Aizaia 3:24 - Edo Bible (E Baibol Ẹdo) Version 1996

²⁴ Ne iran gha na te gha lo ori ne ọ winhin, iran ghi gha wia. Ne iran gha na te gha ya ugbẹkun ni mose gba, iran ghi gha lo irri ne khuarakhuara, ne iran gha na te gha mwẹ eto ne ọ mose, iran ghi gbe akpan, ne iran gha na te rhuan ukpọn ne ọ mose, iran ghi silo osọnmwẹ ukpọn ye egbe, a ghi fi ose iran werriẹ khian emwiekhue!

Aizaia 3:24 ပူးပေါင်းရင်းမြစ်များ

Ẹsta 2:12

Egbe ose ne a ma iran re na, ukpo ọ re ọ ya ẹe vbe otọ — a ghi ya ori e maia lọ ẹre egbe la uki ehan, a ghi vbe ya ori ọghe basan lọ ẹre la uki ehan. Vbe iyeke ọna, a ghi gha viọ iran gie ọba Kzakzis ọsegbe ọsegbe.

Job 16:15

“I kegha khiẹ, I na gha rhuan ukpọn ne a ya ẹkpo ivin do. I tota ye ebubẹ zẹ vbe ọmwa ne a gbe fua.

Itan 31:24

Ọ gha do avbe ukpọn kevbe ọza, ọ ghi khiẹnnẹ ọẹn ne avbe ekpatẹ.

Itan 7:17

I gbe ori ne ọ winhin khakhae, avbe oziya, alọe kevbe esinamọn.

Aizaia 15:2

Emwa ni rre ẹvbo ne a tie ẹre Dibọn hin uhunmwu oke ya gha viẹ vbe aro ẹbọ. Ivbi e Moab gha viẹ, iran gha vbe khiẹ avbe ẹvbo ne a tie ẹre Nebo kevbe Mẹdeba. Iran khiokhio eto kevbe ẹtu iran muotọ ba ẹmwẹ akhiẹ na.

Aizaia 15:3

Emwa ni khian vbe ore viọ ukpọn akhiẹ rhuan, emwa gha viẹ, iran vbe khiẹ vbe adesẹ ughe kevbe ẹrhunrhun owa.

Aizaia 22:12

Ẹghẹ nii, Oghodua ne Udazi keghi datie uwa ne uwa gha viẹ kevbe ne uwa vbe gha khiẹ, ne uwa khiokhio eto ua, ne uwa vbe rhuan ukpọn akhiẹ.

Aizaia 3:23

ẹwu iran ne a la bẹghe iran egbe, ukhiọnfọ eto ovbiohuẹ, ukpọn ne a rhie kinnọ urhu kevbe ukpọn ugbaleto ne wọọrọ.

Aizaia 4:4

E Nọyaẹnmwa gha ya ẹtin ẹnrẹn bu ohiẹn, ọ ghi vbe kpe ẹe huan hin rre ighe orukhọ uhunmwu ẹvbo na, kevbe esagiẹn ne a gbe yotọ vbọ.

Aizaia 57:9

Wa sa ori ne ọ winhin ye egbe kẹe kevbe ori ne a ya wuo. Wa keghi ya gho e Molẹk. Wa gie emwa la erhan la irri ya gha gualọ ẹbọ ne uwa gha gho uhin ighẹ te uwa gie yo ẹvbo iran ni wulo nẹ.

Jerimaia 4:8

Rhunmwuda ọnii wa viọ ukpọn akhiẹ yọ, wa gha tu wa gha viẹ egbe. Rhunmwuda, ohu nọkhua ọghe Nọyaẹnmwa ma he la hin e Juda uhunmwu rre.

Jerimaia 48:37

Iran hia khiokhio eto mu otọ iran keghi vbe gbẹn ẹtu iran. Iran valọ obọ iran, edọmwadẹ ọghọe keghi vbe rhuan ukpọn akhiẹ.

Jerimaia 49:3

Ivbi e Hesbọn, wa gha tulo! A fuẹn Ai rua nẹ! Ikhuo e Raba, wa ya gha khiẹ! Wa viọ ukpọn akhiẹ ye egbe ne uwa gha khiẹ. Wa gha hẹ yo hẹ rre vbe uwu iro ne ọ hanrẹn. A gha mu e Milkọm ne ẹbọ uwa gha rrie iwe, ke ẹe ke avbe ohẹn ọnrẹn kevbe avbe ivbi ọba.

