Aizaia 50:2 - Edo Bible (E Baibol Ẹdo) Version 1996

² “Vbọzẹ ne avbe emwa mwẹ ma na zẹ yọ yi vbe I yo ya miẹn iran fan? Vbọzẹ ne iran ma na khuẹnniẹn vbe I tie iran? Mẹ ma wegbe sẹ ne ọ gha miẹn iran fan ra? Mẹ gha sẹtin ye ẹmwẹ unu mwẹ si okun ka I ghi Vbe ye avbe ẹzẹ khian ato sẹrriọ wẹ avbe ehẹn ni rrọọ ghi wulo rhunmwuda iran ma miẹn amẹ.

Aizaia 50:2 ပူးပေါင်းရင်းမြစ်များ

Gẹnẹsis 18:14

Emwi ọkpa rrọ ne ọ lọghọ ne Nọyaẹnmwa ra? Vbe ẹghẹ ne ọ ke yi, vbe uki ihinrin ne ọ dee, I gha dọlegbe bu ruẹ rre, e Sera gha biẹ ọmọ okpia.”

II Krọnikol 32:15

Wa ghẹ gie Hẹzekaia rẹrẹ uwa ra ne ọ bibi uwa odẹ vberriọ. Wa ghẹ yae yi. A ma he miẹn ẹbọ ne ọ he sẹtin miẹn ivbi ẹre fan vbe obọ Ọgbaisi Asiria ẹdẹ. Erriọ wa vbe ye, ẹbọ uwa i sẹtin miẹn uwa fan!”

Psalm 106:9

Ọ gu Okun ne Nọbaa guan, ọ keghi ka sẹ otọ; ọ keghi viọ emwa nii fian ẹẹn rra vbe otọe ne ọ kae.

Psalm 107:33

Nọyaẹnmwa si avbe ẹzẹ ka fẹfẹẹfẹ, ọ keghi dobọ avbe uhunmwu ẹzẹ ni lẹ obọ yi.

Ẹksọdọs 14:21

E Mosis keghi niẹn obọ ẹre da okun, e Nọyaẹnmwa keghi ya ẹhoho ọlarre ovẹn ne ọ wu vbe egbe bi okun werriegbe, ọ keghi hoho la asọn nii hia, ọ keghi ya okun nii khian otọ nọkae. Amẹ keghi fian egbe ye ihe eva.

Ẹksọdọs 14:29

Sokpan ivbi Izrẹl keghi ya owẹ fian okun ne ọ ka ẹe rra vbene amẹ na yevbe egbekẹn ye iran obọ eveva.

Ẹksọdọs 7:18

Avbe ehẹn ghi wulo, ẹzẹ na gha vbe gha wia sẹrriọ wẹ ivbi Igipt i ghi ra sẹtin wọn amẹ ọnrẹn.’ ”

Ẹksọdọs 7:21

Avbe ehẹn ni rre ẹzẹ keghi wulo, ọ keghi gha wia sẹ vberriọ ne amẹ ọnrẹn ma na gie ivbi Igipt wọn. Esagiẹn keghi gba Igipt hia.

Itan 1:24

Ọ kpẹre ne I kegha tie uwa, I na wẹ ne uwa gha dee, sokpan wa ma danmwehọ. Wa ma zẹ yọmwẹ ẹre.

Aizaia 11:15

E Nọyaẹnmwa gha ka e Suẹz muotọ, ọ ghi ya ẹhoho ne ọ mwẹ ọghae ka Ẹzẹ Yufretes muotọ ọ ghi sẹ ivbiẹzẹ tẹghẹtẹghẹ kẹkan rae sẹrriọ wẹ ọmwaikọmwa sẹtin ye owẹ fian ẹn rra.

Aizaia 19:5

Ẹzẹ e Naẹl gha si, avbe ẹzẹ gha hẹko ka.

