1 ᒎᑏ, ᓴᐳᑎᓚᐅᓐᖓ, ᐊᑎᕐᓄᑦ, ᐅᓇᑕᕈᑎᓗᖓᓗ ᓴᓐᖏᔫᓂᕐᓄᑦ.
ᐅᖃᕐᓗᓂᓗ, “ᐊᑕᓃᖅ ᓯᕗᓕᑦᑕ ᒎᑎᖓᑦ, ᒎᑎᐅᓐᖏᓚᑏᑦ ᕿᓚᖕᒥ? ᐊᐅᓚᑦᓯᓐᖏᓚᑏᑦ ᐊᑕᓂᐅᕕᓕᒫᓂᒃ ᐃᓅᖃᑎᒌᒡᔪᐊᓂᒡᓗ? ᐱᔪᓐᓇᕐᓂᕐᔪᐊᖅ ᐊᔪᖏᑦᑐᕐᔪᐊᖑᓂᕐᓗ ᐊᒡᒐᖕᓃᑉᐳᑦ, ᓇᓪᓕᐊᓐᓄᓪᓘᓐᓃᑦ ᐊᑭᒪᔭᐅᔪᓐᓇᓐᖏᓚᑎᑦ.
ᐊᑕᓂᐅᑉ ᑐᓴᕐᓕᑎᑦ ᐅᖁᒤᑦᑐᒥᒃ ᐅᓪᓗᖃᕐᑎᓪᓗᑎᑦ; ᔧᑰᓪᓗ ᒎᑎᖓᑕ ᐊᑎᖓᑕ ᓴᐳᑎᓯᒪᓕᑎᑦ!
ᐃᖅᑲᕐᑐᓚᐅᓐᖓ, ᐊᑕᓃᖅ; ᐸᓯᔭᒃᓴᐅᓇᖓ ᐃᓅᓚᐅᕋᒪ; ᐊᑕᓂᕐᒥᒡᓗ ᑕᑎᖃᓚᐅᕋᒪ ᓴᖑᓚᐅᕐᓇᖓᓗ.
ᓲᕐᓗᑦᑕᐅᖅ ᐃᕝᕕᑦ ᐊᑎᕐᑐᑦ, ᒎᑏ, ᓂᕐᑐᕐᑕᐅᓃᑦ ᑎᑭᐅᑎᕗᖅ ᓄᓇᕐᔪᐊᑉ ᐃᓱᖏᓐᓄᑦ; ᐊᒡᒐᑎᑦ ᑕᓕᕐᐲᑦ ᑕᑕᑉᐳᖅ ᐃᓱᐊᕐᓂᕐᒥᒃ.
ᐃᑲᔪᓚᐅᕐᑎᒍᑦ, ᒎᑏ ᐱᐅᓕᔨᒋᔭᕗᑦ, ᐊᑎᕐᐱᑦ ᓂᕐᑐᕐᑕᐅᑦᔪᑎᒃᓴᖓᓄᑦ; ᓴᐳᑎᓚᐅᕐᑎᒍᑦ, ᐃᓱᒪᒋᔪᓐᓁᕐᕕᒋᓗᑕᓗ ᐊᔪᕐᓂᑦᑎᓐᓂᒃ, ᐊᑏᑦ ᐱᑦᔪᑎᒋᓗᒍ!
ᐊᖓᔪᖅᑳᕐᔪᐊᖅ ᐊᔪᖏᑦᑐᕐᔪᐊᖑᔪᑎᑦ ᓇᒡᓕᒋᔭᖃᕐᐳᑎᑦ ᓈᒻᒪᓈᕐᓯᒪᔪᒥᒃ; ᐋᖅᑭᒃᓯᓯᒪᕗᑎᑦ ᑍᒤᓪᓘᐊᕇᒃᑎᑦᓯᓂᕐᒥᒃ; ᓈᒻᒪᓈᕐᓯᒪᔪᒥᒃ ᐃᓱᐊᕐᑐᓕᓂᕐᒥᒡᓗ ᐋᖅᑭᒃᓯᕗᑎᑦ ᔧᑯᒃᑯᓐᓂ.
ᑖᓐᓇ ᑲᒪᒋᑦᓯᐊᕐᓯᐅᒃ ᐅᖃᐅᓯᖓᓗ ᓈᓚᒡᓗᒍ, ᐊᑭᕋᕐᑐᕐᓂᐊᕋᓯᐅᒃ, ᑎᓕᓯᒪᒐᒃᑯ, ᐊᑭᕋᕐᑐᕈᑦᓯᐅᒃ ᐊᔪᕐᑐᓕᓂᓯ ᐃᓱᒪᒋᔪᓐᓁᕐᓂᐊᖏᒻᒪᒋᑦ.
ᐊᑕᓂᐅᑉ ᐊᑎᖓ ᓇᐸᔪᕐᔪᐊᑎᑑᕐᐳᖅ ᐊᑕᕐᓇᕐᓂᖃᖏᑦᑐᖅ, ᐃᓱᐊᕐᑐᑦ ᕿᒫᕕᒋᕙᒃᐹᑦ ᐱᔭᐅᓇᕐᑐᖃᖏᒻᒪᑦ.
