Aizaia 13:19 - Edo Bible (E Baibol Ẹdo) Version 1996

¹⁹ E Babilọn ọrọre otọe arriọba ne ọ mose sẹẹ vbe uwu ehia, emwi ne emwa rẹn ya hio nọ. Sokpan mẹ ne Nọyaẹnmwa gha dunmwu e Babilọn uan zẹ vbene i ru e Sọdom kevbe Gomorra.

Aizaia 13:19 ပူးပေါင်းရင်းမြစ်များ

Gẹnẹsis 19:24

E Nọyaẹnmwa keghi gie ugbofi ne ọ giẹn ke odukhunmwu rhọ yan Sọdom kevbe Gomorra vbe udomwurri.

Gẹnẹsis 19:25

Erriọ, e Nọyaẹnmwa keghi fuẹn okpẹvbo na eveva kevbe iya nii hia kevbe emwi hia ni zọ vbe otọe nii.

Aizaia 13:1

Uhunmwu ne a giee rre vbe ekpa e Babilọn ọ re ọ na khin, zẹ vbene Aizaia ne ovbi Amọz họn ẹẹn ke ehe ne Osanobua ye gha dee.

Aizaia 21:9

Wa ghe vbe iran wa dee nian ighẹ avbe ikpia ni hin ẹsin, ni vbe rre uviẹn eveva, odibo ne ọ bodẹ nii ọ re ọ kha vberriọ, “E Babilọn de guọghua, avbe ẹbọ ne iran gho hia wa rre otọ bẹẹrẹ, ehia rẹnkhẹn uan.”

Aizaia 47:5

E Nọyaẹnmwa tama e Babilọn wẹẹ, “Tota ne u hunwan hii vbe uwu ebiebi a i ghi dọlegbe tie ruẹ oloi avbe uhunmwu ẹvbo!

Aizaia 48:14

“Wa hia si koko, ne uwa danmwehọ! Ọkpa i rrọ vbe avbe ẹbọ ne ọ sẹtin tae yotọ wẹ ọmwa ne imẹ zẹe gha mu okuo yo Babilọn; emwi ne I ho ne ọ ru, ọ re ọ ra ru.

Jerimaia 25:12

“ ‘Vbe iyekọnii, I gha do rri e Babilọn kevbe ọba ẹre oya ye orukhọ iran. I gha fuẹn ẹvbo nii, I gha ya ẹe khian itowa ẹdẹdẹmwẹdẹ.

Jerimaia 49:18

Emwi ne ọ mian Sọdom kevbe Gomorra vbe ẹghẹ ne a na guọghọ iran kevbe avbe ẹvbo ni lẹga iran uan, ọ re ọ ra vbe rruan Idọm. Ọmwa i ghi dọlegbe yin ẹnrẹn ọvbehe. Mẹ ne Nọyaẹnmwa ọ re ọ taa ẹe.

Jerimaia 50:40

Emwi ne ọ rruan e Sọdom kevbe Gomorra, ọ re ọ ra vbe rruan e Babilọn, ẹghẹ ne I na fuẹn iran kevbe ẹvbo ni lẹga iran an. Ọmwa i ghi ra dọlegbe yin evba nii ọvbehe. Mẹ ne Nọyaẹnmwa taa ẹe nẹ.

Jerimaia 51:26

Okuta ne a ghẹ ghi lo i rrọ vbe itowa ruẹ ne a ya ẹe bọ owa. Te u ra yevbe ato ẹdẹdẹmwẹdẹ. Mẹ ne Nọyaẹnmwa ọ re ọ taa ẹe.

Jerimaia 51:29

Otọe guọe zẹzẹzẹ, ọ kevbe mu rueghe, rhunmwuda, e Nọyaẹnmwa mu ẹẹn sẹ nian ighe ne ọ na wẹ te irẹn ra ya Babilọn khian ato, ehe ne ọmwarhọkpa i ghi ye.

