Aizaia 48:1 - Edo Bible (E Baibol Ẹdo) Version 1996

¹ Ivbi Izrẹl wa danmwehọ ẹmwẹ na, wa ne ivbi uniẹn e Juda. Wa ọ re ọ ya eni Nọyaẹnmwa vẹn ihẹn wa na vbe gha kha ighẹ Osanobua Izrẹl ọ re uwa ga. Sokpan, ẹmwẹ ne uwa ta, te uwa ba tae kẹkan.

Aizaia 48:1 ပူးပေါင်းရင်းမြစ်များ

Gẹnẹsis 32:28

Okpia nii keghi kha wẹẹ, “A i ghi ra tie eni ruẹn Jekọb ọvbehe. U gu Osanobua kevbe emwa nagbọn suan nẹ, obọ ruẹ keghi ke okhunmwu, rhunmwuda ọnii eni ruẹn ọ re ọ ghi gha re Izrẹl.”

Gẹnẹsis 35:10

Osanobua tama rẹn wẹẹ, “E Jekọb ọre a te tie ruẹ, sokpan ke eban kpao, Izrẹl ọre a ghi gha tie ruẹ,” ẹre Osanobua na he ẹre Izrẹl.

II Ọba 17:34

Iran kegha ye yin uyinmwẹ arre iran do sẹ ẹdẹnẹrẹ na. Iran i ga e Nọyaẹnmwa, iran i vbe ya ẹe ru emwi ighẹ uhi ne Nọyaẹnmwa rhie ne ivbi uniẹn Jekọb ne irẹn he ẹre Izrẹl.

II Ọba 5:20

vbe Gehazi ne ọguọmwadia Elaisia zẹ iro ekhọe ẹre wẹẹ, “Arowa mwẹ wa gie Naaman gha rrie vbene ọ ma na ha emwirhọkpa! Ọ te kei ne ọ viọ emwi ne ovbi e Siria nii hẹ ne ẹẹn. Vbe eni e Nọyaẹnmwa ne ọ rrọọ, I gha rhulẹ lele ẹe ne I ya miẹn ẹre emwi eso.”

Psalm 63:11

Ọba gha ghọghọ rhunmwuda Osanobua gie ẹe khọnmiotọ, iran ni ya eni Osanobua yan eyan gha rho ẹre sokpan a gha gue avbe ọhọn ohoghe unu.

Psalm 66:3

Wa tama Osanobua wẹẹ, “A miẹn vbe emwi ne u ru hia re ọyunnuan hẹ! Ẹtin ruẹn kpọlọ sẹ vberriọ wẹ te avbe eghian ruẹn hia ye ohan defi igue vbe odaro ruẹ.

Psalm 68:26

“Wa rho Osanobua vbe ehe ne avbe emwa rẹn ni do iko ye wa rho e Nọyaẹnmwa wa ne ivbi uniẹn ẹ Jekọb hia!”

Psalm 68:27

E Bẹnjamin ne ẹwae ne ọ kanmwa sẹ ke odaro vbe iyekọnii, avbe ọkaolotu e Juda kevbe otu iran, avbe ọkaolotu e Zẹbulọn kevbe Naftali keghi lele ẹe.

Ẹksọdọs 23:13

Wa rhie ehọ ye ẹmwẹ ne I tama uwa, wa ghẹ na erhunmwu ghe osa ọvbehe, wa ghẹ kue so eni iran.”

Itan 5:16

Emọ ne ikhuo ọvbehe biẹlẹ nuẹn i ra mwẹ esa ne iran ye nuẹn.

Aizaia 26:13

E Nọyaẹnmwa Osanobua mwa, emwa ọvbehe wa gha kha yan mwa, sokpan, wẹ okpa kẹkan ọrọre Nọyaẹnmwa.

Aizaia 44:5

“Ọkpọkpa ọ re emwa ra ya gha kha wẹẹ, ‘ọghe Nọyaẹnmwa ọ re imẹ khin.’ Iran gha do ya egbe ba ivbi Izrẹl. Dọmwadẹ ọghọe gha yi ama e Nọyaẹnmwa ye obọ ẹre, ọ ghi vbe tie egbe ẹre okpa vbe uwu emwa Osanobua.”

Aizaia 45:23

Ẹmwata ọ re eyan ne I yanrẹn khin ai vbe fi ẹe werriẹ. Emwi ne I khin hia fẹẹrẹ ọ re I ya yan: Emwa hia gha rre do diguẹ vbe odaro mwẹ iran ghi yan wẹ iran gha rhie egbe mu mwẹ.

Aizaia 46:12

“Wa danmwehọ mwẹ, wa ni ze vbe ẹkoko udu ni ro wẹ akhọnmiotọ wa rrei ẹsẹse.

Aizaia 51:1

E Nọyaẹnmwa khare wẹẹ, “Wa danmwehọ mwẹ, wa ni ho ne a miẹn uwa fan, wa ni do nọ iyobọ vbe obọ mwẹ, wa roro ẹmwẹ okuta nọkhua ne uwa ke ladian. Ehe ne a na fian okuta ne a ke fian uwa ladian.

