Aizaia 21:5 - Edo Bible (E Baibol Ẹdo) Version 1996

⁵ Vbe umian nii, a keghi le evbare eghọ yotọ. A keghi wa ukpọn lele otọ ne avbe emwa ne a tiere tota yi. Iran kegha re, iran na gha da. Vbe udomwurri, urhu asẹ okpa keghi tae wẹẹ, “Ewọe, wa viọ asa ne uwa mu egbe yotọ.”

Aizaia 21:5 ပူးပေါင်းရင်းမြစ်များ

II Samuẹl 1:21

“Amẹ i ghẹ dọlegbe rhọ, ra ne evbu tuo vbe oke Gilboa, te otọ ẹre hia gha de ihoi rua. Rhunmwuda, evba asa iran ni din ne a fara ye. Ọtọn ma rhu asa ọghe Sọl.

Aizaia 13:2

Tọn afiala okuo nii mu vbe uhunmwu oke ne ọ dihoi rua nii. Da tie avbe ivbiyokuo nii ne u vbe tọn obọ ruẹ mu da iran zẹ vbe igiemwi wẹ ne iran dekun onurho ẹvbo ne ọ tengbemu nii.

Jerimaia 46:3

“Avbe ọkaokuo ivbi Igipt wa davan wẹẹ, ‘Wa viọ asa uwa mwẹ, ne uwa khian la uwu okuo!

Jerimaia 51:11

E Nọyaẹnmwa bọọ avbe ọba e Midia yọ rhunmwuda, ọ ho ne ọ fuẹn e Babilọn ruan. Erriọ ọ re ọ ra ya rria ikhi ye ẹmwẹ Ọgua Osa ọghọe ne iran guọghọ ua. Arowa avbe ivbiyokuo ni ra do gbinna tama iran wẹẹ, “Wa zẹ ifẹnmwẹ uwa ukpẹ! Wa viọ asa uwa mwẹ.

Jerimaia 51:39

Te iran zuan ra? I gha le evbare ne iran, I gha ya ayọn ne iran da, iran ghi vbe gha ghọghọ. Iran gha ya vbiẹ vbe ne iran i ghi ra na rhiọrre ọvbehe.

Jerimaia 51:57

I gha ye ayọn ne avbe enikhaemwisẹ iran da, ne ọ gha gbe iran, avbe umẹwaẹn, ọkaolotu, kevbe ivbiyokuo. Iran gha ya lovbiẹ, sokpan iran i ghi rhiọrre. Mẹ ne ọba taa ẹe nẹ. Mẹ ọrọre Nọyaẹnmwa ne Oghodua.

I Kọrinti 15:32

A deghẹ, vbene ọ ye nii, ighẹ mẹ gu avbe “aranmwẹ oha,” gbinna vbe Ẹfisọs ba ẹmwẹ emwi agbọn na kẹkan, de ere ne ọ rrọọ mẹ? A deghẹ a i gele huẹn eniwulo nẹ kpao vbe idin, vbene emwa tae khian nii, “Wa gie a gha re ne a gha da, rhunmwuda, akhuẹ ma ra wulo.”