16 ᕿᓔᑦ, ᐊᑕᓂᐅᑉ ᐱᒋᕔᑦ; ᓄᓇᕐᔪᐊᕐᓕ ᐃᓄᖕᓄᑦ ᑐᓂᓚᐅᕐᐹ.
ᑖᓐᓇ ᐊᐅᓚᑦᓯᔨᐅᑎᑉᐸᑦ ᓱᓇᑐᐃᓐᓇᕐᓄᑦ ᐊᒡᒐᖕᓄᑦ ᓴᓇᓯᒪᔪᓄᑦ; ᓱᓇᑐᐃᓐᓁᑦ ᐃᓕᕙᑎᑦ ᑖᑦᓱᒪ ᐃᑎᒐᖏᑕ ᐊᑖᓄᑦ.
ᕿᓚᒡᓗ ᓄᓇᓗ ᐱᖁᑎᒋᕚᒃᑭᒃ; ᓄᓇᕐᔪᐊᖅ ᐃᓗᓕᓕᒫᖏᓪᓗ, ᐱᒋᐊᕐᑎᓯᒪᕙᑎᑦ.
ᖁᑦᓯᖕᓂᕐᐹᒍᔪᖅ ᐃᓅᖃᑎᒌᒡᔪᐊᓂᒃ ᓄᓇᑖᕐᑎᑦᓯᓕᕋᒥ; ᐃᓅᖃᑎᒌᑦ ᓇᓂ ᓄᓇᖃᕐᑐᒃᓴᐅᖕᒪᖔᑕ ᐋᖅᑭᒃᓱᐃᓚᐅᕐᐳᖅ, ᐃᓅᖃᑎᒌᒡᔪᐊᓪᓗ ᐊᑐᓂᑦ ᐊᖓᔪᖅᑳᖃᐅᕐᑎᓚᐅᕐᐰᑦ.
ᐊᑕᓃᖅ, ᕿᓚᖁᑏᑦ ᐳᒃᑭᓕᑎᓪᓗᒍ ᐊᖅᑲᓚᐅᕆᑦ! ᖃᖅᑬᑦ ᐊᒃᑐᓚᐅᒃᑭᑦ ᑕᕝᕙ ᐳᔫᓕᕐᓂᐊᕐᐳᑦ.
ᐊᑕᓂᖅ ᐃᒫᒃ ᐅᖃᕐᐳᖅ: “ᕿᓚᒃ ᐃᒃᓯᕙᐅᑕᕐᔪᐊᕆᒐᒃᑯ, ᓄᓇᓗ ᐃᑎᒐᓐᓄᑦ ᐃᑯᕐᕋᕆᓪᓗᒍ, ᓇᐅᒡᓕ ᑍᒪ ᐃᒡᓗᒃᓴᕋ? ᓇᓂᓗ ᐃᓂᖃᕈᓐᓇᕐᐳᖓ?
ᐊᑖᑕᒪ ᐃᒡᓗᖓᓂ ᐃᓂᒃᓴᖃᕐᐳᖅ ᐊᒥᓱᓂᒃ; ᐂᓂᐊᕐᐳᖓ ᐃᓂᒃᓴᓕᐅᕆᐊᕐᑐᕐᓗᓯ, ᑍᒤᖏᑉᐸ ᑕᒪᑐᒥᖓ ᐅᖃᐅᑎᒐᔭᓐᖏᓚᑦᓯ.
ᓂᓐᖓᕕᒃᔪᐊᕐᓂᕐᓄᑦ ᓇᓂᓗᒋᑦ ᓄᖑᑕᐅᑎᓚᐅᒃᑭᑦ.”
ᕿᓔᑦ ᕿᓚᖏᑦ, ᑖᓐᓇ ᓂᕐᑐᕐᓯᐅᒃ, ᐃᓕᑦᓯᓗ ᐃᒪᐅᔪᓯ ᕿᓚᐅᑉ ᖁᓛᓃᑦᑐᓯ!
ᑕᑯᒋᑦ, ᐊᑕᓂᐅᑉ ᒎᑎᑦᓯ ᕿᓔᑦ ᖁᕝᕙᓯᖕᓂᕐᐹᕆᔭᖏᑦ ᐱᖁᑎᒋᕔᑦ; ᓄᓇᕐᔪᐊᕐᑕᐅᖅ ᐱᖁᑎᒋᕚ, ᑖᑦᓱᒪᓃᑦᑐᓕᒫᓪᓗ ᐱᖁᑎᒋᒋᕔᑦ.
ᐅᓐᓄᐊᓪᓗᐊᖅ ᐅᓪᓗᓪᓗᐊᕐᓗ, ᐱᓐᖑᕐᑎᓯᒪᕚᒃᑭᒃ; ᖃᖅᑳᒃ ᑍᐸᕆ ᕼᐊᕐᒪᓂᓗ ᖁᕕᐊᓱᒡᓗᑎᒃ ᐊᑎᕐᓂᖅ ᓂᕐᑐᐃᕘᒃ.
ᐃᒫ ᑕᕝᕙ ᐊᑕᓂᖅ ᐅᖃᕐᐳᖅ, ᕿᓚᖕᒥᐅᓂᒃ ᐱᓐᖑᕐᑎᑦᓯᓚᐅᕐᑐᖅ, ᑖᓐᓇ ᒎᑎᐅᖕᒪᑦ, ᓄᓇᕐᔪᐊᖅ ᐋᖅᑭᒃᓱᓚᐅᕐᒪᒍ ᓴᓇᓪᓗᒍ ᐃᓂᓕᐅᕐᓗᒍᓗ; ᐱᓐᖑᕐᑎᓚᐅᓐᖏᓛ ᓱᓇᖃᖁᓇᒍ, ᐱᓐᖑᕐᑎᓚᐅᕐᐹᓕ ᐃᓄᖃᕐᑐᒃᓴᐅᖁᓪᓗᒍ, “ᐅᕙᖓᐅᕗᖅ ᐊᑕᓂᖅ, ᐊᓯᓐᓂᒡᓗ ᐱᑕᖃᕋᓂ.
