ᐃᓯᑭᐊᓕᐅᑉ ᐊᒡᓚᖏᑦ 8:17 - ᐊᒡᓔᑦ ᐃᑦᔪᕐᖕᓁᑦᑐᑦ

¹⁷ ᑕᕝᕙ ᐅᖃᐅᑎᕚᖓ, “ᐃᓅᑉ ᐃᕐᓂᖓ, ᑕᑯᕕᒌᑦ? ᖃᓄᐃᓐᖏᓛᖅ? ᔫᑕᐅᑉ ᑭᖑᕚᖏᑦ ᓇᕐᕈᒋᔭᓐᓂᒃ ᐱᓇᓱᐊᑐᐃᓐᓇᕐᐸᑕ ᑕᕝᕙᓂ ᐱᓇᓱᐊᕐᑕᒥᖕᓂ, ᓄᓇ ᓈᔭᐅᑎᓪᓗᒍ ᐱᕋᔭᖕᓂᕐᓂᒃ, ᓱᓕ ᓂᓐᖓᒃᓴᒃᑲᓐᓂᕐᓗᖓ? ᑕᑯᒋᑦ, ᕿᔪᑯᑖᒥᒃ ᐊᑭᕈᕐᒥᒃ ᕿᖓᕐᒥᖕᓄᐊᕐᓯᕗᑦ.

ᐃᓯᑭᐊᓕᐅᑉ ᐊᒡᓚᖏᑦ 8:17 ပူးပေါင်းရင်းမြစ်များ

ᒨᓯᓯ ᓯᕗᓪᓖᑦ 6:11

ᓄᓇᕐᔪᐊᖅ ᑕᑕᓕᓚᐅᕐᒪᑦ ᓈᒻᒪᖏᑦᑐᒥᒃ ᒎᑎᐅᑉ ᓵᖓᓂ, ᓄᓇᕐᔪᐊᕐᒥᐅᓪᓗ ᑲᑉᐱᐊᓇᕋᓱᐊᕐᓃᓐᓇᕐᒥᒃ ᐃᓕᖅᑯᓯᖃᓕᓚᐅᕐᐳᑦ.

ᒨᓯᓯ ᓯᕗᓪᓖᑦ 6:13

ᒎᑎᓗ ᓄᐊᒧᑦ ᐅᖃᕐᐳᖅ, “ᓄᓇᕐᔪᐊᕐᒥᐅᑦ ᑎᒥᖃᕐᑐᑦ ᐃᓱᓕᑎᑦᓱᒪᓕᕋᒃᑭᑦ ᓄᖑᑦᓯᐊᕈᒪᓪᓗᒋᑦ; ᓄᓇᕐᔪᐊᓕᒫᖅ ᑲᑉᐱᐊᓱᒃᑎᑦᓯᓂᕐᒥᒃ ᐱᓗᐊᓕᕐᒪᑦ ᑖᒃᑯᑎᒎᓇᖅ; ᑕᑯᒋᑦ ᐊᓯᕈᕐᓂᐊᕐᐸᒃᑲ ᓄᓇᕐᔪᐊᖅ ᐱᖃᓯᐅᑎᓗᒍ.

ᐊᑕᓃᑦ ᐂᑉᐸᖏᑦ 21:16

ᒫᓇᓯᐅᓪᓗ ᐸᓯᔭᒃᓴᐅᓂᖃᖏᑦᑐᓂᒃ ᐃᓄᐊᕐᓯᒪᔭᖏᑕ ᐅᓄᕐᓂᑯᖏᓐᓄᑦ, ᔨᕉᓴᓕᐅᑉ ᐃᓱᐊᓂᑦ ᐃᓱᐊᓄᑦ ᓈᔨᓯᒪᓚᐅᕐᐳᑦ, ᐊᔪᕐᑐᓕᑎᑦᓯᓯᒪᓂᖓ ᔫᑕᒥᐅᓂᒃ ᐱᒐᓗᐊᕐᒥᑎᓪᓗᒍ, ᐊᑕᓂᐅᑉ ᓵᖓᓂ ᓈᒻᒪᖏᑦᑐᓂᒃ ᐱᓂᐊᓚᐅᕐᒪᑕ.

