144 ᐃᓕᓮᑦᔪᑎᑎᑦ ᐃᓱᐊᕐᓂᐅᕗᑦ ᐃᓱᖃᖏᑦᑐᒧᑦ; ᑖᒃᑯᓂᖓ ᑐᑭᓯᑎᓚᐅᓐᖓ, ᑕᕝᕙ ᐃᓅᓂᐊᕐᐳᖓ.
ᐃᓕᓮᑦᔪᑎᒋᓪᓗᒋᑦ ᐊᑐᕐᑕᐅᖁᓚᐅᕐᑕᑎᑦ, ᓈᒻᒪᓈᕐᓯᒪᑦᓯᐊᕐᐳᑦ ᓱᖁᓯᔪᐃᑦᑑᓪᓗᑎᒡᓗ.
ᐊᑕᓃᕐᓕ ᖃᓂᑦᑑᕗᑎᑦ, ᐱᖁᔭᑎᓪᓗ ᓱᓕᔪᐃᓐᓇᐅᓪᓗᑎᒃ.
ᐊᑯᓂᐅᓕᕐᑐᖅ ᐃᓕᓮᑦᔪᑎᖕᓂᒃ ᖃᐅᔨᓯᒪᓕᕐᐳᖓ; ᐃᓱᖃᖏᑦᑐᒥᒃ ᑐᓐᖓᓂᕐᑖᕐᑎᓚᐅᕋᕕᒋᑦ.
ᐊᑕᓃᖅ, ᓂᓪᓕᐊᓂᕋ ᐃᓕᖕᓄᑦ ᑎᑭᐅᑎᓚᐅᕐᓕ; ᑐᑭᓯᑎᓚᐅᓐᖓ ᐅᖃᐅᓯᕐᑎᑦ ᒪᓕᒡᓗᒋᑦ.
ᐱᔩᑦ ᓇᔪᕐᓗᒍ ᐱᑦᓯᐊᕐᕕᒋᒍᒃ, ᐃᓅᖁᓪᓗᖓ, ᒪᓕᑦᓯᐊᖁᓪᓗᖓᓗ ᐅᖃᐅᓯᕐᓂᒃ.
ᑐᑭᓯᔪᓐᓇᕐᑎᓚᐅᓐᖓ, ᐱᖁᔭᕐᓂᒃ ᒪᓕᒍᓐᓇᕐᓯᖁᓪᓗᖓ; ᑕᕝᕙ ᐊᑐᓕᕐᓂᐊᕐᐸᒃᑲ ᐆᒻᒪᒻᒧᑦ ᐊᑕᖏᕐᑐᒧᑦ.
ᐊᔪᕆᕐᑐᓚᐅᓐᖓ ᐃᓅᖃᑎᓐᓄᑦ ᓈᒻᒪᓈᕐᓯᒪᔪᒥᒃ ᑕᑯᓐᓇᕐᓂᕐᒥᒃ ᖃᐅᔨᒪᑦᓯᐊᕐᓂᕐᒥᒡᓗ, ᐱᖁᔭᑎᑦ ᐅᒃᐱᕆᒐᒃᑭᑦ.
ᐊᒡᒐᒃᐱᑦ ᓴᓇᓚᐅᕐᐹᖓ ᐋᖅᑭᒃᓱᕐᓗᖓᓗ; ᑐᑭᓯᑎᓚᐅᓐᖓ ᐱᖁᔭᕐᓂᒃ ᐃᓕᑦᓯᔪᓐᓇᖁᓪᓗᖓ.
ᐊᑕᓂᕐᒥᒃ ᓯᕘᕋᓂᖅ ᓴᓗᒪᑦᓯᐊᕐᐳᖅ, ᐃᓱᖃᖏᑦᑐᒧᑦ ᑲᔪᓯᔪᖅ. ᐊᑕᓂᐅᓪᓗ ᐃᖅᑲᕐᑐᐃᓂᖏᑦ ᓱᓕᑦᓯᐊᕐᐳᑦ ᑕᒪᕐᒥᒡᓗ ᐃᓱᐊᕐᑑᓪᓗᑎᒃ.
