8 ᓴᐳᑎᓚᐅᓐᖓ ᑕᒻᒪᕐᓂᓐᓂᑦ ᑕᒤᓐᓂᑦ; ᓯᓔᑦᑐᓄᑦ ᒥᑕᐅᑎᒃᓴᐅᖁᓇᖓ.
ᓇᕐᕈᒋᔭᐅᑦᔪᑎᒋᔭᕋ ᓴᖑᑎᒍᒃ ᐅᕙᓐᓂᑦ ᐊᑐᕈᒪᖏᓐᓇᒃᑯ; ᐊᑐᕐᑕᐅᖁᔭᑎᑦ ᐱᐅᔫᖕᒪᑕ.
ᑕᕐᓂᕐᒪ ᐊᑕᓂᖅ ᐅᑕᖅᑭᕚ ᐅᓐᓄᐊᒃᑯᑦ ᖃᐅᔨᓴᕐᑎᐅᑉ ᐅᓪᓛᕈᕐᓂᐊᕐᓂᖓᓂᒃ ᐅᑕᖅᑭᔪᒥᑦ ᐊᑯᓂᐅᒃᓴᕐᓂᕐᓴᐅᓪᓗᖓ ᐊᒡᓛᑦ, ᐅᓐᓄᐊᒃᑯᑦ ᖃᐅᔨᓴᕐᑎᐅᑉ ᐅᓪᓛᕈᕐᓂᐊᕐᓂᖓᓂᒃ ᐅᑕᖅᑭᔪᒥᑦ ᐊᑯᓂᐅᒃᓴᕐᓂᕐᓴᐅᓪᓗᖓ.
ᑖᑦᓱᒪᓗ ᐃᓴᕆᐊᓕᑎᒃᑯᑦ ᐱᐅᓕᔪᒫᕐᐰᑦ ᐊᔪᕐᑐᓕᓂᖏᓐᓂᑦ ᑕᒤᓐᓂᑦ.
ᐊᑏᑦ ᐱᓪᓗᒍ, ᐊᑕᓃᖅ, ᐃᓱᒪᒋᔪᓐᓁᕐᕕᒋᓐᖓ ᑕᒻᒪᕐᓂᓐᓂᒃ, ᐅᓄᕐᑐᐊᓘᒐᓗᐊᕐᑎᓪᓗᒋᑦ.
ᐋᓐᓂᐊᕐᓂᒃᑲ ᑕᑯᓐᓈᑭᑦ ᐅᖁᒤᓪᓕᐅᕐᓂᒃᑲᓗ; ᐊᔪᕐᓂᒃᑲᓗ ᑕᒪᕐᒥᒃ ᐃᓱᒪᒋᔪᓐᓁᓚᐅᒃᑭᑦ.
ᖃᓂᕐᒥᖕᓂᒡᓗ ᐂᑦᑕᕐᓗᑎᒃ ᐅᕙᓐᓄᑦ ᐅᖃᕐᐳᑦ, “ᐋᕼᐊ, ᐋᕼᐊ, ᐃᔨᑦᑎᓐᓄᑦ ᓇᖕᒥᓂᖅ ᑕᑯᕙᕗᑦ.”
ᐃᓅᖃᑎᑦᑎᓐᓄᑦ ᓇᕐᕈᓇᕐᑎᓚᐅᕐᐸᑦᑎᒍᑦ, ᒥᑕᐅᑎᒃᓴᓐᖑᕐᓗᑕᓗ ᐊᓖᒃᑯᑎᒃᓴᓐᖑᕐᓗᑕᓗ ᐃᓄᖕᓄᑦ ᐊᕙᑎᑦᑎᓐᓃᑦᑐᓄᑦ.
ᐱᐅᓕᓚᐅᓐᖓ ᐊᐅᖕᒥᒃ ᐊᑭᓕᒃᓴᖃᕐᓂᕐᒥᑦ, ᒎᑏ, ᐱᐅᓕᔭᐅᓂᕐᒪ ᒎᑎᖓ, ᐅᖃᕋ ᑕᕝᕙ ᓂᐱᖅᑯᕐᑐᓗᓂ ᐃᓐᖏᕐᓂᐊᕐᐳᖅ ᐃᓱᐊᕐᓂᕐᓂᒃ.
ᑎᓕᓯᓂᐊᕐᐳᖅ ᕿᓚᖕᒥᑦ ᐱᐅᓕᓗᖓᓗ, ᓵᓚᒋᓂᐊᕐᐰᓪᓗ ᐅᕙᓐᓂᒃ ᑐᖁᑦᓯᓇᓱᐊᕐᑐᑦ. ᓰᓚ ᒎᑎᐅᑉ ᓇᒡᓕᖕᓂᓂ ᓱᖁᓯᔪᐃᑑᓂᓂᓗ ᑎᓕᓂᐊᕐᐹᒃ.