ᐊᑕᓃᑦ ᐂᑉᐸᖏᑦ 24:4

ᐸᓯᔭᒃᓴᐅᖏᑦᑐᓂᒡᓗ ᑐᖁᕅᖃᑦᑕᕐᓯᒪᓂᖓᓄᑦ; ᔨᕉᓴᓕᒥᒃ ᐸᓯᔭᒃᓴᐅᖏᑦᑐᑦ ᐊᐅᖏᓐᓂᒃ ᑕᕐᓴᕐᑖᕐᑎᑦᓯᓯᒪᓕᓚᐅᕐᒪᑦ, ᑕᒪᓐᓇᓗ ᐊᑕᓂᐅᑉ ᐃᓱᒪᒋᔪᓐᓁᓚᐅᓐᖏᓛ.

ᔨᕆᒤᐊᐅᑉ ᐊᒡᓚᖏᑦ 19:4

ᐅᕙᓐᓂᒃ ᕿᒤᓚᐅᕐᒪᑕ, ᐊᓯᖏᑕᓗ ᒎᑎᒋᔭᖏᓐᓄᑦ ᓄᓇᑎᒃ ᐃᓂᑖᖑᑎᓪᓗᒍ ᓇᕐᕈᓇᕐᓯᑎᑉᐹᑦ, ᐆᑕᒃᓴᓂᒡᓗ ᑐᓂᕐᕈᓯᕐᕕᒋᕙᒃᓗᒋᑦ, ᓯᕗᓕᕕᓂᖏᑕᓘᓐᓃᑦ ᖃᐅᔨᒪᓚᐅᕐᓯᒪᓐᖏᑕᖏᓐᓂᒃ, ᔫᑕᐅᓪᓘᓐᓃᑦ ᐊᖓᔪᖅᑳᕐᔪᐊᖏᑕ ᖃᐅᔨᒪᓚᐅᕐᓯᒪᖏᒻᒥᔭᖏᑦ; ᑕᕝᕙᓂᓗ ᑐᖁᕅᕙᒃᓗᑎᒃ ᐸᓯᔭᒃᓴᐅᖏᑦᑐᓂᒃ.

ᔨᕆᒤᐊᐅᑉ ᐊᒡᓚᖏᑦ 20:8

ᐅᖃᓪᓚᒋᐊᕋᒪ ᑍᒪᓐᖓᑦ ᕾᒐᓛᕐᐳᖓ ᑲᑉᐱᐊᓇᕐᑐᓂᒃ ᐊᓯᕈᕐᑕᐅᓂᕐᒥᒡᓗ, ᐅᖃᐅᓯᕆᖁᔭᑎᑦ ᐱᐅᒋᔭᐅᖏᑦᔪᑎᒋᕙᒃᑲ ᐅᖃᕐᓂᕐᓗᒡᕕᐅᑦᔪᑎᒋᓪᓗᒋᓪᓗ ᐅᓪᓗᓕᒪᖅ.

ᔨᕆᒤᐊᐅᑉ ᐊᒡᓚᖏᑦ 44:3

ᐃᓄᒋᓚᐅᕐᑕᖏᓐᓂᑦ ᓂᓐᖓᒃᑎᑕᐅᓚᐅᕋᒪ ᐱᐅᖏᑦᑐᓕᓂᖏᓐᓄᑦ, ᑐᓂᕐᕈᓯᕐᓗᑎᒃ ᑐᒃᓯᐊᕐᕕᖃᖃᑦᑕᓚᐅᕐᒪᑕ ᐊᓯᓐᓂᒃ ᒎᑎᒋᔪᒪᔭᒥᖕᓂᒃ ᑖᒃᑯᐊᓗ ᐱᔨᑦᓯᖔᓕᕐᓗᒋᑦ ᓯᕗᓕᕕᓂᖏᑕ ᓯᕗᓕᕕᓂᑦᓯᓗ ᑐᒃᓯᐊᕐᕕᒋᓂᐅᔭᓚᐅᓐᖏᑕᖏᓐᓂᒃ.