ᐃᓱᐊᕐᑑᑉ ᖃᓂᖓ ᓂᕆᑎᑦᓯᕗᖅ ᐅᓄᕐᑐᓂᒃ; ᓯᓔᑦᑐᓪᓕ ᑐᖁᕗᑦ ᓯᓚᑐᓂᕐᒥᒃ ᐊᔪᕐᓴᕐᓂᕐᒧᑦ.
ᐊᔪᕆᕐᑐᐊᕆᓪᓗᓂᖓ ᐅᖃᐅᑦᔪᕐᐸᓚᐅᕐᐹᖓ, “ᐅᖃᐅᓯᕆᔭᒃᑲ ᐆᒻᒪᑎᖕᓂ ᐱᓯᒪᑦᓯᐊᒃᑭᑦ, ᐱᖁᔭᒃᑲ ᐱᓯᒪᑦᓯᐊᕈᕕᒋᑦ ᑕᕝᕙ ᐃᓅᓂᐊᕐᐳᑎᑦ.
ᐱᖁᔭᒃᑲ ᐱᓯᒪᒍᕕᒋᑦ ᑕᕝᕙ ᐃᓅᓂᐊᕐᐳᑎᑦ, ᐃᓕᓮᑦᔪᑎᒋᔭᒃᑲ ᐱᓯᒪᑦᓯᐊᒃᑭᑦ ᐱᓐᓇᕆᓂᕐᐹᕆᓗᒋᑦ.
ᓇᐹᕐᑐᖏᑕ ᐊᕙᓚᖓᔪᖏᑦ ᐸᓐᓇᑰᓕᕋᒥᒃ ᓇᑲᑎᕐᓯᒪᓕᕐᒪᑕ ᐊᕐᓇᓄᑦ ᕿᔪᒃᓴᕆᔭᐅᔪᒪᓪᓗᑎᒃ ᑲᑎᕐᓱᕐᑕᐅᕙᓕᕐᐳᑦ ᐃᓄᐃᑦ ᑐᑭᓯᓇᓱᓚᐅᖏᒻᒪᑕ, ᑍᒤᒻᒪᑦ ᒎᑎᐅᑉ ᑖᒃᑯᓂᖓ ᐱᓐᖑᕐᑎᑦᓯᓚᐅᕐᑑᑉ ᐃᓚᑦᓱᒋᓂᐊᕈᓐᓃᕐᐰᑦ ᓂᑲᒋᓂᐊᕈᓐᓃᕐᓗᒋᓪᓗ.
“ᐃᓄᖁᑎᒃᑲ ᓯᓔᑦᑑᕗᑦ, ᐅᕙᓐᓂᒃ ᖃᐅᔨᒪᔭᖃᖏᒻᒪᑕ. ᓄᑕᖅᑲᑎᑐᑦ ᐃᓱᒪᖃᖏᑦᑐᑎᑐᑦ ᑍᒤᒻᒪᑕ, ᐃᓕᓯᒪᓂᖃᖏᑦᓯᐊᕐᑐᑦ, ᓯᓚᑐᔪᒥᒃ ᐱᐅᖏᑦᑐᓕᐅᕐᓂᖃᕈᓐᓇᕐᐳᑦ, ᐱᐅᔪᒥᒡᓕ ᐱᓇᓱᐊᕆᐊᒃᓴᖅ ᓇᓗᕗᑦ.”
ᐅᓄᕐᑐᑦ ᓴᓗᒻᒪᕐᓴᕐᑕᐅᔪᒫᕐᐳᑦ, ᑕᕐᓴᖃᕈᓐᓁᕐᓗᑎᒡᓗ, ᓱᕉᓂᖏᑦ ᐲᔭᕐᑕᐅᓗᑎᒃ; ᐱᐅᖏᑦᑐᓕᔪᓪᓕ ᑍᒪᓐᖓᑦ ᐱᐅᖏᑦᑐᓖᓐᓇᕐᓂᐊᕐᐳᑦ, ᐱᐅᒋᑦᑐᓕᔪᑦ ᑐᑭᓯᔪᓐᓇᕐᓂᐊᓐᖏᓚᑦ, ᓯᓚᑐᔪᓪᓕ ᑐᑭᓯᓂᐊᕐᐳᑦ.
