Aizaia 5:7 - Edo Bible (E Baibol Ẹdo) Version 1996

⁷ Izrẹl ọrọre ogba azara ọghe Nọyan ne Oghodua; emwa e Juda ọrọre azara ne ọ kọ yọ. Rẹn te rhie aro yọ ne iran gha ru emwi ne ọ maa, sokpan, iran kegha do izigha. Rẹn te rhie aro yọ ne iran gha ru emwi ne ọ gbae, sokpan, emwa ne obọ iran vbare kegha tu wẹ ne a bu ohiẹn ẹmwata.

Aizaia 5:7 ပူးပေါင်းရင်းမြစ်များ

Gẹnẹsis 4:10

E Nọyaẹnmwa ke kha wẹẹ, “Vbọzẹ ne u na ru emwi ne ọ muohan na yi? Esagiẹn ọtuẹn wa tu ma mwẹ ke uwe otọ gha dee zẹ vbe urhu ne ọ ho ne a rria ikhi.

II Samuẹl 7:10

I gha hannọ ihe ọkpa ne Izrẹl ne emwa mwẹ, I ghi gbe iran ẹkun sotọ vbe evba, ehe ne iran gha ye, ne a i ghi ra na kpokpo iran ọvbehe. Ke ne iran ya sẹ otọ na gha dee, emwa dan ne piankhanrhan ni bun ọ re ọ he gu iran gbinna, sokpan, ọna i ghi ra dọlegbe sunu ọvbehe. I yan rẹn i ghẹ I gha degue ruẹ hin obọ eghian uwa hia rre, kevbe wẹ, u gha mwẹ uniẹn ruẹn.

Job 34:28

Iran ghi ru ovbiogue ne iran ya tu nọ Osanobua iyobọ, rẹn keghi họn utumwẹ iyobọ, ne iran tu tie ẹre.

Psalm 147:11

Sokpan iran ni ya ọghọ ne ẹẹn ọ re ọ ye ẹko rhiẹnrhiẹn ọẹn iran ni mu ẹtin van aho ẹmwẹ ọmwa rẹn ne ẹ i beghe.

Psalm 149:4

E Nọyaẹnmwa sẹ ọyẹnmwẹ ye ẹmwẹ emwa irẹn, ọ ye akhọnmiotọ ye ọghọ ne emwa irẹn ni mu egbe rriotọ.

Psalm 80:15

Do miẹn azara na ne uwẹ gbọre fan, ovbi azara na ne uwẹ gie ẹe wa wan, kevbe ne ọ wegbe sẹ vberriọ.

Ẹksọdọs 3:7

Ẹre Nọyaẹnmwa na kha wẹẹ, “I miẹn obọ oya ne a ya mu emwa mwẹ vbe Igipt, I họn utumwẹ ne iran tu wẹ ne a miẹn iran fan vbe obọ avbe iran ni lo iran vbe eviẹn, I wa miẹn oya ne iran re.

Itan 21:13

U gha wẹ u i danmwehọ utumwẹ ovbiogue, a i vbe danmwehọ ruẹ vbe uwẹ a gha tu nọ iyobọ.

Asan-Ibo 4:1

I keghi vbe dọlegbe do ghe avbe emwi hia ni sunu ne ẹ i la ihe vbe agbọn, iran ne a zẹ kpokpo gha viẹ egbe, sokpan a i miẹn ne ọ ru iyobọ ne iran. A i miẹn ne ọ ru iyobọ ne iran rhunmwuda obọ ọghe iran ni zẹ iran kpokpo, ọ re ẹtin khua ghe.

Ihuan Ne Ọ Sọọ Ihuan Hia 7:6

A miẹn vbe u mose hẹ, a miẹn vbe u yẹ ọmwa hẹ, vbene ahoẹmwọmwa ruẹn ye ọmwa hẹ, ne ọ gbae nọ.

Aizaia 1:21

Ẹvbo ne ọ te ka mwẹ uyinmwẹ ne ọ gbae yi, ọ re ọ ghi yin uyinmwẹ ohọhọ na, vbe ẹghẹ okpa emwa ẹmwata ọ re ọ wa gba re, sokpan, banbanna nian avbe izigha ọ re ọ ghi kẹe.

