Isaías 41:10 - DIOSPA QHELQACHISQ

¹⁰ Chayrayku ama manchachikuychu, imaraykuchus noqa qanwanpuni kashani. Ama q'enaqakuychu, imaraykuchus noqa Diosniyki kani. Noqa kallpachasqayki, yanapasqaykitaj. Jinallataj justiciata ruwaj paña makiywan sayachillasqaykipuni.

Qheshwa Biblia DC

¹⁰ Qanqa, ama manchachikuychu. Noqaqa qanwampuni kashani, Ama iskayrayaychu. Noqaqa kallpachasoj Diosniyki kani. Atipachej paña makiywan sayachisqayki, yanapallasqaykipunitaj.

DIOSPA QHELQACHISQAN DEUTEROCANONICAL

¹⁰ Chayrayku ama manchachikuychu, imaraykuchus noqa qanwanpuni kashani. Ama q'enaqakuychu, imaraykuchus noqa Diosniyki kani. Noqa kallpachasqayki, yanapasqaykitaj. Jinallataj justiciata ruwaj paña makiywan sayachillasqaykipuni.

Isaías 41:10 ပူးပေါင်းရင်းမြစ်များ

Génesis 15:1

Chaymanta Tata Diosqa Abramman mosqoypi jina parlarqa: Ama manchachikuychu, Abram, imaraykuchus noqa waqaychasojniyki kani. Qanpa t'inkaykeqa may chhikapuni kanqa, nispa.

Génesis 26:24

Chay tutataj Tata Dios payman rikhurispa, nerqa: Noqaqa tatayki Abrahampata Diosnin kani. Ama manchachikuychu, imaraykuchus noqa qanwan kashani. Kamachiy Abrahamman nisqayrayku noqa saminchasqayki, mirayniykitapis ashkhayachisaj, nispa.

Génesis 31:5

Chayajtinkutaj, nerqa: Reparani tataykichejqa manaña ñawpajta jinachu qhawawasqanta. Chaywanpis tataypa Diosnenqa noqata yanapashawan.

Génesis 49:24

Joséj makinrí sinch'i kallpayoj kaspa, arcota sumajta jap'in Jacobpa atiyniyoj Diosninrayku, Israelta michejrayku, waqaychajninraykutaj.

2 Samuel 22:19

Sinch'i llakiypi kashajtiy, paykuna maqaj wakiykuwarqanku. Chaywanpis Tata Diosqa yanapawarqapuni,

1 Crónicas 12:18

Chaypacha 300 wapu soldadokunaj kamachejninku Amasayman Diospa Espíritun jamuspa, payta jatunmanta parlacherqa: Yeséj churin David, qanpata kayku, qanwanpunitaj kashayku. Allin kawsay qanpaj kachun, qanta yanapasojkunapajpis, imaraykuchus Diosniyki yanapashasunki, nispa. Davidtaj paykunata jap'ispa, soldadokunata kamachinankupaj churarqa.

2 Crónicas 20:17

Manamin qankunachu maqanakunkichej. Chaynejpi mana kuyurispa sayaychej, rikunkichejtaj imaynatachus Tata Dios qankunata yanapasonqachej, chayta. Jerusalenpi, jinataj Judapi tiyakojkuna, ama manchachikuychejchu, nitaj kharkatitiychejchu. Q'ayapacha rispa, contrankupi sayaykuychej, imaraykuchus Tata Dios qankunawan kanqa, nispa.

2 Crónicas 32:8

Asiriamanta kuraj kamachejqa runaj kallpallanpi atinikushan. Noqanchejwantajrí Tata Dios kashan, paytaj noqanchejrayku maqanakonqa, nispa. Judata kuraj kamachej Ezequiaspa parlasqanta uyarispataj, soldadokunaqa mayta kallpachakorqanku.

Salmos 144:11

Noqatapis waj llajtayojkunaj makinkuman urmanaymanta libraway. Paykunaj siminkoqa llullallata parlan, paña makinkuta oqharispataj, pujllakuspa jinalla tilunku, manataj nisqankuta junt'ankuchu.

Salmos 144:8

Paykuna llullakuspalla parlanku. Paña makinkuta oqharispa, pujllakuspa jinalla tilunku, manataj nisqankuta junt'ankuchu.

Salmos 145:14

Tata Diosqa tukuy urmajkunata aysarin, jinallatataj llakiywan ñit'isqa kajkunatapis.

Salmos 147:12

Jerusalén, Tata Diosta jatunchay. Sión, Diosniykita yupaychay.

Salmos 18:36

36 (37) Ñanniyta purinaypaj jina ruwasqaykirayku chakiy mana llusk'arqachu.

