Orihi ọnịrị ata orihi vị anaā hụrẹ ẹbẹẹba vẹ, dị ẹ yị vavẹ ịzọọ, ẹ̀ yị vị ịjị ẹtẹ sị enyi hú. Ẹtẹ ọ̀ọ sị enyi hú, dị ọ mẹ ka ịsa ịnị aarẹ ẹ̀ chị́ hi ẹhẹ, dị ẹ si ihu yị ọza eneē mí ịsa ọyịna, dị ọ sị ịsọyịrị yị ọza.
Ọza ẹ yị kụkụ vaa hị́ wụ eneyi, a vị dị aa hị́ ẹtẹ awụ nịnị Enezweyị, ama ịrẹha ọwọọwa awụ nịnị ọ rị onimisi, Ẹtẹ awụ nịnị ọ rị Anaanyị. Agụvị ka ayị Ẹnẹyịmavara ô hine tu wụ, ọnị ọ vaa nyị ẹtẹ awụ nịnị anka ọza ộ nyị ọnẹẹ avọọ.
Dị ọ tu wa ohi ka ọnị vaa mẹ ka ịsa ịnị aarẹ ẹnịnị o zoza, dị ẹ nyị akụ ọnịrị eche ọwọọwa ne beri angwẹ ana hụ́ wa, dị ọ vọ ẹtẹ hi ẹtẹ. Agụvị avọọ Anẹkụra ana vọ ẹ yị kụkụ vaa sị wa ẹtẹ.
Ẹnẹyịmavara Ohomorihi kà a ẹnị ana vọ vị ọnị ọnị vaa zama a re anka á mẹẹ sị ịraa nyịna isiriva avọọ. Ọnị vaa zama wa re anka a mẹẹ̄ sị ịraa zama igooru avọọ. Ịjị ọnọọ ẹnịnị ẹ̀ẹ hị́ ọnị, ọnị vaa wụ́ wa. Ọnị vaa kà a ka aza anị ẹ vị nị, dị ẹnị rẹ kà ọnị ọ vị Ẹnẹyịmavara Ohomorihi ẹnịnị nị.
Ọ kà ẹnịnị ẹ kụ avaba agẹẹwụ ẹnịnị vị ịzị aā kụ ogu hi ịnị irehi anị, agụvị dị aa nyị ịsọyịrị ịzọọ. Dị ọ ka ẹnịnị ẹ zama ọnị re daa re, ọnị ẹ yị rẹ vaa na ozokete ihinẹba yị wa, dị ọnị mẹ ka o ze yi wa hyọvọ-hyọvọ.
Ama we vidii sì ka Ohomorihi ọ̀ọ mẹ ịjọva tụra wụ nịnị ịrẹsụ da, dị ụ wa rẹẹ mẹ̀ ịsa ana vọrọ nịnị, ka ọ vaa sị avaba ịsa ana vọ aanịị tụ̀ ọọ yị wụ nịnị.
Ohomorihi ẹnẹ ẹ̀ yị hyakụ sị Ozi anị ụvọta-ụvọta tẹ yị, ộ na a vọ ka ò sú yị avaba ayị. Ọza ana na aa sị Ozi anị ụvọtaa yị, si u ro ka ọ yị kụkụ zụ sị yị ọọhẹ kẹnẹ?