Aizaia 1:6

Wa ke adesẹ uhunmwu ya sẹ owẹ, ihọkpa ne ọ gbae i ghi rre egbe uwa. Ẹwẹn ivbi ẹtẹ kevbe okobẹtẹ gba uwa egbe hia. A ma kpe uwa ẹwẹn ra ne a gbalọe. A ma rhie ukhunmwu ye rhọkpa.

Aizaia 27:2

Ọ gha sẹ ẹdẹ ne ẹdẹrriọ, e Nọyaẹnmwa gha kha vbekpa ọghe ogba azara ne mose mose wẹẹ,

Aizaia 3:14

E Nọyaẹnmwa ra do buohiẹn avbe ediọn kevbe avbe ọkaolotu emwa irẹn, ọ baa iran ifi ẹzọ wẹẹ, “Wa ya de rhu avbe ogba azara, owa ọghe uwa vuọn ne emwi ne uwa miẹn avbe ivbiogue re.

Aizaia 3:15

Wa i mwẹ asẹ ne uwa gha ya gha piẹn emwa mwẹ ginnotọ, ne uwa vbe gha mu avbe ivbiogue vbuẹvbuẹ. Mẹ ne Udazi e Nọyaẹnmwa ne Oghodua ọ re ọ tae.”

Aizaia 3:17

I gha rri iran oya, I gha khiokhio iran uhunmwu, I ghi vbe gie iran gha re emwa ne eto i ghi rrọ ẹre uhunmwu.”

Aizaia 30:12

Sokpan, vbenian ọ re Osanobua nọhuanrẹn ọghe Izrẹl khare, “Wa fi iyeke gbe ẹmwẹ ne I tama uwa, wa na mu ẹtin yan ọkhọ kevbe erẹrẹ ọghe uwa.

Aizaia 46:12

“Wa danmwehọ mwẹ, wa ni ze vbe ẹkoko udu ni ro wẹ akhọnmiotọ wa rrei ẹsẹse.

Aizaia 5:2

Ọ keghi vulo otọe nii, ọ na rhọ avbe okuta ni rrọọ hin, ọ keghi kọ azara ne ọ maa sẹẹ yọ, ọ keghi bọ owa ọkhẹ yọ ne a na gha khẹ ọre. Ọ keghi fian okọ ne a gha na gha minọẹn yọ, ọ keghi gha khẹ ne avbe ọmọ azara ni vbo, sokpan, ehia keghi wa kaan.

Aizaia 59:13

Ma sẹmwẹ ru ẹ, ma he uwẹ yotọ, ma ma ghi lele uwẹ, ma wọ avbe ẹrrẹe uhunmwu ma keghi fi iyeke gbe uwẹ. Ohoghe iro ne ima zẹ khin, ẹmwẹ ne ima ta i re ẹmwata.

Aizaia 59:14

A khu ohiẹn ẹmwata fua, emwi ne ọ kere i sẹtin sikẹ ọmwa. Ẹmwata rrua owẹ vbe ughe, uyinmwẹ ne ọ diae i vbe miẹn otọ tota yi vbe evba.

Aizaia 59:4

Wa gha yo iko, a i bu ohiẹn ne uwa. Ohoghe ọ re uwa mu ẹtin yan ighẹ uwa gha ya rri ase vbe ẹzọ uwa. Wa gha sii uma emwi dan ne uwa ra ru ẹrrẹe re nẹ, wa ghi gele ru ẹe.

Aizaia 62:5

Zẹ vbe igbama ne ọ rhie ọvbokhunvbi rọnmwẹ ọmwa ne ọ yi uwẹ gha rhie ruẹ rọnmwẹ zẹ vbene ẹko ovbiọha rhiẹnrhiẹn ọdafọn ọha erriọ ọ re ẹko rua ra gha maa Osanobua rua.

Jerimaia 12:10

Avbe enikhaemwisẹ ni re orhunmwuyẹn, dunmwu ogba azara mwẹ uan nẹ; iran ye owẹ guọghọ ugbo mwẹ ginna otọ iran ye owẹ ye otọe esiesi mwẹ khian ato.

Jerimaia 24:2

Avbe ohọ ne ọ maa kegha rre okhuae ne okaro, ni wa rherhe vbo vbọ, nọkpa kegha re ne ẹ i maa ye, ne ẹ i gie a re.

Jerimaia 50:46

Ẹdẹ ne Babilọn gha de gbotọ, ọ gha la sẹ vberriọ wẹ otọe agbọn hia ghi mu rueghe, avbe agbọn ẹvbo nekpa gha họn utumwẹ wa bu rre ẹre.”

