Aizaia 53:10 - Edo Bible (E Baibol Ẹdo) Version 1996

¹⁰ E Nọyaẹnmwa khare wẹẹ, “Iho mwẹ nọ wẹ ne ọ rrioya. Uwu ne ọ wu, ese ne a zọ ya dẹ ayabọ ọ re nọ. Rhunmwuda ọnii, ọ gha miẹn ivbi uniẹn ọnrẹn ọ gha tọ ẹsẹsẹmwẹse obọ, ẹre ọ re emwamwa mwẹ ra na dunna.

Aizaia 53:10 ပူးပေါင်းရင်းမြစ်များ

Psalm 110:3

Ẹdẹ ne u gha gu avbe eghian ruẹn gbinna, emwa ruẹn gha tobọ iran la igbinna, zẹ vbe evbu owiẹ vbirrivbirri avbe igbama ruẹn gha bu ruẹ gha die uhunmwu oke ne ọ huanrẹn ni.

Psalm 147:11

Sokpan iran ni ya ọghọ ne ẹẹn ọ re ọ ye ẹko rhiẹnrhiẹn ọẹn iran ni mu ẹtin van aho ẹmwẹ ọmwa rẹn ne ẹ i beghe.

Psalm 149:4

E Nọyaẹnmwa sẹ ọyẹnmwẹ ye ẹmwẹ emwa irẹn, ọ ye akhọnmiotọ ye ọghọ ne emwa irẹn ni mu egbe rriotọ.

Psalm 21:4

Ọ nọ arrọọ, u keghi rhie ne ẹẹn, arrọọ ne ọ tọ kevbe ne ọ kpẹe.

Psalm 22:30

Avbe orre ni dee hia, gha ga ẹe, emwa gha na iyẹn Nọyaẹnmwa, ma avbe orre ni dee.

Psalm 22:31

A gha tama emwa ne a ma he biẹ hia wẹẹ, “E Nọyaẹnmwa ọ re ọ miẹn emwa rẹn fan.”

Psalm 69:26

Iran keghi gha zẹ emwa ne uwẹ rri ọre oya kpokpo iran kegha na iyẹn emwa ne uwẹ kuanrẹn.

Psalm 72:17

Ai ghẹ mianmian eni ọba ẹdẹ te otiti ẹre gha tọ zẹvbe owẹn, te agbọn ẹvbo hia gha tian rẹn, te iran gha wẹ ne Osanobua fiangbe iran ne iran vbe gha gualọ ọyẹnmwẹ ne ọba.

Psalm 72:7

Te uyinmwẹ ẹmwata gha muan yọ vbe ẹghẹ ọre, te ẹfe gha kpee vbe otọ la ẹghẹ ne uki gha ba la.

Psalm 89:29

Uniẹn ni rri ọba ẹre gha mudia gbain zẹ vbe iso ovbi urho ẹre ọ re ọ gha rri ọba rhinrin ẹdẹ.

Psalm 89:36

Te a gha miẹn ivbi uniẹn ọnrẹn ẹdẹdẹmwẹdẹ. Mẹ gha vbe gha wan lẹga arriọba ẹre la ẹghẹ ne ovẹn gha vbe yunmwu la.

Aizaia 42:1

E Nọyaẹnmwa khare wẹẹ, “Ọnọna ọrọre ọguọmwadia mwẹ ne I rhie ẹtin ye ọre iwu, ọmwa ne imẹ zẹe, ne ẹko mwẹ vbe rhiẹnrhiẹn ghe. Mẹ ya orhiọn mwẹ vuọn irẹn nẹ, ọ gha rhie ohiẹn ẹmwata la dọmwadẹ uhunmwu ẹvbo.

Aizaia 46:10

Vbe omuhẹn, ọ re I na taa emwi ne ọ gha kiekie ẹre, vbe ẹghẹ ne ọ kpẹe fua, I taa emwi ne ọ gha sunu yotọ nẹ. I khare wẹ, emwi ne I mwamwaẹn ne I ru, te ọ gba te I ru emwi hia ni rrọ mwẹ ekhọe ne I ru.

