Aizaia 13:6 - Edo Bible (E Baibol Ẹdo) Version 1996

⁶ Wa gha tulo utumwẹ obalọ. Ẹdẹ e Nọyaẹnmwa sẹ otọ fo, ẹdẹ ne Oghodua ra mu ọfuan rre.

Aizaia 13:6 ပူးပေါင်းရင်းမြစ်များ

Job 31:23

Rhunmwuda ighẹ ohan irria ikhi Osanobua mu mwẹ, ohan i gunmwẹ danmwẹ emwi vberriọ ghe.

Aizaia 10:25

Vbe ọma he kpee na, I gha rrii uwa oya sẹ vbene I ho nẹ, I ghi dobọyi, I ghi ya fuẹn iran an.

Aizaia 10:3

Osanobua gha rria uwa ikhi nian, demwi ne uwa ra miẹn ru? Demwi ne uwa ra miẹn ru vbe ọ gha ke odẹ ne ọ rre tie ọfuan yan uwa uhunmwu? De ọmwa ne uwa gha lẹgbinna? De ehe ne uwa gha viọ avbe ẹfe uwa lẹre yi?

Aizaia 13:9

Ẹdẹ e Nọyaẹnmwa dee, ẹdẹ ọkhọ nii ọghe ohu kevbe okuosu ẹre nọkhua. Otọe agbọn gha khian ato, a ghi fuẹn avbe emwa orukhọ hia a.

Aizaia 14:23

I gha ya e Babilọn khian otọe ne ọ gbe ẹvbi, avbe esughusughu ọ re ọ ghi gha rre evba. I gha ya owẹ ne ọ gha, kpolo emwi hia gha rrie, kpolo e Babilọn, Mẹ ne Nọyaẹnmwa ne Udazi ọ re ọ tae.”

Aizaia 14:31

Wa gha go, ne uwa vbe gha tu nọ iyobọ, wa ne avbe okpẹvbo e Filistin hia. Wa runran, wa hia fẹẹrẹ. Amẹ ne ọ bii ne ọ re ebubẹ, ke odẹ okuọ dee, ivbiyokuo ne avbiẹrẹ okpa i rre otu ẹre.

Aizaia 2:12

Vbe ẹdẹ nẹdẹrriọ, e Nọyaẹnmwa ne Oghodua gha hie uhunmwu emwa ni mwẹ ẹtin hia rriotọ, iran hia ni hio, kevbe ni ya obọ rra ẹwẹe.

Aizaia 23:1

Uhunmwu ne a gie vbekpa Taia ọ re ọna khin. Gha go ugomwẹ akhiẹ, wa ne avbe oziguẹ ni gua vbe okun. E Taia ne eghute ẹvbo rua, a dunmwu ẹn ruan nẹ, avbe owa ni rrọ kevbe ehe ne okọ na yakọ khian itowa. Okọ uwa gha ke Saiprọs rre, wa gha họn iyẹn na.

Aizaia 34:2

E Nọyaẹnmwa wa mu ohu avbe uhunmwu ẹvbo hia kevbe avbe iyokuo iran. Ọ tae nẹ ighẹ te iran hia ra fuan.

Aizaia 34:8

Ẹghẹ ne Nọyaẹnmwa gha na miẹn e Zaiọn fan ọ re ọna khin, ọ ghi munọ avbe eghian rẹn gbotọ.

Aizaia 47:11

Ọfuan gha de rhuẹ. Ẹbo edunna ruẹn ọkpa ne ọ ra dae yi i rrọọ. Ọ gha rhurhẹ yan ruẹn vbe udomwurri. Ọfuan ne u ma ro u ma kọ.

Aizaia 52:5

Egbọre ọ re ọ vbe sunu vbe Babilọn na, oghunmwu ọ re uwa khin, a ma vbe ha osa rhọkpa ye uwa uhunmwu. Ẹghẹ hia ọ re iran ni khaemwisẹ yan uwa ya rhuọ, iran vbe ghagha, iran ghi gha ya unu rhia mwẹ uan.