Aizaia 23:11

E Nọyaẹnmwa niẹn obọ rra okun, ọ keghi munọ avbe arriọba gbotọ. Ọ keghi vbe wẹ ne a guọghọ avbe ehe ne emwa e Fonisia na do ẹki sotọ.

Aizaia 36:20

A he miẹn ẹghẹ ne ọkpa vbe uwu emwi ne avbe uhunmwu ẹvbo na gho he ya miẹn iran fan vbe obọ ọgbaisi ima ra? De emwi ne ọ ghi ya uwa gha ro ighẹ e Nọyaẹnmwa gha miẹn e Jerusalẹm fan?”

Aizaia 41:28

Ugbẹn vbe I tọn aro mu ghe avbe ẹbọ, ọkpa vbe uwu iran ne ọ miẹn ẹmwẹ ta i rrọọ; ọkpa vbe uwu iran ne ọ sẹtin rhie ewanniẹn ye ọta ne I nọrẹn i rrọ.

Aizaia 42:15

I gha dunmwu oke negiẹrẹ kevbe nekhua I gha kaka irunmwu kevbe avbe erhan hia a I gha ya iya avbe ẹzẹ khian ato, I ghi si avbe odighi amẹ ka.

Aizaia 43:16

Ẹghẹ ne ọ kpee fua, e Nọyaẹnmwa keghi zẹẹ odẹ fian okun rraa ovbi odẹ la uwu amẹ ne ọ khọn yo Khọn rre.

Aizaia 44:27

I ya ukpẹmwẹ ọkpa ne I tae sii okun ka.

Aizaia 51:10

Wẹ ọ re ọ vbe sii okun ka u na zẹẹ odẹ la uwu amẹ gberra, ne avbe iran ne uwẹ gha miẹnfan sẹtin fiaẹn rra.

Aizaia 54:6

Izrẹl te u ye vbe okhuo ọvbokhan ne ọdọ lẹẹ sẹ rae ekhọe ẹre na rhiaa ẹsẹse. Sokpan, e Nọyaẹnmwa dọlegbe tie ruẹ rriegbe ọ na kha wẹẹ,

Aizaia 59:1

Wa ghẹ gha ro wẹ e Nọyaẹnmwa ma wegbe sẹ ne ọ gha miẹn uwa fan, ra wẹ ọ yin ehọ ẹ i sẹtin họn ugomwẹ ne uwa go gualọ iyobọ.

Aizaia 59:16

Ọ yan irẹn unu uan wẹ a i miẹn ne ọ yi ọmwa ne a wọ ẹre uhunmwu obọ. Rhunmwuda ọnii, ọ gha lo ẹtin ọghọe ne ọ ya miẹn iran fan kevbe ne ọ khọn miotọ.

Aizaia 64:6

Te ima hia wa vuọn ne orukhọ, uhin ighẹ uyinmwẹ ne ọ ghi maa sẹẹ, iku kevbe ẹkẹkhẹrhẹ nọ. Rhunmwuda orukhọ mwa, te ima ghi yevbe ebe ne ọ kakae ne ẹhoho hohoo kua.

Aizaia 65:12

Vbene uwa hi hẹ nọ wẹ ne uwa wulo uwu ekpain ekpain, rhunmwuda, wa ma khuẹnniẹn vbe I tie uwa, wa ma danmwehọ vbe I guan. Wa na wẹ te uwa ra he uhunmwu yọmwẹ obọ ne uwa gha ru emwi dan.

Aizaia 66:4

Rhunmwuda ọnii, I gha gie ọkhọ rruan iran, emwi nii ne ohan rẹn wa mu iran, rhunmwuda, ẹghẹ ne I na gha tie iran, a ma miẹn ne ọ khuẹnniẹn, ẹghẹ ne I na gha guan, a ma miẹn ne ọ danmwehọ mwẹ. Iran na wẹ te iran gha hẹ uhunmwu yọmwẹ obọ, ne iran gha ru emwi dan.”