Jerimaia 51:41

E Nọyaẹnmwa khare vbe ekpa e Babilọn wẹẹ, “A khọn rẹn muotọ ighe ẹvbo ne uhunmwu otọ agbọn hia tian! U miẹn vbe Babilọn ghi khian ẹvbo ne ọ mianmwẹ ughe ne otọ agbọn hia hẹ!

Jerimaia 51:62

‘E Nọyaẹnmwa, u tae nẹ ighẹ u gha fuẹn emwa na sẹrriọ, a i ghi ra miẹn emwi ne ọ ma he wu rhọkpa vbọ, ọ re ọmwa nọ ra aranmwẹ, kevbe wẹ, ọ gha vbe gha yevbe ato ẹdẹdẹmwẹdẹ.’

Daniẹl 4:30

o keghi kha wẹẹ, “Ghe vbene Babilọn kpọlọ hẹ. Mẹ ọ re ọ bọọ ẹe ya ru igiogbe otọe mwẹ ne I ya rhie ma vbene ẹtin mwẹ kpọlọ sẹ hẹ kevbe iwegbe mwẹ, kevbe ẹtin ọba mwẹ.”

Emọs 4:11

“I fuẹn eso vbe uwu uwa a, zẹ vbene I fuẹn Sọdom kevbe Gomorra, wa ni miẹn uhunmwu vbọ keghi yevbe ovbi erhan ne ọ giẹn khian, a keghi rhie ẹre hin erhẹn rre. Sevba, wa ma ye bu mwẹ rre,” erriọ Nọyaẹnmwa khare.

Zẹfanaia 2:9

Omwa vbene a na miẹn wẹ mẹ ọrọre Osanobua ne ọ rrọọ ọghe Izrẹl, I vẹn ihen nẹ wẹ te a ra fuẹn Moab kevbe Amọn zẹ vbe Sọdom kevbe Gomorra. Iran gha khian otọ uye umwẹ kevbe itowa ẹdẹdẹmwẹdẹ ne ekie hinrin. Iran ni ghi miẹn uhunmwu vbe emwa mwẹ gha hẹ rhu iran, iran ghi mu otọ iran.”

Ebe ne Pọl gbẹẹn gie emwa Rom 9:29

Te ọ ye vbe ẹmwẹ ne Aizaia ka vbe ta yi wẹẹ, “Akpawẹ ẹ i re ne Nọyaẹnmwa Oghodua na sẹ rae ne ima vbe ivbi uniẹn mwa, ma ghẹ ghi do ye vbe Sọdom, ma ghẹ gha ye vbe Gomorra.”

Diuteronomi 29:23

Oha ghi khian ehe ọrhiae ne ọ dihoi rua ne ugbofi kevbe umwẹ lẹ rhu, a i kọ emwi yọ, irunmwu i ra vbe zọ vbọ. Otọe uwa ghi yevbe avbe ẹvbo e Sọdom kevbe Gomorra, zẹ vbe Adma ke Zẹboim, ne e Nọyaẹnmwa dunmwu an vbe ohu kakabọ mu ẹẹn.

Arhie Maan 18:11

Emwa ni do ẹki nekhua vbe agbọn kevbe gha viẹ, iran kegha khiẹ ọre rhunmwuda, iran ma ghi miẹn ọmwa ne ọ gu iran dẹ emwi ọvbehe.

Arhie Maan 18:19

Iran keghi kpolo ebubẹ ye egbe iran uhunmwu, iran kegha goo, iran na gha khiẹ wẹẹ, “Okokokoo! Ọna mu ohan gbe vbe egbe ẹvbo nii. Rẹn ọrọre ẹvbo ne emwa hia ni ghi mwẹ okọ ne ọ gua vbe okun nẹ, la ekpa ẹfe ẹre khian enọfe. Emwi na hia wa wi ẹre vbe ẹgogo ọkpa kẹkan!”