Aizaia 61:2

Ọ gie mwẹ ne I ya kha, wẹ ẹghẹ sẹ nẹ, ne Nọyaẹnmwa gha ya miẹn emwa rẹn fan. Ọ ghi vbe khọn eghian iran muotọ. Ọ giee mwẹ nẹ I ya fu iran ni khiẹ ẹko rre,

Aizaia 63:4

Te I khare wẹ, ẹghẹ sẹe nẹ ne I gha na miẹn avbe emwa mwẹ fan, ẹghẹ sẹe nẹ ne I gha na rri eghian iran oya.

Aizaia 65:14

“Iran gha so ihuan oghọghọ, sokpan wa gha viẹ eve orriara.

Jerimaia 25:34

“Wa gha viẹe, wa ne avbe ọkaolotu, wa ne ọsuohuan avbe ohuan mwẹ. Wa gha khiẹ, ne uwa vbe gha werriẹ vbe uwu ebubẹ. Ẹghẹ sẹ nẹ nian ne a gha ya lọkọ uwa a, a gha gbele uwa vbene a gbele ogho.

Jerimaia 49:3

Ivbi e Hesbọn, wa gha tulo! A fuẹn Ai rua nẹ! Ikhuo e Raba, wa ya gha khiẹ! Wa viọ ukpọn akhiẹ ye egbe ne uwa gha khiẹ. Wa gha hẹ yo hẹ rre vbe uwu iro ne ọ hanrẹn. A gha mu e Milkọm ne ẹbọ uwa gha rrie iwe, ke ẹe ke avbe ohẹn ọnrẹn kevbe avbe ivbi ọba.

Jerimaia 51:8

E Babilọn de udemwẹ udomwurri, ọ keghi rẹnkhẹn uan. Wa khiẹ ọre! Wa gualọ ukhunmwu rhie ye ọre ẹwẹn, u gha ghe, ọ gha rrie.

Ezikiẹl 13:5

Iran i khẹ avbe ehe ne ekẹn na deguọghọ rua nẹ, a ma ghi wẹ ne iran dọlọ ekẹn nii gbe, rhunmwuda ọnii, a i sẹtin khẹ igbinna vbe ẹdẹ ne okuo gha la e Jerusalẹm vbe ẹdẹ e Nọyaẹnmwa.

Ezikiẹl 21:12

Ovbi ọmwa, kpe orhu eve orriara, emwa mwẹ ọ re a rhie umozo na bu dee, deba avbe ọkaolotu Izrẹl hia. Te a ra gbele iran an, deba avbe emwa nekpa. Ye obọ akhiẹ gbe ẹwẹe!

Daniẹl 5:26

Emwi ne a yae kha ọ re ena khin: a kaa ẹe: Osanobua kaa ikpẹdẹ arriọba ruẹ nẹ, ọ na mu ufomwẹ yọ.

Daniẹl 5:9

Vbene ọ ghi daa ẹe sẹ ighe emwi na, ọba Bẹlsiaza keghi dọlegbe gha kuagha, avbe ekhaẹmwẹ ọnrẹn ma ghi rẹn emwi ne iran gha ru.

Joẹl 1:11

Wa gha khiẹ, wa ne avbe ọwẹe wa gha viẹ, wa ni gbearoghe ogba azara rhunmwuda avbe ọka kevbe ọka irhuarhua, ya sẹ egbe emwiokọ nekpa hia, a dunmwu ehia a nẹ.

Joẹl 1:13

Wa yọ ukpon akhiẹ ne uwa gha viẹ ne avbe ohẹn ni ga vbe Ogiukpo. Wa gha rrie uwu Ọgua Osa, ne uwa ya ye asọn hia khiẹ! Ọka ra ayọn i ghi rrọ, ne uwa gha ya ru imuohan gie Osanobua uwa.

