E Nọyaẹnmwa guaan nẹ wẹẹ, “Ọghe iran ni khaemwisẹ yan Igipt fo nẹ rhunmwuda, iran sọtẹ mwẹ. Uviẹn ne I ma vin ọ re iran lele. Iran ghi vbe ya gha gu emwa ke ọta ne I i ma kue yi, iran ghi gha kun orukhọ yan orukhọ.
Wẹ ọrọre erha mwa. Ebraham kevbe Jekọh ne avbe erha mwa odede ma ka ima yọ, sokpan, wẹ ne Nọyaẹnmwa, wẹ ọrọre erha mwa, wẹ ọ re ọmwa ne ọ wa miẹn ima fan dee ẹdẹ.
Avbe emwa mwẹ gha werriegbe rre vbe ne iran na viẹ, iran ghi vbe gha na erhunmwu vbe ehe ne I na viọ iran werriegbe dee ni. I gha ma iran odẹ gha rrie ẹzẹ amẹ, vbe odẹ ne ọ rriẹe kpẹghẹ, ehe ne iran i ra na rrua owẹ. Te I ye vbe erha ne Izrẹl Ifreim ọrọre ovbi mwẹ nọdiọn.”
Otọ agbọn, danmwehọ! Zẹ vbe emwi ne I ra ya rria iran ikhi ye uma ne iran si, I ra gie ọkhọ rruan iran na, rhunmwuda, iran he iruemwi mwẹ yotọ, iran ma vbe ya ẹmwẹ mwẹ ru emwi.
Rhunmwuda ọnii, wa ne oke nekhua kevbe negiẹrẹ, wa danmwehọ ẹmwẹ ne imẹ ne Nọyaẹnmwa ne Udazi tama uwa, kevbe uwa ne ivbi ẹzẹ kevbe iya, kevbe uwa ne ehe ne a ya khian itowa hia, kevbe uwa ne ore ẹvbo ne a lẹẹ sẹrae, ne a fu ẹre emwi hẹ, avbe ẹvbo ni yin lẹga ẹre na vbe yae gha gbogiẹ.
Ẹghẹ ne Jotam, Ehaz kevbe Hẹzekaia na gha re avbe ọba e Juda, ọ re Nọyaẹnmwa na gie Maika ne ovbi ẹvbo ne a tie ẹre Morẹsiẹt. E Nọyaẹnmwa keghi rhie avbe emwi na ma e Maika vbe ekpa Sameria kevbe Jerusalẹm.
Wa danmwehọ ẹmwẹ na, wa ne uhunmwu ẹvbo hia, wa danmwehọ, wa hia ni rre agbọn na! E Nọyaẹnmwa ne Udazi gha sẹ osẹe gbe uwa. Danmwehọ. Ọgua Osa ẹre vbe ẹrinmwi ọ re ọ ke guan rre.
Sokpan, zẹ vbe ọghomwẹ e Nọyaẹnmwa ya orhiọn rẹn kevbe ẹtin ẹnrẹn vuọn mwẹ ọ vbe rhie mwẹ ne I gha rẹn emwi ne ọ re ohiẹn ẹmwata, kevbe udinmwẹ ne I gha ya gha tama ivbi Izrẹl orukhọ ne iran ru.
E Nọyaẹnmwa ne Oghodua tama avbe ohẹn wẹẹ, “Te ọmọ ya ọghọ ne erha ẹe, ọviẹn vbe ya ọghọ ne arowa ẹre. Mẹ ọrọre erha uwa, vbọzẹ ne uwa i na ya ọghọ mẹ? Mẹ ọrọre arowa uwa, vbọzẹ ne uwa i na lohan mwẹ? Wa zan mwẹ wa ghi ye vbe gha nọ wẹẹ, ‘Vbe ima ya zan ruẹn hẹ?’
Te I tama uwa nian ne uwa zẹ vbọ, adeghẹ ẹfe nọ ra uwu, a deghẹ afiangbe Osanobua nọ ra ihẹn. I kevbe tie agbọn vbe ẹrinmwi ne iran sẹ osẹe ye ne uwa zẹe vbọ. Wa zẹ ẹfe.
Wa gha ru emwi na, I tie ẹrinmwi kevbe agbọn vbe osẹe ẹre na, wẹ wa gha rherhe gbẹro vbe otọ na. Wa i khian tọ vbe otọe ne ọ rre vbe a gha fian Jọdan rra ne uwa ra ya yin na. Te a ra wa fuẹn uwa fo fẹẹrẹ.