Jeremías 11:8 - DIOSPA QHELQACHISQ

⁸ Chaywanpis mana kasuwarqankuchu, nitaj uyariwarqankuchu, manachayqa k'ullukuspa, sonqonkoj millay yuyasqallanta ruwarqanku. Paykunaqa manapuni kamachisqayta junt'ayta munarqankuchu. Chayrayku chay tratopi imatachus nisqay ñak'ariykunata patankuman kachaykamorqani, nispa.

Qheshwa Biblia DC

⁸ Chaywampis mana kasuwarqankuchu, nitaj uyariwarqankuchu, manachayqa k'ullukuyninkuwan, rumi sonqonkoj munayninman jina ruwarqanku, manapuni kamachisqasniyta junt'ayta munarqankuchu; chayrayku jasut'isniyta kachamorqani, chay trato ruwasqaypi nisqayman jina.

DIOSPA QHELQACHISQAN DEUTEROCANONICAL

⁸ Chaywanpis mana kasuwarqankuchu, nitaj uyariwarqankuchu, manachayqa k'ullukuspa, sonqonkoj millay yuyasqallanta ruwarqanku. Paykunaqa manapuni kamachisqayta junt'ayta munarqankuchu. Chayrayku chay tratopi imatachus nisqay ñak'ariykunata patankuman kachaykamorqani, nispa.

Jeremías 11:8 ပူးပေါင်းရင်းမြစ်များ

Nehemías 9:26

Chaywanpis, Tata Dios, paykunaqa mana kasukojkuna karqanku. Contraykipi oqharikorqanku, kamachisqaykitataj qhesacharqanku. Chantaqa sut'inchajniykikunata wañucherqanku uyankupi qanman kutirikamunankuta k'amisqankurayku. Chaymantataj aswan millayta ruwaspa, sonqoykita nanachisorqanku.

Nehemías 9:29

Qanqa paykunata k'amej kanki kamachisqaykita watej junt'anankupaj. Paykunatajrí may kasqankuta yuyakuspa, kamachisqaykita mana kasojchu kanku. Nisqaykita p'akej kanku, mayqentachus junt'aspa kawsayta tarinanku karqa, chayta. Paykunatajrí qanpa contraykita oqharikuspa, rumi sonqo kasqankurayku, mana uyarikorqankuchu.

Jeremías 13:10

Millayta ruwaj runakunaqa kamachisqayta mana uyariyta munankuchu, manachayqa k'ullukuspa, sonqonkoj yuyasqanta ruwanku. Paykunaqa waj dioskunaj qhepankuta purinku paykunaj munayninkuta ruwanankupaj, chantá yupaychanankupaj ima. Ajinata ruwasqankurayku kay ismusqa chumpi jina mana imapaj walejchu kanku.

Jeremías 3:17

Chaypacha Jerusalenta sutichanqanku: “Tata Diospa Kamachinan Tiyana”, nispa, tukuy suyumanta kajkunataj chaypi yupaychanawankupaj tantakonqanku. Manaña ujtawan sonqonkupi k'ullukuspa sajra yuyasqankuwan apachikonqankuchu.

Jeremías 31:32

Chay mosoj tratoqa mana ñawpa tatankuwan ruwarqani jinachu kanqa. Chay tratota paykunawan ruwarqani, maypachachus Egiptomanta paykunata orqhomorqani makinkumanta jap'ispa, chaypacha. Chaywanpis noqa qosanku jina kashajtiypis, paykunaqa trato ruwasqayta mana junt'arqankuchu. Noqa Tata Diosmin chayta nini.

Jeremías 32:23

Paykunataj qosqayki jallp'aman yaykuspa, dueñochakorqanku. Chaywanpis mana kasusorqankuchu nitaj kamachisqaykita junt'arqankuchu. Manallataj paykuna kamachisqaykita ruwarqankuchu. Chayraykumin kay tukuy ñak'ariykunata paykunaman kachaykamorqanki.

Jeremías 34:14

Noqa paykunata kamacherqani sapa qanchis watamanta kacharipunankuta, mayqen llajta masinkuchus paykunaman vendekuspa, sojta watataña kamachinkupi karqanku, chaykunata. Jinapis ñawpa tataykichejqa mana kasuwarqankuchu, nitaj nisqayta ruwarqankuchu.

