Aizaia 54:5 - Edo Bible (E Baibol Ẹdo) Version 1996

⁵ Te Ayi ne ọ yii uẹ ra yevbe ọdafọn ọn, e Nọyaẹnmwa ne Oghodua ọre a tie ẹre. Osanobua nọhuanrẹn ọghe Izrẹl gha miẹn ruẹn fan, rẹn ọ re ọ khaemwisẹ yan otọ agbọn hia.

Aizaia 54:5 ပူးပေါင်းရင်းမြစ်များ

Job 19:25

Sokpan, mẹ rẹnrẹn ighẹ arhiọnkpa rre ẹrinmwi, ne ọ gha do mu ẹzọ mwẹ gui.

Aizaia 11:9

A i ra miẹn emwi dan okpa ra emwi ne ọ kuan ọmwa egbe vbe Zaiọn, ne oke nọhuanrẹn ọghe Osanobua. A rẹn e Nọyaẹnmwa gha vuọn otọe nii zẹ vbene amẹ vuọn okun.

Aizaia 43:1

Izrẹl, Osanobua ne ọ yi uwe khare wẹẹ, “Ghẹ mu ohan, I gha miẹn ruẹn fan. Mẹ ọ re ọ he uwẹ eni, ọghomwẹ ọre u khin.

Aizaia 43:14

Osanobua nọhuanrẹn ọghe Izrẹl, e Nọyaẹnmwa ne ọ miẹn uwa fan khare wẹẹ, “Ne I miẹn ehe na miẹn uwa fan, I gha gie ivbiyokuo ne iran ya gu e Babilọn khọn; I gha guọghọ ẹkhu onurho ne ọ rrọọ sẹ otọ uwemwẹ ne emwa ni rrọọ te wee, gha khian eve.

Aizaia 45:11

E Nọyaẹnmwa ne Osanobua nọhuanrẹn ọghe Izrẹl ọmwa ne ọ kha vbene ẹdẹ nakhuẹ ra gha ye hẹ khare wẹẹ, “U i mwẹ asẹ ne a ya nọ mwẹ ọta vbekpa ivbi mwẹ, ra ne u gha tama mwẹ emwi ne ọ te kei ne I ru.

Aizaia 48:17

Osanobua Nọhuanrẹn ọghe Izrẹl, e Nọyaẹnmwa ne ọ miẹn uwa fan khare wẹẹ, “Mẹ ọrọre Nọyaẹnmwa ne Osanobua uwa ọmwa ne ọ ho ne ọ ma uwa emwi ne umamwẹ uwa, ne ọ vbe gha su uwa lele odẹ ne uwa gha la.

Aizaia 48:2

Sevba wa ghi ye gha ya unu hia tae wẹ ivbi ore nọkhua ọghe ẹvbo nọhuanrẹn nii ọ re uwa khin, kevbe wẹ Osanobua Izrẹl ọ re uwa ya egbe kọ ọmwa ne eni ẹnrẹn re e Nọyaẹnmwa ne Oghodua.

Aizaia 51:15

“Mẹ ọrọre Nọyaẹnmwa ne Osanobua ruẹ mẹ ọ re ọ tughu okun I ghi vbe ye ulẹmwẹ amẹ ọnrẹn gha vanhiẹn. Eni mwẹ ọrore Nọyaẹnmwa ne Oghodua.

Aizaia 54:8

Ohu mu mwẹ, I na fi iyeke gbe vbe ovbi ẹghẹ kherhe. Sokpan, I gha ho ẹmwẹ ruẹn ẹdẹdẹmwẹdẹ. Erriọ e Nọyaẹnmwa ne ọ miẹn ruẹn fan khare.

Aizaia 6:3

Iran keghi gha go tama egbe wẹẹ: “Huanrẹn, huanrẹn, huanrẹn! Ne ọ huanrẹn ọ re Nọyaẹnmwa ne Oghodua khin! Uyi ẹre vuọn agbọn hia.”

Aizaia 65:16

Ọmwaikọmwa ne ọ ghi nọ afiangbe vbe otọe nii, Osanobua ẹmwata ọ re ọ ra wẹ, ne ọ fiangbe irẹn. Ọmwaikọmwa ne ọ vbe vẹn ihẹn eni Osanobua ẹmwata nii ọ re ọ ra vbe ya vẹn ọẹn. Orueghe ọghe ẹghẹ ne ọ gberra gha fo, a ghi vbe mianmian ẹn.”

Jerimaia 10:16

Osanobua Jekọb i ye vbe iran, rẹn ọrọre ọmwa ne ọ yii emwi hia, ọ keghi hannọọ Izrẹl zẹẹ ne iran gha re emwa obọ ẹre. E Nọyaẹnmwa ne Oghodua ọ re a tie ẹre.

