Ama ọnị o ve re avaba ịsị ọnị sị ẹhị ẹngụ anị mẹ ka avaba anị vị osusu. Ọ́ sị mẹẹ anka ọza oo rere aa dụ ahị avọọ nị. Ẹ yị nyị ịsị ọza aa dụ ịnị ẹhẹ ọnọnị ana nyị ọgụ vụrụ-vụrụ.
Ọza ọ zụ sị ịrẹyọyẹ ọnịrị ọbọ mẹ avaba ụkọrọ anị, dị ọ vị vaa para avaba ịsị ọ nyị hu. Dị ahịka ọza ẹnẹẹ yị yẹ ọ mẹmẹ wa ọ vaa sịị mẹ ẹhẹ nị. Ọsọnị ọnị rẹ vị osusu, dị ọ rẹ vị ịrẹyị odivi ọbanyị ọnya nị.
Ọza ana ayị Ohomorihi oo hine tù ọọ̄ sị ịrẹyọyẹ ọnịrị ayohinee yị, dị ọ mẹ ka ọ̀ yẹ ịsa nị, ama ọza odivi vị ọnị Ohomorihii mẹ ka ọọ kụ oguu gụ, dị ọ̀ va hụrẹ wa ụvọ yị ọza ene zee ọnị eyi. Ọsọnị bẹẹ rẹ vị osusu, vị ọza aa dụ ahị kẹnẹ nị.
Agụvị avọọ ọnị ọ sị o re ka ẹ yị nyị ịsị ẹyị ọza zụ mẹ huni ka, ọzọza ọ̀ọ rị ịsa ụkọrọ ọnị ọọ mẹ, dị oo hine ẹngụ anị ayị; ka avaba ene tụ ọzọza ịnị ẹhẹ ọ vị ọnọọ nị, ọza òo wu usu, vị ta ịnị ẹhẹ ọnọnị avọọ nị.
Dị ọnị va yẹ ka, ịsị e zoza hu ka ọza ọọ mẹ ịnị ẹhẹ ọ vị ka, ọọ rị ịsa, dị oo hú nị. A vọrọ ka ọza ọọ mẹ ẹngụ anị ayohine ịnị avaba ụkọrọ ọnị aa mẹ dị ẹ yị nyị eyi tụ́ ụhwọ́, ịnị ụmẹ chee ọnị Ohomorihi sị mẹ ẹyịza ịnị ẹhẹ nị.
Ọpa ụmẹ ọnị Ohomorihi ọ̀ọ sị yị wụ ka wa mẹ ịnị ẹhẹ osusu ọnọnị, ẹwụrị ose wu ọnị u sì ịrẹyị anị ọọ mẹ ẹhẹ dị wa mẹrị ẹngụ nịnị, ka ọnị Ohomorihi gà tu wu ịnị ẹhẹ ọnịrị ịnị ụkọrọ ọnị waa mẹ ọ vị ọnọọ nị.
Ohomorihi ọ́ọ nyị ẹngụ anị iyi, dị ọ sị ụkata mị ka ma yà anka ọza ana zụ tụra irehi ẹtẹẹtẹrẹ. Ma raà ká irehi ẹtẹ, dị ọza ẹnẹsa ọnị aa tụraa tụ́ ọọ ịrẹsụ nị. Ama ọzọza ò sị eyi pee, ọ mẹmẹ aa tụraa tụ́ ọọ!