कलस्सी 1:24 - डोटेली नयाँ करार

²⁴ क्याकि मइले तमनलाइ सुसमाचार प्रचार अर्या हुनाले म अइल तमरा निउति कष्ट भोग्दाछु, रे म आफनाइ इच्छाले ख्रीष्टको तर्फ बठेइ यिन कष्ट भोग्दाछु, ताकि मण्डलिलाइ सहयोग अद्द सकु, जो उनरो शरीर जसाइ हुन।

कलस्सी 1:24 ပူးပေါင်းရင်းမြစ်များ

मर्कुस 10:39

तिननले उनलाइ भण्यो, “हाम सब सक्दाउ।” रे येशूले तिननलाइ भण्यो, “कि तमन त्यो सतावट सन सकन्छौ जो म छिट्टाइ सताइन्या हु? कि तमन तसेरि मद्द सकन्छौ जसेरि म छिट्टाइ मारिन्या हु?

प्रेरित 5:41

तब येशूकी निउति अपमान सहन्या योग्यका ठहरिया भण्नेइ कुरणीमि आनन्द मनाउनाइ तिनन यहुदि महासभा बठेइ बाइर निकलिबर गया।

रोमी 5:3

इति मान्तर होइन तर जब हाम समस्यामि हुनाउ तब हाम रमाउन सक्दाउ, क्याकि हामलाइ था छ कि समस्यामि हुनज्या हाम सहनशील हुन सीक्दाउ,

रोमी 8:17

रे सन्तान हु भण्या उत्तराधिकारी लगइ हु, परमेश्वरका उत्तराधिकारी रे ख्रीष्टसित सज्जि उत्तराधिकारी हु। यदि हाम अइल येशूकी जसेरि दु:ख भोग्दाछौ भण्या हाम उनरो महिमामि लगइ सहभागी हुन्या हु।

१ कोरिन्थी 12:27

तसेरि तमन ख्रीष्टका शरीर हौ, रे उनरा शरीर अंगका रुपमि तमन हरेक ख्रीष्टका हौ।

२ कोरिन्थी 12:15

म आफइलाइ रे मसित भया सबै कुरणी लगइ दिनाइ म खुशी हुन्या हु, ताकि म तमनलाइ परमेश्वरको अनुकरण अददाइलाइ सहयोग अद्द सकु। म तमनलाइ भौत प्रेम अद्दउ, तर इसो लाग्नछ तमन मलाइ थोकाइ प्रेम अरन्छौ!

२ कोरिन्थी 6:10

हामलाइ भौत दुःख भया लगइ सदाइ खुशी छौ। हाम गरिब भया लगइ भौतलाइ आत्मिक धनि बनाउनाउ। केइ नभया जसा भया लगइ सब चिज छ।

२ कोरिन्थी 7:4

तमनमि मेरो ठुलो भरोसा छ। तमनमि म भौत घमण्ड अद्दउ। म सान्त्वनाले परिपुर्ण छु। हामरा सब कष्टमी म भौत आनन्दित छु।

एफिसी 1:23

हाम बिश्वासि ख्रीष्टका शरीर भाग जसाइ हौ, ख्रीष्टले आफ्नो सक्ति सारा संसारमी प्रयोग अर्या जसेइ उनले आफ्नो पुरा सक्ति संसारमी प्रयोग अददाहान।

एफिसी 3:1

तबइकिलाइ म, पावल तमनकीलाइ प्रार्थना अद्दउ। मइले तमन, गैर-यहुदिलाइ सुसमाचार प्रचार अर्या रे येशू ख्रीष्टकी निउति काम अर्या हुनाले म झेलमि छु।

एफिसी 3:13

म तमनलाइ बिन्ति अद्दउ, कि तमरा निउति मइले भोग्या कष्टमी तमन निरास जन हौ। यो सब तमरो फाइदाकिलाइ हो।

फिलिप्पी 3:10

म ख्रीष्टलाइ जण्न रे अनुभव अद्द चाहानउ। रे उनलाइ मर्या बठेइ जिउना बनाउन्या सक्ति अनुभव अद्द चाहानउ, रे उनरो मराइमि उन जसा भइबर उनरा दु:खमी सहभागी हुन सकु।

कलस्सी 1:18

एक जाना मान्सको शिरले पुराइ शरीरलाइ सम्हाल्या जसेरि ख्रीष्टले मण्डलिलाइ सम्माल्लाहान। उनै सुरु हुन, मर्या बठेइ जिउना हुन्यामि उन पइला हुन ताकि हरेक चिजमि उन सर्वोच्च हुन सकुन।

२ तिमोथी 1:8

तबइकिलाइ हामरा प्रभुको बारेमि और मान्सनलाइ भण्नाइलाइ लाज जन माणउ, न त लाज माण्न्नु पणन्छ कि उनरो सेवा अर्या हुनाले म झेलमि छु। बरु तुइले परमेश्वरको सक्तिलाइ प्रयोग अददु पणन्छ रे सुसमाचारका निउति मेरो दु:खमी मसित सहभागी हो।

याकुब 1:2

मेरा बिश्वासि भाइन हो, तमनमि बिभिन्न किसिमका आपत बिपद आउन्ज्या तिनलाइ पुरा आनन्दको कुरणी सम्ज।