Jerimaia 3:14

“Wa ne emwa ne ai gha ekhọe ẹre, wa werriegbe rre, ọghomwẹ ọ re uwa khin, I gha rhie ọkpọkpa vbe uwu uwa ke dọmwadẹ okpẹvbo ladian, kevbe eveva ke dọmwadẹ ẹwae rre, I ghi viọ uwa werriegbe gha die Oke Zaiọn.

Jerimaia 51:19

Osanobua Jekọb i ye vbe iran, rẹn ọ re ọmwa ne ọ yii emwi hia, ọ keghi zẹẹ Izrẹl ne iran wa gha re emwa irẹn to bọ irẹn. E Nọyaẹnmwa ne Oghodua ọre a tie ẹre.

Ezikiẹl 16:8

“I ghi vbe dọlegbe gberra, I keghi miẹn wẹ ẹghẹ sẹ nẹ ne ẹmwẹ okpia gha ya gha rre uẹ aro. I keghi ya ẹwu mwẹ gue egbe ruẹ ne u bannọ yotọ, I keghi yan ma ruẹn ighe I gha ho ẹmwẹ ruẹn. Vbe ẹmwata, I keghi guẹ rhie obọ ye ebe wẹ I gha rhie ruẹ rọnmwẹ, wẹ na ghi do gha re ọghomwẹ.” Erriọ ọre Osanobua ne Udazi khare.

Hozia 2:16

Ẹghẹ nii ọ ghi dọlegbe gha tie mwẹ ọdọ ẹre, ẹ i ghi ra tie mwẹ e Baal ọghọe ọvbehe.

Hozia 2:18

Ogha sẹ ẹghẹ nii, mẹ gha gu avbe aranmwoha hia kevbe avbe ahianmwẹ ta ẹe kugbe, ne iran ghẹ kuan emwa mwẹ ọvbehe. I gha vbe viọ emwi igbinna okuo hia hin otọe nii rre, umozo kevbe uhanbọ hia I ghi gie emwa mwẹ gha rrọọ vbe ọfumwegbe kevbe ne a i na mwẹ ẹbe.

Zẹkaraia 14:9

Ẹghẹ nii e Nọyaẹnmwa ghi gha re ọba yan otọ agbọn hia, emwa hia gha ga ẹe zẹ vbe Osanobua, iran ghi vbe gha ya eni ọkpa tie ẹre.

Malakai 1:11

Ke ehe ne agbọn sẹe vbe obọ na ya sẹ ehe ne ọ sẹe vbe obọ nọkpa, te emwa hia ya ọghọ mẹ. Ehe hia iran na giẹn eturari mẹ, iran ghi vbe gha zọ ese ne ọ gia rhan obọ miẹn. Te iran hia wa rhie ọghọ mẹ.

Iyẹn ne ọ Maan Ọghe Luk 1:32

Rẹn gha khian okpọmwa, a ghi vbe gha tie ẹre Ovbi Osanobua Ne Ọ Yọ Sẹ, Nọyaẹnmwa Osanobua gha ma ẹn re ọba zẹ vbe ne Devid ne erhae odede vbe gha ye.

Iyẹn ne ọ Maan Ọghe Jọn 3:29

Ọdafẹn ọha ọre ọ yan ovbiọha. Ọse ọdafẹn ọha ghi mudia gha danmwehọ, ẹko ghi gha rhiẹnrhiẹn ọẹn vbe ọ gha họn urhu ọdafẹn ọha. Erriọ zẹẹ ọre a ya ye ọyẹnmwẹ ne ọ sẹmwẹ khian ne ọ gbae.

Ẹfisọs 5:32

Ẹmwata nọkhua ọre a rhie maa vbe ebe na, mẹ vbe rẹn wẹ Kristi kevbe esọsi ọre a ta ẹe gie.

Jọsua 3:11

Ẹkpẹti Ile ọghe Nọyaẹnmwa uhunmwu otọ agbọn hia ra ke odaro ne uwa ya fian Ẹzẹ Jọdan rra.

Jọsua 3:13

Avbe ohẹn ni mu Ẹkpẹti Ile ọghe Nọyaẹnmwa uhunmwu otọ agbọn hia gha viọ owẹ iran ye uwu amẹ nii, ẹzẹ Jọdan ghi dobọ ulẹmwẹ yi, amẹ ni lẹ ke uhunmwu Ẹzẹ dee ghi hẹnhẹn ye ihọkpa.”

Arhie Maan 11:15

Odibosa ne ogihinrọn keghi fian okpe ọghọe re, a keghi họn urhu ni vannọ vbe ẹrinmwi kha wẹẹ, “Ẹtin ne a ya khaemwisẹ yan agbọn na, Nọyaẹnmwa kevbe Mẹzaia ẹre, ọre ọ ghi yan rẹn nian, ọ gha vbe gha khaemwisẹ ẹdẹ kevbe ẹdẹdẹmwẹdẹ.”