Joẹl 1:15

Ẹdẹ e Nọyaẹnmwa bu otọe nẹ ẹdẹ ne Oghodua, gha na gie ọfuan rre. Wẹ miẹn ohan ne ọ gha rre ẹdẹ ne ẹdẹrriọ!

Joẹl 1:5

Wa rhiọrre ne uwa gha viẹ, wa ne avbe ọdayọn, wa gha viẹ, wa ni da ayọn, iran dunmwu ehia a ighe avbe alimo ne a te ya ru ayọn ọgbọn.

Joẹl 2:1

Wa kpe okpe, wa si orhu okuo vbe Zaiọn ne oke nọhuanrẹn Osanobua. Wa gha guọ ivbi e Juda! Ẹdẹ e Nọyaẹnmwa dee ẹgiẹgiẹ.

Joẹl 2:11

E Nọyaẹnmwa ghi davan gie ivbiyokuo ẹre uhunmwu, otu iyokuo ni ru vbene ọ khare, wa bun ẹsẹse, iran vbe wegbe. U miẹn vbe ẹdẹ e Nọyaẹnmwa mu ohan hẹ. De ọmwa ne ọ gha miẹn uhunmwu vbọ?

Joẹl 2:31

Owẹn gha so ebiebi uki ghi do gha baa vbe esagiẹn ọ te sẹ ẹdẹ ne ẹdẹ nọkhua, ẹdẹ ugborrirri, ọghe Nọyaẹnmwa nii, gha ya egbe ladian.

Emọs 5:18

U miẹn vbe ọ gha ba so uwa hẹ wa ni rhie aro ye odẹ gha khẹ ẹdẹ e Nọyaẹnmwa. De emwi ne uwa ro ighe wa gha miẹn vbọ yi? Ẹdẹ ne ọ so ebiebi khian gha nọ ne uwa, ighe ẹ i re ẹdẹ uwanmwẹ.

Zẹfanaia 1:14

Ẹdẹ nọkhua ọghe Nọyaẹnmwa sikẹ otọ nẹ, ọ wa sẹẹ otọ fo, ọ wa dee ẹgiẹgiẹ! Ẹdẹ ne ẹdẹrriọ gha wa rriara, rhunmwuda, ovbiyokuo ne ọ wegbe sẹ gha rhie urhu hoho ua ẹdẹrriọ vbe ẹtin a ghi fo ẹe!

Zẹfanaia 1:7

Ẹdẹ ne Nọyaẹnmwa gha tota bu ohiẹn dee, rhunmwuda ọnii, wẹ hunwan zẹẹ vbe ehe ne ọ ye. E Nọyaẹnmwa wa mu egbe nian ne ọ ya emwa rẹn zọ ese, Ọ vbe gie ne a tie avbe eghian ne iran do fu emwi viọ vbe Juda.

Zẹkaraia 14:1

Ẹdẹ ne Nọyaẹnmwa ra tota gha bu ohiẹn sẹ otọ nẹ. Ẹdẹrriọ, a gha fu emwi viọ vbe Jerusalẹm, a ghi wa vbe sirra ruẹ gha ghae emwi ne a fu viọ nii.

Malakai 4:5

Sokpan, vbene ẹdẹ nọkhua ne ọ muohan ọghe Nọyaẹnmwa te do rre, I gha gie Elaija ne akhasẹ bu uwa gha dee.

Jems 5:1

Banbanna nian, wa danmwehọ mwẹ, wa ni fee. Wa gha viẹ, wa gha viẹ eve orriara ye ẹmwẹ ọkhọ ne ọ ra do sunu vbe egbe uwa.

Arhie Maan 18:10

Iran mudia ye urria, rhunmwuda, ohan oya ne ọ re mu iran, iran ghi vbe kha wẹ: “Okokokoo! Ena mu ohan gbe o! Babilọn ne ẹvbo nọkhua ne ọ wo vbe egbe, vbe uwu ẹgogo ọkpa, ọre a na rri uwẹ oya vbe nian!”