Aizaia 40:11 - Edo Bible (E Baibol Ẹdo) Version 1996

¹¹ Ọ gha gbearoghe avbe ohuan rẹn zẹvbe ne ọsuohuan ru. Ọ gha si avbe oteghe ohuan koko, ọ ghi munọ iran ye ekuaobọ ẹre ọ ghi su avbe iye iran hẹnnẹhẹnnẹ.

Aizaia 40:11 ပူးပေါင်းရင်းမြစ်များ

Gẹnẹsis 33:13

E Jekọb keghi wanniẹn wẹẹ, “Ẹn, u rẹnrẹn ighẹ avbe ibiẹka ma wegbe, ke avbe ohuan, ẹmila kevbe ivbi iran negiẹrẹ rre evba. A gha tua iran okhian gbe ehia gha wulo fo.

Gẹnẹsis 49:24

sokpan uhanbọ irẹn ma bẹghe, a ya ekuabọ iran wegbe vbekpa ẹtin ọghe Osanobua Noghodua ọghe Jekọb, vbe obọ Osanobua nii, ọmwa ne ọ degue Izrẹl.

Psalm 100:3

Wa ghẹ mianmian wẹ Nọyaẹnmwa ọrọre Osanobua rẹn ọ re ọ yi ima ọghọe ọ re ima khin ma ọrọre emwa rẹn ma ọ re oghẹn ohuan rẹn.

Psalm 27:10

Erha mwẹ vbe iye mwẹ sẹtin he mwẹ yotọ, sokpan, e Nọyaẹnmwa gha gbe aro ghe mwẹ.

Psalm 28:9

Miẹn emwa ruẹn fan Nọyaẹnmwa ne u vbe fiangbe emwa ni re ọwuẹ. Gha re ọsuohuan iran, ne u vbe gha gbearoghe iran ẹdẹdẹmwẹdẹ.

Psalm 37:3

Mu ẹtin yan e Nọyaẹnmwa ne u gha ru emwi ẹse, vbe gha yin otọe nii vbe ne ai na mwẹ ẹbe.

Psalm 80:1

Danmwehọ ima ọmwa Ne ọ huanrẹn Izrẹl họn ọghomwa, we ne ọkaolotu emwa ruẹn wẹ ne ọ tota ye ẹkete ruẹ vbe odukhunmwu avbe aranmwẹ ni zẹ ifuẹn.

Aizaia 42:3

Rẹn i ra bun ovbi erhan ne ọ bi gọọ ra ne ọ dọ ukpa ne ọ gbe muẹinmuẹin yọ. Ọ gha rhie ibuohiẹn ẹmwata sẹ obọ agbọn hia.

Aizaia 63:11

Sokpan, iran keghi do ye ẹkpo nẹdẹ rre, ẹghẹ e Mosis ne ọguọmwadia e Nọyaẹnmwa, ọ re iran na ghi nọọn wẹẹ, “De ehe ne Nọyaẹnmwa ghi ye yi, ọmwa ne ọ miẹn avbe ọkaolotu emwa irẹn fan vbe obọ okun? De ehe ne Nọyaẹnmwa ghi ye yi ọmwa ne ọ rhie orhiọn irẹn ne Mosis?

Jerimaia 31:10

E Nọyaẹnmwa khare wẹẹ, “Wa ne uhunmwu ẹvbo, wa danmwehọ mwẹ, ne uwa ta uhunmwu ne I gie vbe eghute ne ọ rrei, I zagha avbe emwa mwẹ kua, sokpan, I gha vbe si iran koko. I ghi gha su iran vbene ọsuohuan su avbe ohuan rẹn.

Jerimaia 31:8

I gha viọ ke odẹ okuọ gha dee, I ghi vbe si iran koko ke ufomwẹ agbọn gha dee, avbe arhuaro kevbe avbe arọe gha lele iran rre, ikhuo ni hanmwa kevbe iran ni gha ra biẹ iran gha werriegbe rre, uhunmwu ẹvbo nọkhua.

Ezikiẹl 34:15

Mẹ ọ re ọ ra tobọ mwẹ gha re ọsuohuan avbe ohuan mwẹ. I gha vbe gualọ ehe ne iran gha na kẹtin. Mẹ ne Nọyaẹnmwa ne Udazi ọ re ọ tae.

