Aizaia 50:10 - Edo Bible (E Baibol Ẹdo) Version 1996

¹⁰ Wa hia ni ya ọghọ ne Nọyaẹnmwa ni vbe ya ẹmwẹ avbe eguọmwadia ẹre ru emwi, odẹ ne uwa la khian sẹtin wa gele so ebiebi sokpan wa ya egbe yan e Nọyaẹnmwa, wa mu ẹtin uwa yan Osanobua uwa.

Aizaia 50:10 ပူးပေါင်းရင်းမြစ်များ

II Samuẹl 22:29

Nọyaẹnmwa, wẹ ọrọre uwanmwẹ mwẹ, u zagha ebiebi mwẹ kua.

I Krọnikol 5:20

Osanobua ọ re iran mu ẹtin iran yan, iran kevbe gha na erhunmwu ghe ẹre ne ọ yi iran obọ. Osanobua keghi họn erhunmwu iran, ọ na gie iran khọn miotọ emwa Hagrit kevbe irogho iran hia.

II Krọnikol 20:12

We ọrọre Osanobua mwa! Rri iran oya, rhunmwuda, ma i miẹn emwi ọkpa ru vbe ehe ne ivbiyokuo ni bun sẹ nian na, ni gu ima khọn ye, ma ma rẹn emwi ne ima gha ru, sokpan, aro ruẹ ma ghi ghe ne iyobọ.”

II Krọnikol 20:20

Owiẹ vbirrivbirri vbe ẹdẹ ne ọ lelẹe, emwa nii hia kegha rrie uwu ẹgbo ne ọ rre ọkpẹn Tẹkoa. Iran ghi ra wa ladian gha khian, e Jehosiafat keghi tama iran wẹẹ, “Ivbi e Juda kevbe Jerusalẹm, wa mu ẹtin yan e Nọyaẹnmwa ne Osanobua uwa, wa ghi vbe mudia gbain. Wa ya avbe ẹmwẹ ne akhasẹ ẹre tama uwa yi, ọ gha vbe dinnodẹ ne uwa.”

Job 13:15

Idaehọ mwẹ fo nẹ, rhunmwuda ọnii, ẹ i ghi mwẹ asa a deghẹ Osanobua gbe mwẹ uan. I gha gui ene unumwẹ ma rẹn.

Job 29:3

Ẹghẹ nii, te Osanobua wa gha gun mwẹ rrọ vbe ẹghẹ hia. Ọ na gha rhie uwanmwẹ mẹ vbe I a gha khian vbe ebiebi.

Psalm 111:10

A rhie ọghọ ne Nọyaẹnmwa ọ re ọ ye ọmwa wan. Ọ rhie irẹnmwi ẹmwata ne iran ni rhie uhi ẹre mwẹ, te a ra gha rho ẹre rhinrin ẹdẹ.

Psalm 128:1

Afiangbe ọrọre ọghe iran ni ye ọghọ ne Nọyaẹnmwa, iran ni lele iyi ẹre ru emwi.

Psalm 145:21

Mẹ gha rho e Nọyaẹnmwa vbe ẹghẹ hia, wa gie emwi ne ayi hia rho eni ẹnrẹn ne ọ huanrẹn ẹdẹdẹmwẹdẹ.

Psalm 23:4

Vbe ẹmwata, mẹ gha rhe gha khian vbe adesẹ uguowẹ, ọghe aghọnghọn uwu, ohan ọkhọ rhọkpa i ra mu mwẹ Nọyaẹnmwa, rhunmwuda, wẹ deba mwẹ. Orhokhua ruẹ kevbe ọkpọ ruẹ ehia tan obọ gue mwẹ.

Psalm 25:12

Iran ni họn ẹmwẹ ne Nọyaẹnmwa, gha ruẹ emwi vbe ehe ne ọ ye odẹ ne ọ kere ne iran lele.

Psalm 25:14

Ọse iran ni họn ẹmwẹ ne ẹẹn, ọ re Nọyaẹnmwa khin. Ọ ghi gha so igie ye ile ne ọ gu iran ta.

