Aizaia 2:4 - Edo Bible (E Baibol Ẹdo) Version 1996

⁴ Ọ gha dọlọ avbe uhunmwu ẹvbo nekhua kugbe. Iran gha ya umozo iran dunmwu emwi ne ọ yevbe ẹguẹ kevbe asoro iran, iran gha ya dunmwu ikhu. Avbe uhunmwu ẹvbo ighi khọn okuo ọvbehe iran ighi mu egbe okuo ọvbehe.

Aizaia 2:4 ပူးပေါင်းရင်းမြစ်များ

Psalm 110:6

Ọ gha bu ohiẹn avbe uhunmwu ẹvbo ọ ghi ya ikun orinmwi vuọn ehe ne a na khọn okuo; ọ gha khọn avbe ọba uhunmwu otọ agbọn hia miotọ.

Psalm 46:10

Rẹn keghi kha wẹẹ, “Wa dobọ igbinna yi ne uwa vbe rẹn wẹ mẹ ọrọre Osanobua Ne ọ yo sẹẹ vbe avbe agbọn ẹvbo hia ne ọ yo sẹ vbe uhunmwu otọ agbọn.”

Psalm 46:9

Ọ dobọ okuo yi vbe uhunmwu otọ agbọn hia ọ bunnọ avbe uhanbọ ọ vbiolo avbe asoro ọ keghi vbe giẹn avbe asa a vbe erhẹn.

Psalm 82:8

Osanobua, larre, do rri ọba yan agbọn wẹ ọ re ọ yan uhunmwu ẹvbo hia.

Psalm 96:13

Ẹghẹ ne Nọyaẹnmwa gha na do kha yan agbọn, rẹn gha kha yan emwa ni rre agbọn na vbe ẹmwata kevbe a i ghe ikpanro.

Aizaia 32:17

Rhunmwuda ighe emwa hia ọ re ọ ra gha ru emwi ne ọ gbae, ọfumwegbe kevbe ẹkun ne ọ sotọ ghi gha rrọọ ẹghẹ hia.

Aizaia 32:18

Emwa Osanobua gha fe vbe obọ ukpokpo, owa iran ghi gha re ne ọfumwegbe ye kevbe ne ẹ i mwẹ ẹbe.

Aizaia 33:22

Ugbalọmwẹ ne a gbalọ okọ nii, i mwẹ asa, ukpọn ne ẹhoho ya sua ẹre khian i gia tan. Ma gha viọ emwi ne avbe ivbiyokuo eghian mwa mwẹ, iran gha bun sẹ vberriọ wẹ uhin ghẹ te obọ avbe arọ gha vbe vba vbọ. E Nọyaẹnmwa tobọ ẹre ọ re ọ ra gha re ọba mwa. Rẹn ọ re ọ ra gha khaemwisẹ yan mwa, ọ ghi vbe gha degue mwa.

Aizaia 42:1

E Nọyaẹnmwa khare wẹẹ, “Ọnọna ọrọre ọguọmwadia mwẹ ne I rhie ẹtin ye ọre iwu, ọmwa ne imẹ zẹe, ne ẹko mwẹ vbe rhiẹnrhiẹn ghe. Mẹ ya orhiọn mwẹ vuọn irẹn nẹ, ọ gha rhie ohiẹn ẹmwata la dọmwadẹ uhunmwu ẹvbo.

Aizaia 42:3

Rẹn i ra bun ovbi erhan ne ọ bi gọọ ra ne ọ dọ ukpa ne ọ gbe muẹinmuẹin yọ. Ọ gha rhie ibuohiẹn ẹmwata sẹ obọ agbọn hia.

Aizaia 9:5

Ibata avbe iyokuo ni mu okuo dee kevbe ẹwu iran ne esagiẹn gbe yi hia erhẹn gha giẹn ehia a.