ᔨᕆᒤᐊᐅᑉ ᐊᒡᓚᖏᑦ 6:7

ᓲᕐᓗ ᐃᒥᕐᑕᕐᕕᐅᑉ ᐃᒪᖓ ᐃᒻᒥᕐᓱᕐᑕᐅᕙᖕᒪᑦ, ᑍᒫᒃᑕᐅᖅ ᐱᐅᖏᑦᑐᓕᐅᕐᓂᖏᑦ ᐱᓯᒪᔭᐅᕗᑦ, ᓇᓂᑐᐃᓐᓇᖅ ᑲᑉᐱᐊᓇᕐᑐᖃᕐᐳᖅ ᐊᓯᕈᕐᓇᕐᑐᖃᕐᓗᓂᓗ, ᖃᓂᒪᓐᓇᕐᓂᖏᑦ ᐋᓐᓂᕐᑎᕆᓂᖏᓪᓗ ᑕᐅᑐᐃᓐᓇᕋᒃᑭᑦ.

ᔨᕆᒤᐊᐅᑉ ᐅᒡᒍᐊᕐᓂᖏᑦ 1:5

ᐊᑭᕋᕐᑐᕐᑎᒋᓚᐅᕐᑕᖏᑦ ᐊᐅᓚᑦᓯᔨᐅᓕᕋᒥᒃ ᓯᕘᕋᒋᔭᖃᕈᓐᓁᕐᐳᑦ ᐊᑕᓂᐅᑉ ᕿᒃᓵᖕᓇᕐᑐᕐᔪᐊᕐᒧᑦ ᑎᑭᑎᓚᐅᕐᐰᑦ ᐊᔪᕐᑐᓕᓯᒪᓂᖏᑦ ᐱᑦᔪᑎᒋᓪᓗᒋᑦ ᕿᑐᕐᖓᖏᑦ ᐊᐅᓪᓚᕈᑦᔭᐅᕗᑦ ᑎᒍᔭᐅᓪᓗᑎᒃ ᐊᑭᕋᖏᓐᓄᑦ.

ᐃᓯᑭᐊᓕᐅᑉ ᐊᒡᓚᖏᑦ 11:6

ᐃᓄᐊᕐᓯᒪᓕᕋᑦᓯ ᐅᓄᕐᑐᓂᒃ ᑕᕝᕙᓂ ᐃᒡᓗᒐᓴᖕᓂ, ᐊᖅᑯᑎᓯᓗ ᑕᑕᓕᕐᐳᑦ ᑐᖁᖓᔪᓂᒃ.

ᐃᓯᑭᐊᓕᐅᑉ ᐊᒡᓚᖏᑦ 16:26

ᐄᑦᔨᑉᑎᒥᐅᓂᒃ ᐊᓯᓐᓂᐊᖃᑎᖃᖃᑦᑕᓚᐅᕆᕗᑎᑦ, ᐃᒃᓯᒍᓗᐊᕐᒥᔪᓂᒃ ᖃᓂᒋᔭᑦᓯᓐᓃᑦᑐᓂᒃ, ᐊᖑᓐᓂᐊᕐᓂᕕᑦ ᓯᐊᒻᒪᒃᐸᓪᓕᐊᓂᖓᓄᑦ ᓂᓐᖓᒃᑎᑉᐸᓪᓕᐊᕙᕐᒪ.