Psalm 28:7

E Nọyaẹnmwa degue mwẹ, ọ vbe gbinna mẹ I mu ẹtin yan rẹn. Ọ yọmwẹ obọ, ọ keghi ya ọyẹnmwẹ sẹ mwẹ, I gha so ihuan oghọghọ rho ẹre.

Psalm 42:11

Vbọzẹ yi, ne ekhọe mwẹ na rhia vbenian vbọzẹ ne orhiọn mwẹ ma na sotọ I gha hẹnhẹn idaehọ mwẹ yan Osanobua I gha vbe dọlegbe rho ẹre, ọmiọnmwafan mwẹ kevbe Osanobua mwẹ.

Psalm 62:8

Wa ne emwa mwẹ, wa mu ẹtin yan Osanobua vbe ẹghẹ hia, wa ta enegbe uwa hia ma rẹn, rhunmwuda rẹn ọrọre ugue ne ima.

Asan-Ibo 12:13

Vbe iyeke avbe enena hia, ẹmwẹ okpa kẹkan ọ re ọ ghi kẹe ne a gha ta wẹ. Gha yọghọ ne Osanobua, ne u vbe gha ya uhi ẹre ru emwi, rhunmwuda emwi ne a yi ọmwa ba ọ re ọnii khin.

Aizaia 10:20

Ẹghẹ dee, ne a gha na miẹn wẹ iran ni miẹn uhunmwu vbe ivbi Izrẹl i ghi ra gha mu ẹtin yan avbe uhunmwu ẹvbo ni te ra wa fuẹn iran an fẹẹrẹ. Iran gha mu ẹtin yan e Nọyaẹnmwa ne ọ re Osanobua nọhuanrẹn ọghe ivbi Izrẹl, vbe ẹmwata.

Aizaia 12:2

Osanobua ọrọre ọmiọnmwafan mwẹ I gha mu ẹtin yan rẹn, I i ghi vbe fian afianma. E Nọyaẹnmwa rhie ẹtin kevbe iwegbe mẹ rẹn ọrọre ọmiọnmwafan mwẹ.

Aizaia 26:9

Vbe asọn, I ya ekhọe gualọ uwẹ khian; wẹ gha bu ohiẹn agbọn kevbe emwa ni rrọọ iran gha rẹn emwi ne a ya ohiẹn ẹmwata kha.

Aizaia 42:1

E Nọyaẹnmwa khare wẹẹ, “Ọnọna ọrọre ọguọmwadia mwẹ ne I rhie ẹtin ye ọre iwu, ọmwa ne imẹ zẹe, ne ẹko mwẹ vbe rhiẹnrhiẹn ghe. Mẹ ya orhiọn mwẹ vuọn irẹn nẹ, ọ gha rhie ohiẹn ẹmwata la dọmwadẹ uhunmwu ẹvbo.

Aizaia 50:4

E Nọyaẹnmwa ne Udazi tama mwẹ ẹmwẹ ne I gha ta nẹ, ne I miẹn ehe na rhie ẹtin ne ne egbe wọre. Owiẹ owiẹ ọ re ọ ya gie ẹe gha bọbọmwẹ egbe ne I họn ẹmwẹ ne ọ gha ma mwẹ re.

Aizaia 53:11

Ọ gha ghi rrii oya nẹ vbe ẹdẹ agbọn rẹn, ọ gha vbe dọlegbe miẹn ọyẹnmwẹ ọ gha rẹn wẹ rẹn ma rrioya kua kẹkan. ọguọmwadia mwẹ ne ekhọe esi ne ẹko mwẹ rhiẹnrhiẹn ghe. Gha ye egbe miẹn oya emwa nibun, rhunmwuda ẹre, mẹ gha yabọ iran.

Aizaia 59:9

Emwa nii khare wẹẹ, “Banbanna nian, ma rẹn emwi ne ọ sii ẹe ne Nọyaẹnmwa ma na miẹn ima fan vbe obọ emwa ni wọ ima uhunmwu. Ma rhie aro ye uwanmwẹ ne ima gha na gha khian, sokpan, ebiebi ọkpa ọ re ọ rrọọ,

Aizaia 8:17

E Nọyaẹnmwa rhie egbe ẹre lẹre ne emwa rẹn nẹ, sokpan, mẹ mu ẹtin yan rẹn, I vbe mwẹ idaehọ vbe uwu irẹn.