Aizaia 51:2

Wa roro ẹmwẹ erha uwa odede ighẹ Ebraham kevbe e Sera ne uwa re ivbi ivbi ẹre. Ẹghẹ ne I na tie Ebraham, ẹ i mwẹ ọmọ sokpan, I fiangbe ẹe, I ke viọ emọ ne ẹẹn I keghi ya ivbi uniẹn ọnrẹn khian ọrhẹnrhẹn.

Aizaia 58:2

Ẹdẹgbegbe ọ re iran ya ga mwẹ, iran ghi vbe kha wẹ iran ho ne iran rẹn vbene I ru emwi hẹ, kevbe ne iran vbe gha ya uhi mwẹ ru emwi. Iran khare wẹ, iran ho ne I yi uhi ẹmwata ne iran, kevbe wẹ te ọ wa bọbọ iran egbe ne iran gha ga mwẹ.”

Aizaia 62:8

E Nọyaẹnmwa yan eyan akekhọerre nẹ ọ gha ya ẹtin irọẹn mu ẹẹn sẹ, “Ọka ruẹ i ghi re ne avbe eghian ruẹn gha ya gha koko egbe iran. Avbe ọrriọvbe i ghi ra dọlegbe gha rhie ayọn ruẹn da.

Aizaia 64:6

Te ima hia wa vuọn ne orukhọ, uhin ighẹ uyinmwẹ ne ọ ghi maa sẹẹ, iku kevbe ẹkẹkhẹrhẹ nọ. Rhunmwuda orukhọ mwa, te ima ghi yevbe ebe ne ọ kakae ne ẹhoho hohoo kua.

Aizaia 65:16

Ọmwaikọmwa ne ọ ghi nọ afiangbe vbe otọe nii, Osanobua ẹmwata ọ re ọ ra wẹ, ne ọ fiangbe irẹn. Ọmwaikọmwa ne ọ vbe vẹn ihẹn eni Osanobua ẹmwata nii ọ re ọ ra vbe ya vẹn ọẹn. Orueghe ọghe ẹghẹ ne ọ gberra gha fo, a ghi vbe mianmian ẹn.”

Jerimaia 4:2

ọ sẹtin gha re emwi ne ọ kere ne uwa, ne uwa gha ye eni mwẹ vinhẹn. Ẹghẹ nii avbe uhunmwu ẹvbo hia gha rinmwian mwẹ ne I fiangbe iran, iran ghi vbe gha rho mwẹ.”

Jerimaia 44:26

Sokpan, wa danmwehọ nian, eyan ne imẹ ne Nọyaẹnmwa, ya eni mwẹ nọkhua yan ma uwa ne ivbi Izrẹl ni rre Igipt wẹẹ, ‘Mẹ i ghi ra dọlegbe gie ọmwaikọmwa vbe uwu uwa ya eni mwẹ yan emwi wẹ I ya eni e Nọyaẹnmwa ne Udazi ne ọ rrọọ vinhẹn.’

Jerimaia 5:2

A gha rhe miẹn wẹ wa kha wẹ wa ga e Nọyaẹnmwa, ọdẹn ọ re uwa ya ẹe gbe kẹkan.

Levitikọs 19:12

Ghẹ ya eni mwẹ ru eyan a deghẹ ẹ i re te u ho ne u mu ẹẹn sẹ, te ọnii fa eni mwẹ uan. Mẹ ọre Nọyaẹnmwa Osanobua rua.

Maika 2:7

Te uwẹ ro ighe te a fi ivbi Izrẹl unu ra? E Nọyaẹnmwa i ghi sẹtin ziengbe ra? Rẹn gha gele ru egbe emwi vberriọ ra? E i ghi gu iran ni ru emwi esi guan rọkhọrọkhọ ra?”

Zẹfanaia 1:5

I gha fuẹn ọnrẹn uan ighe ọmwaikọmwa ne ọ hin ẹrhunrhun owa ya gha ga owẹn, uki ra orhọnmwẹ. I gha vbe fuẹn iran ni ga mwẹ, iran na vbe gha ya eni mwẹ vẹn ihen zẹ vbe ọmwa ne ọ mudia ẹse, sokpan, iran ghi vbe gha ya eni e Milkọm ne ẹbọ vẹn ihẹn.

Zẹkaraia 5:3

Rẹn keghi tama mwẹ wẹẹ, “Emwi ne a gbẹn ye uwu ẹre ọrọre ihen ne a ra tie ne uhunmwu otọe hia. Vbe obọkpa vbe ebe nii, a gbẹn ọẹn yọ wẹ a gha hẹ avbe oyi hia kua vbe otọe nii; a keghi gbẹn ye obọ nọkpa wẹ emwa ni ye ta ohoghe vbe iran a vbe vẹn ihen nẹ, a gha vbe hẹ iran kua.

