Pagpakita 11:18 - I bowon a pagpakikasungdu

¹⁸ Gepinagbulas i an ide geabuya dikamo misan ay gedetong di i panahon a podusahan yu ide ta hahatolan yu i nalibunin ta panahon dingani a podusahan yu i pesan a nagpahedep de kakmukan. Misan pan ay bebiyen yu ni bilos a piyon i pesan a magsasabi a katabeng yu pati pesan a pineta yu a te manga gelang dikamo, mahedep man o mayaman.”

Pagpakita 11:18 ပူးပေါင်းရင်းမြစ်များ

Mateo 5:12

Masalig kamo ngani a masakut ta hanga ngani a masakut i bilos yu de kataanan nun Makedepat. Ta maginon pala i yinadi a malot ni kaapoapohan de de magsasabi ide a den.

Lukas 1:50

Talage ngani a pekalbian na kapide man i manga agta a gegelang diya.

Hebreo 9:27

Nano ay te pigsabiin a depat a nelibun i pesan a kaagtaan a pakosa la dehil de mammalotin de dingan gekaduman ide ngani ni paghatol.

Pagpakita 10:7

Ta be iniyupan pan di ni kapito a anghel i paoni a nabbolan na ay yeyedi di ni Makedepat i belak na a pinahola na de katabeng na ide a magsasabi a den.

Pagpakita 11:2

Misan ay wet mo sokata i deldeg a bekoran nun beloy a pighandogen ta inon ay binoy di de tage makmuk a bensa a an gepinag-abuya de Makedepat ta nanalo ide a geyedi ni malot de benwaan ni Makedepat ni apat a puwu pati aduwa a bulan.

Pagpakita 13:10

“Be i misan ino ay nabbilanggo ay depat a tanggepin na inon a kapuoyen na misan pan be i misan ino ay nomuno de utak ay de utak pala nelibun kanya i pesan a gepanulusun de Makedepat ay depat a getiyage a gepanulusun a tuloy.”

Pagpakita 13:16

Pati pesan a kaagtaan, mayaman, mahedep, matandein, mangának, alepin man o eyen ay pepadumanan na ni manga tande de awenan de a kumot o de ibu de

Pagpakita 14:10

ay peinom diya ni Makedepat i magi alak a podusa na, a an te nakaabet de gengsa na ta podusahan na ide de apoy pati de asupre de kasagkaden ni Anak a Topa pati de manga pineta na a anghel.

Pagpakita 15:1

Nano ay kinta ko pan di i kakmukan a tande a makapangyedihan a gepakataka de langot. Ta nagtaka ok a masakut ta te duman a pito a anghel a te manga adde ni pito a pampadusa ta i oyo i inapóan a pampadusa ni Makedepat ta de inon ay natapos di i gengsa na.

Pagpakita 15:7

Ta binoy de pito a anghel, ni isin de apat a yinadi a needupin i pito pala a mangkuk a ginto a pinoin ni gengsa ni Makedepat a needup magpakapide pa man.

Pagpakita 18:6

Talage a depat a bilosan eya ni malot a nappaayun de mammalotin na ta pehedepan pala eya a magi pagpahedep na de kakmukan. Ta yadi pa a dumanan i pig-inoman na ni namas pa a mapit de pinainom na de kakmukan.

Pagpakita 19:15

De nguso na ay te getanga a utak a matalas ta i utak a oyo i gegemit na tangani matalo na i pesan a lugel ta eya ay gehari a mahigpit pati dehil de gengsa ni Makedepat a Makapangyedihan de pesan ay podusahan na i manga an gepanulusun.

Pagpakita 19:18

Ta panganin yu i unid ni pesan a agta, alepin man o eyen, i te kapangyedihan ide o eyen, i unid ni manga hari, ponu ide ni sundelo, manga sundelo pati kabeyo de ide.”

Pagpakita 19:5

Ta te nagsurut a gepo de alane ni piglipaan a magioyo, “Magpodi kamo di de Makedepat tam, ikamo a pesan a manga katabeng na a te manga gelang diya, a te manga kapangyedihan man o eyen.”

Pagpakita 20:12

Ta i pesan a nalibunin a i te kapangyedihan ide pati an ide te kapangyedihan ay kinta ko a kauluuddi de kasagkaden ni piglipaan a malapsay ta inumapo de atab pati putok, i bengkay de ta i kaleduwa de pan ay inumapo de kataanan de. Ta de tagibu ay binuka un manga libro ta dingan binuka pala un isin pa a libro a kadumanan ni te edup ide a bowon misan hinatolan ngani un nalibunin ide a an te edup a bowon a nappaayun de yinadi de a nassolat de manga libro.

Pagpakita 20:15

Ta i misan ino a an nassolat i ngalan na de libro a kadumanan ni te edup ide a bowon ay winitik de uluátaben a apoy.

Pagpakita 22:12

Dingan sinabi ni Hisus, “Magpatalikngoy kamo ta ako ay nádetong a mandeli a te adde ok ni bilos ko a boboy de belang geyedi ni piyon pati malot.