Aizaia 30:16 - Edo Bible (E Baibol Ẹdo) Version 1996

¹⁶ Wa keghi kun ẹẹn ne uwa hin ẹsin ni rhulẹ ẹsẹse lẹ fua vbe obọ eghian uwa. Ẹmwata wa nọ, ulẹ ọ re uwa gha lẹẹ, wa ro wẹ avbe ẹsin uwa wa rhulẹ ẹsẹse, sokpan iran ni khu uwa khian gha rhulẹ sẹẹ.

Aizaia 30:16 ပူးပေါင်းရင်းမြစ်များ

II Ọba 25:5

Sokpan, ivbi iyokuo e Babilọn keghi khu e Zedekaia iran na mu ẹẹn vbe otọe ne ọ rriẹe ne ọ rre ọkpẹn e Jẹriko, ivbi iyokuo ẹre hia keghi lẹ sẹ ọe rae.

Job 39:11

U gha sẹtin mu ẹtin yan ẹtin ẹnrẹn nọkhua ra, ne u gha khẹ ọre ne ọ do winna iwinna ruẹn ne ọ lọghọ?

Psalm 147:10

Ẹ i re avbe ẹsin ni mwẹ ẹtin ọ re ẹko rhiẹnrhiẹn yi, ra ne ọyẹnmwẹ gha sẹ ọe ye ẹmwẹ avbe ivbiyokuo ni wegbe.

Psalm 33:17

Avbe ẹsin okuo imwẹ asa vbe akhọnmiotọ, ẹtin iran nọkhua isẹtin miẹn ọmwa fan.

Aizaia 2:7

Otọe iran vuọn ne esiliva kevbe igoru. Ẹfe iran i vbe mwẹ inu. Otọe iran vuọn ne avbe ẹsin, ikẹkẹ okuo, iran i vbe mwẹ inu.

Aizaia 31:1

Ọ ghe iran ni ya gha nọ iyobọ vbe Igipt fo. Emwi igbinna ọrhẹnrhẹn ne Igipt mwẹ ọ re iran mu ẹtin yan, avbe ẹsin, ikẹkẹ okuo kevbe ivbiyokuo sokpan iran ma mu ẹtin yan e Nọyaẹnmwa, ne Osanobua nọhuanrẹn ọghe Izrẹl, ra ne iran nọ iyobọ vbe obọ ẹre.

Aizaia 31:3

Avbe ivbi Igipt i re ẹrinmwi, emwa kẹkan ọ re iran khin. Ẹsin iran ivbi re ni ke ẹrinmwi rre. Ẹghẹ ne Nọyaẹnmwa gha na guan yọ, ẹvbo ne ọ wegbe nii gha de guọghọ ua, ẹvbo ne ọ ma wegbe ne irẹn te yọre obọ ghi de. A gha fuẹn iran eveva a.

Jerimaia 39:4

Ugbẹn vbe Zedekaia ne ọba kevbe avbe ivbiyokuo ẹre ghi miẹn vbene emwi ye hẹ, iran kegha ho ne iran lẹkua hin ẹvbo rre vbe asọn. Iran keghi la odẹ ogba ọghe ọba, iran na lele onurho ne ehe ne ekẹn ọlẹga eva na vba egbe iran na lẹẹ mu aro da odẹ Iya e Jọdan.

Jerimaia 4:13

Ghe vbe eghian nii wa dee zẹ vbe ubimwẹ amẹ. Avbe ikẹkẹ okuo ẹre yevbe ẹhoho ẹziza, okhian kẹ avbe ẹsin okuo ẹre sẹ oghohọn. Ma wiri, ọghe ima fo.

Jerimaia 46:6

Iran ni sẹtin rhulẹ i ra lẹ fe, avbe ivbiyokuo i ra sẹtin lẹ fe, vbe odẹ okuọ vbe ọkpẹn Yufretes, iran rrua owẹ, iran keghi dele.

Jerimaia 52:7

A keghi guọghọ ekẹn ẹvbo nii gberra. A gha rhe miẹn wẹ te ivbi e Babilọn ghae ga ẹvbo ni, avbe ivbiyokuo ni rrọọ keghi lẹẹ kua vbe asọn. Iran keghi la odẹ ogba ọha ladian iran na la onurho ne ọ rre ehe ne ekẹn eva na vba egbe, iran na lẹ ghe odẹ Iya e Jọdan.

Eve Orriara 4:19

Iran vin zẹ mwa khu okhian kẹ iran sẹẹ oghohọn ne ọ ke iso rre. Iran zọọ owẹ mwa ya sẹ uhunmwu oke; obọ iran vba mwa vbe a ma ro a ma kọ vbe ato.

Emọs 9:1

I keghi ya bẹghe vbe Nọyaẹnmwa mudia ke Ogiukpo. I keghi vbe họn vbe. Ọ taa ẹe wẹẹ, “Wa kinmwi odukhunmwu orrẹ ni rre Ọgua Osa ne obọ da ẹe sẹrriọ wẹ ne ẹyotọ ẹre mu rueghe. Wa bunnọ ehia kua, ne uwa gie iran dele gbe avbe emwa nii uhunmwu. I gha gbele iran ni dekẹe vbe uwu avbe emwa nii vbe okuo. Ọkpa ne ọ gha rrie i rrọ, ọkpa ne ọ gha miẹn uhunmwu i rrọ.

Maika 1:13

Wa ni rre Lakis, wa gbalọ ẹsin mu avbe ikẹkẹ okuo. Wa ọ re ọ ya egbe ta orukhọ ivbi Izrẹl wa na vbe gie Jerusalẹm ru orukhọ.

Habakọk 1:8

“Okhian kẹ avbe ẹsin iran sẹ atalakpa, iran vbe mu ohan sẹ avbe oduma ne ohanmwẹ gbe. Emwa ni hin ẹsin ọghe iran, ehe ne ọ rrei ọre iran kegha hin ẹsin gha dee, ẹsin ya owẹ guọghọ otọe hia. Iran ghi vin rre zẹ vbe oghohọn ne ọ ra gbe emwi.

Diuteronomi 28:25

E Nọyaẹnmwa ghi gie eghian uwa gha khọn miẹn uwa otọ. Wa gha la odẹ ọkpa mu igbinna gie iran, sokpan wa ghi la odẹ ihinrọn lẹ hin ehe ne iran ye rre. Afianma ghi gha fian emwa ni rre agbọn hia vbe iran a miẹn emwi ne ọ sunu vbe egbe uwa.

Diuteronomi 28:49

E Nọyaẹnmwa gha mu okpẹvbo ke ehe ne agbọn sẹe gha dee, emwa ne uwa i họn ẹvbo ne iran zẹ, ọ ghi mu ẹre aro da uwa. Iran ghi siẹn rhu uwa zẹ vbe oghohọn.