1 ᑕᕐᓂᕋ ᓂᐱᖃᕋᓂ ᐅᑕᖅᑭᕗᖅ ᒎᑎᑐᐊᒥᒃ; ᐱᐅᓕᔭᐅᓂᕋ ᑖᑦᓱᒪᓐᖓᑦ ᐱᖕᒪᑦ.
ᑍᕕᑎᓗ ᐊᖓᔪᖅᑲᐅᔪᓪᓗ ᐅᓇᑕᕐᑐᒃᓴᓄᑦ ᓴᓂᕐᕔᒋᕗᑦ ᐱᔨᑦᓯᕐᑐᒃᓴᓂᒃ ᐊᓴᐸᐅᑉ ᐃᕐᓂᖏᓐᓂᒃ, ᕼᐃᒪᓐᑯᓐᓂᑦ, ᔨᑐᑕᓐᑯᓐᓂᓪᓗ, ᒎᑎᐅᑉ ᐅᖃᕐᑕᐅᖁᔭᖏᓐᓂᒃ ᐅᖃᕐᑎᒃᓴᓂᒃ ᓄᖃᕐᑎᓕᖕᓄᑦ, ᕼᐊᕐᐱᓄᑦ, ᓯᕙᓂᕋᐅᑎᓄᓪᓗ. ᓇᓗᓁᕐᑕᐅᓯᒪᔪᑦ ᐱᔨᑦᓯᕐᑐᒃᓴᐅᓪᓗᑎᒃ ᐅᑯᐊᖑᕗᑦ:
ᔨᑐᑕᓐᒥᑦ ᐱᔪᑦ, ᔨᑐᑕᐅᑉ ᐃᕐᓂᖏᑦ: ᒋᑕᓔᐊ, ᔨᕆ, ᔨᓮᐊ, ᓯᒥ-ᐂ, ᕼᐊᓴᐰᐊ, ᒪᑎᑍᐊᓗ, ᐱᖓᓲᔪᕐᑐᑦ, ᐊᑖᑕᒥᓂᒃ ᔨᑐᑕᓐᒥᒃ ᐊᐅᓚᑦᓯᔨᖃᕐᐳᑦ, ᒎᑎᐅᑉ ᐅᖃᕐᑕᐅᖁᔭᖏᓐᓂᒃ ᐅᖃᓪᓚᓚᐅᕐᐳᑦ ᓄᖃᕐᑎᓕᖕᓄᑦ ᖁᔭᓕᓂᒃᑯᑦ ᓂᕐᑐᐃᓂᒃᑯᓪᓗ ᐊᑕᓂᕐᒥᒃ.
ᐃᑲᔪᕐᑕᐅᓂᕋ ᐊᑕᓂᕐᒥᑦ ᐱᕗᖅ, ᕿᓚᖕᒥᒃ ᓄᓇᒥᒡᓗ ᓴᓇᓚᐅᕐᑐᒥᑦ.
ᑕᑯᒋᑦ, ᓲᕐᓗ ᐱᔨ ᐊᖓᔪᖅᑳᒥᓂᒃ ᑕᑎᖃᕐᐸᖕᒪᑦ, ᐱᔨᐅᔪᕐᓗ ᐊᕐᓇᖅ ᐊᖓᔪᖅᑳᒥᓂᒃ ᑕᑎᖃᕐᐸᖕᒪᑦ; ᑍᒫᒃᑕᐅᖅ ᑕᑎᖃᕐᓂᐊᕐᐳᒍᑦ ᐊᑕᓂᕐᒥᒃ ᒎᑎᑦᑎᓐᓂᒃ, ᑖᑦᓱᒪ ᓂᑲᒍᓱᓕᕐᓂᐊᕐᓂᖓᓂᒃ ᐅᕙᑦᑎᓐᓂᒃ ᐅᑕᖅᑭᓗᑕ.
ᓱᓕᑦᓯᐊᕐᓂᒃᑯᑦ ᑕᓯᐅᓚᐅᓐᖓ, ᐃᓕᓐᓂᐊᕐᑎᓪᓗᖓᓗ, ᐱᐅᓕᔨᒋᓪᓗᑎᑦ ᒎᑎᒋᒐᒃᑭᑦ; ᐃᓕᖕᓂᓪᓗ ᓂᕆᐅᒋᔭᖃᕐᐳᖓ ᐅᓪᓗᖅ ᓈᓪᓗᒍ.