Jerimaia 14:9

Vbọzẹ ne u na ye vbe ọmwa ne emwi yan ẹre unu uan, zẹ vbe ovbiyokuo ne ẹ i mwẹ ẹtin ne ọ gha ya ru iyobọ? Vbe ẹmwata, wẹ rrọọ yaba mwa, Nọyaẹnmwa emwa ruẹn ma khin, ghẹ he mwa yotọ.

Jerimaia 35:14

Ivbi e Jonadab wa ru vbene ọ tama iran ne iran wẹ ghẹ da ayọn, ye do sẹ ẹdẹ nẹrẹ na, ne ọ da i rre uwu iran. Sokpan, vbe ne I yan gu uwa guaan sẹ, wa ma họn ẹmwẹ mẹ.

Jerimaia 35:15

I gie avbe eguọmwadia mwẹ i ghe avbe akhasẹ gie uwa, iran vbe tama uwa ne uwa mu emwi dan ne uwa ru fua ne uwa gha ru emwi ne ọ gbae, iran tama uwa ne uwa ghẹghi ga avbe ẹbọ ọvbehe, ne uwa miẹn ehe na gha yin otọe nii ne I mu ne uwa kevbe avbe erha uwa odede. Sokpan, wa ma danmwehọ mwẹ a ma wẹ te uwa ghi ra zẹ yọ mwẹ re.

Jerimaia 5:1

Wa ne ivbi e Jerusalẹm, wa rhulẹ la idunmwu ẹvbo uwa, wa ghe lẹga. Wa ya aro uwa tobọ uwa miẹn ọẹn, wa gualọ uwu ẹki, wa gha miẹn orhiọnkpa ne ọ ru emwi ẹse ra, ra ne ọ vbe hia ne ọ gha re ne ọ gie Osa mu ẹtin yan? Adeghẹ wa gha miẹn vbọ, e Nọyaẹnmwa gha yabọ Jerusalẹm.

Jerimaia 7:13

Wa ru avbe orukhọ na hia ne, a gha rhe miẹn wẹ te I gha gu uwa guan kugba kẹghẹrẹ, wa ma danmwehọ. I tie uwa wa ma khuẹnniẹn.

Jerimaia 7:27

“Rhunmwudọnii nian Jerimaia, u ghi ta avbe ẹmwẹ na ma avbe emwa mwẹ, sokpan, iran i ra danmwehọ ruẹ. u gha tie iran sokpan, iran i ra khuẹnniẹn.

Jerimaia 8:6

I wa gbe ehọ kotọ gha danmwehọ, sokpan wa ma ta ẹmwata. A ma miẹn ọkpa ne ọ vbe khiẹ ye ẹmwẹ emwi dan ne ọ ru. A ma miẹn ọkpa ne ọ, vbe nọ wẹẹ, ‘De emwi ne I baku ru?’ Dọmwadẹ ọghọe wa rhie uhunmwu da odẹ ọre zẹ vbe ẹsin ne ọ khọn rrie okuo.

Daniẹl 3:15

Banbanna nian, wa gha ghi wa họn urhu avbe okpe, ẹgogo, ighẹnghan, akpata, kevbe avbe emwi ne a kpee ọvbehe, wa ghughẹrre ne u wa ya uhunmwu rhanmwẹ otọ ne amazẹ nii. Adeghẹ wa ma ru vberriọ, a gha wa viọ uwa ku uwu erhẹn ọwarọkpa nii, wa yayi we ẹbọ ọkpa rrọ ne ọ gha sẹtin miẹn uwa fan ra?”

Daniẹl 3:29

“Banbanna nian, I tae wẹ adeghẹ a miẹn ovbi uhunmwu ẹvbo ọkpa ra emwa, ra ẹvbo ne a zẹ ne ọ ya ukpẹ sakan Osanobua e Siedrak, Mesiak, kevbe Abẹdnigo, te a ra yanghan ẹre obọ vbe owẹ hin egbe ẹre rre, a ghi ya owa ẹre khian otiku. Osanobua ọvbehe i rrọ ne ọ sẹtin miẹn ọmwa fan vbenian.”

