Aizaia 41:22 - Edo Bible (E Baibol Ẹdo) Version 1996
22 Wa larre, wa do ta emwi ne ọ gha he kue sunu yotọ. Ne ima miẹn ehe na rẹn ọnrẹn vbe ọ a gha sunu wa rhan otọ emwi ne ọ gberra ma iko ne uwa vbe tama ima emwi ne a ya ẹe kha.
De ọkpa ne ọ tae yotọ vbe uwu uwa ighẹ ọna gha sunu, ne ima miẹn ehe na kha wẹ, ẹmwata u tae? Ọkpa vbe uwu uwa ne ọ ya unu kanrẹn i rrọọ, ọmwa ne ọ họn ẹmwẹ ọkpa vbe unu uwa i rrọọ.
Ọmwa ọvbehe ne ọ gha te sẹtin ru emwi ne imẹ ru rrọọ ra? De ọmwa ne ọ gha te sẹtin tae yotọ yi ighẹ avbe emwi ni gha sunu ke omuhẹn emwi hia gha dee do sẹ ufomwẹ ọnrẹn?
Wa larre, wa do ta ne unu uwa vbe iko, wa tama iran ne a gu ẹzọ ne iran mu iro vba egbe. Gha ọ ta emwi ne ọ gha he kue sunu yotọ ke ẹkpo nii gha dee? Ẹre mẹ ne Nọyaẹnmwa nọ, mẹ ne Osanobua ne ọ miẹn emwa rẹn fan? Osa ọvbehe i rrọọ.
Vbe omuhẹn, ọ re I na taa emwi ne ọ gha kiekie ẹre, vbe ẹghẹ ne ọ kpẹe fua, I taa emwi ne ọ gha sunu yotọ nẹ. I khare wẹ, emwi ne I mwamwaẹn ne I ru, te ọ gba te I ru emwi hia ni rrọ mwẹ ekhọe ne I ru.
“Wa hia si koko, ne uwa danmwehọ! Ọkpa i rrọ vbe avbe ẹbọ ne ọ sẹtin tae yotọ wẹ ọmwa ne imẹ zẹe gha mu okuo yo Babilọn; emwi ne I ho ne ọ ru, ọ re ọ ra ru.
Ẹ i ra zẹ ọghe obọ ẹre ta, ẹmwẹ ne ọ họẹn ọre ọ khian ta, ọ ghi vbe ta emwi ne ọ gha he sunu. Ọ gha rhie uyi mẹ, rhunmwuda, ọ gha rhie ẹmwẹ ne I gha te ta, ọ ghi rhie ẹre ta ma uwa.