Aizaia 49:4

Mẹ keghi kha wẹẹ, “I te winna, sokpan ọ ma dinnodẹ hiehiere. I wa lo ẹtin mwẹ, sokpan, a ma miẹn emwi ọkpa rhie ke ọe rre.” Sevba, mẹ ye mwẹ amuẹtinyan wẹ e Nọyaẹnmwa gha ta ene unu mwẹ ọ gha san mwẹ ẹse iwinna ne I winna ẹn.

Aizaia 53:12

Rhunmwuda ọnii, mẹ gha rhie ẹre ye ukpo uyi ọ ghi gha mwẹ ihe vbe uwu ẹbu iran ni kọnkọn ni mwẹ ẹtin. Ekhọe obọ ẹre ọ re ọ ya rhie ẹdagbọn rẹn yotọ ọ keghi ya egbe miẹn vbe emwi ne ọ rruan emwa dan. Ọ rhie ihe emwa orukhọ nibun. Ọ na na erhunmwu wẹ ne a yabọ iran.”

Aizaia 54:3

U gha vbẹẹ ehe ne otọe ruẹ lae vbe igienenẹ. Otọe nii gha dọlegbe sẹ emwa ruẹn obọ ighẹ ehe ne avbe emwa ọvbehe yinrin na. Avbe ore ẹvbo ne emwa na lẹkua nian gha khian ne emwa vuọn rẹn.

Aizaia 61:9

Iran gha hin usi vbe uwu avbe uhunmwu ẹvbo emwa ni rhirhi miẹn iran gha rẹn wẹ emwa ne imẹ fiangbe ọ re iran khin.”

Aizaia 66:22

“Zẹ vbene ẹrinmwi ọgbọn nii kevbe agbọn ọgbọn nii gha ye ekpa ẹtin mwẹ gha rrọọ, erriọ ọ re avbe ivbi uniẹn uwa kevbe eni uwa gha vbe gha rrọọ.

Aizaia 9:7

Te ẹtin arriọba ẹre ra gha muan yọ, ọfumwegbe ọ re otọe arriọba ẹre ra gha ye vbe ẹghẹ hia te irẹn ra rriọba zẹvbe ọmwa ne ọ rriọba lele Devid ne Ọba ẹmwata kevbe uhunmwu ẹmwẹ ọ re irẹn ra ya gha mwẹ ẹtin; ke ẹghẹ na kpao ya sẹ ufomwẹ agbọn. E Nọyaẹnmwa ne Oghodua tae nẹ ighe erriọ rẹn ra ru ehia.

Jerimaia 32:41

I gha wa ye ọyẹnmwẹ gha ru emwi esi ne iran. I ghi vbe gbe iran ẹkun sotọ ẹdẹdẹmwẹdẹ vbe otọe na.

Ezikiẹl 33:11

Vbene aro na dae na wẹ mẹ ne Nọyaẹnmwa ne Udazi ọrọre Osanobua ne ọ rrọọ, ẹko i rhiẹnrhiẹn mwẹ ye uwu ọmworukhọ. Emwi ne ọ yẹ mwẹ sẹẹ ọrọre ne iran dobọ orukhọ ne a ru yi ne iran diagbọnya. Izrẹl, dobọ orukhọ ne a ru yi. Vbọzẹ ne u na ho ne u wu yi?

Ezikiẹl 37:25

Iran gha yin otọe ne I mu ne Jekọb ne ọguọmwadia mwẹ, otọe ne avbe erha iran odede gha ye. Iran gha di evba ya ẹdẹdẹmwẹdẹ erriọ vbe nọ ne ivbi iran kevbe ivbi uniẹn iran hia. Ọba ne ọ ye vbe Devid ne ọguọmwadia mwẹ gha khaemwisẹ yan iran ẹdẹdẹmwẹdẹ.

Daniẹl 9:24

“Ukpo ekigbesiyenẹ vbe ihe ihinrọn ọ re Osanobua bu yọ ne ọ gha na do fannọ emwa ruẹn kevbe ẹvbo ruẹ nọhuanrẹn hin obọ orukhọ kevbe ọkhọ rre. A gha ya orukhọ bọ emwa, a ghi mu ẹmwata etẹbitẹ gbọọ, ẹghẹ nii umian nii, kevbe ẹmwẹ akhasẹ nii ghi do sẹ, a ghi do do ugie ya dọlegbe rhie Ọgua Osa ye ihe.

