Ijeremaya 27:10 - IWE ỌNỊNỊ

¹⁰ Ireche e yee che wụ nịnị nị, ọ̀ vavẹ ịrẹma anị vị ọnị ọnị vaa dụ wụ nịnị tụ ẹhẹ, dị a kụ wụ nịnị huu hụrẹ ẹtẹ awụ nịnị, dị ụ ne vú ẹtẹ nịnị nị.

Ijeremaya 27:10 ပူးပေါင်းရင်းမြစ်များ

Ọyịkụra 22:18

Ọnẹẹ ana aa mẹ ẹbẹ vị ana a vaa wụ̀.

Ijeremaya 14:14

Ama dị Ẹnẹyịmavara tụ ohi ka, ọnịsẹ ẹnẹẹ vi enee cheeche ka maa tụ ẹnị ụtụ. Ọ kà ọnị ẹ́ yị tụ wa ụtụ, ọnị ọ yị rẹ mẹ ọda ọnyọọnyị yị wa. Ẹnẹyịmavara kà ọnị ẹ yị nyị ụvọ tụ ịnị ẹtẹ ẹnẹ ẹ ka ẹnị ee re zị; ịsẹ ẹnẹ ẹ yaa ka vị ịrẹyị kẹnẹ-kẹnẹ ẹnẹ ẹ yaa sị ayị ẹnịnịị rò.

Ijeremaya 23:16

Ẹnẹyịmavara Ochẹtẹẹngụ ộ kà a yị Anijerusarẹmị nịnị ka, Asị ẹ wụ́ ịrẹyị ọnị ọnịsẹ ẹnẹnị aa kà o; ịrẹyị ireche ẹyaa mẹ ka waa tụra eyi nịnị nị. Ọ kà, ịrẹyị ọnị ọnịsẹ ẹnẹnị rò tụ ịnị ayị ẹnịnị ẹyaa kà a yị wụ nịnị nị, ẹ yị vị ịsị ọnị kà yị wa.

Ijeremaya 23:25

Ẹnẹyịmavara kà, ọnị ộ wụ ịsị ọnịsẹ nịnị anaa sị ịrẹha anịị cheeche ka vị ẹnị aa kà ịsẹ anị nị aa kà. Ẹnịnị ka ọnị ô tụ́ ẹnị ụtụ ịnị ụra ọnị ẹnị ra.

Ijeremaya 27:14

Ọnị ộ kà a yị Ịzẹdẹkaya ka, asị ọ wụ́ ịrẹyị ọnịsẹ nịnị anaa kà a yị wa ka asị ẹ dọ yị ohinọyị Anibabironi avọọ o. Vị e yee vene u nịnị nị.

Ijeremaya 27:15

Ẹnẹyịmavara ọnị ụvọta ka ọnị ẹ́ yị tụ wa ụtụ. Ireche e yee chee zị ka vị ọnị tụ ẹnị ụtụ nị, avọọ ọnị vaa dụ ẹwụrị ọnịsẹ enee cheechee wụ nịnị avọọ hi ẹhẹ dị aa wụ̀ wụ nịnị.

Ijeremaya 27:16

Ijeremaya ka ọnị ộ rẹ kà a yị ohirẹsụ irehi Ohomorihi nịnị ọnịrị aza ana vọ ka, Ẹnẹyịmavara kà; asị ụ wụ́ ịrẹyị ọnịsẹ nịnị anaa kà a ka ẹ yị nyị aa jẹẹ dị à kụ ẹnya ene hi ini irehi Ohomorihi và vẹ hụrị Ịbabịrọnị. Ireche eyee chee wụ nịnị nị.

Ijeremaya 28:11

Dị ọ kà a eyi avaba aza ka, Ẹnẹyịmavara kà aanị ọnị me vee che ọkẹẹkẹrẹ ohinọyị Inebukadineza hụrị avaba anẹkụra nịnị ọrọkọ nị. Ịnị akakana ịrayị ẹẹva ọnị vaa maanị mẹẹ nị. Ijeremaya ka, dị ọnị hụụ ịzọọ nị.

