Róóma 14:13 - Fayam Midhab Yiesu Kiristoká He Hol Af Iđiny Kaanaká

¹³ Aaléka, kí hol ˈdeensen hayo. Hé kinaal afleka kí hol ˈdéé mé gaa eet, giri nyaaram kúnnaa Kiristóóllá hé mákárta-, hí riigirsuo-, hí ađaabano mé ki kokuoká ke gáál ˈgas met ma gaa iđiminyká.

Róóma 14:13 ပူးပေါင်းရင်းမြစ်များ

Matááyo 16:23

Yíésu Bétiro gaa dhaay, kieye, Sátan, ye innum gaa sí! Kuun he mé ilchú. Tawuny ˈgayyóóllá hé tawuny Waaˈgiet muuniny, tawuny gálaat, Yíésú hí mú yie.

Matááyo 18:7

He bá ˈdéen! Les har hé gálaat ađááb higilsuoká hí gaa ijaa! Yaalmisam hatallóóllá gon les yé hai gáá ˈdeeme, tá máá gálaat ađááb higilsúóllá, ebá he hí ki ˈdéen!

Matááyo 7:1

Yíésu geđi gáál geey, kieye, Haí hol ˈdeđénsen, itín Waag hí ˈdéénsen.

Lúka 12:57

Háteka itín dhúrkícho hé midhabká ubaa hé ˈdeđewká hí hol eiy ma gaa nanninyal?

Lúka 17:2

Máá gál nigini-, hatallóóllá tikiˈd ye el af gaa tuoká gaalí yíérích ilishká luut ki hidhe-, gaalí bás ki layka kalat.

Róóma 11:9

Tá héétí ˈDáwuˈd úba kieye, Gáál gololaamle hí naram ki yeet, hí ˈgiiliˈgaw, hí ˈgodo ki okodicho, gáál héllé ˈdeđewká ˈdaalleka, gáál hééllá il hí argiyyo.

Róóma 14:10

Aaléka, kúún háteka nyaaram kua Kiristóól ˈdeđenseto-, muuninyka, egesheychóol? Onnóo, múún lulkúnno bar tikiˈd Waag met ha ke ki ˈdeeme, Waag ˈdéé hai gáál ki iđimicha.

Róóma 14:3

Máá he met lulle kokuoká hai máá he met lulle ma kokonyká egeshêny. Héétí máá he met lulle ma kokonyká hai máá he met lulle kokuoká ˈdeđénsen, ˈdaa giri máá kinaallá Waag hí ká ˈjobonsoteká.

Róóma 14:4

Kúún mááya, kó gédéch máá eiy ˈdeđensetóol? Gédéch Waaˈgiet ˈdeđensetóóllá Máállé Guđo Waago hí ˈdeđente, muuninyka, hí máá ˈdúwaká yegedhe. Tá Waag hé mú ma ˈdeđensen, mú yiir hai gaa chiirata.

Róóma 16:17

Nyaaramchú, gillo yú hí ki efe, gál gálaat hol eiy gaa ˈgiˈgidhuo-, hé ˈdaa Kiristoka gaalí oonisieká el ˈgiˈgisat-, hí ˈdaa eiy ki riitisuoká hol ˈdeeˈdeemíe, gaa fagandhíe.

Korínto Erká 10:32

Hé hí ekemeychóóllá hai hé gál Yuuˈdi yíekaʼ, gál Hellen yíekaʼ, héétí gál Kiristo yíekaʼ ídho gaa verennoká onnôny.

Korínto Erká 11:13

Itín tákámkícho, hol mé ˈdéé gaa eedhdhíe, máá ˈdiet đafar mé ma buan-, tá Waag vivisatka, taglê?

Korínto ki Naamaká 5:14

Nyiin hé nyí af tatuoká he gielmit Kiristo. Hééllá he ˈdaa giri ke óg-, mú tikiˈd tákámle gálaat lulle ˈdú kufeká. Aaléka, múúnííllá hé ke mú hol ˈgar kufe, ke húgúm kúnnaa kissoká ke yé gaa ˈdie.

Korínto ki Naamaká 6:3

Nyiin hújích Waaˈgietallá nyáá nyí ˈgíérích gálaat Waag gaa faaganoyoká ma ki nanniny. Hújích Waaˈgietallá gálaat hí egesheyoká nyáá nyí ma fediny.

Filíbi 1:10

hí hé midhabká ubaa hé ˈdeewká hol eiy gaa nannasato-, hí ˈdeensen ubaa saas ˈdaabiyya-, ˈjíig kúlích Kirísto hí hol gáá naatká đigká.

Tímote Erká 5:14

Aaléka, hát yú fedoká, ˈdeg híyes-, rúóreká hí shuunat, hí umle kuol kaayo, hí é gerle tág ki ˈgiiyyo, giri kídhích kúnnaa Sátanléká kar ma aargiriny-, muun gáál ma eeshenyká.

Yákob 2:4

Itínka, hééllá hé gál kaamúreká ˈdú ˈdíínínyle muunîny? Hééllá hí ekeycheka, af kinaalka ar tawuny ˈdeewká ˈgayyoká hí chie.

Yákob 4:11

Nyaaramchú, haí hol meet ˈdeđenêny. Máá nyárle ˈdeđenset-, muuninyka, mú ˈdéé ki iđimuoká, af kinaalka ííni Waag hemuumuritle ˈdeente, ˈdéé ki iđie. Kúún har hemuumurít ˈdéé ki iđimichoka, af kinaalka kó máá hemuumurít el gaa igiroká muuniny. Kuun he máá hemuumurít ˈdéé ki iđimuoká chie.

Yuána Erká 2:10

Máá nyárle gielká hé bííy gaa édhká gaa ijo. Tá bííy gaa édh kinaallá hé níínní hí gaa ijo-, mú riigirsuoká mán.

Kí Edhesiny 2:14

Tá yú yáá ˈdéé um naama-, hí ˈdú ˈdeenteká ˈguo. Itín hurtkícho hé gál gálaat he onisiny Balam oonisuoká hí gaa ijo. Bálam Bálak yaalmit gál Yisirayel ađaabano mé ki kokuoká onisie. Ađaabano kinaallá he suoryam gaalí waaˈgam hódhoká ki ˈgaˈgaleká kóonylé ubaa herginy gál hol ma shúúnanká hí hol ka ˈgieká.