Aizaia 17:8 - Edo Bible (E Baibol Ẹdo) Version 1996

⁸ Iran i ghi ra dọlegbe mu ẹtin yan avbe Ogiukpo ne iran ya obọ iran ma, ra ne iran mu ẹtin yan iwinna obọ iran, avbe amazẹ ọghe Asiẹrra ne ẹbọ nokhuo kevbe avbe Ogiukpo ne a na giẹn eturari.

Aizaia 17:8 ပူးပေါင်းရင်းမြစ်များ

II Samuẹl 22:42

Iran gualọ iyobọ, ne ọ gha miẹn iran fan i rrọọ, iran tu tie Nọyaẹnmwa, sokpan ọ ma khuẹn niẹn iran.

II Krọnikol 14:5

Rhunmwuda ne ọ na wabọ avbe aro ẹbọ hiaa, kevbe aka ne a na giẹn eturari vbe otọ e Juda hia, ọfumwegbe kegha rre otọe nii vbe ẹghẹ ne ọ ya ẹe vbe ẹkete.

II Krọnikol 31:1

Iran ghi ru emwiukpo na nẹ, ivbi Izrẹl hia keghi khian lele ore ẹvbo ni rre Juda hia, iran keghi ya guọghọ orre okuta ni rrọ kua, iran keghi siẹn ama Asiẹrra ne ẹbọ ne okhuo sẹ otọ, iran keghi dunmwu avbe Ogiukpo kevbe aro ẹbọ iran ni ga ẹbọ hia a. Iran keghi vbe ru ẹe vberriọ vbe ehe ni dekẹe vbe Juda, kevbe otọe Bẹnjamin, Ifreim kevbe Manasẹ, iyeke ọnii, iran hia kegha die owa.

II Krọnikol 34:4

Zẹ vbene ọ gie iran, avbe emwa rẹn keghi guọghọ aro e Baal, iran dunmwu Ogiukpo ne a na giẹn eturari ni dekẹe hia a. Iran keghi lọkọ amazẹ Asiẹrra kevbe avbe amazẹ nekpa hia rẹnkhẹn rẹnkhẹn iran na bọnmwẹ ọẹn lele idin iran ni vbe gha gho iran.

Ẹksọdọs 34:13

Ye ihe ọnii, u ghi rẹnkhẹn aka iran an, u ghi guọghọ okuta iruemwi iran an, u ghi tọnnọ erhan iruemwi ẹbọ ne okhuo iran ighẹ Asiẹrra kua.

Aizaia 1:29

U gha gbe I ma rẹn ye ẹmwẹ avbe erhan kevbe ogba iruẹbọ ne u gha ghoo.

Aizaia 10:20

Ẹghẹ dee, ne a gha na miẹn wẹ iran ni miẹn uhunmwu vbe ivbi Izrẹl i ghi ra gha mu ẹtin yan avbe uhunmwu ẹvbo ni te ra wa fuẹn iran an fẹẹrẹ. Iran gha mu ẹtin yan e Nọyaẹnmwa ne ọ re Osanobua nọhuanrẹn ọghe ivbi Izrẹl, vbe ẹmwata.

Aizaia 17:9

Ọ gha sẹ ẹdẹ nẹdẹrriọ, avbe ẹvbo ne a gbe ekẹn gaa hia gha khian ne emwa na lẹkua, iran ghi sẹ ehia rae zẹ vbe itowa, ọ ghi yevbe avbe ẹvbo ne ivbi Hivi kevbe Amọri lẹẹ sẹraa ẹghẹ ne iran na gha lẹẹ ne ivbi Izrẹl.

Aizaia 2:8

Otọe iran vuọn ne amazẹ, emwi ne iran ya obọ iran ma ọ re iran ghi ghoo.

Aizaia 27:9

Sokpan, a gha ya orukhọ Izrẹl bọ ẹe vbe iran a lọ Ogiukpo okuta ọghe avbe ẹbọ iran ni ru ẹbọ nẹ zẹ vbe ebubẹ, ra a ghi miẹn wẹ a i ghi dọlegbe miẹn amazẹ ẹbọ okhuo ne iran tie ẹre Asiẹrra, ra ne Ogiukpo ne iran na giẹn eturari ye kẹe.

