Aizaia 45:1 - Edo Bible (E Baibol Ẹdo) Version 1996

¹ E Nọyaẹnmwa zẹẹ Sairọs nẹ ne ọ rriọba. Ọ vbe zẹẹ ọe nẹ ne ọ gha khọn avbe uhunmwu ẹvbo miotọ; ọ gie ẹẹ ne ọ ya bannọ ẹtin hin obọ avbe ọba rre e Nọyaẹnmwa gha kie urho avbe okpẹvbo ne ẹẹn. E Nọyaẹnmwa tama Sairọs wẹẹ,

Aizaia 45:1 ပူးပေါင်းရင်းမြစ်များ

I Ọba 19:15

E Nọyaẹnmwa keghi kha wẹẹ, “Werriegbe ne u gha rrie oha ne ọ rre ọkpẹn e Damaskọs. U ghi la ore ẹvbo ni ne u ya ma Hazaẹl ọba e Siria.

Ẹzra 1:1

Vbe ukpo ne okaro ne Sairọs ya gha re ọgbaisi e Pẹsia, e Nọyaẹnmwa keghi ru ẹe ne ẹmwẹ ne ọ la unu e Jerimaia ne akhasẹ ta do sẹ. Ọ keghi rhie ẹre ye Sairọs ekhọe, ne ọ ta ẹmwẹ na ladian, kevbe ne ọ gbẹnnẹ ọẹn ne a vbe tie ẹre ne emwa hia vbe otọe arriọba ẹre hia wẹẹ,

Ẹzra 1:2

“Ẹmwẹ ne Sairọs ne Ọgbaisi ọghe Pẹsia tae ọ re ọna khin, E Nọyaẹnmwa ne Osanobua ọghe Ẹrinmwi ọre ọ ya mwẹ ru nọ khaemwisẹ yan uhunmwu otọ agbọn hia, ọ kevbe ya ẹe wa iwinna mẹ wẹ ne I bọ Ọgua Osa ne irẹn vbe Jerusalẹm ne ọ rre Juda.

Job 12:21

Ọ fa iran ni rre ukpo ẹtin uan, ọ kevbe dobọ ẹtin iran ni dakha yi.

Psalm 73:23

Vberriọ te I wa simama uwẹ vbe ẹghẹ hia, wẹ keghi vbe da mwẹ obọ yi.

Aizaia 13:2

Tọn afiala okuo nii mu vbe uhunmwu oke ne ọ dihoi rua nii. Da tie avbe ivbiyokuo nii ne u vbe tọn obọ ruẹ mu da iran zẹ vbe igiemwi wẹ ne iran dekun onurho ẹvbo ne ọ tengbemu nii.

Aizaia 13:3

E Nọyaẹnmwa tie avbe ivbiyokuo ẹre ni hio ke ni vbe din nii ladian ne iran do khọn okuo nọhuanrẹn, ne iran vbe rri iran ne ohu ẹre mu oya.

Aizaia 41:13

Mẹ ọrọre Nọyaẹnmwa, Osanobua ruẹ, I rhie iwegbe ne uwa, I keghi tama uwa wẹẹ, ‘Wa ghẹ mu ohan, I gha yi uwa obọ.’ ”

Aizaia 41:2

“Gha ọ rhie ne ọ khọnmiotọ ke owẹn owiẹ rre yi ne ọ na gie ẹe khọnmiotọ vbe ehe ne ọ rhirhi a la hia? Gha ọ gie ẹe khọn avbe ọba kevbe avbe uhunmwu ẹvbo muotọ? Umozo ẹre bẹlẹ ehia ku otọ vbene a gha kha wẹ ebubẹ ọ re iran khin. Ifẹnmwẹ ọnrẹn zagha iran, zẹ vbe ebe nọkakae vbe odaro ẹhoho.

Aizaia 41:25

“I hannọ orhiọnkpa ne ọ rre odẹ ahọ zẹ nẹ. I gha ru ẹe ne ọ ya la odẹ okuọ suẹn igbinna. Te ọ ya owẹ rrilo irriegie mu otọ, vbe ne a khakha ighẹ ọrho iran khin, zẹ vbene ọmakhe ya owẹ rrilo obuẹ.

Aizaia 42:6

“Mẹ ne Nọyaẹnmwa ọ re ọ tie ruẹ, I na rhie ẹtin ne uẹn ne u miẹn wẹ a yinrin vbene ọ kere vbe otọ agbọn. Obọ ruẹ ọ re I ra la gu emwa hia ta ile obọ ruẹ ọ re I ra la rhie uwanmwẹ gie uhunmwu ẹvbo hia.

Aizaia 44:28

I tama Sairọs wẹẹ, ‘Wẹ ọrọre ọmwa ne ọ gha ya gha khaemwisẹ mẹ; u gha ru vbene I ho ne u ru: U gha tae wẹ ne a dọlọ bọ Jerusalẹm kevbe wẹ ne a gbe ẹyotọ ọgua Osa.’ ”

Aizaia 45:5

“Mẹ ọrọre Nọyaẹnmwa, osa ọvbehe irrọọ. I gha rhie ẹtin ne ọ khẹ kuẹ nuẹn, a gha rhe miẹn wẹ, u ma rẹn mwẹ.

