Ijeremaya 31:12 - IWE ỌNỊNỊ

¹² Ẹnịnị vaa vẹ, dị ẹ jẹ ịrẹsụ dị ẹyaa jị ahẹ boro-boro. E vee hine ayị agụvị ịsọyịza ẹnẹ Ẹnẹyịmavara mẹ yị wa. E vee hine ayị agụvị ịsọyịrị, eche, ọnịrị angwẹ beri ịsụpa ọnị ọ vaa sịị yị wa. Ẹnịnị vị ana vaa yà anka ụbazị ana a da enyi hi avọọ. Ẹnịnị é yi me vene re ayodu.

Ijeremaya 31:12 ပူးပေါင်းရင်းမြစ်များ

Ahẹ Ụgama 130:4

Ama ẹwụ vị ana aa vagu ọza ana àa mẹ̀ ebira odivi, avọọ aza sịị̄ nyị angwahi awụ nị.

Ayịsaya 1:30

Vị ụ vaa sị mẹẹ anka ọchị ene su dị avị anị sị wọrọ avọọ nị. Mị ka vị ụ vaa yà anka ịsa ene hi ini ụbazị ọnị ọza ọ̀ yị ká enyi hi avọọ nị.

Ayịsaya 35:10

Ẹnịnị vaa sị ayohine na ngụ Ijeruasarẹmị, dị ẹ yaa jẹ ịrajẹ, dị ẹ yaa jị ahẹ naa pooro. Ẹnịnị vaa jẹ pooro, dị ẹ mā vana yẹ ịsị aā hị́ orere ọnịrị ayodu pàá.

Ayịsaya 51:11

Aza ọnị ọ dọ ha vaa ngụ Ijerusarẹmị ịnị ayohine, dị ẹ yaa jị ahẹ, di e yee na owu booboro agụvị ka ayị ẹnịnị ee hine. Ẹnịnị vị ana vaa jị ịrajẹ pooro agụvị ka ẹ sị hụụnị ayodu ọnịrị ẹngụ ọyị và hí.

Ayịsaya 52:8

Sị ụtọ pe ẹtẹ! Aza enee sere ẹkụra ee nowu. Ẹnịnị dudu aa jị ahẹ agụvị ka ayị ẹnịnị ee hine. Ee sị eyi ẹnịnị ee re ka, Ẹnẹyịmavara ọ sị varẹma aa vẹ Ịzayọnị.

Ayịsaya 58:11

Ẹnẹyịmavara kà ọnị vaa zụ wa oze pooro, dị ọnị sị ịsa ọyịza-ọyịza ọnị e yee si yị wa. Ọnị vaa sị ụkata yị wa, dị ẹ nyị ẹngwọnịya. Ẹ vaa ya anka ụbazị ana ya ịnị apasị ọnị enyi anị ẹ yị mā wụ̀ avọọ nị.

Ayịsaya 60:20

Ẹkụhị ayodu awụ vaa ta. Ẹnẹyịmavara vaa vị ẹtohweyi ẹnẹ ẹ yị ma ta yị ọ nị. Etohweyi anị ó hụụnị ọyị ọnịrị ụhwẹ.

Ayịsaya 65:19

Ayị ẹmị ụvọta vee hine agụvị Ijerusarẹmị, dị maa jẹ agụvị aza amị. Aza ẹ yị ma vana jị òrèrè ịzọọ; ọza ẹ yị me vene nowu ka à va gụ ẹnị ụvọ.

Ijeremaya 3:14

Ẹnẹyịmavara kà, vavẹ eehi nịnị, ka aanị ụ vị nịnị nị. Ọ kà ọnị vaa sị ọza ikonyi ikonya hụrị ẹkụra ọnya, aza ẹnị ẹẹva hụụnị ịrẹsụ ọnya, dị ọnị kụ wụ nịnị vavẹ ẹtẹ.

Ijeremaya 31:24

Aza vaa ra Ijuda ọnịrị avaba ẹkụra ene hi ịnị anị. Anaarẹ vee hi ịzọọ. Oseratẹmẹ ẹnịrị ịsụpa ẹnịnị vee hi ịzọọ.