ᐃᓯᑭᐊᓕᐅᑉ ᐊᒡᓚᖏᑦ 18:12

ᐊᒃᓗᔪᓂᒃ ᐊᔪᕐᓴᕐᑐᓂᒡᓗ ᐅᖁᒤᒃᓴᕐᑎᑦᑎᕙᒡᓗᓂ, ᑎᒡᓕᒃᐸᒡᓗᓂ, ᐊᑐᕐᑐᐊᕐᑕᕕᓂᕐᒥᓂᒡᓗ ᐱᑖᑐᐃᓐᓇᖃᑦᑕᕐᓗᓂ, ᒎᑎᓐᖑᐊᓄᓪᓗ ᑐᒃᓯᐊᖃᑦᑕᕐᓗᓂ, ᓇᕐᕈᓇᕐᑐᓂᒡᓗ ᐱᓇᓱᐊᖃᑦᑕᕐᓗᓂ,

ᐃᓯᑭᐊᓕᐅᑉ ᐊᒡᓚᖏᑦ 23:25

ᓂᓐᖓᐅᑎᓯᒪᒐᒃᑭᑦ ᑖᒃᑯᓄᖓ ᐱᓇᓱᐊᕐᕕᐅᑎᑦᓱᒫᕐᐸᒋᑦ, ᓂᓐᖓᐅᒪᓂᕐᒥᒍᑦ ᐱᓇᓱᐊᕕᐅᖁᓪᓗᑎᑦ. ᕿᖎᕐᑕᐅᔪᒫᕐᐳᑎᑦ ᓯᐅᑍᕐᑕᐅᓗᑎᓪᓗ, ᐊᒥᐊᒃᑰᔪᓪᓗ ᑐᖁᕋᕐᑕᐅᔪᒫᕐᐳᑦ ᓴᕕᒡᔪᐊᒧᑦ. ᐃᓛᒃ ᐃᕐᓂᑎᑦ ᐸᓂᑎᓪᓗ ᑎᒍᔭᐅᔪᒫᕐᐳᑦ, ᐃᓚᖕᓂᓗ ᐊᒥᐊᒃᑰᔪᑦ ᐃᑯᐊᓪᓚᒃᑕᐅᓗᑎᒃ ᓄᖑᑕᐅᔪᒫᕐᐳᑦ.

ᐃᓯᑭᐊᓕᐅᑉ ᐊᒡᓚᖏᑦ 28:16

ᑕᐅᕐᓰᖃᑎᖃᖃᑦᑕᕐᓂᕐᒧᓪᓗ ᑲᔪᓯᒻᒪᕆᓕᕐᑎᓪᓗᑎᑦ, ᐱᓂᕐᓗᖕᓂᕐᒧᑦ ᑎᑭᐅᑎᓚᐅᕐᐳᑎᑦ, ᐊᔪᕐᑐᓕᓕᕐᓗᑎᓪᓗ; ᐊᓂᑎᑦᓴᕆᐊᖃᓕᓚᐅᕐᐸᒋᑦ ᓇᕐᕈᓇᕐᓯᑎᑦᓯᒐᕕᑦ ᒎᑎᐅᑉ ᖃᖅᑲᖁᑎᖓᓂᒃ, ᐂᓐᖏᓕᐅᓪᓗ ᓯᕋᐱᐅᑉ ᓴᐳᑦᔨᔨᒋᓚᐅᕐᑕᕕᑦ ᐊᓂᑎᑦᓴᕆᐊᖃᓕᓚᐅᕐᐹᑎᑦ ᑕᕝᕙᓐᖓᑦ ᐅᔭᕋᖕᓂᑦ ᐱᐅᔪᓂᑦ ᕿᓪᓛᒡᒋᕐᑕᕐᑐᓂᑦ.