Daniẹl 6:20

Ọ ghi sẹ evba nii, ọ keghi ye udu ne ọ ha ọka da tu wẹẹ, “E Daniẹl ọguọmwadia Osanobua ne ọ rrọọ. Osanobua nii ne u ya ekhọe hia gha sẹtin miẹn ruẹn fan vbe obọ avbe oduma ra?”

Daniẹl 6:27

Ọ miẹn ọmwa fan, ọ vbe fan ọmwa ye otọ ọ ru emwi vbe ẹrinmwi kevbe agbọn. Ọ miẹn Daniẹl fan ọ ma gie avbe oduma gbe ẹe re.”

Hozia 11:2

Sokpan vbene I ya gha tie ẹre, erriọ ọ re ọ ya gha lẹ mẹ. Emwa mwẹ zọ ese ne Baal, iran giẹn eturari ne amazẹ.

Hozia 11:7

Iran wa mu aro ye ẹmwẹ ne iran gha rhie aro lẹ mẹ. Iran gha viẹ ba ẹmwẹ urọnghọn ne ọ rre iran urhu, sokpan, iran i ra miẹn ọmwa ne ọ gha rhan ẹnrẹn hin iran urhu rre.

Nahum 1:4

Ọ gu okun guan ọ keghi ka mu otọ! Ọ ru ẹe ne avbe ẹzẹ ka mu otọ. Oha ni rre Basan luẹluẹe. Te Oke Kamẹl ghi ba rriẹrriẹ, obobo ni rre Lebanọn fafaa.

Habakọk 3:8

Avbe ẹzẹ ọ re ọ ya ohu mu ẹẹn ra Nọyaẹnmwa? Avbe okun ọ re ọ gie ohu kakabọ mu ẹẹn ra? Uhunmwu okuku amẹ ọ re uwẹ hin la khian; okuku amẹ okpẹhoho ọrọre ikẹkẹ okuo ruẹ, u keghi rhie akhọnmiotọ gie emwa ruẹn.

Nọmbas 11:23

E Nọyaẹnmwa keghi wanniẹn, “A miẹn emwi ne ime isẹtin ru ra? U gha miẹn wan a deghẹ ẹmwẹ ni tae gha sunu ra ẹ i ra sunu.”

Iyẹn ne ọ Maan Ọghe Mak 4:39

Jesu keghi guakpao, ọ tama ẹhoho wẹẹ, “Dobọ owogho yi!” Ọ keghi vbe tama ogbigbi amẹ wẹẹ, “Hunwan hi i i!” Ẹhoho keghi wa dọyọ, ehe hia keghi ye hi i i.

Iyẹn ne ọ Maan Ọghe Jọn 1:11

Rẹn kegha die ẹvbo irẹn tobọ ẹre, sokpan avbe emwa rẹn ma rhan obọ miẹn rẹn.

Iyẹn ne ọ Maan Ọghe Jọn 3:19

Vbene ibuohiẹn ni ya de ọre ọ na khin wẹẹ: Uwanmwẹ rrie agbọn, sokpan emwa ne agbọn keghi ho ẹmwẹ ebiebi sẹ uwanmwẹ rhunmwuda ọkhọ ne iran ru.

Jọsua 3:16

Amẹ keghi dobọ ulẹmwẹ yi, ọ na hin utete gha rrie odẹ uhunmwu ẹzẹ gban an vbe Adam ne ẹvbo ne ọ rre ọkpẹn Zarẹtan, ulẹmwẹ ẹzẹ ghe ototọ ne ọ rrie Okun Nọwu ke wa gha re ne a yan fua, emwa keghi fian ẹn rra vbe ọkpẹn Jẹriko.