10 ᓄᓇᒧᑦ ᓯᓚᓗᒃᑎᑦᓯᖃᑦᑕᕐᐳᖅ ᐱᕈᕐᓰᕖᓪᓗ ᐃᒻᒥᕐᓱᖃᑦᑕᕐᐰᑦ;
ᓯᓚᓗᒃ ᐋᖅᑭᒃᓯᒪᕚ ᐱᒋᐊᕐᕕᒃᓴᖓᓗ, ᑲᓪᓘᓪᓗ ᑲᓪᓕᕐᕕᒃᓴᖓ ᐋᖅᑭᒃᓯᒪᒋᕚ;
ᑖᑦᓱᒪ ᓄᓇᕐᔪᐊᑉ ᐃᒪᖓ ᖁᒻᒧᐊᒃᑎᖃᑦᑕᕐᐹ, ᑕᑉᐹᓐᖓᓪᓗ ᐃᒪᕐᒥᒃ ᓯᓚᓗᓕᕐᑎᖃᑦᑕᕐᐹ.
ᓄᕗᔭᓂᑦ ᓯᓚᓗᒃ ᑯᕕᓕᕐᑎᖃᑦᑕᕐᐹ, ᐃᓄᓕᒫᑦᓯᐊᓄᓪᓗ ᓯᓚᓗᒃᑎᖃᑦᑕᕐᓗᓂᐅᒃ.
ᑖᑦᓱᒪ ᐱᖁᔨᓂᖓᒍᑦ ᐊᐳᑦ ᑲᑕᒐᖃᑦᑕᕐᐳᖅ ᓄᓇᒧᑦ; ᓯᓚᓗᒃᑎᑉᐹᑦᑕᐅᖅ ᐃᒥᕐᒥᒡᓗ ᑯᕕᑐᐃᓐᓇᕐᑎᓪᓗᒍ, ᐱᔪᓐᓇᕐᓂᒃᑯᑦ.
ᕿᓚᖕᒥᒃ ᐅᓕᒃᓯᔪᖅ ᓄᕗᔭᓄᑦ, ᓄᓇᐅᓪᓗ ᓯᓚᓗᒃᑕᐅᓂᒃᓴᖓᓂᒃ ᐊᑐᐃᓐᓇᕈᐃᕙᒃᓗᓂ, ᖃᖅᑲᓂᓗ ᐃᕕᒃᓱᒐᕐᓂᒃ ᐱᕈᕐᑎᑦᓯᕙᒃᑐᖅ.
ᐃᕝᕕᑦ ᒎᑏ, ᓯᓚᓗᒃᑎᑦᓯᓚᐅᕐᐳᑎᑦ ᐊᒥᒐᖏᑦᑐᒥᒃ, ᑍᒫᒃ ᐱᒃᓴᕆᔭᑎᑦ ᓇᓗᓁᓚᐅᕐᐸᑎᑦ, ᑕᖃᓯᒪᔪᓐᓃᕐᑎᓪᓗᒋᓪᓗ.
ᓂᓪᓕᕌᖓᑦ ᐃᒤᑦ ᕿᓚᖕᒦᑦᑐᑦ ᐃᒃᑑᓛᕐᐳᑦ, ᓄᕗᔭᓂᒡᓗ ᓴᖅᑭᑎᑦᓯᕙᒡᓗᓂ ᓄᓇᕐᔪᐊᑉ ᑭᒡᓕᖓᓂᑦ, ᖃᐅᒻᒫᓪᓚᖃᕐᑎᑦᓯᓪᓗᓂᓗ ᓯᓚᓗᒃᑐᒥ, ᐊᓄᕆᖃᕐᑎᑦᓯᓪᓗᓂᓗ ᐱᖁᑎᒃᑯᕕᖕᒥᓂᑦ.