ᐃᓯᑭᐊᓕᐅᑉ ᐊᒡᓚᖏᑦ 45:9

“ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ: ᐊᑯᓂᓗᐊᖅ ᐃᓴᕆᐊᓕᒥᐅᓄᑦ ᐊᖓᔪᖅᑲᐅᔪᓯ ᐱᕋᔭᒃᑐᓂᒃ ᐊᓂᒍᑐᐃᓐᓇᕐᑎᑦᓯᖃᑦᑕᕋᑦᓯ ᐊᒃᓱᕈᕐᑎᑦᓯᓪᓗᓯᓗ, ᓈᒻᒪᓈᕐᑐᒥᒃ ᐃᓱᐊᕐᑐᒥᒡᓗ ᐱᓇᓱᐊᓕᕆᑦᓯ; ᐃᓄᖁᑎᓐᓂᒃ ᐊᕐᓵᕐᑎᕆᖃᑦᑕᕈᓐᓃᕆᑦᓯ, ᐊᑕᓂᖅ ᒎᑎ ᐅᖃᕐᐳᖅ.

ᐃᓯᑭᐊᓕᐅᑉ ᐊᒡᓚᖏᑦ 7:11

ᐱᓂᕐᓗᖕᓃᑦ ᐱᕈᕐᐸᓪᓕᐊᕗᑦ ᐱᐅᖏᑦᑐᓕᓂᖅ ᐊᖏᒡᓕᕙᓪᓕᐊᓪᓗᓂ; ᓇᓪᓕᖏᓪᓘᓐᓃᑦ ᑍᒤᓕᖎᓐᓇᕐᓂᐊᓐᖏᓚᑦ, ᐅᓄᕐᓯᕙᓪᓕᐊᑦᔮᓐᖏᓚᑦ, ᐊᒃᓱᐃᑦᑐᓐᖑᕐᓂᐊᕋᑎᒡᓗ; ᓇᓪᓕᐊᓪᓘᓐᓃᑦ ᐱᓪᓚᕆᓐᖑᕐᑐᖃᕐᓂᐊᓐᖏᓚᑦ.

ᐃᓯᑭᐊᓕᐅᑉ ᐊᒡᓚᖏᑦ 7:23

“ᓄᖑᕅᑦᔪᑎᒃᓴᓕᐅᕆᑦ; ᓇᓂᓕᒫᖅ ᓄᓇ ᐃᓄᐊᕐᑎᓂᒃ ᓈᓯᒪᖕᒪᑦ ᐃᒡᓗᒐᓴᒡᔪᐊᓪᓗ ᐱᕋᔭᒃᑎᓂᒃ ᑕᑕᓪᓗᑎᒃ.

ᐃᓯᑭᐊᓕᐅᑉ ᐊᒡᓚᖏᑦ 8:6

ᐅᖃᐅᑎᕚᖓᓗ, “ᐃᓅᑉ ᐃᕐᓂᖓ, ᑕᑯᕖᑦ ᖃᓄᐃᓕᐅᕐᓂᖏᓐᓂᒃ? ᐃᓴᕆᐊᓕᐅᑉ ᑭᖑᕚᖏᑦ ᓇᕐᕈᒋᓂᕐᐹᓐᓂᒃ ᐱᓇᓱᐊᕐᑐᑦ, ᐃᑦᔪᕐᓁᑦᑐᕕᖁᑎᓐᓂᑦ ᐅᖓᓯᒃᓯᑎᑕᐅᓕᕐᐳᖔ? ᓱᓕ ᑕᑯᓂᐊᕐᐳᑎᑦ ᑕᒪᒃᑯᓇᓐᖓᑦ ᓇᕐᕈᓇᕐᓂᕐᓴᓂᒃ.”

ᐃᓯᑭᐊᓕᐅᑉ ᐊᒡᓚᖏᑦ 9:9

ᑕᕝᕙ ᐅᖃᐅᑎᕚᖓ, “ᐃᓴᕆᐊᓕᐅᑉ ᔫᑕᐅᓪᓗ ᑭᖑᕚᖏᑦ ᐸᓯᔭᒃᓴᐅᓗᐊᕐᒪᑕ; ᓄᓇ ᐊᐅᖕᒥᒃ ᑕᑕᒻᒪᑦ, ᐃᒡᓗᒐᓴᒡᔪᐊᕐᒥᐅᓪᓗ ᐊᑦᔨᒌᒃᑎᑦᓯᓇᑎᒃ; ᐅᖃᖃᑦᑕᕐᒪᑕ, ‘ᐊᑕᓂᖅ ᓄᓇᒥᒃ ᖁᔭᓈᕐᓯᕗᖅ, ᑕᑯᓐᓇᕈᓐᓃᕐᓗᓂᓗ.’