Ijeremaya 31:25

Ọ kà, ọnị vaa sị ụkata yị aza ọnị ọ sị ngụ ẹngụ, ọnị vaa sị ịsọyịrịị yị aza ọnị ụngwẹ raa tụ ọkụmị dị ịnẹ ha wa.

Ijeremaya 31:4

Ọ kà, ẹwụ nịnị Anisirẹrị ọnị vanaa kụ ụ nịnị kwẹẹtẹ, ịzẹyịza dị ụ kwẹẹtẹ nịnị. Ụ vanaa sị ahịhya awụ nịnị, dị waa nyẹzẹ ụ waa maa jẹ ịrajẹ nịnị.

Ijeremaya 31:6

Ka ẹkụhị aa vẹ ọnị oserẹtẹ vaa yà ịrẹsụ ataba Ehwireemi dị ọ hị́ aza ka! Aa kwẹẹtẹ, dị aa vaa hịrẹ nọ ne tu Ẹnẹyịmavara Ohomorihi ayị.

Ijeremaya 31:7

Ẹnẹyịmavara kà, hụ̀ agụvị Anisirẹrị waa jẹ ịrajẹ dị waa jị ahẹ nịnị. Hụ agụvị Anisirẹrị wee nowu nịnị agụvị ka ẹnị ẹ vị ohirẹsụ avaba anẹkụra nịnị nị. Wee gono Ẹnẹyịmavara boro-boro, dị waa kà a nịnị ka, ọ sị aza anị ana vẹtẹ dọ ha.

Ijeremaya 32:15

Ẹnẹyịmavara Ochẹtẹẹngụ, Ohomorihi Anisirẹrị ọ sị ọ ka ka, a vànaa hị́ irehi, ẹtẹ ọnịrị ụbazị ịvayịnị ịzị ẹnị o.

Ijeremaya 33:12

Ẹnẹyịmavara Ochẹtẹẹngụ ka, ịzị ẹnaanị ana sị mẹẹ anka ẹtẹ ọyịwụ, dị ẹ̀ yị nyị aza à vị ịsụpa aanị, ọ vanaa nyị avị ohwoohu ịzị oseratẹmẹ nịnị zụ kụ atẹmẹ ẹnịnị ve hi.

Ijeremaya 33:13

Ẹnẹyịmavara kà, oseratẹmẹ nịnị vaa yà ẹkụra ene hi ịrẹsụ ataba ọnịrị iruvo ataba dị ẹyaa za atẹmẹ ẹnịị ịrịka. E vee hi eyi ụvẹtẹ Ijuda ọnịrị okokooro Ịbẹnjamịnị dị ẹyaa za atẹmẹ ẹnịnị ịrịka. Ẹnịnị vee hi ẹkụra eweyi-eweyi ana kara Ijerusarẹmị ọnịrị ịnị ẹkụra ẹbanyị-ẹbanyị ene hi Ijuda dị ẹyaa za atẹmẹ ẹnịnị ịrịka.

Ezikẹẹrị 17:23

Ọ kà ọnị vaa hị́ ọ tụ ịrẹsụ ataba ana nẹba hu kere-kere ẹtẹ Isirẹrị. Ọ vaa ha avọ, dị ọ tụ ẹtụtụ, dị ọ vara ọchị Isida ọyịza-ọyịza inomi irenyi-irenyi vaa mẹ ịrẹngwẹ tụ ọ, dị ẹ sị ịzọọ mẹ irehi.

Ezikẹẹrị 20:40

Ọ kà, agụvị ka ịnị ataba ọnịnị anị, ataba ana nẹba tụ ẹtẹ Isirẹrị, avaba ẹwụ nịnị Anisirẹrị vaa yaa hẹkẹ ọnị nị. Ayị anị vee hinee tu wu nịnị, dị ọnị ee zì ka wa va mẹ̀ ịsọvọ yị ọnị nịnị ịzọọ dị wa sị ịsị ịsọvọ awụ nịnị ene hu kere-kere ọnị ụ sị tụ irenyi nịnị va yị ọnị.

