Aizaia 48:13 - Edo Bible (E Baibol Ẹdo) Version 1996

¹³ Obọ mwẹ ọ re ọ gbe ẹyotọ agbọn ọ na vbe tan iso gbadaa. I gha gie ne a tie otọe kevbe iso, iran ghi rre vbe ọwarọkpa do rhie egbe ma.

Aizaia 48:13 ပူးပေါင်းရင်းမြစ်များ

Job 37:18

U gha sẹtin gu Osanobua tan iso ra? Ne u vbe ya ẹe wegbe zẹ vbe ematọn ne a fiọnghae yi.

Psalm 102:25

Vbe ẹghẹ ne ọ kpẹ fua, u keghi yi agbọn na, obọ ruẹ ọre u vbe ya yi ẹrinmwi.

Psalm 147:4

Ọ ta inu ne avbe orhọnmwẹ ra gha khin nẹ, ọ na he dọmwadẹ ọghọe eni.

Ẹksọdọs 20:11

Ẹdẹ ehan ọre mẹ ne Nọyaẹnmwa ya yi ẹrinmwi, agbọn, avbe okun kevbe emwi nii rre uwu iran hia, sokpan vbe ikpẹdẹ ne ne ogihinrọn, I keghi kẹtin. Ọnii ọ zẹe ne imẹ ne Nọyaẹnmwa na fiangbe Ẹdẹ Ikẹtin, I na ya ẹe khian ne ọ huanrẹn.

Aizaia 40:12

A gha miẹn ọmwa ne ọ gha ye atataobọ mwa amẹ okun ra ne ọ ya obọ mwa iso? A gha miẹn ọmwa ne ọ gha ya ukpu mu ekẹn ne otọe, ra ne ọ ya omwa mwa avbe oke nekhua kevbe negiẹrẹ?

Aizaia 40:21

Wẹ ma rẹn ra? A ma tama ruẹn ke ẹkpo nii gha dee? Wẹ ma he họn vbene agbọn ya suẹn hẹ?

Aizaia 40:22

Ọmwa ne ọ tota ye ẹkete ẹre ọ re ọ ru ẹe vbe odukhunmwu agbọn, a ghi gberra iso, emwa ni rre ototọ ye giẹnrẹn vbe iranmwẹ ọ tan agbọn zẹ vbe ukpọn ne a taẹn zẹ vbe owa ukpọn ne ọ mwa ra dia.

Aizaia 40:26

Tọn aro mu ghe odukhunmwu! Gha ọ yi avbe orhọnmwẹ ne u dẹghe yi? Ọmwa ne ọ viọ iran ladian vbe ivbiyokuo? Ọ rẹn inu ne iran khin te ọ he ọkpọkpa vbọ eni! Ẹtin ẹnrẹn kpọlọ sẹ vberriọ okpa vbe iran ne ọ gha wii edẹ i rrọ!

Aizaia 42:5

Osanobua ọ re ọ yi iso, ọ keghi niẹn ẹnrẹn uan. Rẹn ọ re ọ yi agbọn kevbe emwi hia ni rre uwu ẹre; rẹn ọ re ọ rhie arrọọ kevbe uhiọnrọnmwẹ ne emwa ẹnrẹn hia. Banbanna nian, e Nọyaẹnmwa Osanobua tama ọguọmwadia ẹre wẹẹ,

Aizaia 44:24

“Mẹ ọrọre Nọyaẹnmwa ne ọ ọmiọnmwafan ruẹn, mẹ ọ re ọ yii uwẹ. Mẹ ọrọre Nọyaẹnmwa ne ọ yii emwi hia. Mẹ ọkpa ọ re ọ tan iso zẹ vbe ukpọn ẹghẹ ne I na yii agbọn, ọmwa ne ọ ru iyobọ mẹ i rrọọ.

Aizaia 45:12

Mẹ ọrọre ọmwa ne ọ yii otọe agbọn I keghi vbe yi emwa nagbọn ne iran gha rre evba. Ẹtin mwẹ ọ re I ya rhaan iso ladian; mẹ ọ re ọ dia owẹn, kevbe uki kevbe avbe orhọnmwẹ.

Aizaia 45:18

E Nọyaẹnmwa ọ re ọ yii iso, rẹn ọrọre ọmwa ne ọ re Osanobua! Rẹn ọ re ọ dọnmwẹ agbọn, ọ na yii ẹe ọ ru ẹe gbain kevbe ne ọ vbe tọ, ọ ma yi ẹre ne ọ dihoi rua ne ọ rhiaẹe. Sokpan ehe ne emwa gha yin. Rẹn ọrọre ọmwa ne ọ khare wẹẹ, “Mẹ ọrọre Nọyaẹnmwa, osa ọvbehe i ghi vbe rrọọ.

Aizaia 51:13

Wẹ mianmian e Nọyaẹnmwa ne ọ yii uwẹ nẹ ra? Ọmwa ne ọ tana iso yotọ ọna vbe gbe ẹyotọ agbọn? Vbọzẹ ne ohan na mu ẹẹn ẹghẹ hia yi rhunmwuda okuosu iran ni wọ ruẹ uhunmwu? Iran ni mu egbe ne iran ya fuẹn ruẹn uan okuosu iran i ghi miẹn emwi ru uẹ re.

Jerimaia 51:15

E Nọyaẹnmwa ọ re ọ ya ẹtin ẹnrẹn yii otọe, ẹwaẹn ẹnrẹn ọ re ọ ya yii agbọn, ọ kevbe rhaan aro iso ne ọ vbẹ.

Ebe ne Pọl gbẹẹn gie emwa Rom 4:17

Zẹ vbene ebe kha re, “Mẹ ya uwẹ khian erha uhunmwu ẹvbo ni bun nẹ.” Ọnii nọ wẹ, emwi ne a ve na wa maa vbe aro Osanobua ne Ebraham yayi, Osanobua ne ọ huẹn ne ọ wu kpaegbe, ne ẹmwẹ ọnrẹn ye emwi ne ẹ i te ka rrọọ khian ne ọ ghi rrọọ.