Aizaia 26:6 - Edo Bible (E Baibol Ẹdo) Version 1996

⁶ Te iran ne a te wọ ẹre uhunmwu ghi khian lae gberra nian iran ghi gha ya ọwẹ mamaẹn ginna otọ.

Aizaia 26:6 ပူးပေါင်းရင်းမြစ်များ

II Ọba 9:33

Ẹre Jehu na tama iran wẹẹ, “Wa rrua ẹre fua!” Iran ke rrua ẹre fi otọ, esagiẹn ọnrẹn keghi gbe ku egbekẹn kevbe ẹsin. E Jehu keghi fi avbe ẹsin ẹnrẹn kevbe ikẹkẹ okuo ẹre nana ikun ẹnrẹn gberra.

Aizaia 11:4

ọ gha bu ohiẹn ẹmwata ne ivbiogue ọ ghi mu ẹzọ iran ne ẹ i mwẹ gui ọ ghi yi iyi wẹ ne a rri avbe emwa nii oya, avbe emwa dan gha vbe wulo.

Aizaia 25:10

E Nọyaẹnmwa gha degue Oke Zaiọn sokpan, a gha ya owẹ rrilo ivbi e Moab ginna otọ zẹ vbene a ya owẹ rri irunmwu ye uwu ekẹn nekhui ne a ya kọ emwiokọ.

Aizaia 28:3

Uhiomwẹ avbe ọkaolotu ni ne ayọn gbe, a gha ya owẹ rri ẹe ginna otọ.

Aizaia 29:19

Avbe ivbiogue kevbe avbe emwa ni mu egberriotọ gha vbe dọlegbe miẹn ọyẹnmwẹ ne Nọyaẹnmwa ne ọmwa nọhuanrẹn Izrẹl rhie ne ọmwa.

Aizaia 3:14

E Nọyaẹnmwa ra do buohiẹn avbe ediọn kevbe avbe ọkaolotu emwa irẹn, ọ baa iran ifi ẹzọ wẹẹ, “Wa ya de rhu avbe ogba azara, owa ọghe uwa vuọn ne emwi ne uwa miẹn avbe ivbiogue re.

Aizaia 3:15

Wa i mwẹ asẹ ne uwa gha ya gha piẹn emwa mwẹ ginnotọ, ne uwa vbe gha mu avbe ivbiogue vbuẹvbuẹ. Mẹ ne Udazi e Nọyaẹnmwa ne Oghodua ọ re ọ tae.”

Aizaia 37:25

U rhuọ ma mwẹ wẹ, u fian uhae u keghi wọn amẹ vbe ẹvbo ẹrrẹe, kevbe wẹ avbe ivbiyokuo ruẹ ya owẹ mama ẹzẹ e Naẹl ka.

Aizaia 60:14

Ivbi avbe emwa ni te gha wọ ruẹ uhunmwu gha rre. Iran ghi ya uhunmwu rhanmwẹ otọ ya ọghọ nuẹn. Avbe iran ni te ka gha giọ yi. Gha do ga vbe akharha ruẹ. Iran gha tie ruẹ ‘Ore nọkhua ọghe Nọyaẹnmwa,’ ‘E Zaiọn ne Ore Nọkhua ọghe Osanobua Nọhuanrẹn Izrẹl.’

Jerimaia 50:45

Rhunmwuda ọnii, danmwehọ vbene I khuan khọ e Babilọn hẹẹ, kevbe ne I ho ne I ru emwa rẹn hẹ ya sẹ egbe avbe ivbi iran, te a ra kpolo ehia gha rrie dọmwadẹ ọghọe ghi runran.

Daniẹl 7:27

A gha mu ẹtin kevbe ukpọlọmwẹ ọghe avbe otọe arriọba agbọn hia ne emwa Osanobua ne ọ Sẹehia. Ẹtin ọba ne iran mwẹ i vbe fo ẹdẹ. Avbe iran ni khaemwisẹ vbe otọ agbọn hia gha ga, iran ghi vbe gha họn ẹmwẹ iran.”

Zẹfanaia 3:11

Ọ gha sẹ ẹghẹ nii, ekhue i ghi ra ye gha mu uwa ne emwa mwẹ wẹ wa sọtẹ mwẹ. I gha viọ iran hia ni hio kevbe ni tọn egbe mu hin rre, wa i ghi ra dọlegbe sọtẹ ghe mwẹ ọvbehe vbe oke mwẹ nọhuanrẹn.

Malakai 4:3

Ẹdẹ ne I gha guan yọ, wa gha khọnmiotọ vbe uhunmwu emwa dan, iran ghi do yevbe ebubẹ vbe atataowẹ uwa.

Iyẹn ne ọ Maan Ọghe Luk 10:19

Wa danmwehọ, I rhie ẹtin ne uwa nẹ ne uwa ya gha rrilo ekpakpahuangan kevbe ẹyẹn muotọ, kevbe ẹtin vbe uhunmwu ẹtin hia ne Oghian ni mwẹ. Emwi ọkpa ne ọ gha kuan uwa, ẹ i rrọọ.

Ebe ne Pọl gbẹẹn gie emwa Rom 16:20

Vbe ọ ma he kpẹe wan, Osanobua ne ọ re uhunmwu ọfumwegbe mwa, gha guọghọ Setan ye atataowẹ uwa. Te ẹsọhẹ Nọyaẹnmwa Jesu gha guwa gha rrọọ.

I Kọrinti 1:26

Wa ghi ye rre vbene uwa gha ye hẹ vbe Osanobua tie uwa, etẹn mwẹ wẹ, ibozẹghẹ vbe gha mwẹ ẹtin, ibozẹghẹ ọre ọ vbe gha rre ukpo ne ọ yo vbe aro agbọn.

Jems 2:5

Wa danmwehọ etẹn mwẹ ni ghan. Avbe ivbiogue ni rre agbọn na, ọre Osanobua zẹe wẹ, iran mwẹ iyayi ẹsẹse kevbe wẹ, iran ọ ra yan arriọba ne irẹn ve iran ni ho ẹmwẹ ọnrẹn re.

Jọsua 10:24

Iran ghi viọ avbe ọba nii sẹ ehe ne Jọsua ye nẹ, ọ keghi tie ivbi Izrẹl hia rriegbe, ọ na tama avbe emwa iwinna rẹn ni lele ẹe gha khian wẹẹ, “Wa larre, wa viọ owẹ uwa yan ẹyaẹn avbe ọba na.” Iran keghi ru vberriọ.

Arhie Maan 2:26

Iran ni khọnmiotọ nẹ, I gha rhie egbe asẹ ne Erha mwẹ rhie mẹ vbe ne iran. I gha rhie asẹ ne iran yan avbe uhunmwu ẹvbo, ne iran gha ya ukpokpo ematọn khaemwisẹ yan iran, ne iran guọghọ iran rẹnkhẹn rẹnkhẹn zẹ vbe akhe. I gha vbe rhie orhọnmwẹ owiẹ ne iran.

Arhie Maan 3:9

U ghi danmwehọ. U ma miẹn avbe otu nii, ni re ọghe Setan, avbe ọhọn ohoghe ni, ni tie egbe iran e Ju vberriọ iran i re ọre, I gha ru ẹe ne iran bu ruẹ gha dee ne iran do mu ẹko rhu otọ, ne iran vbe ya uhunmwu rhanmwẹ otọ nuẹn. Iran hia gha rẹn ighe I ho ẹmwẹ ruẹn.