Jeremías 35:15

Qhepan qhepanta noqamanta sut'inchajkunata kachamorqaykichej ninasuykichejpaj: Mana allin ruwasqaykichejta, millay kawsayniykichejta ima saqeychej. Ama waj dioskunaj qhepankuta ripuychejchu, nillataj paykunata yupaychaychejchu. Kay nisqaytachus kasuwankichej chayqa, qankunaman, jinataj ñawpa tataykichejmanpis qosqay jallp'api tiyakullankichejpuni, nispa. Chaywanpis qankunaqa manapuni kasuwarqankichejchu, nitaj nisqayta junt'arqankichejchu.

Jeremías 35:17

Chayrayku noqa Israelpa Tukuy Atiyniyoj Tata Diosnin nini: Noqa Judapi tiyakojkunaj patanman, jinataj Jerusalén llajtapi tiyakojkunaj patankumanpis tukuy ima ñak'ariykunata kachaykamusaj. Noqa parlapayarqaykichej, qankunatajrí mana kasuwarqankichejchu. Jinallataj wajyarqaykichej, manataj uyariwarqankichejchu, nispa.

Jeremías 38:20

Jeremiasrí kuticherqa: Mana judiokunaj makinman chayankichu. Tata Diospa nisqanta willasusqayta kasuy. Ajinamanta allinmin risonqa, manataj wañunkichu.

Jeremías 44:16

Tata Diospa sutinpi niwasqaykuta mana kasusqaykuchu.

Jeremías 44:17

Manachayqa ruwallasqaykupuni, imatachus ruwanaykuta nerqayku, chayta. Inciensota q'oshñichillasqaykupuni, vinotapis ch'allasqayku Janaj Pachaj Qoyan nisqa diosman, imaynatachus kunankama kuraj kamachejniyku, noqayku, ñawpa tatayku ima ruwarqayku, ajinata. Judá llajtakunapi, jinallataj Jerusalenpa callenkunapipis Janaj Pachaj Qoyan nisqa diosman inciensota q'oshñichillarqaykupuni, imaynachus ñawpa tataykukuna ruwarqanku, ajinata. Chaypacha chayta ruwasqaykurayku ñawpajta ashkha mikhuna tiyapuwaj kayku, atipachikunaykupaj jina. Tukuy imapi allin riwaj kayku, manataj ima ñak'ariypis noqaykuta qhatiriwajchu kayku.

Jeremías 44:5

Paykunatajrí nisqayta mana ruwarqankuchu, nitaj kasuwarqankuchu. Millay ruwanankuta saqenankutaqa, inciensota waj dioskunaman q'oshñichillarqankupuni.

Jeremías 7:13

Mashkha kutita parlapayarqaykichej, qankunatajrí mana kasuwayta munarqankichejchu, nitaj uyarillawaytapis munarqankichejchu.

Jeremías 7:24

Chaywanpis paykuna mana kasuwarqankuchu, nitaj uyariwarqankuchu. Manachayqa rumi sonqo kayninkuwan apachikorqanku, jinallataj sonqonkoj millay ruwayta munasqanwan ima. Noqaman kutirikamunawankutaqa wasanchawarqanku.

Jeremías 7:26

Chaywanpis qankunaqa manapuni kasuwarqankichejchu, manachayqa ñawpa tataykichejkunamantapis astawanraj rumi sonqo karqankichej.

Ezequiel 20:8

Paykunatajrí contraypi oqharikorqanku, manataj uyariwayta munarqankuchu. Millay lantinkumanta ni pipis t'aqakorqachu, nitaj Egiptomanta apamusqanku lantikunatapis saqerqankuchu. Chayrayku noqa yuyarqani k'araj phiñakuyniyta patankuman kachaykuspa, kikin Egiptollapiraj paykunata ñak'arichiyta, phiñakuyniyta thasnukunaypaj.

Zacarías 1:4

Ama ñawpa tataykichejkuna jina kaychejchu. Noqamanta ñawpa sut'inchajkunaqa paykunata sutiypi nerqanku: Millay kawsayta saqeychej, mana allin kajta ruwanamantataj t'aqakuychej, nispa. Paykunatajrí mana uyariwarqankuchu nitaj nisqayta kasuwarqankuchu. Noqa Tukuy Atiyniyoj Tata Diosmin chayta niykichej.

Zacarías 7:11

Ñawpa tataykichejkunatajrí mana kasuta ruwawarqankuchu. Tukuyninku wasanchawarqanku, mana uyarejtaj tukorqanku.