Aizaia 9:2

Iran ni te ka khian vbe uwu ebiebi miẹn uwanmwẹ nọkhua otọe aghọnghọn ọ re iran te ye usin banbanna nian, uwanmwẹ wan yan iran.

Eve Orriara 3:2

Ọ suaa mwẹ la uwu ebiebi, ọ keghi dọlegbe suaa mwẹ la uwu ẹre.

Daniẹl 3:28

Ọba keghi kha wẹẹ, “Wa rho Osanobua e Siedrak, Mesiak kevbe Abẹdnigo! Ọ gie odibo ẹre gha dee ne ọ do miẹn iran ni gae kevbe ni muẹtinyan rẹn na fan. Iran fieghe uhunmwu ye iyi ne imẹ yi, iran keghi mu egbe ne iran gha ya wu, sẹẹ ne iran ghughẹrre ya uhunmwu rhanmwẹ otọ ne ẹbọ ọvbehe gberra Osanobua iran.

Nahum 1:7

E Nọyaẹnmwa wa maa ọ degue avbe emwa rẹn vbe ẹghẹ ibaro; ọ gbe aro ghe iran ni lẹ bu ẹre rre.

Zẹfanaia 3:12

I gha sẹ avbe ọmẹhẹ ni mu egberriotọ rae ye evba, iran na ọ re ọ gha do gha nọ iyobọ vbe obọ mwẹ.

Hagai 1:12

Ẹre Zerubabẹl kevbe Jọsua kevbe avbe emwa hia ni ke iwe vbe Babilọn rre, na ru zẹ vbene Nọyaẹnmwa ne Osanobua iran tama iran. Ohan mu iran, iran keghi gha họn ẹmwẹ ne Hagai ne akhasẹ ne odibo e Nọyaẹnmwa.

Malakai 3:16

Ẹkpo nii, ọre iran ni muohan e Nọyaẹnmwa na gu egbe guan, e Nọyaẹnmwa keghi danmwehọ, ọ họn ẹmwẹ ne iran tae. A keghi sirra irẹn gbẹnnẹ ebe iran ye otọ ighe iran ni muohan e Nọyaẹnmwa, ne iran vbe ya ọghọ ne ẹẹn.

Iyẹn ne ọ Maan Ọghe Jọn 12:46

Te imẹ rrie agbọn zẹ vbe uwanmwẹ, ne ọmwaikọmwa ne ọ ya mwẹ yi ghẹ gha rre ebiebi.

Iyẹn ne ọ Maan Ọghe Jọn 8:12

Jesu keghi dọlegbe gu avbe emwa guan wẹẹ, “Mẹ ọrọre uwanmwẹ agbọn, Ọmwaikọmwa ne ọ lele mwẹ, ọ gha mwẹ uwanmwẹ ẹfe, ẹ i ra vbe khian vbe ebiebi.”

Ẹfisọs 5:8

Wa tobọ uwa te ka vbe gha rre uwu ebiebi yi, sokpan, banbanna nian, ne uwa ghi na khian emwa ọghe Nọyaẹnmwa nẹ, uwu uwanmwẹ ọre uwa ghi ye.

Hibru 5:9

Ugbẹn vbe a ghi ya ẹe khian enọgbae na nẹ, rẹn keghi do khian ehe ne imiẹnfan etẹbitẹ ke rre ne iran hia ni họn ẹmwẹ nẹẹn.

I Pita 5:7

Ye enegbe ruẹ hia yan rẹn, rhunmwuda, rẹn ọre ọ gbe aro ghe ruẹ.

I Samuẹl 30:6

Uwu ọlọghọmwa nọkhua ọre Devid ghi ye rhunmwuda ẹko ma maa rẹn hiehie rhunmwuda ivbi iran ne iran ma ghi miẹn, iran na gha yan ighẹ iran ra filo okuta gbe ẹe rua, sokpan, e Nọyaẹnmwa ne Osanobua ẹre keghi rhie igiẹudu ne ẹẹn.