ᐊᑕᓂᖅ ᐅᑕᖅᑭᒍᒃ; ᑯᒃᓴᓱᖏᓪᓗᑎᑦ, ᑕᕝᕙ ᐆᒻᒪᑏᑦ ᓴᓐᖏᓂᕐᒥᒃ ᑐᓂᓯᕕᒋᓂᐊᕐᐹ; ᐅᖃᕐᐳᖓ, ᐊᑕᓂᖅ ᐊᑏ ᐅᑕᖅᑭᒍᒃ!
ᑕᕐᓂᕗᑦ ᐅᑕᖅᑭᕗᑦ ᐊᑕᓂᕐᒥᒃ; ᐃᑲᔪᕐᑎᒋᒐᑦᑎᒍ ᓴᐴᓗᑕᕆᓪᓗᒍᓗ.
ᐃᓱᐊᕐᑐᓪᓕ ᐱᐅᓕᔭᐅᓂᖓᑦ ᐊᑕᓂᕐᒥᑦ ᐱᕗᖅ; ᓄᑭᖃᐅᑎᒋᕚᑦ ᐅᖁᒤᑦᑐᖃᕐᑎᓪᓗᒍ.
ᐊᑕᓂᕐᒥ ᐃᓂᓪᓚᖓᓕᕆᑦ, ᕿᓄᐃᓵᕐᓗᑎᓪᓗ ᐅᑕᖅᑭᑦᓯᐊᕆᑦ ᑖᑦᓱᒥᖓ; ᐱᓂᐊᕐᓗᖕᓂᕐᒥᖕᓂᒃ ᑲᔪᓯᑎᑦᓯᔪᑦ ᐃᓱᒫᓗᓕᕈᑎᒋᑦᑍᓕᒃᑭᑦ ᐅᕝᕙᓗ ᐱᐅᖏᑦᑐᒥᒃ ᐱᓇᓱᐊᕐᑐᑦ ᑲᔪᓯᓂᕆᔭᖏᑦ.
ᐅᖃᓚᐅᕐᐳᖓ, “ᐱᓂᐊᕐᓂᒃᑲ ᐅᑦᔨᕐᑐᕈᒪᕙᒃᑲ, ᐅᖃᕋ ᐱᐅᖏᑦᑐᓕᖁᓇᒍ; ᖃᓂᕋ ᓂᓪᓕᕐᑎᑦᑍᓕᔪᒪᕙᕋ; ᐱᐅᖏᑦᑐᓕᔪᑦ ᓵᓐᓃᑎᓪᓗᒋᑦ.”
ᐅᑕᖅᑭᕗᖓ ᕿᓄᐃᓵᕐᓗᖓ ᐊᑕᓂᕐᒥᒃ; ᓵᕝᕕᒋᕚᖓ ᓂᓪᓕᐊᓂᕋᓗ ᑐᓴᕐᐹ.
ᑖᓐᓇᑐᐊᖅ ᕾᕐᑐᕆᒐᒃᑯ ᐱᐅᓕᔨᒋᓪᓗᒍᓗ; ᓴᐳᑦᔨᔨᒋᕙᕋ, ᑕᕝᕙᓐᖓᑦ ᐊᐅᓚᑦᔭᒃᑎᑕᐅᓂᐊᓐᖏᓚᖓ.
ᒎᑏ, ᓂᕐᑐᕐᑕᐅᓂᐅᑉ ᐅᑕᖅᑭᕚᑎᑦ ᓮᐅᓂᒥ; ᐃᓕᖕᓄᓪᓗ ᐊᖏᒻᒪᕆᒍᑕᐅᓯᒪᔪᑦ ᐱᓂᐊᕈᑕᐅᔪᒫᕐᐳᑦ.
ᓂᐱᖅᑯᕐᑐᓪᓗᖓ ᒎᑎᒧᑦ ᓂᓪᓕᐊᓚᐅᕐᐳᖓ, ᒎᑎᒧᑦ ᓂᐱᖃᕐᓗᖓ, ᑖᑦᓱᒧᖓ ᑐᓴᕐᑕᐅᔪᒪᓪᓗᖓ.