Malakai 3:5

E Nọyaẹnmwa ne Oghodua khare wẹẹ, “I gha ladian vbe uwu ẹbu uwa ne I do bu ohiẹn. I gha wa sẹ osẹe gbe iran ni ru e emaziki awan, iran ni ghẹ, iran ni sẹ osẹe ohoghe, iran ni gbe igho emwa ne iran ya winna rhu, iran ni mu avbe ẹgbẹe ru kevbe emọ ne ẹ i mwẹ erha, kevbe avbe erhunmwuyẹn, kevbe iran hia ne ẹ i da mẹ.”

Nọmbas 24:7

Amẹ gha wa rhọ ne iran ẹsẹse iran kọ emwi okọ iran ye otọe ne ọ rọkhọe ọba iran gha kpọlọ sẹ Agag, arriọba ẹre gha kpolo, ọ gha tan la erhan la irri

Matiu 23:13

“U miẹn agbọn ne uwa ye eni ma emwa Uhi kevbe Farisi, ayunukpaegbe! Wa khui urho Arriọba ẹrinmwi ke emwa yi, wa tobọ uwa ma ho ne uwa la owa, emwa ni ho ne iran la owa, wa ma kie ne iran. [

Iyẹn ne ọ Maan Ọghe Jọn 1:47

Ugbẹn vbe Jesu ghi bẹghe Nataniẹl Vbe ọ bu ẹre dee, ọ wẹẹ, “Ghe Ovbi Izrẹl vbe ẹmwata, ẹko ne ero i ye.”

Iyẹn ne ọ Maan Ọghe Jọn 4:24

Orhiọn ọre Osanobua khin, iran ni gae, ọ kere ne iran ya orhiọn gae vbe ẹmwata.”

Ebe ne Pọl gbẹẹn gie emwa Rom 2:17

Wẹ vbo? Ẹ i re Ju ọre u tie egbe ruẹ re, u mu ẹtin yan nene Uhi gha ya Osanobua rhuọ.

Ebe ne Pọl gbẹẹn gie emwa Rom 9:6

Ẹ i re te I khare ighẹ emwi ne Osanobua ve firaa nẹ, rhunmwuda ẹ i re ivbi Izrẹl hia ọre ọ wa re emwa ne Osanobua hannọ zẹ.

Ebe ne Pọl gbẹẹn gie emwa Rom 9:8

Ọna rhie maa wẹ emọ ne a biẹ ẹe zẹ vbene a biẹ ọmwa kẹkan, iran i re ivbi Osanobua, sokpan iran ne a biẹ ẹe rhunmwuda ighẹ Osanobua ọre ọ ve emwa re, ọre a ka ye ivbi eseserese.

Diuteronomi 10:20

Wa gha mu ohan e Nọyaẹnmwa Osanobua uwa, wa vbe gha ga irẹn ọkpa kẹkan. Wa gha re emwa ne ọ gba ẹko ẹre, ne uwa gha ya eni ẹnrẹn ọkpa kẹkan ru eyan uwa.

Diuteronomi 33:28

Ẹre ivbi e Jekọb na gha rrọọ vbe ọfumwegbe ọ kevbe gbe ẹkun sẹ otọ vbe otọ ne ọka kevbe ayọn na kpọ ehe ne iso na gie evbu gha tue ye otọ.

Diuteronomi 5:28

“E Nọyaẹnmwa ghi họn ọna, ọ keghi tama mwẹ wẹẹ, ‘I họn vbene iran na kha hẹ, ẹmwata iran ta ẹe.

Diuteronomi 6:13

E Nọyaẹnmwa Osanobua rua ọkpa ọ re uwa gha mu ohan rẹn, rẹn ọkpa wa gha vbe gha ya gha yan eyan.

I Timoti 4:2

Obọ avbe ọhọn ohoghe ni mu emwa rẹrẹ, ọre iruẹmwi na ke rre, emwa ne ekhọe ẹre gbin vbe ne a miẹn wẹ te a mu ematọn ye erhẹn ya tọn ẹn.

Arhie Maan 2:9

I rẹn emwi ne ọ kpokpo uẹ. I rẹnrẹn ighẹ ovbiogue ọre u khin sokpan vbe ne ẹmwata, ọmwa ẹfe ọre u khin! I vbe rẹn ẹmwẹ dan ne iran talọ vbe ekpa ruẹ ighẹ iran ni wẹ Ju ọre iran khin, vberriọ iran i re ọre, otu ne Setan yanrẹn ọre iran khin.

Arhie Maan 3:9

U ghi danmwehọ. U ma miẹn avbe otu nii, ni re ọghe Setan, avbe ọhọn ohoghe ni, ni tie egbe iran e Ju vberriọ iran i re ọre, I gha ru ẹe ne iran bu ruẹ gha dee ne iran do mu ẹko rhu otọ, ne iran vbe ya uhunmwu rhanmwẹ otọ nuẹn. Iran hia gha rẹn ighe I ho ẹmwẹ ruẹn.