Ezikiẹl 22:29

Iran ni fe rha, iran do oyi. Iran ye obọ dan mu avbe ivbiogue, iran keghi vbe mu avbe orhunmwuyẹn vbuẹvbuẹ.

Hozia 10:1

Te ivbi Izrẹl te yevbe erhan azara ne ọmọ gba ẹre uhunmwu. Vbene emwi ya gha maa ne iran, erriọ ọ re iran ya gha bọlọ Ogiukpo yọ. Vbene emwiokọ iran ya gha maa yọ, erriọ iran ya gha te ẹre egbe yọ ighẹ avbe okuta ẹbọ ne iran gho.

Maika 6:12

Iran ni fe vbe emwa ruẹn ya avbe ivbiogue ru enegbe iran, ọhọn ohoghe wa hia fẹẹrẹ wa khin.

Maika 6:8

Ẹn o, e Nọyaẹnmwa ta ma ima nẹ emwi ne ọ maa. Emwi ne ọ ho vbe obọ mwa ọre ena khin: ne a gha ru emwi ẹmwata, ne a gha mwẹ itohan ne ẹ i rueghe; kevbe ne ima gha ye a mu egbe rriotọ lele Osanobua mwa khian.

Habakọk 1:3

Vbe u a ghi na gunmwẹ miẹn ọlọghọmwa vbenian hẹ yi? Vbe uwẹ ra sẹtin ziengbe gha ghe amaruẹse vberriọ hẹ yi? Omurhia kevbe uyinmwẹ ọkpankpan lẹga mwẹ; igbinna kevbe ẹzọ wa vbe rre ehe hia.

Zẹfanaia 3:17

E Nọyaẹnmwa ne Osanobua mwẹ rrọ yaba ruẹ, ẹtin ẹnrẹn ọ re ọ rhie akhọnmiotọ nuẹn. Ẹko ruẹ gha rhiẹnrhiẹn e Nọyaẹnmwa kevbe uwu aho ẹmwẹ ọmwa ẹnrẹn, ọ gha rhie arrọ agbọn ne uẹn. Ọ gha so ihuan, ọyẹnmwẹ ruẹn ghi vbe gha sẹ ọe.

Matiu 23:23

“U miẹn agbọn ne uwa ye, enimaemwa Uhi kevbe Farisi, ayunukpaegbe. Wa ghi zẹ a ghae ye ihe igbe ebe uwọnmwẹ ne giẹrẹ hia, vbe ne avbe akpọkọ, ihiehie kevbe ebe aranmwọkhọ ye, vberriọ, wa sẹ emwi kpataki ni rre uwu Uhi rae, zẹ vbe a i bu eku, itohan, kevbe ne a i na sẹ ni dekẹe rae.

Iyẹn ne ọ Maan Ọghe Luk 18:7

Wa ma yayi ighẹ Osanobua gha buohiẹn ne avbe emwa rẹn ni kpe tie ẹre asọn kevbe avan? Wa yayi ighẹ ọ gha yae rhẹghẹrẹ?

Iyẹn ne ọ Maan Ọghe Jọn 15:2

Abọ ne ọma mọ vbọ, ọ ghi fiaẹn mu fua, abọ ne ovbe mọ, ọ ghi kpannọ igẹngẹn ọnrẹn kua ne ọ miẹn ehe na fanmwegbua, nọ miẹn ehe na gha mọ ẹse.

Diuteronomi 15:9

Ghẹ kha i ghẹ ui ghi rhie emwi ne ẹẹn mọmọ rhunmwuda ighẹ ukpo ne a na ya igho ma ọmwa i ghi rrei. Ghẹ gie iro dan vberriọ la ruẹ ekhọe. U gha he ne u rhie igho nii ne ẹẹn mọmọ, ọ gha viẹ yuẹ urhu ma e Nọyaẹnmwa, a ghi ka a ye ọmwa ne ọ rria abe.

Jems 5:4

Wa ma he ha osa ne iran ne uwa ya gbe ugbo. Wa gha họn vbe ne iran gui hẹ! Eve ne iran ni rhọ emwiokọ uwa ne uwa viẹ, sẹ ehọ Osanobua nẹ, Nọyaẹnmwa ne Oghodua.