Aizaia 40:30 - Edo Bible (E Baibol Ẹdo) Version 1996

³⁰ Uhin ighẹ ẹtin vbe fo ọmwa ne ẹ i re ọmaẹn egbe sẹtin wa wọ igbama, ọ ghi de.

Aizaia 40:30 ပူးပေါင်းရင်းမြစ်များ

Psalm 33:16

Ẹi re rhunmwuda iyokuo ẹre ne ọ wegbe, ọ re ọba na khọnmiotọ, ẹi re ekpa ẹtin obọ ẹre ọ re ovbiyokuo ya khọnmiotọ.

Psalm 34:10

Avbe oduma sẹtin gha vbabọ evbare, sokpan iran ni họn ẹmwẹ ne Nọyaẹnmwa i ra vbabọ emwi nẹ Ọ maa rhọkpa.

Psalm 39:5

A miẹn vbene u ru ẹdẹ agbọn mwẹ kanmwa hẹ! Ẹdagbọn mwẹ i zẹdẹ mwẹ esa vba aro ruẹ. Vbẹmwata ọmwa nagbọn ma vbe sẹẹ, ẹhoho ne ọ rhie gberra khian.

Asan-Ibo 9:11

I keghi vbe miẹn emwi okpa ọvbehe vbe agbọn na wẹ, ẹ i re iran ni rhulẹ sẹẹ ọ re ọ mu okaro vbe ulẹ, ẹ i vbe re iran ni din sẹ ọ re ọ khọn miotọ vbe okuo. Avbe umẹwaẹn i mobọ sẹtin khuan okhuan unu iran, emwa ni fu ẹro i mobọ vbe sẹtin fe, emwa ni guẹ sẹẹ i mobọ sẹ ukpo ni yo. A i miẹn ọmwa ne emwi i beghe.

Aizaia 13:18

Iran gha ya uhanbọ kevbe ifẹnmwẹ gbele avbe igbama, iran i ra vbe tohan avbe emobọ ra ibiẹka.

Aizaia 9:17

Rhunmwuda ọnii, e Nọyaẹnmwa I ra gie ọkpa lẹfe vbe uwu avbe igbama ni rrọọ, ẹ i ra vbe tohan avbe ẹgbẹ kevbe emọ ne ẹ i mwẹ erha, rhunmwuda emwa dan ne emwa dan ọ re avbe emwa nii hia wa khin, ẹmwẹ ne iran ta hia, ọkhọ ọ re ehia khin. Ọ rhe ye vberriọ, ohu e Nọyaẹnmwa i he ye fo, te obọ ẹre gha ye niẹn ladian ne ọ rria ikhi.

Jerimaia 48:15

A fuẹn Moab kevbe avbe okpẹvbo ni rrọ ua nẹ a gbele avbe igbama ni mose ni rrọ ua. Mẹ ọrọre ọba, e Nọyaẹnmwa ne Oghodua, I vbe guaan nẹ.”

Jerimaia 6:11

Ohu iran ne ọ mu ẹẹn wa vbe giẹn vbe erhẹn vbe uwu ime, Nọyaẹnmwa, I i ghi sẹtin zin ẹnrẹn ọvbehe.” Ẹre Nọyaẹnmwa na tama mwẹ wẹẹ, “Hihiẹ ohu mwẹ yan avbe ibiẹka vbe adesẹ ore, kevbe ye ehe ne avbe igbama na si koko. A gha viọ avbe ọdọ kevbe avbe amwẹ kpao, a i ra vbe sẹ avbe ọmaẹn rae.

Jerimaia 9:21

Uwu la ewindo ima la owa nẹ, ọ keghi la avbe ẹguae ima ọ gbele emọ negiẹrẹ vbe orere mwa kevbe avbe igbama vbe ẹki.

Emọs 2:14

Ya sẹ egbe iran ni guara rhulẹ, ọkpa ne ọ ra miẹn uhunmwu i rrọọ, ẹtin gha fo iran ni wegbe avbe ivbiyokuo i ra vbe sẹtin sinmwi uhunmwu iran ye agbọn.

I Samuẹl 30:10

E Devid keghi viọ uri eva ba egbe gha khian vbe uwu avbe emwa rẹn. Iran ne uri ọkpa ni dekẹe, egbe wọ iran sẹrriọ wẹ iran ma ghi sẹtin fian ovbi ẹzẹ nii rra, iran na ghi yakọ vbe evba nii.