Imatiwu 17:17 - IWE ỌNỊNỊ

¹⁷ Dị Ijeesu tụ́ ohi, dị ọ ka, “Sị ẹ vẹ dị ẹwụ nịnị anụmẹ ọnọnị ẹ̀ yị dọ wụ́, dị ụ maanị nyeeyi nịnị aanị? Ịzị mị vaa yàa pe wu nịnị nee tù? Ịzị mị vaa sị ẹngụụ dọ ịrẹyị awụ nịnị nee tù? Sị ọọ ve tù mi ịzẹnị!”

Imatiwu 17:17 ပူးပေါင်းရင်းမြစ်များ

Ahẹ Ụgama 95:10

Ohomorihi ộ kụ́ ayị hi aza ẹnẹẹ mẹ ịrayị ẹbẹẹva, Dị ọ kụkụ ka ivehu aza ẹnẹnị ẹ sị wa vene, ẹnịnị ẹ yị jẹẹ pè ọda anị.

Ọyịkụra 10:3

Di Imosiisi ọnịrị Eerọnị ne tù Ihwarawo dị ẹ ka Ẹnẹyịmavara ana vị Ohomorihi Anihiburu ka ộ yị va dọ ka ọnị aa ká ẹngụ anịị chi yị ọnị ọgọnị? Di Imosiisi nịnị ka Ẹnẹyịmavara kà ọ̀ hụrẹ aza anị ụvọ dị ẹ na, dị ẹ̀ na hẹkẹ ọnị.

Ọyịkụra 16:28

Dị Ẹnẹyịmavara va hị́ Imosiisi dị ọ ka, “Aanị ka aanị ụ mẹ̀ vaa mẹ akamawụ nịnị pooro di ụ wẹ yị jẹẹ pè ọda amị ọnịrị ịrẹyị ọnị mị kà wụ nịnị nị?

Ụhịrẹyị 1:22

Ẹwụ nịnị ọnụra tee! ịzị ụ vaa mẹ ụra nee tu nịnị? Ịhị eyi awụ nịnị vee hweyi? Ịzị ụ vaa ka ọsọọsa nee tụ nịnị?

Ụhịrẹyị 6:9

Onuworo, ụ́ụ́ sụ ara pooro kẹnẹ nị? Yere ụmẹ ọnị ụ vaa ha hụụnị ara?

Ayịsaya 19:14

Ẹnẹyịmavara ọ raà mẹ wa ka asị ẹ yẹ ịsị ẹ yaa mẹ. Avaba ịsa ana Anijipiti aa mẹ vị ana aa mẹ anka ọza ene eche aa mẹrị ana hyẹdụ ne ngụ ịzị ọ hẹrẹ hị́ avọọ.

Ijeremaya 4:14

Ẹwụ nịnị Anijerusarẹmị, hụụnị ebira odivi awụ nịnị dị wa ha. Ịzị ụ maanị vaa sị ịrẹyị odivi tụ ịnị ayị nee tu nịnị?

Ịrịka 14:11

Dị Ẹnẹyịmavara kà a yị Imosiisi ka, aanị ka aanị aza ẹnẹnị me vee yi ọnị tịtẹ nị? Avaba ohyozirenu pọpọrọpọ ọnị ọnị mẹ̀ ẹyị ẹnịnị, ẹnịnị ẹ yị yị sị ayị tụra ọnị.

Ịrịka 14:27

Ụpẹ ịrịka ya aza edivi ẹnịnị va sị rị uhuhu hi ọnị kẹ? Ụtọ anị o si hi yị ịrẹka ọnị ẹ yaa kụ́ ku ọnị.

Imatiwu 13:58

Ọ yị mẹ̀ ụkọrọ ohyozirenu baaba ịzọọ, agụvị ka ẹnịnị ẹ yị dọ ọ wụ́.

Imatiwu 16:8

Dị Ijeesu sị yẹ nị, dị ọ ka, “Ẹdọwụ awụ nịnị ộ da weyi. Sị ẹ vẹ dị ụ waa kà a ka wẹ yị za ịsọyịrị nịnị?

Imatiwu 17:16

Mâ sị ọọ ká ezirẹma awụ vẹ, ama ẹ yị nyẹngụ mẹ̀ ẹ yọ.”

