Aizaia 3:7 - Edo Bible (E Baibol Ẹdo) Version 1996

⁷ Sokpan, rẹn ghi wanniẹn wẹẹ, “Ẹ i re imẹ! I i sẹtin ru iyobọ ne uwa. I i mwẹ evbare a ma ghi wẹ ukpọn. Wa ghẹ ya mwẹ ru ọkaolotu uwa.”

Aizaia 3:7 ပူးပေါင်းရင်းမြစ်များ

Gẹnẹsis 14:22

Sokpan Ebram keghi wanniẹn wẹẹ, “Ekhọekekhọe ọre i wa ya vẹn ihẹn vbe odaro Nọyaẹnmwa Osanobua Nọyosẹ, ọmwa ne ọ yii ẹrinmwi kevbe agbọn.

Aizaia 58:12

Avbe emwa ruẹn gha dọlegbe bọ avbe emwi ni guọghọ ua ke ẹghẹ ni gha dee. Iran ghi bọlọ owa yan avbe ẹyotọ nẹdẹ nii. A ghi gha tie uwa emwa ni dọlegbe gbe ekẹn nii, emwa ni munọ avbe owa nii te khian itowa kpaegbe.”

Jerimaia 14:19

E Nọyaẹnmwa, te uwẹ wa he Juda fo fẹẹrẹ ra? Te uwẹ mu ohu emwa ni rre Zaiọn ra? Vbọzẹ ne u na mu ohu ima sẹ vberriọ yi ne a na miẹn wẹ, a i ghi sẹtin mu ima egbe rran? Ma rhie aro ye ọfumwegbe sokpan, emwi ọma rhọkpa ma sunu, ma rhie aro ye amu ọmwa egbe rran, sokpan, emwi ugborrirri ọ re ọ rre.

Eve Orriara 2:13

Eu, e Jerusalẹm, ẹvbo ne a ho ẹmwẹ ọnrẹn, e Jerusalẹm, vbe i a ghi ra miẹn ta? Vbe i a ra ya fu ruẹ ẹko rre hẹ? A ma miẹn ọmwa ne ọ he rri egbe oya ne uwẹ re na ẹdẹ. Ọkhọ ne ọ rruan ruẹn yevbe okun ne ẹ i mwẹ okhiẹ, idaehọ ighi zẹdẹ rrọ hiehiere.

Ezikiẹl 34:4

“ ‘Wa ma gbearoghe iran ni ma wegbe, wa ma sinmwi iran ni khuọnmwi vbọ, wa ma gba iran ni miẹn ikuangbe vbọ ẹwẹn. Wa ma ya viọ iran ni bibi odẹ vbọ werriegbe, ra ne uwa gualọ iran ni wiri vbọ viọ werriegbe rre. Sokpan, ne uwa gha na te ru vberriọ, wa keghi gha ru iran khọ.

Hozia 5:13

“Izrẹl ghi miẹn vbene obọ emianmwẹ da irẹn hẹ, e Juda ghi miẹn ẹwẹn ne egbe ẹre, Izrẹl keghi gha rrie Asiria ne ọ ya nọ iyobọ vbe obọ ọgbaisi nọkhua, sokpan, ọ ma sẹtin sinmwi iran, ra ne ọ kpe ẹwẹn iran rrie.

Hozia 6:1

Emwa ni khare wẹẹ, “Wa gie ima werriegbe bu e Nọyaẹnmwa. Ọ ru ima emwi nẹ, sokpan ẹ i mwẹ ọ ma mu ima egbe rran, ọ kuan ima nẹ, sokpan ọ gha gbalọ ima ẹwẹn ra u ma ro vberriọ?

Joẹl 1:16

Ma bolo aro ua gha ghe ẹre, vbe a fuẹn ima emwiokọ ua, ẹkorhiẹnrhiẹnmwẹ i ghi rre uwu Ọgua Osa Osanobua mwa.

Diuteronomi 32:40

Vbene aro na da ẹe ighẹ mẹ ọ re Osanobua ne ọ rrọọ, I niẹn obọ ghe ukhunmwu, I keghi yan,