Héberew 10:39 - Fayam Midhab Yiesu Kiristoká He Hol Af Iđiny Kaanaká

³⁹ Tá múún hé ke gál Waag el hol gaa nannaat-, ál gálaat he il hí gaa aargiˈdoká seseenká muuniny. Muun he ke gál Waag iiy yeget-, luolmit biiyoká aargiroká.

Héberew 10:39 ပူးပေါင်းရင်းမြစ်များ

Márko 16:16

Máá ye iiy yeet-, gaalí bie gim nuoká rubach hai aargira. Tá máá ye iiy ma yéenká kúlích Waag gálaat hol eiy gaa nanniyyoká hé ˈdeewká il haí aargiˈda.

Lúka 11:26

Hai siete, aryaan éíy taaka tiiya-, súm ˈdeew-, hí a mé ˈdaatíká hai ká eete, hai ká chimie, ˈbíl giriká hai hille, hai gaa yíéđiyye. Aaléka máá aryaannéél hí hilleká yaalmitle đo súm hai ˈdeenete, yaalmit giri erká a mé hai ˈgisate, Yíésu hí gáál yie.

Yuána 17:12

Af giri gáál nyí hol ˈgayyeká meeny ye ká shiichééllá yú gáál in ki yiel, in gaal naanná ije. Gaal hé máá níínní muun gáál gaa ˈgiteká mán. Gálallá máállé tikiˈde-, muun gáál gaa ˈgiteká he iny baađawká tákáma, giri ˈdeeny kua warˈgát hí hoteká ˈduuwawká.

Yuána 20:31

Máá warˈgatééllá ka veerééllá hé he veerééllá, he giri itín Yíésu hát he Messíya-, Iny Waaˈgietká hí iiy chegeto-, tá hí mú iiy chieka, hí luolmit biiyoká mú meenyle ki aargiˈdoká.

Yuána 5:24

Yú hí hé ˈdúwaká geeye, máá ˈdeenychú maalo-, Máá ye ali gáá kaayká iiy yeetká, hé luolmit biiyoká ˈguo, mú álle hé ˈdéé ki iđiny mán. Máá kinaallá kisso kúfach yé gaa ˈdie, luolmít hile.

Yuána 6:40

Hé ˈJaachú hí fedoká hééllá: Máá yáá Ínyííllá ye bala ˈdu gáá nuo-, ye iiy yeetká, luolmit biiyoká hai gaa yíéđima, tá kúlích biiy el ˈdaˈdká úba uushich yé ha yú gáá ˈdeđia, Yíésu hí gáál yie.

Dhesaloníke Erká 5:9

Waag múún gáál gálle hosotééllá, idhollé he gáál ˈdú iđimicha muuniny, he giri muun ke Máá kúnnaa Guđo Yiesu Kirísto rubach gaa aargiroká.

Dhesaloníke ki Naamaká 2:3

Ha máádhat hí ˈgierim mákártaká ki nyiimísan. Kúlích kinaallá hé ali ma kí ˈdeeminy, ˈdaab Waag af điiny er ali ma kí ˈdíiny-, máá hemuumurit Waaˈgiet điidhe-, Waag hí maanyjasichoká biiy yé ma gáá ˈdíinyká.

Tímote Erká 6:9

Tá gál súm kaamurawká fedoká hé ˈdeđew-, tagle muuniny-, ki kaamurawká he ekemeye. Gaal he feditlé đeemo-, burnayye-, gálaat ˈdeđeneychóóllá he hát naar gaal íín dhúrle ˈgiiliˈgayyo-, gáál beđisato-, gáál mé ˈgiidhichoká.

Héberew 10:26

Múúni giri ke hé ˈdúwa-, Waaˈgietallá hát ˈdabaanká maale-, ke he ˈduuwle ógallá har ke hátle met guogínta-, ke ađaabano hát onyiká higiloka, af kinaalka biiy hé suor éíy taaka-, níínní hí kí ˈgisate-, ađaabano kinaallá egeyyoká mán.

Héberew 10:38

Máá innum chia ˈdúwaká he máá iiy yeen ye iiy yieká he ki ija. Tá máá ye el hol gaa nadheká hé ye geer ma gaa meesiny, he chie.

Héberew 11:1

Aaléka, iiy yeen ˈgany he hé ke met egesoká hát he ˈduuwawká ke ógká. Hát tikiˈdééllá iiy yeen ˈgany he hé hátle ke il ma ki árginyká hát he yé ka ˈdeenká ke ógká.

Bétiro Erká 1:5

Rubach ˈdaab kúlíchlé biiy el ˈdaˈdká ali ma kí ˈdíinyká, iiy yeenkícho ˈdaalle ˈdugaka, fargogint Waaˈgiet hé hí in gaa taal. Rúbách kinaallá kúlíchle ali kí ˈdiiyyeka, Waag yíé haí ká ˈdeđicha.

Bétiro ki Naamaká 3:7

Waag ˈdéé hótle úba in ur kaanallóóllá ubaa lés kaanallóóllá Waag hí taak ki koyye, giri ˈjiet hí af ki shugunatká. Hé kinaallá hé Waag hí ali koyye, ˈdaab kúlích Waag gálaat ˈdeem ki iđimichoká ubaa gál Waag af điđidhanká af ki beesenle-, ali ma kí ˈdíinyká.

Yuána Erká 5:16

Aalé har máá mákártaká nyárle arge-, mu ađaab hí kúfach mé ma ki kokonyká hileka, muí mú Waag ki viivisat, mú Waag hí luolmít shiicho. Tá biiy hé ađaab gálaat kúfach mé ki kokoyyoká hí gaa ijo. Tá yáá kieye, gál ađaab kinaallá hiloká Waag ki viivitíe, ma yegen.

Yuána Erká 5:5

Mááya hé lesalloká ká aađadhdha? Máá Yíésu hát Iny Waaˈgietká iiy yeetká tákáma hé lesalloká ká aađadhdha.

Kí Edhesiny 17:11

Bíních giri kach ˈguo-, kis ali ije-, tá káána mánnallá he kánsích ki síet-, kansim giri tiiyaká máállé-, állé he il hí gaa aargiˈdoká mé nannuoká.

Kí Edhesiny 17:8

Bíních kuuní argiyyééllá hé kis ali ije, kor káána hé mán, tá bár ˈdaatika ˈguoˈd gaa ˈdér-, el mé mánká yé hai gáá ˈdeeme, állé he il hí gaa aargiˈdoká mé hai nannaa. Aalé gál les ˈdú ijo-, Waag hátlé les ma ka kúóninyká meetle Waag hí warˈgat luolmitiká ma gaa véérinyká bíních kach ˈguo-, kis ali ije-, tá kufe-, geđi yé ka ˈdeˈdeenká argeka he af hai ˈdaaba.