Oseas 8:1 - DIOSPA QHELQACHISQ

¹ Waqachiychej cornetata runakuna wakichikunankupaj. Aylluypa awqan anka jina jamurishan, imaraykuchus aylloyqa yachachisqayta mana kasuspa, tratoyta p'akisqanku.

Qheshwa Biblia DC

¹ Waqachiy pututusniykita, imaynatachus uj qhawajqa Señorpa ayllunta mana puñuspa qhawan jinata, imaraykuchus noqawan tratonkuta p'akinku.

DIOSPA QHELQACHISQAN DEUTEROCANONICAL

¹ Waqachiychej cornetata runakuna wakichikunankupaj. Aylluypa awqan anka jina jamurishan, imaraykuchus aylloyqa yachachisqayta mana kasuspa, tratoyta p'akisqanku.

Oseas 8:1 ပူးပေါင်းရင်းမြစ်များ

2 Reyes 18:27

Asiriamanta soldadokunata kamachejrí nerqa: Wiraqocheyqa mana qankunaman, nitaj kamachejniykichejman willanallaypajchu kachamuwan. Manachayqa perqa patapi kashanku, chaykunaman willanaypaj kachamuwarqa. Paykunapis qankunawan khuska jatun jisp'ayninkuta mikhukaponqanku, jinallataj yaku jisp'ayninkutapis ujyakaponqanku, nispa.

Isaías 18:3

Tukuy kay pachapi kaj runakuna, kay jallp'a patapi tiyakojkuna, orqo puntapi wiphalata sayachejtinku, sumajta qhawariychej, cornetata waqachejtinkukamataj, sumajta uyarinkichej.

Isaías 24:5

Kay pachaqa chaypi tiyakojkunanejta ch'ichichasqa, imaraykuchus yachachisqanta mana junt'ankuchu, nitaj Tata Diospa kamachisqankunata kasunkuchu, wiñaypaj ruwasqa tratotapis p'akillankutaj.

Isaías 58:1

Tata Dios niwarqa: Ama samarispa, kunka llik'ikuyta qhapariy, pututu jina qhapariy. Jacobpa miraynin aylluypa juchanta sut'iman orqhoy.

Jeremías 31:32

Chay mosoj tratoqa mana ñawpa tatankuwan ruwarqani jinachu kanqa. Chay tratota paykunawan ruwarqani, maypachachus Egiptomanta paykunata orqhomorqani makinkumanta jap'ispa, chaypacha. Chaywanpis noqa qosanku jina kashajtiypis, paykunaqa trato ruwasqayta mana junt'arqankuchu. Noqa Tata Diosmin chayta nini.

Jeremías 34:18

Tata Dios nillantaj: Judamanta kurajkuna, jinataj Jerusalenmanta kajkunapis kamachina wasipi kamachejkunawan khuska, sacerdotekuna, tukuy chaypi tiyakojkunapis ñawpaqeypi uj tratota ruwarqanku: Uj waka uñata ñak'aspa, khuskanninmanta iskayman t'aqarqanku, chantá iskayman t'aqasqa chawpitataj pasarqanku. Chaywanpis trato ruwasqankuta p'akispa, mana junt'arqankuchu.

Jeremías 4:13

Chantá israelitakuna nenqanku: Qhawariychej, awqanchejkuna phuyu jina jamurishanku. Carretankupis sinch'i muyoj wayraman rijch'akunku, caballonkutaj ankakunamantapis aswan usqhayta phawanku. Ay, noqanchejqa imallapichus tukukusunchejpis, nispa.

Jeremías 4:5

Judá suyupi kayta willamuychej, jinallataj Jerusalén llajtapipis uyarichimuychej. Trompetata waqachispa, kay tukuy suyupi qhapariychej, ajinata sinch'itapuni qhapariychej: Tantakuspa, ayqekunachej sumachaj jark'achasqa llajtakunaman, nispa.

Jeremías 48:40

Tata Dios nillantaj: Moabpa awqanqa anka jina paypa contranpi phawan.

Jeremías 49:22

Bosraj contranpi awqanqa oqharikonqa, imaynatachus uj anka oqharikuspa phawan, ajinata. Chay p'unchaypi Edompa soldadonkunaqa kharkatitenqanku, imaynatachus paqarichikoj warmi kharkatitin, ajinata, nispa.

Jeremías 51:27

Chay suyupi wiphalata pataman oqhariychej maqanakuman yaykunapaj. Trompetata waqachiychej, runatataj tantaychej, Babiloniaj contranta maqanakoj yaykunapaj. Paypa contranpi Araratmanta, Minimanta, Askenazmantawan runata tantaychej. Chantá uj kamachejta churaychej, tukuy rejkunata maqanakuman pusananpaj. Caballopi rejkunata kachaykuychej, may chhika phinki phinkikuna jina.

Jeremías 6:1

Benjamín ayllumanta kajkuna, pakakunata mask'aychej, Jerusalenmantataj ayqeychej. Tecoapi trompetata waqachiychej. Señal kananpaj ninata jap'ichispa, q'oshñichiychej Bet Haquerenpi, imaraykuchus wichaynejmanta jatun llakiy, manchay ñak'ariytaj jamushan.

Ezequiel 11:4

Chayrayku runaj churin, sutiypi paykunaj contranpi sut'inchay, nispa.