Aizaia 9:7

Te ẹtin arriọba ẹre ra gha muan yọ, ọfumwegbe ọ re otọe arriọba ẹre ra gha ye vbe ẹghẹ hia te irẹn ra rriọba zẹvbe ọmwa ne ọ rriọba lele Devid ne Ọba ẹmwata kevbe uhunmwu ẹmwẹ ọ re irẹn ra ya gha mwẹ ẹtin; ke ẹghẹ na kpao ya sẹ ufomwẹ agbọn. E Nọyaẹnmwa ne Oghodua tae nẹ ighe erriọ rẹn ra ru ehia.

Hozia 2:18

Ogha sẹ ẹghẹ nii, mẹ gha gu avbe aranmwoha hia kevbe avbe ahianmwẹ ta ẹe kugbe, ne iran ghẹ kuan emwa mwẹ ọvbehe. I gha vbe viọ emwi igbinna okuo hia hin otọe nii rre, umozo kevbe uhanbọ hia I ghi gie emwa mwẹ gha rrọọ vbe ọfumwegbe kevbe ne a i na mwẹ ẹbe.

Hozia 2:20

I gha mu eyan mwẹ sẹ, I ghi ya uwẹ khian ọghomwẹ, wẹ ghi vbe miẹn imẹ zẹ vbe Nọyaẹnmwa ruẹn.

Joẹl 3:10

Wa ya unu ẹguẹ uwa dunmwu umozo, kevbe erọ ulema ọwua, asoro. Te avbe emitan gha ye vbe gbinna.

Joẹl 3:12

“Te avbe uhunmwu ẹvbo gha mu egbe, ne iran gha die Iya Ibuohiẹn. Evba mẹ ne Nọyaẹnmwa ra na tota, ne I bu ohiẹn, avbe ẹvbo ni lẹga eni hia.

Maika 4:3

Ọ gha bu ohiẹn ẹvbo ni mwẹ egbe ẹzọ. Avbe ẹvbo ni mwẹ ẹtin, ni sikẹ emwa kevbe ni rrei, iran gha ya umozo iran gbe ẹguẹ, kevbe asoro iran, erọ ulema. Uhunmwu ẹvbo i ghi mu okuo gie egbe ọvbehe, iran i ghi vbe mu egbe okuo ọvbehe.

Zẹkaraia 9:10

E Nọyaẹnmwa khare wẹẹ, “I gha viọ avbe ikẹkẹ okuo hin otọe Izrẹl rre. I ghi viọ avbe ẹsin hin e Jerusalẹm rre; avbe uhanbọ ne a lo vbe okuo, a gha bunnọ ehia a. Ọba ruẹ gha ru adọlọ ọfumwegbe ye ẹbu avbe uhunmwu ẹvbo; ọ gha khaemwisẹ ke okun ya sẹ okun ke Ẹzẹ Yufretes kpao yasẹ ehe ne agbọn sẹe.”

Iwinna 17:31

Rhunmwuda ọ bu ẹdẹ ọkpa ye otọ nẹ ne irẹn gha wẹ ne ọmwa ne irẹn hannọ zẹ nẹ, bu ohiẹn agbọn na hia vbe ne a i na bu eku. rẹn keghi vbe gie aro emwa da ọ na vbe ekpa ne ọna huẹn ọmwa ne a kha na kpaegbe vbe idin orinmwi!”

Arhie Maan 19:11

I keghi miẹn vbe ẹrinmwi kie ye otọ, ẹsin nọfua ọkpa kegha rrọọ, a kegha tie ọmwa ne ọ hin ẹnrẹn, Ọmwata kevbe Ne ọ ta uhunmwu ẹmwẹ. Ẹmwata ọre ọ ya bu ohiẹn kevbe ne ọ vbe ya khọn okuo ẹre.

I Samuẹl 2:10

A gha fuẹn eghian e Nọyaẹnmwa, ọ gha van yan iran ke ẹrinmwi rre, e Nọyaẹnmwa gha bu ohiẹn agbọn; ọ gha rhie ẹtin ne ọba ẹre, ọ gha rhie akhọnmiotọ ne ọba ne ọ hannọ zẹ.”