125 ᐱᔨᒋᒐᕕᖓ; ᑐᑭᓯᑎᓚᐅᓐᖓ, ᐃᓕᓮᑦᔪᑎᒋᔭᕐᓂᒃ ᖃᐅᔨᒪᔪᓐᓇᖁᓪᓗᖓ.
ᐊᑕᓃᖅ ᐃᓛᒃ ᐱᔨᒋᕙᕐᒪ; ᐱᔨᒋᕙᕐᒪ, ᐃᕐᓂᕆᔭᐅᓪᓗᖓ ᐱᔨᖕᓄᑦ ᐊᕐᓇᒧᑦ. ᕿᓚᒃᑕᐅᓯᒪᓂᒃᑲ ᐲᔭᓚᐅᕐᐸᑎᑦ.
ᐅᖃᐅᓯᕐᑎᑦ ᑐᖅᑯᕐᐸᒃᑲ ᐆᒻᒪᑎᓐᓄᑦ, ᐊᔪᕐᑐᓕᖁᓇᖓ ᐃᓕᖕᓄᑦ.
ᐱᓂᐊᕐᓃᑦ ᓱᓕᖏᑦᑐᑦ ᐅᕙᓐᓂᑦ ᐅᖓᓯᒃᓯᑎᓚᐅᒃᑭᑦ; ᐱᑦᓯᐊᕐᓂᕐᓄᓪᓕ ᐱᖁᔭᕐᓂᒃ ᐃᓕᓴᕐᑎᓚᐅᓐᖓ.
ᑐᑭᓯᔪᓐᓇᕐᑎᓚᐅᓐᖓ, ᐱᖁᔭᕐᓂᒃ ᒪᓕᒍᓐᓇᕐᓯᖁᓪᓗᖓ; ᑕᕝᕙ ᐊᑐᓕᕐᓂᐊᕐᐸᒃᑲ ᐆᒻᒪᒻᒧᑦ ᐊᑕᖏᕐᑐᒧᑦ.
ᐊᔪᕆᕐᑐᓚᐅᓐᖓ ᐃᓅᖃᑎᓐᓄᑦ ᓈᒻᒪᓈᕐᓯᒪᔪᒥᒃ ᑕᑯᓐᓇᕐᓂᕐᒥᒃ ᖃᐅᔨᒪᑦᓯᐊᕐᓂᕐᒥᒡᓗ, ᐱᖁᔭᑎᑦ ᐅᒃᐱᕆᒐᒃᑭᑦ.
ᐱᖁᑎᒋᒐᕕᖓ, ᐱᐅᓕᓚᐅᓐᖓ; ᐱᓇᓱᐊᕐᑕᐅᖁᔭᑎᑦ ᕿᓂᕐᓯᒪᒐᒃᑭᑦ.
ᓵᕝᕕᒋᓗᖓ ᓂᑲᒋᓚᐅᓐᖓ; ᐱᔪᓐᓇᕐᓃᑦ ᑐᓂᓚᐅᕈᒃ ᐱᔨᖕᓄᑦ, ᐱᐅᓕᓗᒍᓗ ᐱᔨᕕᑦ ᐊᕐᓇᐅᑉ ᐃᕐᓂᖓ.
ᓯᓚᑐᓂᕐᒥᓄᑦ ᓯᕗᓂᒃᓴᕐᓯᐅᑦᓯᐊᕐᑑᑉ ᐊᖅᑯᑎᒋᔭᓂ ᐅᑦᔨᕐᑐᑦᓯᐊᕐᓗᒍ ᐃᓅᕗᖅ, ᓯᓔᑦᑐᓪᓕ ᐱᓂᐊᕐᓂᖃᕐᐳᑦ ᑕᒻᒪᕐᑎᑦᓯᓪᓗᑎᒃ.
ᐊᑕᓂᕐᒥᒃ ᓯᕘᕋᓂᖅ ᓯᓚᑐᓂᕐᒥᒃ ᐱᒋᐊᕐᓂᐅᕗᖅ, ᖃᐅᔨᓂᕐᓗ ᐃᑦᔪᕐᓁᑦᑐᑐᐊᒥᒃ ᐱᒋᐊᕐᓂᐅᕗᖅ ᑐᑭᓯᓂᕐᒥᒃ.
ᒫᓐᓇᓕ ᐊᔪᕐᓂᕐᒥᑦ ᕿᓚᕈᑦᔮᕐᑕᐅᓯᒪᓕᕋᑦᓯ ᒎᑎᒧᓪᓗ ᑭᒡᒐᐅᓕᕐᓗᓯ, ᐊᑭᓕᕐᑕᐅᕗᓯ ᑕᕝᕙ ᐃᑦᔪᕐᓁᑎᑕᐅᓂᕐᒥᒃ ᐃᓱᐊᓂᓗ ᐃᓅᓯᕐᒥᒃ ᓄᖑᓱᐃᑦᑐᒥᒃ.
ᐅᖃᐅᓯᕆᔭᒃᑲ ᐃᓱᒪᒃᓴᕐᓯᐅᕈᑎᒋᒃᑭᑦ, ᐊᑕᓂᐅᑉ ᑕᒤᓐᓂᒃ ᑐᑭᓯᑎᓐᓂᐊᕐᐹᑎᑦ.
ᓇᓪᓕᕐᓯᓕ ᓯᓚᑐᓂᕐᒥᒃ ᐊᔪᕐᓴᕈᓂ, ᒎᑎᒧᑦ ᑐᒃᓯᐊᕐᑐᒃᓴᐅᕗᖅ, ᑖᑦᓱᒪ ᑕᑉᕙ ᑐᓂᓯᕕᒋᓂᐊᕐᐹ ᐱᔪᒪᔭᖓᓂᒃ. ᐃᓄᓕᒫᑦ ᑐᓂᓯᕕᒋᕙᖕᒪᒋᑦ ᖁᕕᐊᒋᓪᓗᒋᑦ ᐊᓐᓂᕈᓱᒐᓂᓗ.