Ezequiel 16:59

Noqa Tukuyta Kamachej Tata Dios nillanitaj: Ruwasqaykiman jina jasut'isqayki, imaraykuchus tiluwasqaykita pisipaj qhawaspa, trato ruwasqaykita p'akerqanki.

Ezequiel 17:3

Paykunata niy: Tukuyta Kamachej Tata Dios kayta nisunkichej: Uj manchay jatun anka Libanoman chayamusqa. Lijrankunaqa manchay jatuchaj kasqa, tukuy imaymana color phuruyojtaj. Chantá pino sach'aj thansanta jap'ispa,

Ezequiel 7:14

Pututu waqajtin, maqanakuman rinankupaj tukuy wakichikunku. Chaywanpis mana pipis maqanakuman rejqa kanchu, imaraykuchus runaykachaj Israelta k'araj phiñakuyniywan jasut'isaj.

Oseas 4:6

Qankunatajrí, sacerdote kashaspa, yachachisqayta qhesacharqankichej. Chayrayku noqapis sacerdote kanaykichejmanta wijch'usqaykichej. Qankunaqa Diosniykichejpa kamachisqanta qonqaporqankichej. Kunantaj noqapis wawaykichejkunamanta qonqapullasajtaj.

Oseas 5:8

Gabaa llajtapi maqanakuman wajyana putututa waqachiychej, Ramapitaj cornetata waqachiychej. Bet Avenpi wakichisqa kachunku, Benjaminpipis kikillantaj kachunku.

Oseas 6:7

Chaywanpis aylloyqa Adán jinallataj trato ruwasqayta p'akinku, wasanchawankutaj.

Oseas 9:15

Tata Dios nin: Israelitakunaqa Gilgalpi tukuy imaymana mana allin kajta ruwarqanku, chaymantapachataj paykunata chejnikuyta qallarerqani. Millay sajrata ruwasqankuraykutaj wasiymanta paykunata wijch'usaj. Manaña paykunata munakusajñachu, imaraykuchus tukuy kurajninkukuna contraypi oqharikorqanku.

Joel 2:1

Sión orqopi putututa waqachiychej. Noqaj ajllakusqay orqopitaj sinch'ita qhapariychej. Judá suyupi tiyakojkuna, tukuyniykichej kharkatitiychej, imaraykuchus Tata Diospa p'unchaynin chayamushanña.

Joel 2:15

Sión orqopi putututa waqachiychej. Tukuy runata tantaspa, ayunanankuta willaraychej.

Amós 3:6

Sichus llajtapi pututu waqan chayqa, runakuna qhollpirakuyta qallarinku. Sichus ñak'ariy llajtapi rikhurin chayqa, Tata Diosmin chayta apachimun.

Amós 8:3

Chay p'unchaypi kamachinanku wasipi takisqanku may llakiyman tukonqa. Ashkha runakuna wañusqankuraykutaj, ayanku tukuynejpi wijch'urayanqa, nispa. Noqa Tukuyta Kamachej Tata Diosmin chayta nini.

Amós 9:1

Chantá noqaqa Tukuyta Kamachej Diosta altar qayllapi sayashajta rikorqani. Paytaj niwarqa: Temploj sayantankunata wajtay, punkukuna thalakunankupaj. P'akirakuspa, runakunaj umankuman urmaykuchun. Noqataj puchojkunata espadawan wañurachisaj, manataj pipis pakakuyta nitaj ayqeytapis atenqachu.

Habacuc 1:8

Caballonkoqa tigremantapis astawan sinch'ita t'ijurin, ch'innejpi k'ita alqokuna jinataj manchachikunapaj kanku. Caballopi soldadonkukunapis wayra jina phawarispa, karumantapacha maqanakoj chayarparimunku, imaynatachus anka mikhunanta jap'ej phawaykun, jinata.

Sofonías 1:16

Chay p'unchaypi pututu waqanqa. Jinapitaj awqaykichejqa jark'achasqa llajtakunaj contrankupi, jatuchaj qhawana torrenkunaj contrankupi ima jap'inankupaj kachaykonqanku.

Zacarías 11:1

Líbano, punkuykita kichariy, pino sach'aykikunata nina ruphaykunanpaj.

Zacarías 9:14

Tata Diosqa maqanakuman ayllunpa ñawpaqenta renqa, jinaspataj, illapata jina flechankunatapis kacharenqa. Tukuyta Kamachej Tata Dios putututa waqachispa, muyoj wayra chawpipi urayninta renqa.

San Mateo 24:28

Maypichá aya tiyan, chayman suwintukuna tantakonqanku, nispa. Ajinata Jesús yachacherqa.

1 Corintios 15:52

Ujllata, uj ñawi ch'irmiypi, qhepa kaj trompeta waqajtin, waj jinaman tukuchisqa kasunchej. Trompeta waqajtin, ñawpajta wañusqakuna kawsarimponqanku mana jayk'aj ujtawan wañunankupaj. Chaymantataj noqanchejpis waj jinaman tukuchisqa kasunchej.

Deuteronomio 28:49

Qanpa contraykita Tata Diosqa karumanta, kay pachaj k'uchunmantapacha waj llajtayojkunata kachaykamusonqa. Chay karu llajtayojkunaj parlasqankuta mana entiendeyta atinkichu. Paykuna anka jina usqhayllata phawamuspa, chayamusonqanku.