Imatiwu 17:18

Dị Ijeesu tụ́ ụhwẹ echu ọnọọ ohuvọ, dị ọ hụụnị ẹngụ ozi ọnọọ nị. Ẹngụ ozi ọnọọ ộ ta hụrẹ ụmẹ ọnọọ.

Imatiwu 6:30

Ohomorihi ọ̀ọ vavọọ sị uzoza yị avị, oni u wèe re ajịnị, ụhwọọ dị a sị ọọ ká tụ́ ịnị ịra, wé ro ka ọ yị vaa sị ịta ene zoza hu avọọ kú wu nịnị ẹngụ? Ẹdọwụ awụ nịnị ộ da weyi kẹnẹ!

Imatiwu 8:26

Dị ọ kà a yị wa, dị ọ ka, “Sị ẹ vẹ du wee hí angwa nịnị? Ẹdọwụ awụ nịnị ô weyi, oo!” Dị ọ kwẹẹtẹ, dị ọ tụ́ ahị ọnịrị irehu ohuvọ nị, dị ẹtẹ tịtẹ sii nị.

Ịmaakị 16:14

Ịrẹma ọnọọ, dị Ijeesu rẹ sị ẹngụ zụ̀ ezirẹma anị ẹwụrọnya, ẹ́nịnị màa rị ịsa nị. Ộ tụ́ wa ohuvọ, agụvị ka ẹnịnị ẹ yị dọ ọnị wụ́, ayị ẹnịnị ọ sị katẹngụ, agụvị ka ẹnịnị ẹ yị dọ aza ene re ọnị ka ọnị ộ ha hụụnị isu wụ́.

Ịmaakị 9:19

Dị Ijeesu ka, “Sị ẹ vẹ dị ẹwụ nịnị anụmẹ ọgọnị ọ̀ yị dọ wụ́ vụrụ-vụrụ aanị? M mẹmẹ kụkụ vaa yà ịdị awụ nịnị kùu hu aanị? Ịzị mị vaa sị ẹngụụ dọ ịrẹyị awụ nịnị nee tù? Sị ozi ọnọọ vẹ!”

Iruuku 24:25

Dị Ijeesu va aa kà a yị wa ka, “Ho! Wâ vị ọnụra nịnị, oo! Wa mā hụra dọ avaba ịrẹyị ọnị ọnịsẹ nịnị kà wụ́ụ?

Iruuku 9:41

Dị Ijeesu ka, “Ho! Sị ẹ vẹ dị ẹwụ nịnị anị ụmẹ ọnọnị ẹ̀ yị dọ wụ́, dị ụ maanị nyeeyi nịnị aanị? M mẹ̀ kụkụ vaa yà ịda awụ nịnị hu aanị? Ịzị mị vaa sị ẹngụ dọ ịrẹyị awụ nịnị nee tù? Sị ozi ewu ọnọọ vẹ ịzẹnị!”

Ịjọọnụ 20:27

Dị Ijeesu kà a yị Ịtọmọsị ka, “Sị igege awụ tụ́ ịzẹnị, di u we re ụvọ amị! Rẹ tana ụvọ awụ, dị ụ wa sị tụ́ ịnị akaha amị! Asị ụ rẹ̀ kụkụ mẹ ayị ẹẹva, waa dọ ọ wụ́!”

Odeyi 13:18

Dị ọ sị ẹngụ dọ ịrẹyị ẹnịnị mẹ ẹhụụ ịrayị ẹbẹẹva ịnị ụnọmị nị.

Odeyi 2:40

Ipita ộ kà ịrẹyị ọrụrụ-ọrụrụ yị wa, dị aa dá ịpẹẹ yị wa ẹtẹẹtẹrẹ, ka ẹ̀ dọ ẹngụ ẹnịnị hụụnị ụya ana aa vẹ ịrẹsụ aza edivi ụmẹ ọnọnị.

2 Anịkọrịntị 11:1

Àa yẹ wa zụ sị ụtọ pe ụra ọnị maa vaa kà nịnị aanị! Navọ weyi batọ nịnị!

Iwe Ọhụhị Imosiisi ana aa hị́ Ọyịvatụrọda 32:5

Ama ẹwụ nịnị ọ raa rị ịvị Ẹnẹyịmavara nịnị, ebira odivi awụ nịnị wẹ yị kụkụ vị ezi anị nịnị. Ụ me divi avọọ ụ mẹ vị enevene nịnị nị.