ᐃᓄᖁᑎᒃᑲ ᐊᓯᕈᓕᕐᐳᑦ ᐅᕙᓐᓂᒃ ᖃᐅᔨᒪᖏᓐᓂᕐᒧᑦ; ᐃᓕᑦᓯ ᑐᓂᕐᕈᓯᕐᑎᓯᔨᐅᔪᓯ ᖃᐅᔨᔪᒪᓚᐅᖏᓐᓇᑦᓯ, ᑍᒤᒻᒪᑦᑕᐅᖅ ᓇᕐᕈᒋᓕᕐᐸᑦᓯ ᑐᓂᕐᕈᓯᕐᑎᑦᓯᔨᐅᓂᐊᕈᓐᓃᕐᐳᓯ ᐅᕙᓐᓄᑦ. ᒎᑎᑦᓯ ᐱᖁᔭᖏᓐᓂᒃ ᐃᓱᒪᔪᓐᓃᓚᐅᕋᑦᓯ, ᕿᑐᕐᖓᓯᑦᑕᐅᖅ ᐃᓱᒪᒋᓂᐊᕈᓐᓃᕆᕙᒃᑲ.
ᑖᒃᑯᐊ ᐅᖃᐅᓯᕐᓂᒃ ᑐᓴᕐᑐᑦ ᒎᑎᐅᑉ ᐊᑕᓂᐅᕕᖓᓂᒃ ᑐᑭᓯᓇᑎᒡᓗ, ᐊᑦᔨᖃᕐᐳᑦ ᐱᕈᕐᑐᒃᓴᓂᒃ ᑍᒃᑯᓄᖓ ᐊᖅᑯᓯᓂᕐᒧᑦ ᑲᑕᒃᑐᓂᒃ, ᐱᐅᖏᑦᑐᖅ ᑎᑭᓐᓇᒥ ᐲᔧᕗᖅ ᑲᓐᖓᕐᓲᑎᒋᔭᐅᔪᓂᒃ ᑖᒃᑯᓄᖓ.
ᓱᓕᔪᒥᒃ ᐅᖃᐅᑎᕙᑦᓯ, ᕿᓚᒃ ᓄᓇᕐᔪᐊᕐᓗ ᓄᖑᓚᐅᖅᑳᕐᑎᓐᓇᒋᒃ, ᐱᖁᔧᑦ ᓈᓂᖏᑦ ᐋᖅᑭᒋᐊᕈᑎᖏᓪᓗ ᐊᑐᕈᓐᓃᕐᑐᖃᑦᔮᓐᖏᓚᑦ, ᑕᒪᕐᒥᑦᓯᐊᖅ ᓇᓚᐅᑦᓯᓚᐅᖅᑳᕐᑎᓐᓇᒋᑦ.
ᐃᓅᓯᖅ ᓄᖑᓱᐃᑦᑐᖅ ᐃᒤᓕᖓᕗᖅ, ᐃᓕᖕᓂᒃ ᖃᐅᔨᓗᓂ ᓇᓛᒍᑦ ᓱᓕᔪᒥᒃ ᒎᑎᑐᐊᖑᓂᕐᓂᒃ, ᑎᓕᓚᐅᕐᑕᕐᓂᒡᓗ ᔩᓱᓯ ᙭ᔅᑑᓯᒥᒃ.
ᐃᒫᒃ ᒎᑎ ᐅᖃᕐᓯᒪᖕᒪᑦ, “ᖃᐅᒪᔪᖅ ᖃᐅᒻᒤᓕᕐᓕ ᑖᕐᑐᒥ,” ᑖᑦᓱᒪ ᖃᐅᒪᓂᓂ ᖃᐅᒻᒪᒃᑎᑉᐹ ᐆᒻᒪᑎᑦᑎᓐᓄᑦ ᖃᐅᔨᑎᑕᐅᖁᓪᓗᑕ ᒎᑎᐅᑉ ᓂᕐᑐᕐᓇᕐᓂᕐᔪᐊᖓᓂᒃ ᙭ᔅᑑᓯᐅᑉ ᖃᐅᒻᒪᒃᑎᑦᓯᓂᖓᓂᑦ ᐱᔪᒥᒃ.