Aizaia 33:2 - Edo Bible (E Baibol Ẹdo) Version 1996

² E Nọyaẹnmwa, tohan mwa. Wẹ ọ re ima mu ẹtin yan. Gha degue mwa ẹdẹgbegbe, ne u vbe miẹn ima fan vbe ẹghẹ ibaro.

Aizaia 33:2 ပူးပေါင်းရင်းမြစ်များ

Psalm 123:2

Zẹ vbene ọguọmwadia ye egbe yan arowa ẹre, zẹ vbene ọguọmwadia okhuo ye egbe yan aro wa ẹre nokhuo, erriọ ma khian gha ghe ruẹ obọ Nọyaẹnmwa Osanobua mwa a te do miẹn wẹ u tohan mwa.

Psalm 143:8

Gha ye mwẹ ẹre rre owiẹ owiẹ ighe ẹmwẹ ahoẹmwọmwa ruẹn ne ẹ i beghe, rhunmwuda, wẹ ọ re imẹ mu ẹtin mwẹ yan. Erhunmwu mwẹ hin odukhunmwu bu ruẹ dee, ma mwẹ odẹ ne I gha la.

Psalm 25:3

A i mu emwa ni mu ẹtin yan ruẹn gbotọ sokpan iran ni zẹgiẹgiẹ sọtẹ ruẹ.

Psalm 27:1

E Nọyaẹnmwa ọrọre uwanmwẹ mwẹ kevbe imiẹnfan mwẹ, de ọmwa ne ohan rẹn gha mu mwẹ? E Nọyaẹnmwa, ọ re ọ degue mwẹ, hin uwu ẹbe hia, afianma i ghi fianmwẹ.

Psalm 33:22

Gie ahoẹmwọmwa ruẹn ne ẹi beghe, gu ima gha rrọ, Nọyaẹnmwa, zẹ vbene idaehọ mwa rre uwu uwẹ.

Psalm 37:39

E Nọyaẹnmwa ọ re ọ miẹn ẹmwata fan ọ ghi degue iran vbe ẹghẹ orueghe.

Psalm 46:1

Osanobua ọrọre ugue kevbe ẹtin mwa, ọ mu egbe vbe ẹghẹ hia ne ọ ya ru iyobọ vbe ẹghẹ ukpokpo.

Psalm 46:5

Osanobua rre ẹvbo nii, a i vbe fuọn ruan ẹdẹdẹmwẹdẹ; ọ gha rre do yọre obọ vbe owiẹ vbirrivbirri.

Psalm 50:15

Ibaro gha rre, kpe tie mwẹ, I gha miẹn ruẹn fan wẹ ghi do gha rho mwẹ.”

Psalm 60:11

Yi ima obọ gu avbe eghian ni gbinna; kẹkan ọ re iyobọ ọmwa nagbọn khin.

Psalm 62:1

I hẹko ya izin egbe mudia khẹ Osanobua ne ọ do miẹn mwẹ fan. Rẹn okpa kẹkan ọre I mu ẹtin yan.

Psalm 62:5

Osanobua okpa ọ re I ya egbe yan idaehọ mwẹ vbe rre ọghọe.

Psalm 62:8

Wa ne emwa mwẹ, wa mu ẹtin yan Osanobua vbe ẹghẹ hia, wa ta enegbe uwa hia ma rẹn, rhunmwuda rẹn ọrọre ugue ne ima.

Psalm 90:15

Banbanna nian, rhie ọyẹnmwẹ ne ọ kpọlọ ne ima, vbe ẹghẹ usẹ mwa.

Psalm 91:15

Iran gha kpe tie mwẹ, I gha yaba iran vbe iran a gha rre uwu ibaro. I gha miẹn iran fan I gha vbe ye ọghọ ne iran.

Ẹksọdọs 14:27

Ẹre Mosis na niẹn obọ ẹre da okun, ẹdẹ ghi gbe, ẹzẹ keghi ro zẹ vbene ọ ka ye ẹdẹ. Ivbi Igipt ghi te ho ne iran lẹ, e Nọyaẹnmwa keghi filo iran ku uwu okun.