Ijeremaya 28:16

Avọọ, Ẹnẹyịmavara kà ọnị vaa sị ụ hụrị ẹhẹ. Wee sú dị ịrayị ọnọnị ọ̀ gẹ, agụvị ka wàa sị ịrẹyị irenu awụụ kụ̀ụ hịrẹ Ẹnẹyịmavara.

Ijeremaya 32:31

Ọ kà, ẹkụra ọnọnị me hụrẹ nyima, pooro va ngụ ajịnị, aza ene hi ịnị anị hụrẹ aa mẹ ayịị kụ ọnị dị ayị aa dọva nị. Agụvị avọọ ọnị ka ọnị ee vu wa ẹtẹ nị.

Ijeremaya 8:19

Sị ụtọ pe ẹtẹ, ịzị waa zị ịnị ẹkụra kẹnẹ, vị ọnị aa wụ̀ aza anị maa jị òrèrè. Ẹnịnị ka, aanị ka vị Ẹnẹyịmavara ẹ yị kụkụ ya nị? Aanị ka vị ohinọyị ẹ̀ yị kụkụ yà ịzọọ nị? Dị Ẹnẹyịmavara, ohinọyị ẹnịnị tụ́ ohi, dị ọ ka sị ẹ vẹ dị ụ na hẹkẹ ori nịnị, dị wee ku ẹtẹ yị ori ọzọga kẹnẹ-kẹnẹ ọnị ụ na dọ nịnị, dị waa sịị mẹ ayịị kụ ọnị nịnị?

Arụwẹ 2:14

Ireche kẹnẹ ọnịsẹ Anijuda nịnị ee che yị wa nị. Ẹnịnị ẹ yị kà ịzẹyịza yị wa, ẹnịnị ẹ yị sị zụ wa ka ẹ yaa mẹ̀ ebira odivi. Agụvị avọọ ẹnịnị ẹ yị ro ka a vọrọ ka ẹnị è ro ịnẹ varẹma.

Ịdanịyẹrị 4:7

Ịzẹyịza, â kụ avaba ẹnịnị eneē rè ẹtẹ, ọmahọnọ nịnị, ẹnẹbẹ nịnị, ẹnịrị aza ọkatẹngụ ene hi ịnị ẹkụra vẹ ọvịdị anị. Ịjị ẹ vẹ, ọnị ộ kà a yị wa ụra ọnị ọnị ra, ama ẹnịnị ẹ yị zụ ka iruvo anị yị ọnị.

Ịzakaraya 10:2

Ori nịnị ẹ yị ka ịrẹyọyẹ, ọhẹva nịnị vị ene cheeche, aza ana ka ụra vị enee vene aza. Agụvị avọọ aza aa woowo zị anka atẹmẹ ene vu avọọ nị. Ẹnịnị ẹẹ nyị ẹngụkata agụvị ka ẹnịnị ẹ yị ọza ene sere wa.

Ịmarakayị 3:5

Ẹnẹyịmavara Ochẹtẹẹngụ ka, ọnị vaa ka pe wa dị ọnị ọ mẹ̀ ọkarẹyị yị wa. Dị ọnị ụsẹ jị ịvị yị aza ana aa mẹ ẹbẹ, ọnịrị ọsẹrẹka nịnị, ne beri aza ana aa hị́ eku iruku, ọnịrị aza ana aa mẹ anụkọrọ rị, aza ana aa mẹ ẹvaya yị osoku nịnị ọnịrị ozi oku nịnị ne beri azọga ọnịrị aza ẹnẹ ẹ yị nyị angwahi anị.

Iwe Ọhụhị Imosiisi ana aa hị́ Ọyịvatụrọda 18:10

A sị a nyị ọza awụ nịnị ana rị ozi anị ịra ịrẹsụ ụta mẹ̀ ịsọvọ o. A sị ụ há ẹva nịnị, a sị u re ẹtẹ yị ọza nịnị, dị a sị ụ mẹ ahọnọ nịnị.