Aizaia 30:22

Wa gha viọ avbe amazẹ uwa ne a ya esiliva rhu, kevbe avbe amazẹ ne a ya igoru rhu, wa ghi viọ ehia kua zẹ vbe iku, wa ghi datu wẹẹ, “Wa kpahin odaro mwẹ rre!”

Aizaia 37:19

Ọ keghi giẹẹn avbe emwi ne iran gho ua emwi ne ọ ma sẹ ne a gho ọ re iran gha khin, amazẹ erhan kevbe okuta kẹkan ọ re iran gha khin, emwi ne emwa ya obọ ru.

Aizaia 41:29

Kẹkan ọ re avbe ẹbọ na hia wa khin, iran i sẹtin ru emwi rhọkpa hiehiere. Te avbe amazẹ na ye mitanmitan iran i mwẹ ẹtin rhọkpa.”

Aizaia 44:15

Ọmwa ghi rhie vbe erhan ya koko erhẹn, ọ ghi vbe rhie vbọ ya ka amazẹ, ọ ghi rhie vbọ ya hie erhẹn ne ọ ghae ra ne ọ ya le ebrẹd, ọ ghi ya obọ nọkpa ka amazẹ ne ọ gha gho.

Jerimaia 17:2

Ehe ne avbe Ogiukpo ye ọ re avbe emwa na ga, kevbe ne a mu gbọ ne Asiẹrra ne ẹbọ ne okhuo, vbe ehe ne erhan ne ọ mwẹ ebe ye, kevbe uhunmwu oke negiẹrẹ.

Ezikiẹl 36:25

I gha miẹn amẹ afọ yan uwa, awua ẹbọ ghi lahin uwa egbe rre, deba avbe emwi ọvbehe hia ne ọ te mu awua ye uwa egbe.

Hozia 14:8

A i ghi ra dọlegbe tie ivbi Izrẹl ye ẹmwẹ ẹbọ ọvbehe. I gha họn erhunmwu iran, I ghi vbe gha gbearoghe iran I gha mu irhu gue iran zẹ vbe erhan ne ẹ i khuọn ebe kua. Obọ mwẹ ọ re afiangbe iran ke rre.”

Hozia 14:9

Te emwa ne ẹwaẹn gba na gha rẹn otọ ẹmwẹ ne a gbẹnnẹ ye emwana, ọ ghi vbe la iran ekhọe. Odẹ ne ọ kere ọ re odẹ e Nọyaẹnmwa khin, evba nii ọ re emwa ẹmwata vbe la khian vbe ẹdagbọn iran. Sokpan, emwa orukhọ rrua owẹ, iran keghi dele rhunmwuda, iran ma ka ẹe yọ.

Zẹfanaia 1:3

Emwa ne agbọn hia kevbe avbe aranmwẹ oha, avbe ahianmwẹ kevbe avbe ehẹn. I gha ru ẹe ne avbe emwa dan de guọghọ ua. I gha fuẹn emwa ne agbọn uan, ọkpa ne ọ ra kẹe i rrọ. Mẹ ne Nọyaẹnmwa ọ re ọ ta ẹe.

Zẹkaraia 13:2

Vbe ẹghẹ ne a kha na, I gha viọ eni avbe ẹbọ hin otọe na rre, a i ghi miẹn ọmwa ne ọ gha ye iran rre ọvbehe. I gha rhie ẹre fua ighe ọmwaikọmwa ne ọ rhirhi kha ighe akhasẹ rẹn khin, I gha vbe gbe ukhu ẹre ua ighe ne a na ho ne a gha gho ẹbọ.

Diuteronomi 7:5

Vbene uwa gha ru iran na hẹ ọ re ọ na khin. Wa siẹn aka iran hia sẹ otọ, wa bunnọ orre okuta iruẹbọ iran ukhiọnmwẹ. wa giagia erhan iruẹbọ ne iran baba lele otọ kua, ne uwa vbe giẹn amazẹ iran an ighẹ Asiẹrra.