Maika 7:18

Ẹbọ ọkpa ne ọ yevbe ruẹ i rrọọ Nọyaẹnmwa, wẹ ya orukhọ bọ avbe emwa ruẹn ni miẹn uhunmwu. U ma gie ohu wa mu uẹn ẹdẹdẹmwẹdẹ, sokpan, te ọ wa yẹ ruẹ ne u gha rhie itohan ruẹn ne ẹ i beghe ma mwa.

Zẹfanaia 3:17

E Nọyaẹnmwa ne Osanobua mwẹ rrọ yaba ruẹ, ẹtin ẹnrẹn ọ re ọ rhie akhọnmiotọ nuẹn. Ẹko ruẹ gha rhiẹnrhiẹn e Nọyaẹnmwa kevbe uwu aho ẹmwẹ ọmwa ẹnrẹn, ọ gha rhie arrọ agbọn ne uẹn. Ọ gha so ihuan, ọyẹnmwẹ ruẹn ghi vbe gha sẹ ọe.

Zẹkaraia 13:7

E Nọyaẹnmwa ne Oghodua khare wẹẹ, “Umozo, rhiọrre, ne u dekun ọsuohuan ne ọ winna mẹ. Gbe ẹe rua, ne u gie avbe ohuan zagha kua, mẹ gha dekun avbe emwa mwẹ,

Matiu 17:5

Vbene ọ wa guan ni, okuku ne ọ fi wain wain keghi rhu gue iran, urhu ọkpa keghi ke uwu okuku nii guan ladian wẹẹ, “Ọna ọre ovbi mwẹ ne I ho ẹmwẹ ọnrẹn kevbe ne ọ ghan, wa danmwehọ ẹre.”

Matiu 3:17

Urhu ọkpa keghi ke ẹrinmwi rre wẹẹ, “Ọna ọre ovbi mwẹ ni ho ẹmwẹ ọnrẹn, ọmwa ne ekhọe mwẹ rhiẹnrhiẹn ghe ẹsẹsẹmwẹse.”

Iyẹn ne ọ Maan Ọghe Luk 1:33

Rẹn gha rriọba yan ivbi e Jekọb ẹdẹdẹmwẹdẹ, arriọba ẹre ẹ i ra mwẹ ufomwẹ.”

Iyẹn ne ọ Maan Ọghe Jọn 1:29

Ẹdẹ ghi gbe, Jọn keghi miẹn Jesu vbe ọ bu irẹn dee, ọ na kha wẹẹ, “Wa ghe oteghe ohuan Osanobua ne ọ viọ orukhọ agbọn gha rrie!

Iyẹn ne ọ Maan Ọghe Jọn 12:24

Ẹmwata I tama uwa, ikpe ọka ọkpa ma gberra ikpẹ ọka ọkpa a deghẹ i re te ọ de fi otọ ne ọ wu, a deghẹ ọ wu, ẹghẹ nii ọ ghi mọ ọmọ ni bun ẹsẹse.

Iyẹn ne ọ Maan Ọghe Jọn 13:32

A deghẹ a ghi la egbe ẹre rhie uyi Osanobua maa, Osanobua gha vbe tobọ ẹre rhie uyi Ovbi Ọmwa maa, ọ gha wa vbe ruẹe ọwarọkpa.

Ebe ne Pọl gbẹẹn gie emwa Rom 6:9

Rhunmwuda ma rẹnrẹn ighẹ a huẹn Jesu kpao vbe idin rre nẹ, ẹ ghi wu ọvbehe, uwu i ghi mwẹ ẹtin vbe uhunmwu ẹnrẹn ọvbehe.

Ebe ne Pọl gbẹẹn gie emwa Rom 8:32

Ọ ma rhie ovbi ẹre fi ghe iyeke sokpan, ọ keghi ya ẹe fi ohan ne ima hia, ọ rhie ovbi ẹre ne ima, u ma rẹn ghẹ te ọ gha ghi ya emwi hia ru ima ẹse!

Ebe ne Pọl gbẹẹn gie emwa Rom 8:8

Iran ni ru vbene egbe iran zẹ vbene a yi ẹe ho, iran i sẹtin ru emwi ne ọ yẹ Osanobua.