ᐂᒨᓯᐅᑉ ᐊᒡᓚᖏᑦ 3:10

“ᐱᓂᐊᕐᓂᕐᒥᒃ ᐃᓱᐊᕐᑐᒥᒃ ᖃᐅᔨᒪᖏᒻᒪᑕ.” ᐊᑕᓂᖅ ᐅᖃᕐᐳᖅ, “ᑖᒃᑯᐊ ᑲᑉᐱᐊᓱᒃᑎᑦᓯᓂᒃᑯᑦ ᑎᒡᓕᒐᕐᓂᒃᑯᓪᓗ ᐱᓯᒪᔭᒥᖕᓂᒃ ᑐᖅᑯᕐᑎᕆᓯᒪᕗᑦ ᕿᒫᕕᖕᒥᖕᓂ.”

ᐂᒨᓯᐅᑉ ᐊᒡᓚᖏᑦ 6:3

ᑲᑉᐱᐊᓐᓇᒦᖑᔪᓯ ᐅᓪᓗᕐᒥᒃ ᓱᒋᐊᕐᑕᐅᕕᖕᒥᒃ ᐅᖓᓯᖕᓂᕅᔪᓯ, ᖃᒡᓕᒋᐊᕐᑎᑦᓯᒐᑦᓯ ᑲᑉᐱᐊᓇᕐᑐᒥᒃ.

ᒤᑲᐅᑉ ᐊᒡᓚᖏᑦ 2:2

ᐱᕈᕐᓰᕕᖕᓂᒃ ᐱᔪᒪᕕᒃᔪᐊᓕᕌᖓᒥᒃ ᐱᕋᔭᖕᓂᒃᑯᑦ ᐊᕐᓵᕐᓯᕙᒃᐳᑦ, ᐃᒡᓗᑖᕐᐸᒡᓗᑎᒡᓗ ᐊᕐᓵᕐᓯᓪᓗᑎᒃ. ᐅᖁᒤᒃᓴᕐᑎᑦᓯᓪᓗᑎᒡᓗ ᐊᖏᕐᕋᓕᖕᓂᒃ, ᐊᕐᓵᕐᓯᕙᒡᓗᑎᒡᓗ ᑭᖑᕐᖑᑎᔭᒃᓴᕆᔭᐅᔪᓂᒃ.

ᒤᑲᐅᑉ ᐊᒡᓚᖏᑦ 6:12

ᐃᓄᐃᑦ ᐊᒃᓱᐃᑦᑐᖁᑎᓯ ᑲᑉᐱᐊᓱᒃᑎᑦᓯᓂᕐᒥᒃ ᑕᑕᒻᒪᑕ; ᓄᓇᖅᑲᑎᓯᓗ ᓴᒡᓗᑐᓪᓗᑎᒃ, ᐅᖃᖏᑦ ᐅᐃᕕᕆᒃᓯᓂᕐᓂᒃ ᑕᑕᑉᐳᑦ.

ᔨᐸᓁᐊᐅᑉ ᐊᒡᓚᖏᑦ 1:9

ᐅᓪᓗᖅ ᓇᓪᓕᐅᑎᒃᐸᑦ ᐃᑎᕐᑕᕐᕕᒃᑯᑦ ᐊᓪᓗᕐᑐᓕᒫᑦ ᓱᒋᐊᕈᒫᕐᐸᒃᑲ, ᐊᖓᔪᖅᑳᒥᓗ ᐃᒡᓗᖓᓄᐊᖅᑬᔪᑦ ᐱᕋᔭᖕᓂᕐᒥᒃ ᐅᐃᕕᕆᒃᓯᓂᕐᒥᒡᓗ.