Aizaia 48:15

Mẹ ọ re ọ guanrẹn, I na vbe tie ẹre I su ẹe ladian, I na vbe rhie akhọnmiotọ ne ẹẹn.

Jerimaia 27:6

Mẹ ọrọre ọmwa ne ọ viọ avbe uhunmwu ẹvbo na hia ye ototọ ẹtin ọguọmwadia mwẹ ighẹ Nebukiadneza ne ọba e Babilọn, uhin ya sẹ egbe aranmwẹ oha, te I wẹ ne iran gha gae.

Jerimaia 43:10

Ẹghẹ nii, u ghi ya tama iran wẹẹ, ‘Mẹ ne Nọyaẹnmwa ne Oghodua, ne Osanobua Izrẹl, I gha rhie ẹre gha dee ighe e Nebukiadneza ne ọguọmwadia mwẹ, ọba e Babilọn, ọ ghi gha die emwana, ọ gha mu ẹkete ẹre yan avbe okuta ne u tọnnọ ye evba, ọ ghi vbe tan owa ukpọn ọghe ọba yan rẹn.

Jerimaia 50:3

Uhunmwu ẹvbo okpa ke odẹ okuọ dee do dekun e Babilọn, te ọ ra ya ẹe khian ato. Te emwa nagbọn kevbe aranmwẹ oha! Ra lẹ kua vbọ, a i vbe miẹn emwa ne ọ gha di evba ya.”

Jerimaia 50:35

E Nọyaẹnmwa khare wẹẹ, “Uwu ọrọre ọghe ivbi e Babilọn! Uwu ọrọre ọghe emwa ẹnrẹn, ọghe iran ni khaemwisẹ, avbe umẹwaẹn ne ọ mwẹ.

Jerimaia 51:11

E Nọyaẹnmwa bọọ avbe ọba e Midia yọ rhunmwuda, ọ ho ne ọ fuẹn e Babilọn ruan. Erriọ ọ re ọ ra ya rria ikhi ye ẹmwẹ Ọgua Osa ọghọe ne iran guọghọ ua. Arowa avbe ivbiyokuo ni ra do gbinna tama iran wẹẹ, “Wa zẹ ifẹnmwẹ uwa ukpẹ! Wa viọ asa uwa mwẹ.

Jerimaia 51:30

Avbe ivbiyokuo e Babilọn dobọ igbinna yi nẹ, iran vbe mudia ye okhiẹ ẹvbo iran. “Ẹtin fo iran nẹ, te iran ghi yevbe ikhuo. A guọghọ onurho ẹvbo nii sotọ nẹ avbe owa ni rrọ hia gha giẹn.

Jerimaia 51:58

A gha rrua ekẹn e Babilọn nọkhua gbe otọ. A ghi vbe giẹn avbe ẹkhu ẹre ne ẹrẹkhẹrẹ sẹ otọ. Iwinna avbe uhunmwu ẹvbo khian ekẹkan, ẹsọn iran giẹn uan vbe erhẹn. Mẹ ne Nọyaẹnmwa ne Oghodua guaan nẹ.”

Ezikiẹl 29:20

I ra mu Igipt ya ha ẹre osa ye iwinna ne ọ winnaẹn, rhunmwuda mẹ ọ re avbe ivbiyokuo ẹre gha winna na. Mẹ ne Nọyaẹnmwa ne Udazi ọ re ọ tae.

Daniẹl 5:6

Ọ keghi reghe aro ua vbe uhunmwu, ohan keghi muẹn sẹrriọ wẹ igbọn rẹn kegha de gbe egbe.

Daniẹl 7:5

Aranmwẹ ne ogieva keghi yevbe akpakomiza ne ọ ye owẹ odieke ẹre mudia, ọ keghi ye akọn khuaa ifẹnmwaguẹ eha mwẹ vbe unu. Urhu ọkpa keghi tama rẹn wẹẹ, “De yan rẹn, rri emiowo vbene ẹtin ruẹn sẹ ọe sẹ.”

Daniẹl 8:3

I ghi ghe ya ghe ogho ọkpa ne ọ mwẹ igho eva hiain hiain vbe ọkpẹn ẹzẹ nii, ọkpa keghi tan sẹẹ, ọ vbe ru ọghọgbọn sẹ nọkpa.

Daniẹl 8:4

I keghi bẹghe vbe ogho nii ya igho so emwi rrie odẹ ahọ, odẹ okuọ kevbe orrie. A ma miẹn aranmwẹ ọkpa ne ọ sẹtin rrọ ẹre ra ne ọ lẹ fe vbe obọ ẹtin ẹnrẹn. Vbene ọ khọnrẹn ọ re ọ wa gha ru, ọ na wa gha hio paipai.

Nahum 2:6

Urho ni rre odẹ ẹzẹ yannọ ye otọ ohan nọkhua keghi vuọn ẹguae.

Nahum 3:13

Avbe ivbiyokuo ruẹ yevbe ikhuo, ẹvbo ruẹ keghi khian ne ẹ i ghi mwẹ ogba ne a gba ga ẹre, vbe odaro avbe eghian ruẹn. Erhẹn gha giẹn ogba ne a mu gbe onurho ruẹ.