II Kọrinti 5:21

Kristi ma gha mwẹ orukhọ, sokpan Osanobua keghi ghae nẹ vbe orukhọ ima, ne a miẹn ehe na miẹn wẹ, ma gha ye egbe ba irẹn nẹ, ma ghi vbe ghae vbe ọmwa ẹmwata ne Osanobua khin.

Galatia 3:13

Sokpan, rhunmwuda ne Kristi na rhunmwuda mwa khian ne a fi ẹre unu, ọ keghi fannọ ima kua vbe obọ ifi unu ne ọ ke obọ nene Uhi rre. Zẹ vbene ebe kha re, “Ọmwaikọmwa ne a sirrọ ye uhunmwu erhan, khian ne a fi ẹre unu.”

Ẹfisọs 1:5

Osanobua tae nẹ wẹ vbe ekpa Jesu Kristi, rẹn gha silo ima rrie egbe ne ima do gha re ivbi ẹre, vbene ọ yẹ ọre, kevbe vbene ọ mwamwa ẹn ọre ọna khin.

Ẹfisọs 1:9

Osanobua keghi wa ru zẹ vbe ne ọ ye ekhọe mwamwa ẹn, ọ keghi gie ima rẹn emwamwa ne irẹn mwamwa ẹn vbe ẹkhokho, ne ọ wẹ rẹn gha la ekpa Kristi ya khian ne a ru gba.

Ẹfisọs 5:2

Wa gie aho ẹmwẹ ọmwa gha kha yan ẹdẹ agbọn uwa, zẹ vbene Kristi ho ẹmwẹ mwa, ne ọ na ya ẹdẹ agbọn rẹn fi ohan ne ima, zẹ vbe emwi imuohan kevbe emwi izọ ese ne ọ winhin, ne ọ yẹ Osanobua.

II Tẹsalonaika 1:11

Ọna ọ si ẹe ne ima na na erhunmwu ne uwa vbe ẹghẹ hia. Ma ghi rinmwian wẹ ne Nọyaẹnmwa gie uwa gha re emwa ni ke ye uyinmwẹ ne ọ tie uwa yi, ne uwa do gha yin. Te irẹn gha ye ẹtin ẹnrẹn mu emwi ne uwa ho hia ni maa sẹ, ne ọ ru ẹe fo ighẹ iwinna iyayi uwa.

Hibru 2:13

Ọ keghi vbe ta ẹe wẹ, “I gha mu ẹtin mwẹ yan Osanobua” ọ keghi ye vbe ta ẹe wẹẹ, “Ghe mwẹ ghe emọ ne Osanobua hẹ mẹ.”

Hibru 7:27

Rẹn i yevbe avbe igie ohẹn nekpa, ẹ i vbe ka zọ ese ye orukhọ obọ ẹre nẹ ẹdẹgbegbe, zẹ vbe emwi ne ẹ i mwẹ a ma ru, ọ keghi do zọ ye ọghe emwa nekpa. Ọ zẹ ese nẹ uhukpa nii, ne emwa hia, vbe ẹghẹ ne ọ na ye egbe ẹre zọ ese.

Hibru 9:14

Ugbẹn vbe a ghi miẹn wẹ ẹmwata ọna khin, Inuinu ọre ne esagiẹn Kristi gha ru ya kpọlọ sẹẹ! Ọ la ekpa Orhiọn etẹbitẹ nii ya egbe ẹre zọ ese ne ọ gbae ghe Osanobua. Esagiẹn ọnrẹn ọre ọ gha khuẹ ekhọe orhiọn mwa huan hin obọ iwinna ọrhiae rre, ne ima miẹn ehe na gha ga Osanobua ne ọ rrọọ.

I Pita 2:24

Kristi tobọ ẹre, ọre ọ ye egbe miẹn orukhọ mwa, ọ keghi ye egbe ẹre muẹn gha rrie ugbugbe, ne ima miẹn ehe na wulo hin orukhọ rre, ne a miẹn ehe na gha yin uyinmwẹ ẹmwata. Ẹwẹn ọghọe, ọre a ya mu uwa egbe rran.

Arhie Maan 1:18

Mẹ ọrọre ọmwa ne ọ rre agbọn, I te ka wu yi, sokpan banbanna nian, I rre agbọn ẹdẹ kevbe ẹdẹdẹmwẹdẹ.” I mwẹ asẹ vbe uhunmwu uwu tobọ ẹre kevbe ẹvbo iran ne orinmwi.