ᐱᐅᖏᑦᑐᓕᓂᕐᒧᑦ ᓵᓚᐅᓯᒪᓕᕐᑎᓪᓗᑕ, ᓈᒻᒪᖏᑦᑐᓕᓂᑦᑕ ᐃᓱᒪᒋᔭᐅᔪᓐᓁᕐᑕᐅᑦᔪᑎᒃᓴᖏᓐᓂᒃ ᑐᓂᓯᕗᑎᑦ.
ᐃᓅᖃᑎᑦᑎᓐᓄᑦ ᐅᐱᓐᓇᕈᓐᓃᕐᐳᒍᑦ; ᐃᔪᕿᑕᐅᑎᒋᔭᐅᓪᓗᑕ ᒥᑕᐅᑎᒋᔭᐅᓕᕐᐳᒍᑦ ᖃᓂᒋᔭᑦᑎᓐᓃᑦᑐᓄᑦ.
ᑐᓂᕐᕈᓯᕐᑎᑦᓯᔩᑦ ᐱᔨᑦᓯᕐᐸᒃᑐᑦ ᑭᒡᒐᕐᑐᕐᓗᑎᒃ ᐊᑕᓂᕐᒥᒃ, ᕿᐊᓕᕐᓕᑦ ᑐᒃᓯᐊᕐᕕᒡᔪᐊᑉ ᑐᕐᓲᖓᑕ ᑐᓂᕐᕈᓯᕐᕕᐅᓪᓗ ᐊᑯᓐᓂᖓᓂ; ᐅᖃᕐᓗᑎᒡᓗ, “ᐃᓄᖁᑎᑎᑦ ᓂᑲᒋᓚᐅᒃᑭᑦ, ᐊᑕᓃᖅ; ᐃᓅᖃᑎᒌᒡᔪᐊᓄᑦ ᔫᑎᐅᖏᑦᑐᓄᑦ ᓇᕐᕈᓇᕐᓯᑎᑕᐅᖁᓇᒋᑦ ᒥᑕᐅᑎᒋᔭᐅᖁᓇᒋᓪᓗ ᐅᖃᖁᓇᒋᓪᓗ, ‘ᓇᐅᒡᓕ ᒎᑎᖓᑦ?’”
ᐊᑕᓂᐅᓪᓗ ᐃᓄᖁᑎᓂ ᑭᐅᔪᒫᕐᐰᑦ ᐅᖃᐅᑎᓗᒋᓪᓗ, “ᑕᑯᒋᑦ, ᑐᓂᓯᕕᒋᓂᐊᕐᐸᑦᓯ ᓂᐊᖂᔭᒃᓴᒥᒃ ᕔᓂᒥᒡᓗ ᓄᑖᒥᒃ ᐸᐅᕐᖎᓪᓗ ᐅᕐᓱᖏᓐᓂᒃ, ᓈᒻᒪᒃᓯᓂᐊᕐᐳᓯ ᐃᓅᖃᑎᒌᒡᔪᐊᓄᓪᓗ ᓇᕐᕈᒋᔭᐅᓂᐊᕈᓐᓁᕐᐳᓯ.
ᐃᓚᑦᓱᒍᓱᓕᕐᓂᐊᕐᒥᔪᖅ ᐅᕙᑦᑎᓐᓂᒃ, ᐱᐅᖏᑦᑐᓕᓂᕗᑦ ᓵᓚᒋᓂᐊᕐᐰᑦ. ᐊᔪᕐᑐᓕᓂᕗᑦ ᐃᒋᓐᓂᐊᕐᐸᑎᑦ ᐃᒪᕐᕕᐅᑉ ᐃᑎᓂᕐᐹᖓᓄᑦ.
ᐃᕐᓂᕐᒥᒃ ᐃᕐᓂᔪᒫᕐᐳᖅ, ᑖᓐᓇ ᔩᓱᓯᒥᒃ ᐊᑎᕐᑖᕐᑎᓛᕐᐸᑦ, ᑖᑦᓱᒪ ᐃᓄᖁᑎᓂ ᐱᐅᓕᔪᒫᕐᒪᒋᑦ ᐊᔪᕐᓂᖏᓐᓂᑦ.”
ᑖᓐᓇ ᐃᒻᒥᓂᒃ ᑐᓂᓚᐅᕐᒪᑦ ᐅᕙᑦᑎᓐᓄᑦ ᐱᐅᓕᔪᒪᓪᓗᑕ ᐱᐅᖏᑦᑐᓂᑦ ᑕᒤᓐᓂᑦ ᐃᑦᔪᕐᓁᑦᑐᓐᖑᕐᑎᑦᓱᒪᓪᓗᑕᓗ ᓇᖕᒥᓂᖅ ᐃᓄᖁᑎᑖᕆᓗᓂᑎᒍᑦ ᐱᐅᔪᒥᒃ ᐃᓅᓯᖃᕈᒪᑦᓯᐊᖁᓪᓗᑕ.