Ezikẹẹrị 34:14

Ọnị vaa kụ wa naa rị ịzị avị ozoza-ozoza hi, dị ẹ rẹ yaa naa rị ịrẹsụ ataba ene hi Isirẹrị. Ẹnịnị vaa sụ̀tẹtẹẹ hi ịzị avị ozoza-ozoza hi ịzọọ, dị ẹyaa rị avị ọyịza-ọyịza ịnị ataba Isirẹrị.

Ezikẹẹrị 36:30

Ọ kà ọnị vaa mẹ ọchị nịnị ẹẹ tụ ẹtụtụ ẹtẹẹtẹrẹ, dị ọnị mẹ ka ịsị ịnị aarẹ ẹ̀ mẹ va gwẹtẹ, agụvị asị ụngwẹ ana vaa mẹ ụhịị nyị wụ nịnị vana vẹ.

Ihoseya 3:5

Ama ịrẹma anị, Isirẹrị vaa vaka Ẹnẹyịmavara ọnịrị Idevidi ohinọyị ẹnịnị vẹ ịnị angwahi ọnịrị ẹgahị. Ẹnẹyịmavara vaa mẹ ọyịza yị wa.

Ijowẹrị 3:18

Ịnị ụmẹ ọnọọ ụbazị ịvayịnị ene hi ịrẹsụ ataba vaa mẹ̀ ẹtẹẹtẹrẹ, dị eche ịvayịnị gwẹẹtẹ hi ẹtẹ. Ịsụpa nịnị vee re avị rị ịrẹsụ ataba, dị ịrẹva ẹnịnị nyị enyi hyọkọ-hyọkọ. Avaba okuha ene hi Ijuda vaa ha irenu, di enyi ee sii hụụnị ịnị irehi Ohomorihi na ngụ inozi Ákesiya.

Ịhagayị 2:19

Ẹnẹyịmavara ộ rẹ kà a ka, ẹnịnị ẹ yị daka nyị ihu ayị, dị ẹ yi nyị ẹtụtụ ịvayịnị ọnịrị, ihwigi beri orivi, ọnị vaa mẹ̀ ka o ze yị wa.

Ịzakaraya 8:12

Ẹnịnị vaa chire ịsa ịnị ẹngwọọrọ. Ọchị ịvayịnị ẹnịnị vaa tụ́ ẹtụtụ, dị ẹtẹ zoza dị ọ mẹ̀ ịsa ẹtẹẹrẹ, Dị orihi aa zụ a mẹ vọrọ. Ẹnẹyịmavara kà ọnị vaa sị ịsa ẹnẹnị mẹ ogu yị aza ana vọ tụ́ ịzọọ.

Ịjọọnụ 16:22

Ayị awụ nịnị o si du booro aanị, ama mị vanaa vẹ vee hee wu nịnị; ịjọnọọ ayị awụ nịnị vee hine ẹtẹẹtẹrẹ. Ẹ yị nyị ọza ana va zụụ dọ wụ nịnị ẹngụ ayohine ọnọọ.

Aniroomi 2:4

Ohomorihi aa ngụ ayị awụ ẹtẹẹtẹrẹ, dị ọ rẹ nyayịnẹ nyị isuuru wụ nị. A vị du wee ree ịrẹyị ịyẹyẹẹ? Aa nị ka wẹ yị yẹ ka vị Ohomorihi aa vayị awụ di ee sì ka ọnị ọ̀ mẹ wụ di u we ro ịnẹ varẹma nị?

Ẹtore 21:4

Ohomorihi vee nyee avaba ẹgọọ hụụnị eyi ẹnịnị. Ayị kụkụ vaa nyị iswọọza, ẹ yị nyị ayodu, àa vị orere. Ayị rẹ kụkụ nyị ịsị ẹ vaa zị ọza, agụvị ka ịsa ịyẹẹyẹ ẹ́ẹ ta saka-saka.”

Ẹtore 7:17

Agụvị ka Ozi Atẹmẹ ana yà ọvịdị aga ohinọyị vaa tẹsị ẹnịnị anka oseratẹmẹ. Dị aa kụ́ waa nọ aha ene enyi ẹtẹ anaā mẹ ka ọza ọ̀ yàra pooro zịna-zịna yà. Ohomorihi vee nyee avaba ẹgọọ hụụnị eyi ẹnịnị.