ᐃᓅᖃᑎᒌᒡᔪᐊᖑᖃᑎᑦᑕ ᒎᑎᖏᑦ ᓱᓕᖏᑦᑐᑦ ᓯᓚᓗᒃᑎᑦᓯᔪᓐᓇᕐᐹᑦ? ᓯᓚᒥᒡᓗ ᑯᕕᑐᐃᓐᓇᕐᑎᑦᓯᔪᓐᓇᕐᐹᑦ? ᑍᒤᑎᑦᓯᔪᓐᓇᕐᑐᖃᓐᖏᓚᖅ ᐃᕝᕕᑦ ᐊᓯᖕᓂᒃ ᐊᑕᓃᖅ ᒎᑏᒃ, ᐃᓕᖕᓂᑦ ᓂᕆᐅᒋᔭᖃᕐᐳᒍᑦ, ᐃᕝᕕᑐᐊᖅ ᑕᒪᒃᑯᐊᓕᒫᑦ ᐊᐅᓚᓐᓇᕕᒋᑦ.
ᐃᓱᒪᓇᓱᐊᓐᖏᓚᓪᓘᓐᓃᑦ ᐊᑕᓂᖅ ᒎᑎᑎᒃ ᓯᕘᕋᒋᔪᒪᓗᒍ, ᐅᑭᐊᒃᓵᒃᑯᑦ ᐅᐱᕐᖔᒃᑯᓪᓗ ᓇᓪᓕᐅᑎᔭᕌᖓᑦ ᓯᓚᓗᒃᑎᑦᓯᕙᒃᑐᒥᒃ, ᐱᕈᕐᑐᓂᒡᓗ ᐱᕈᕇᕐᑎᑦᓯᕙᒃᑐᒥᒃ ᑲᑎᕐᓱᕐᑕᐅᕕᒃᓴᖏᓐᓂ ᑲᑎᕐᓱᕐᑕᐅᕙᖁᓪᓗᒋᑦ.
“ᓯᓚᓗᒡᓗ ᓄᖅᑲᖓᑎᓚᐅᕐᐸᕋ, ᓱᓕ ᑕᖅᑭᓂᒃ ᐱᖓᓱᓂᒃ ᑲᑎᕐᓱᐃᕕᒃ ᓇᓪᓕᐅᑎᓚᐅᕐᑎᓐᓇᒍ, ᐃᒡᓗᒐᓴᖕᓂ ᐊᑕᐅᓯᕐᓂ ᓯᓚᓗᒃᑎᑦᓯᓚᐅᕐᐳᖓ, ᐃᒡᓗᒐᓴᖕᓂᓗ ᐊᓯᖏᓐᓂ ᓯᓚᓗᒃ ᓄᖅᑲᖓᑎᓚᐅᕐᐸᕋ, ᐱᕈᕐᓰᕖᑦ ᐃᓚᖏᑦ ᓯᓚᓗᒃᑕᐅᑎᓚᐅᕐᐸᒃᑲ; ᐱᕈᕐᓰᕖᓪᓗ ᓯᓚᓗᒡᕕᐅᓚᐅᖏᑦᑐᑦ ᑐᖁᓕᓚᐅᕐᐳᑦ.
ᓇᓗᓁᕐᓯᔪᓂᒃ ᐃᒻᒥᓄᑦ ᑐᕌᖓᔪᓂᒃ ᓴᖅᑭᑎᑦᓯᖃᑦᑕᓚᐅᕐᐳᖅ, ᐱᑦᓯᐊᕐᓂᕐᒥᓂᒃ ᓴᖅᑭᑎᑦᓯᕙᒃᓗᓂ ᕿᓚᖕᒥᑦ ᓯᓚᓗᒃᑎᑦᓯᕙᒃᑲᒥ ᐊᑲᐅᓈᑦᓯᐊᕐᑐᒥᒃ, ᑐᓂᓯᕕᒋᕙᒃᐹᓯᓗ ᓂᕿᒃᓴᓂᒃ, ᖁᕕᐊᓱᖕᓂᖃᕐᑎᓪᓗᓯᓗ ᐃᓗᑦᓯᒍᑦ.”
