5 ᓯᕘᕋᓂᐅᑉ ᓴᔪᖕᓂᐅᓪᓗ ᑎᑭᒻᒪᖓ, ᑲᑉᐱᐊᓱᒃᔪᐊᕐᓂᐅᓪᓗ ᓵᓚᒋᕚᖓ.
ᑕᕝᕙ ᑍᕕᑎᐅᑉ ᐊᖓᔪᖅᑳᖁᑎᓕᒫᓂ ᔨᕉᓴᓕᒦᑦᑐᑦ ᐅᖃᐅᑎᕔᑦ, “ᒪᑭᓪᓗᑕ ᒫᓐᓇᑦᓴᐅᑎᒋ ᕿᒪᒃᓯᓕᕐᑕ; ᑕᒪᐅᓐᖓᑐᐊᕐᐸᑦ ᓴᐱᔭᐅᓗᑕ ᓵᓚᒋᓂᐊᕐᒪᑎᒍᑦ; ᑐᐊᕕᕐᓗᑕ! ᐋᑉᓴᓚᐅᑉ ᐱᕕᒃᓮᕈᑎᑐᐃᓐᓇᕆᐊᖃᕐᒪᑎᒍᑦ, ᐱᐅᖏᑦᑐᐊᓗᖕᒥᒡᓗ ᐅᕙᑦᑎᓐᓄᑦ ᑎᑭᑎᑦᓯᒐᔭᕐᒪᑦ ᐃᒡᓗᒐᓴᖕᒦᑦᑐᓕᒫᓪᓗ ᑐᖁᓪᓗᓂᒋᑦ!”
ᖃᓄᐃᓯᒪᓂᓐᓂᒃ ᐃᓱᒪᓕᕋᒪ ᑕᕝᕙ ᖁᐊᕐᓵᖓᕗᖓ, ᓴᔪᓕᕐᓗᖓᓗ ᑎᒥᒐᓗ ᕿᑲᕈᓐᓁᓪᓕᕗᖅ.
ᒎᑎᐅᑉ ᐊᔪᒐᖃᖏᑦᑑᑉ ᖃᕐᔪᖏᑕ ᐃᓗᒃᑯᑦ ᑲᐱᓯᒪᖕᒪᖓ; ᑐᖁᓐᓇᕐᑐᖏᓐᓂᒡᓗ ᑎᒥᒐ ᐃᒥᕐᓯᒪᓕᕐᓗᓂ; ᒎᑎᐅᑉ ᑲᑉᐱᐊᓱᒃᑎᑦᓯᓂᕐᒥᓄᑦ ᑎᑭᕝᕕᐅᑎᓯᒪᖕᒪᖓ.
ᑎᒥᒐ ᓴᔪᒃᐳᖅ ᐃᓕᖕᓂᒃ ᓯᕘᕋᓂᕐᒧᑦ; ᐃᖅᑲᕐᑐᐃᓃᓪᓗ ᑲᑉᐱᐊᒋᕙᕋ.
ᐃᓗᖏᕐᑐᕐᓂᓐᓂ ᐊᑕᓂᖅ ᓂᓪᓕᐊᕕᒋᕙᕋ, ᓂᐱᖅᑯᕐᑐᕗᖓᓗ ᒎᑎᓐᓄᑦ; ᑐᒃᓯᐊᕐᕕᒡᔪᐊᖁᑎᒥᓂᑦ ᓂᐱᒐ ᑐᓴᕐᐹ, ᓂᐱᖅᑯᕐᑐᓪᓗᖓ ᓂᓪᓕᐊᓂᕋ ᓯᐅᑎᖏᖕᓄᑦ ᑎᑭᑉᐳᑦ.
ᒎᑎᒐ, ᑕᕐᓂᕋ ᕿᒃᓵᒃᐳᖅ ᐃᓗᓐᓂ; ᑍᒤᒻᒪᑦ ᐃᖅᑲᐅᒪᔪᒪᕙᒋᑦ ᓄᓇᒥᑦ ᔪᐊᕐᑕᓂᒥᑦ, ᕼᐊᕐᒪᓂᐅᑉ ᖄᖓᓂᑦ, ᒥᓴᕆᐅᑉ ᖃᖅᑲᖓᓂᑦ.
ᓄᓇᕐᔪᐊᑉ ᐃᓱᐊᓂᑦ ᓂᓪᓕᐊᕕᒋᕙᒋᑦ, ᐆᒻᒪᑎᒐ ᓵᓚᐅᓯᒪᑎᓪᓗᒍ; ᑕᓯᐅᓚᐅᓐᖓ ᕾᕐᑐᒧᑦ ᐅᕙᓐᓂᑦ ᐳᕐᑐᓂᕐᓴᒧᑦ.
ᓂᐊᖁᕋᓗ ᐅᐃᑦᔭᓐᖑᓕᕐᓗᓂ ᑲᑉᐱᐊᓱᖕᓂᕐᒧᓪᓗ ᓴᔪᓗᓕᕐᓗᖓ, ᐅᓐᓄᖕᓂᐊᕐᑐᖅ ᐊᑯᓂᒋᓕᓚᐅᕐᐸᕋ ᑎᑭᐅᑎᒐᓗᐊᕐᒪᓪᓗ ᐱᐅᓂᕐᓴᒦᓚᐅᓐᖏᓚᖓ ᑲᑉᐱᐊᓇᕐᑐᓄᑦ ᑎᑭᑕᐅᒃᑲᓐᓂᑐᐃᓐᓇᓚᐅᕐᐳᖓ.
ᐳᑐᕐᓛᓂᒃ ᐊᓐᓄᕌᕈᒫᕐᐳᑦ, ᑲᑉᐱᐊᓱᖕᓂᕐᒧᑦ ᑕᑕᒥᓯᒪᓗᑎᒃ; ᑲᓐᖑᓱᖕᓂᖅ ᑮᓇᖏᓐᓂ ᑕᑯᒃᓴᐅᔪᒫᕐᐳᖅ, ᓂᐊᖁᑎᒡᓗ ᓴᓕᓗᒋᑦ ᓄᔧᕈᑎᔪᒫᕐᐰᑦ.
ᐅᖁᒤᒃᓴᓗᐊᓕᕋᒥ ᐊᒃᓱᕈᕐᓂᕐᓴᐅᓪᓗᓂ ᑐᒃᓯᐊᓕᕐᐳᖅ, ᐊᐅᒃᑲᕐᓂᖓᓕᕐᓗᓂ ᐊᐅᒃᑎᑐᑦ ᑯᑐᒃᑐᓂᒃ ᓄᓇᒧᑦ.