ᑕᑯᒋᑦ, ᒎᑎ ᐱᐅᓕᔨᒋᕙᕋ, ᑕᑎᒋᓗᒍ ᑲᑉᐱᐊᓱᖕᓂᐊᓐᖏᓚᖓ; ᐄᓛᒃ, ᐊᑕᓂᖅ ᒎᑎ ᐱᔪᓐᓇᕐᑎᑦᓯᔨᒋᒐᒃᑯ ᐃᓐᖏᐅᑎᒋᓪᓗᒍᓗ, ᑖᓐᓇ ᐃᓛᒃ ᐱᐅᓕᔨᑖᕆᒐᒃᑯ.”
ᐊᑕᓂᕐᓕ ᐅᑕᖅᑭᕗᖅ, ᐃᓕᑦᓯᓐᓂᒃ ᐱᑦᓯᐊᕐᕕᖃᕈᒪᓪᓗᓂ; ᑍᒤᒻᒪᑦ ᒪᑭᑦᓱᒫᕐᐳᖅ ᓂᑲᒍᓱᖕᓂᕐᒥᓂᒃ ᖃᐅᔨᑎᑦᓱᒪᓪᓗᓯ, ᐊᑕᓂᖅ ᒎᑎᐅᖕᒪᑦ ᐊᑦᔨᒌᒃᑎᑦᓯᔪᖅ; ᖁᕕᐊᓱᒍᑎᒃᓴᖃᕐᐳᑦ ᐊᑕᓂᕐᒥᒃ ᐅᑕᖅᑭᔪᓐᓇᕐᑐᓕᒫᑦ.
ᐊᑕᓂᕐᒥᒡᓕ ᐅᑕᖅᑭᔪᑦ, ᐱᔪᓐᓇᕐᓂᖏᑦ ᓄᑖᓐᖑᕐᑎᑕᐅᔪᒫᕐᐳᑦ, ᐃᓴᕈᕐᒥᖕᓄᑦ ᑎᖏᔪᒫᕐᐳᑦ ᓇᒃᑐᕋᓕᒃᑎᑐᑦ, ᐅᓪᓚᒃᓯᔪᒫᕐᐳᑦ ᑕᖃᓂᐊᕈᓐᓃᕐᓗᑎᒃ, ᐱᓱᓕᕈᒫᕐᐳᑦ ᓅᑮᕈᑎᓂᐊᕈᓐᓃᕐᓗᑎᒡᓗ.
ᒎᑎᐅᑉ ᐊᓯᐊᓅᕐᓂᕗᑦ ᐱᖑᐃᑦ ᖄᖏᓐᓂ ᖃᖅᑲᓂᓗ ᐃᑲᔪᕐᓯᒪᓐᖏᓚᑦ ᐅᕙᑦᑎᓐᓂᒃ, ᐊᑕᓂᕐᒥ ᒎᑎᑦᑎᓐᓂ ᑭᓯᐊᓂ ᐃᓴᕆᐊᓕᒥᐅᑦ ᐱᐅᓕᔭᐅᕕᒃᓴᖃᕐᐳᑦ.
ᐊᑕᓂᖅ ᐱᐅᔪᒥᒃ ᐱᓂᐊᕐᕕᖃᕐᐳᖅ ᑖᑦᓱᒥᖓ ᐅᑕᖅᑭᔪᓄᑦ, ᑕᕐᓂᕐᒥᒍᑦ ᕿᓂᕐᑐᓄᑦ.
ᖁᑦᓯᖕᓂᕐᐹᖑᔫᑉ ᐱᖁᔨᓂᖓᓄᑦ ᐱᐅᔪᑦ ᓈᒻᒪᖏᑦᑐᓪᓗ ᐊᑑᑎᕙᒃᑭᕗᑦ.
ᑍᒤᒻᒪᑦ ᐅᒃᐱᖃᑎᒃᑲ, ᕿᓄᐃᓵᕆᑦᓯ ᐊᑕᓂᖅ ᑎᑭᑦᓯᐊᕆᓗᒍ. ᑕᑯᒋᑦ ᐱᕈᕐᓰᕕᓕᕆᔨᐅᑉ ᕿᓄᐃᓵᕐᓗᓂ ᐱᕈᕐᑐᐃᑦ ᑕᑯᒥᓇᕐᑐᑦ ᐱᕈᕐᓯᐊᕆᕔᑦ, ᕿᓄᐃᓵᕐᓗᓂ ᐅᑕᖅᑭᕗᖅ ᐅᐱᕐᖔᒃᑯᑦ ᐅᑭᐊᒃᓵᒃᑯᓪᓗ ᓯᓚᓗᖕᓂᐅᕙᒃᑐᓂᒃ.