Jerimaia 6:26

E Nọyaẹnmwa khama emwa rẹn wẹẹ, “Wa viọ ukpọn akhiẹ ye egbe ne uwa gha wunnu vbe uwu emuẹn, wa ye ameve ne ọ rriara khiẹ zẹ vbe ne ọmwa gha khiẹ ukpọmọkpa, rhunmwuda emwa ne ọ ra do fuẹn uwa a gha dekun uwa vbe amaro amakọ.

Eve Orriara 2:10

Avbe eniwanrẹn e Jerusalẹm tota lele otọ vbe ahunwan hii, iran zẹẹ ebubẹ ye uhunmwu, iran keghi viọ ukpọn akhiẹ ye egbe. Evbokhunvbi hia hie uhunmwu ghe otọ.

Ezikiẹl 27:31

Iran zẹ eto iran ne uẹn, iran keghi viọ ukpọn akhiẹ ye egbe. Ekhọe iran hia rriara, vbe iran viẹ nii.

Ezikiẹl 7:18

Iran gha viọ ukpọn akhiẹ ye egbe, iran ghi gha guẹ kpẹkpẹkpẹ. A gha zẹlẹ iran hia eto, a ghi vbe fa iran uan.

Joẹl 1:8

Wa ne avbe emwa, wa gha viẹ vbe ọmọ okhuo ne ọ viẹ uwu ọdọ ne ọ te ra rọnmwẹ.

Levitikọs 26:16

I gha rri uwa oya. I gha si ọkhọ yan uwa uhunmwu, emianmwẹ ni i mwẹ ukhunmwu kevbe emwirraro ne ọ gha rhu uwa aro, kevbe ne ọ gha ya uwa gha rri ororo. Wa gha kọ emwiokọ uwa sokpan ẹ i ra ma ne uwa rhunmwuda eghian uwa gha khọn miẹn uwa otọ, iran ghi rri emwi ne uwa kọ ẹe.

Emọs 8:10

I gha ru ẹe ne uwa khiokhio eto, na uwa vbe viọ ukpọn akhiẹ ye egbe. Wa ghi ye vbe evbibiemọ ni khiẹ ukpọmọkpa ne iran biẹe. Tẹ ẹdẹ ne ẹdẹrriọ ra wa rriara ne ebi ro.

Maika 1:16

Wa ne ivbi e Juda, wa zẹ eto uwa ne uwa ya khiẹ emọ ne uwa ho ẹmwẹ ọnrẹn. Wa gie akpan gha rre uwa uhunmwu zẹ vbene ọghe ugu ye, rhunmwuda, a gha miẹn uwa ivbi uwa viọ gha rrie iwe.

Diuteronomi 28:22

E Nọyaẹnmwa ghi tue emianmwẹ ne ọ ke egbe ẹmwẹ ọkpa la egbe ọmwa ọvbehe ku uwa kevbe egbe ne ọ hinmwian kevbe ọnii, ọ gha ru ẹe ne amẹ ghẹ rhọ ọ ka uwa hia ghi so hie kevbe irhunrhun, ne ọ ya ẹe fuẹn emwiokọ uwa hia a. Ọfuan na ghi gu uwa gha rrọọ wa te ya wulo.

Diuteronomi 32:24

Ohanmwẹ kevbe emwirraro gha gbele iran an, emianmwẹ ne ọ mu ohan gha gbele iran an, I gha gie aranmwẹ akọn ne ọ gha gu iran khọn, kevbe ẹyẹn ne ọ mwẹ obi nọ ọ gha ho iran ẹmwẹ

I Pita 3:3

Wa ghẹ gha ya emwi itegbe te egbe ne uwa ba miẹn ehe na gha mose, egbe vbene uwa mẹ eto hẹ ra emwi itegbe ne uwa viọ ye egbe ra ukpọn ne uwa ya mu egbe.

Arhie Maan 11:3

Mẹ gha gie avbe osẹe mwẹ eva, ni yọ ukpọn ẹkpo ivin, iran ghi vbe ya gha kpe orhu ẹmwẹ Osanobua vbe uwu ikpẹdẹ iyeha yan uri yan arriaisẹn nii (1,260).”

Arhie Maan 16:9

Owowo ọhanabe ni kegha giẹn emwa uan, iran keghi ya ẹbọ yan eni Osanobua ọmwa ne ọ mwẹ asẹ vbe uhunmwu avbe egboghogbogho na hia, sokpan iran ma zobọ vbe orukhọ, ne iran rhie urhomwẹ ne ukpọlọmwẹ ọnrẹn.

Arhie Maan 18:9

Avbe ọba agbọn, ne ọ gu ẹe ruemwi awua kevbe orriarria, gha tu, iran gha vbe viẹ ne ẹvbo nii, vbe iran a miẹn ighogho ne ọ gbe vbe ọ gha giẹn.