹ, “Ọka ruẹ i ghi re ne avbe eghian ruẹn gha ya gha koko egbe iran. Avbe ọrriọvbe i ghi ra dọlegbe gha rhie ayọn ruẹn da.

Aizaia 62:9

Sokpan, wẹ ne ọ kọe, ne ọ vbe rhọ ọka nii ẹre ọ gha vbe rri ebrẹd ẹre, u ghi rho e Nọyaẹnmwa, wẹ ne ọ gbearoghe ne u na kọlọ azara nii ọ re ọ gha vbe da ayọn ẹnrẹn vbe ore Ọgua Osa mwẹ.”

Aizaia 65:23

Emwi ne iran ru gha wa gha dinna odẹ, ọkhọ i ra vbe sunu vbe egbe ivbi iran, i gha fiangbe iran kevbe uniẹn ivbi iran ni dee ẹdẹdẹmwẹdẹ.

Jerimaia 12:13

Avbe emwa mwẹ kọ ọka, sokpan iran keghi ya rhọ irunmwu; iran kakabọ winna, sokpan, iran ma miẹn emwirhọkpa vbọ. Rhunmwuda ohu mwẹ ne ọ wegbe, emwiokọ iran ma maa.”

Jerimaia 17:24

“Tama avbe emwa na ne iran gha ye uhi mwẹ hia ru emwi. Iran ghẹ mu ihẹikeihẹ la onurho ẹvbo nii la owa vbe Ẹdẹ Ikẹtin. Iran ghi gha ru Ẹdẹ Ikẹtin ẹdẹ nọhuanrẹn, iran ghẹ vbe winna iwinna rhọkpa hiehiere.

Jerimaia 2:13

rhunmwuda orukhọ eva ọ re emwa mwẹ ru: iran fi iyeke gbe mwẹ, mẹ ne uhunmwu ẹzẹ amẹ ne ọ furre, iran keghi ya gha fian ivbi uhae, uhae ni halọe, ne ẹ i vbe sẹtin rrọ amẹ hiehiere.

Jerimaia 31:14

I gha ye evbare ne ọ ghi maa sẹẹ koko avbe ohẹn ne ẹko vuọn iran I ghi vbe gie iho avbe emwa mwẹ sẹ iran ọkẹn. Mẹ ne Nọyaẹnmwa tae nẹ.”

Hozia 12:1

“Emwi ne ivbi Izrẹl ru hia fẹẹrẹ, ke owiẹ ya sẹ ota ọfuan kevbe ọrhiae ọ re ehia khin. Uma dan kevbe uyinmwẹ ibalegbe wa dọlegbe gbọ yọ vbe ehe ne iran ye. Iran gu Asiria rhie obọ ye ebe, iran vbe gu Igipt do ẹki.

Hozia 8:7

Iran kọ ẹhoho iran gha rhọ okpẹhoho! Ugbo ọka ne ọma mọ ọka, ẹ i sẹtin rhie ebrẹd ladian. Sokpan, a deghẹ ọ sẹtin gha yerriọ, ẹrrẹe ọ re ọ ra rriọe rua.

Habakọk 2:13

Avbe ẹvbo ne uwa khọn mu gha rri ororo rhunmwuda iwinna ẹhorriẹ ne uwa ya iran winna, emwi hia ne iran te bọ khian ne ọ la erhẹn rrie. E Nọyaẹnmwa ne Oghodua ọ re ọ ru ọna.

Matiu 15:9

Vbe iran ghi ya uhunmwu rhanmwẹ otọ mẹ ba a, vbe iran mu ẹmwẹ uhi emwa kẹkan vbe na miẹn we uhi Osanobua nọ!’ ”

Matiu 22:4

Ọ keghi vbe gie eguọmwadia ọvbehe ya khama iran wẹẹ, ‘A le evbare nẹ, avbe ẹmila abẹgbe ne a ware, ọre a ya le ẹe, a wa mwamwa emwi hia ye otọ nẹ. Wa gha dee do rri evbare irhiọha’,

Matiu 5:6

Ọ maa ne iran ni rhiegba ye ẹmwẹ ne a ru nọ yẹ Osa, Osanobua gha gie ẹko vuọn iran fẹfẹfẹ!

Iyẹn ne ọ Maan Ọghe Mak 7:14

Ẹghẹ ni ọre Jesu na dọlegbe tie emwa ni gbe ẹbu ye evba, ọ tama iran wẹẹ, “Wa hia fẹẹrẹ wa danmwehọ mwẹ ne ọ miẹn ehe na la uwa ekhọe.

Iyẹn ne ọ Maan Ọghe Luk 15:23

Wa mu ẹmila abẹgbe nii, wa gbe ẹe ne ima ya dugie ọyẹnmwẹ.

Iyẹn ne ọ Maan Ọghe Jọn 6:27

Wa ghẹ miẹn ẹsọn ye evbare ne ọ sẹtin rhia, sokpan emwi ne ọ kere ne uwa miẹn ẹsọn yi ọrọre evbare ne ọ sẹtin gha rrọọ ya sẹ agbọn etẹbitẹ. Ovbi Ọmwa gha rhie evbare na ne uwa rhunmwuda Osanobua ne Erha ye obọ yọ ọre nẹ.”

Ebe ne Pọl gbẹẹn gie emwa Rom 10:17

Ọnii nọ wẹ a gha họn ẹmwẹ nii ọre a na yae yi, ekpa a kpe orhu Kristi ọre nene ẹmwẹ la rre.

Ebe ne Pọl gbẹẹn gie emwa Rom 9:31

Vbe rriọ, iran na hannọ zẹ ni gha gualọ uhi ne ogha dọlọ iran kugbe ba Osanobua, keghi baeku.

Diuteronomi 11:13

“Rhunmwuda onii nian, wa ghi gha ya uhi ne I gbe ne uwa ẹrẹna gha ru emwi, onii nọ wẹ ne uwa gha ya ekhọe uwa hia ho ẹmwẹ Nọyaẹnmwa Osanobua rua kevbe ne uwa vbe ga ẹe vbe orhiọn ruan hia kevbe ẹko rua hia.

Hibru 13:9

Wa ghẹ gie iruẹmwi ughughan ne a ma he ka rẹn, bi uwa hin urodẹ ẹmwata rre. Ọ kere ne a ya ẹsọhẹ Osanobua ye orhiọn ima khian ni wo vbe egbe, i ghẹ ẹ i re a ru emwi ne uhi kha re vbe ekpa evbare, iran ni ka ru vbene avbe uhi nii khare yi, ma miẹn emwi ọkpa ne iran miẹn vbọ.