ᑍᒤᑦᑐᑦ ᓴᐳᑦᔨᔨᖓᑦ ᐊᔪᒐᖃᖏᑦᑑᖕᒪᑦ; ᐃᖅᑲᕐᑐᕐᑕᐅᑦᔪᑎᒃᓴᕐᓂᒃ ᐱᓇᓱᐊᕈᓐᓇᕐᒪᑦ.
ᑕᑯᒋᑦ, ᐊᑕᓂᐅᑉ ᐊᑎᖓ ᐅᖓᓯᒃᑐᒥᑦ ᑕᑯᒃᓴᐅᓕᕐᐳᖅ, ᐃᑯᐊᓚᔪᖅ ᓂᓐᖓᐅᒪᓂᕐᒧᑦ, ᐳᔪᕐᔪᐊᕐᓗ ᑕᑯᒃᓴᐅᓇᖏᑦᑐᖅ ᖁᒻᒧᐊᓕᕐᐳᖅ; ᖃᓂᖓ ᓂᓐᖓᐅᒪᓂᕐᒥᒃ ᑕᑕᑉᐳᖅ, ᐅᖃᖓᓗ ᐃᑯᒪᒥᒃ ᓄᖒᑦᓯᔪᒥᒃ ᐊᑦᔨᖃᕐᐳᖅ.
ᐱᐅᓕᔨᒃᓴᖓᑦ ᐱᔪᓐᓇᕐᓂᕐᔪᐊᖃᕐᐳᖅ, ᐊᑎᖃᕋᒥ ᐊᑕᓂᕐᒥᒃ ᐊᔪᒐᖃᖏᑦᑐᕐᔪᐊᕐᒥᒃ. ᓴᐳᑦᔨᓇᓱᒡᓗᓂ ᐊᔪᐃᓐᓇᕈᓐᓇᕐᑐᖅ, ᓮᓕᑦᓯᐊᕐᓂᕐᒥᒃ ᑎᑭᑎᑦᓯᔪᒫᕐᐳᖅ ᓄᓇᕐᔪᐊᕐᒧᑦ, ᐹᐱᓘᓂᒦᑦᑐᓪᓕ ᓮᓕᑦᓯᐊᕈᓐᓇᕈᒫᓐᖏᓚᑦ.
ᐃᕐᓂᕐᒥᒃ ᐃᕐᓂᔪᒫᕐᐳᖅ, ᑖᓐᓇ ᔩᓱᓯᒥᒃ ᐊᑎᕐᑖᕐᑎᓛᕐᐸᑦ, ᑖᑦᓱᒪ ᐃᓄᖁᑎᓂ ᐱᐅᓕᔪᒫᕐᒪᒋᑦ ᐊᔪᕐᓂᖏᓐᓂᑦ.”
“ᑕᑯᒋᑦ, ᐅᐃᒡᒐᓱᒃ ᐊᖑᒻᒧᑦ ᐊᒃᑐᕐᑕᐅᓚᐅᕐᓯᒪᖏᑦᑐᖅ ᓄᑕᕋᒃᓴᕐᑖᕈᒫᕐᐳᖅ, ᐃᕐᓂᕐᒥᒃ ᐃᕐᓂᔪᒫᕐᓗᓂ, ᑖᓐᓇ ᐃᒫᓄᐃᓕᒥᒃ ᐊᑎᖃᕐᑎᑦᓱᒫᕐᐹᑦ.” ᐊᑎᖓᑕ ᑐᑭᖓ ᐃᒤᓕᕗᖅ, “ᒎᑎᐅᑉ ᓇᔪᕐᐹᑎᒍᑦ”.
“ᐊᖑᑦ ᐱᔭᐅᒃᑬᔪᒫᕐᐳᖅ ᖃᑕᓐᖑᑎᒥᓂᒃ ᑐᖁᑎᑕᐅᖁᓪᓗᒍ, ᐊᑖᑕᐅᔪᕐᓗ ᑍᒫᑦᓮᓐᓇᖅ ᐱᔪᒫᕆᕗᖅ ᕿᑐᕐᖓᒥᓄᑦ; ᕿᑐᕐᖓᕐᓗ ᐊᖓᔪᖅᑳᒥᖕᓂᒃ ᐊᑭᕋᕐᑐᓕᕈᒫᕐᐳᑦ ᑐᖁᑕᐅᑎᑦᓯᓗᑎᒃ.
“ᐊᓯᐊᓂᒃ ᐱᐅᓕᔨᒃᓴᖃᓐᖏᓚᖅ, ᐊᑎᕐᑕᖃᓐᖏᓚᕐᓗ ᓄᓇᕐᔪᐊᓕᒫᒥ ᐃᓄᖕᓄᑦ ᑐᓂᔭᐅᓯᒪᔪᒥᒃ ᐱᐅᓕᔭᐅᑦᔪᑎᒃᓴᑦᑎᓐᓂᒃ.”
ᐊᖑᑏᑦ ᐃᓚᖏᑦ ᔨᑉᕼᐂᑎᒥᐅᑦ ᓴᐅᓕᒧᐊᕐᐳᑦ ᒋᐱᐊᒧᑦ, ᐅᖃᐅᑎᓪᓗᒍᓗ, “ᑍᕕᑎ ᐃᔨᕐᓯᒪᓐᖏᓚᖅ ᖃᖅᑲᒥ ᕼᐊᑭᓚᒥ, ᔫᑕᐅᑉ ᐃᓄᖃᔪᐃᑦᑐᖓᑕ ᑭᒡᓕᖓᓂ?”