Ezikiẹl 34:16

“I gha gualọ ni wiri vbọ, I ghi viọ iran ni bibi odẹ vbọ werriegbe rre, I gha gbalọ ẹwẹn iran ni kuan egbe vbọ, I ghi vbe sinmwi iran ni khuọnmwi, sokpan, I gha fuẹn ni ti ye egbe kevbe ni wegbe vbọ hin rre, rhunmwuda, ọsuohuan ne ọ ru emwi ne ọ gbae mẹ khin.

Ezikiẹl 34:2

“Ovbi ọmwa, ta ku avbe ọkaolotu Izrẹl. Ta ẹmwẹ akhasẹ ma iran, ne u tama iran vbene imẹ ne Nọyaẹnmwa ne Udazi khama iran hẹ wẹẹ: ‘Wa wiri, wa ne ọsuohuan Izrẹl! Wa gha koko egbe uwa, sokpan, wa ma koko avbe ohuan.

Ezikiẹl 34:23

I gha rhie ọba ne ọ yevbe Devid ne ọguọmwadia mwẹ ne iran, ne ọ gha re ọsuohuan iran, ọ gha gbearoghe iran.

Ezikiẹl 34:31

“Wa ne avbe ohuan mwẹ, oghẹn ne imẹ koko, wa ọrọre emwa mwẹ, mẹ ọrọre Osanobua uwa,” erriọ ọ re Nọyaẹnmwa ne Udazi khare.

Ezikiẹl 37:24

Ọba ne ọ yevbe Devid ne ọguọmwadia mwẹ ghi gha re ọba iran. A gha si iran hia koko ye ototọ enọkhaemwisẹ ọkpa, iran ghi gha ye ekhọekekhọe ya uhi mwẹ ru emwi.

Maika 5:4

Ọ gha rre, ẹtin ne ọ ke ehe ne Nọyaẹnmwa ye rre ọre ọ ra ya gha khaemwisẹ yan emwa rẹn, deba orrirri ọba ọghe Nọyaẹnmwa Osanobua tobọ ẹre. Emwa rẹn gha rrọ vbe a i mwẹ ebe rhunmwuda, otọ agbọn hia gha miẹn ukpọlọmwẹ ọnrẹn kue.

Maika 7:14

Nọyaẹnmwa, gha re ne ọ su ohuan avbe emwa ruẹn, emwa ne u hannọ zẹ. A gha rhe miẹn wẹ iran ọkpa ọ ya yin fua vbe otọ ẹgbo, otọe ne ọ maa emwiokọ lẹga iran. Gie iran ya gha koko egbe iran vbe ehe ne oha ne aranmwẹ na rri evbare ne ọ mobọ maa nii, vbe Basian kevbe Giliad, zẹ vbene iran gha ru vbe ẹghẹ ne ọ kpee fua.

Zẹkaraia 11:7

Iran ni dẹlẹe kevbe ni vbe khiẹnnẹ avbe ohuan na, keghi rhie mwẹ vbe iwinna, mẹ keghi khian Ọsuohuan avbe ohuan ne a ra ya gbele ua. I keghi viọ ọkpọ eva mwẹ obọ, I keghi tie ọkpa vbọ “Aro ne ọ maa” kevbe nọkpa “Akugbe.” I na gha gbearoghe avbe oghẹn ohuan nii.

Zẹkaraia 13:7

E Nọyaẹnmwa ne Oghodua khare wẹẹ, “Umozo, rhiọrre, ne u dekun ọsuohuan ne ọ winna mẹ. Gbe ẹe rua, ne u gie avbe ohuan zagha kua, mẹ gha dekun avbe emwa mwẹ,

Hibru 13:20

Osanobua huẹn Nọyaẹnmwa Jesu Kristi kpao vbe idin nẹ, ọmwa ne ọ re Ọsuohuan Nọkhua ọghe avbe ohuan, rhunmwuda uwu ẹre ne a ya yi ile etẹbitẹ nii okhi.

I Pita 2:25

Wa keghi te ye vbe avbe ohuan ni bibi odẹ, sokpan, banbanna nian, a viọ uwa bu Ọsuohuan kevbe Nọgharoghe orhiọn uwa gha dee nẹ.

I Pita 5:4

Ẹghẹ ne Ogiete iran ne avbe Ọsuohuan gha na ya egbe ladian, ẹde uyi ne ẹ i fafaa, gha sẹ uẹ obọ.

Arhie Maan 7:17

Rhunmwuda, Oteghe Ohuan ne ọ rre adesẹ ẹkete ọre ọ khian gha re Ọsuohuan iran, ọ ghi vbe gha su iran ye uhunmwu ẹzẹ ehe ne amẹ ẹfe ye, Osanobua gha khiẹn ameve hia hin iran aro rre.”