Aizaia 17:10

Izrẹl, wa mianmian Osanobua ne ọmwa ne ọ fannọ uwa kua, ọ na degue uwa zẹ vbe okuta nọkhua. Wa keghi ya gha fian erhan gbọọ, ne uwa miẹn ehe na gha ga ẹbọ ẹrrẹe vbe evba.

Aizaia 25:4

Ivbiogue kevbe iran ne ẹ i mwẹ iyobọ lẹẹ bu ruẹ rre iran kegha rrọ vbe a i mwẹ ẹbe vbe ẹghẹ ibaro. U rhie ehe ne iran lẹre yi vbe ẹghẹ okpẹhoho, kevbe irhu vbe ẹghẹ owowo ne ọ tọn. Emwa dan gbinna zẹ vbe ẹhoho okhuakhua

Aizaia 25:9

Ọna ghẹ ghi sunu, emwa hia ghi kha wẹẹ, “Rẹn ọrọre Osanobua mwa. Ma mu ẹtin mwa yan rẹn, ọ keghi vbe miẹn mwa fan. rẹn ọrọre Nọyaẹnmwa! Ma mu ẹtin mwa yan rẹn, banbanna nian, ma gha ghọghọ, ọyẹnmwẹ sẹ mwa, rhunmwuda ọ miẹn mwa fan.”

Aizaia 26:16

Nọyaẹnmwa, wẹ rri avbe emwa ruẹn oya, ugbẹn vbe obọ ghi da iran, iran keghi na erhunmwu ghe ruẹ.

Aizaia 26:8

ma lele vbene uwẹ ho, ma mwẹ idaehọ vbe uwu uwẹ, wẹ okpa ọrọre emwi ne ima ho.

Aizaia 37:3

Vbene ọ wẹ ne iran tama Aizaia ọ re ọna khin: “Ẹdẹ irrioya ọ re ẹdẹnẹrẹ na wa khin, a wa rri ima oya, a fa ima an. Ma ye vbe okhuo ne ọ te ra biẹ, sokpan orhiọn i rrọ ẹre re ne ọ gha ya biẹ ọe.

Aizaia 40:10

E Nọyaẹnmwa ne Udazi dee ra do ya ẹtin khaemwisẹ. Ọ ghi viọ avbe emwa ne irẹn miẹnfan mwẹ obọ gha dee.

Aizaia 51:5

I gha zẹgiẹgiẹ rre ne I do miẹn iran fan ẹghẹ akhọnmiotọ mwẹ sẹ otọ fo. Mẹ ọ re ọ ra tobọmwẹ gha khaemwisẹ yan avbe uhunmwu ẹvbo. Avbe otọe urria hia diakhẹ mwẹ ne I rre iran ya idaehọ mudia ne I do miẹn iran fan.

Aizaia 59:16

Ọ yan irẹn unu uan wẹ a i miẹn ne ọ yi ọmwa ne a wọ ẹre uhunmwu obọ. Rhunmwuda ọnii, ọ gha lo ẹtin ọghọe ne ọ ya miẹn iran fan kevbe ne ọ khọn miotọ.

Aizaia 8:17

E Nọyaẹnmwa rhie egbe ẹre lẹre ne emwa rẹn nẹ, sokpan, mẹ mu ẹtin yan rẹn, I vbe mwẹ idaehọ vbe uwu irẹn.

Jerimaia 14:8

Wẹ ọrọre idaehọ okpa kẹkan ne Izrẹl mwẹ wẹ okpa kẹkan ọ re ọ miẹn ima fan vbe obọ ọfuan. Vbọzẹ ne u na ye vbe ọrriọvbe vbe otọe mwa? Zẹ vbe ọmwa ne ọ rre okhian, ne ọ gbe asọn okpa kẹkan?

Eve Orriara 3:23

ọ ye rọkhọọ vbe owiẹ, ọ keghi vbe re ne ẹ i baku zẹvbe ne owẹn yanrre.

Hozia 14:2

Wa bu e Nọyaẹnmwa werriegbe gha dee, wa gie erhunmwu na gha re emwi ne uwa gha ya ha oko gie ẹe wẹẹ, “Ya orukhọ ima hia bọ mwa, ne u vbe rhan obọ miẹn erhunmwu ima hia. Ma gha vbe rho ruẹ zẹ vbene ima yan rẹn.