Salmos 27:1

(1b) Tata Diosqa k'anchawajniy, qhespichiwajniytaj. Pimantataj manchachikusajri? Tata Diosqa kallpachawajniy, tukuy mana allin kajmanta jark'akuwajniy ima. Imajtintaj imatapis manchachikuyman kasqari?

Salmos 29:11

Tata Diosqa ayllunmanpis kallpata qollantaj. Jinallataj Tata Dios sonqo tiyaykusqa kawsakuywan ayllunta saminchan.

Salmos 33:12

Kusikuyniyoj pi suyojtachus Tata Diosqa Diosnin kajtin. Chay aylluta payqa paypata kananpaj ajllakun.

Salmos 37:17

Tata Diosqa millayta ruwajkunaj atiyninkuta chinkachenqa, cheqanta ruwaj runakunatatajrí yanapanqa.

Salmos 37:24

Chay runa urmanman chaypis, mana pampapi wijch'usqachu qhepakonqa, imaraykuchus Tata Dios makinmanta jap'in.

Salmos 41:12

12 (13) Mana k'aminapaj jina purisqayrayku marq'arikuway, wiñaypajtaj ñawpaqeykipi kanallaytapuni munay ari.

Salmos 46:11

11 (12) Tukuy Atiyniyoj Tata Dios noqanchejwan kashan. Jacobpa Diosnenqa pakakunanchej.

Salmos 46:7

7 (8) Tukuy Atiyniyoj Tata Dios noqanchejwan kashan. Jacobpa Diosnenqa pakakunanchej.

Salmos 63:8

8 (9) Almayqa qanman ujchasqa, paña makiykitaj mana kachariwanchu.

Salmos 65:5

5 (6) Qhespichiwajniyku Dios, justiciawan t'ukunata ruwaspa, qan kutichiwayku. Kay pachapi tukuy tiyakojkuna qanpi atinikunku, jinallataj aswan karu mama qocha kantupi tiyakojkunapis.

Salmos 99:4

Tata Dios, qan may jina atiyniyoj Kuraj Kamachej kanki, justiciatataj munakunki. Qanmin tukuypaj uj rejllata ruwanata sayacherqanki. Jacobpa churinkunapaj justiciata, cheqan kajta ima ruwarqanki.

Éxodo 14:13

Moisestajrí israelitakunata nerqa: Ama manchariychejchu, pachanpi sayaychej, rikunkichejtaj Tata Dios qankunata kacharichisunaykichejpaj imatachus ruwananta. Kunallantawanña Egipto llajtayojkunaj uyankuta rikunkichej. Kaymanta qhepamanrí niña jayk'ajpis paykunata rikunkichejñachu.

Éxodo 20:20

Moisestaj paykunata nerqa: Ama manchachikuychejchu. Diosqa sonqoykichej imaynachus kasqanta yachaj jamun, qankuna payta manchachikuspallapuni kanaykichejpaj, amataj juchallinaykichejpaj, nispa.

Isaías 12:2

Diosmin kacharichiwajneyqa. Payllapi noqa atinikuni, manaña ni imamanta manchachikusajchu. Tata Dios kallpachawajneyqa, payllamantapuni takisaj, imaraykuchus paylla atipanaypaj yanapawan.

Isaías 35:4

Manchachikojkunamantaj niychej: Kallpachakuychej, amataj manchachikuychejchu. Qhawariychej, Diosniykichej jamushan awqanchejkunata ñak'arichispa, ruwasqankuman jina pagachikunanpaj, kacharichinawanchejpajtaj, nispa.

Isaías 37:6

Isaías paykunaman kuticherqa: Kamachiykichejman ajinata nimuychej: Tata Dios ajinata nin: Ama chay runaj nisqanmanta llakikuychu, noqaj contrayta Asiriamanta kuraj kamachejpa kamachinkuna millayta rimasqankumantaqa.

Isaías 43:5

Ama manchachikuychu, imaraykuchus qanwanpuni kashani. Chantá inti llojsimuynejmanta, inti yaykuynejmantawan runaykikunata tantamusaj.

Isaías 44:2

Noqa ruwasoj Tata Diosniyki kani. Manaraj paqarikushajtiyki ruwarqaykiña, kunantaj qanta yanapasqayki. Munakusqay Jacobpa ayllun, ama manchachikuychu, imaraykuchus noqaqa kamachiy kanaykipaj ajllakorqayki.

Isaías 49:8

Tata Dios nillantaj: Khuyakunay p'unchay chayamojtin, uyarerqayki, qhespichina p'unchaypitaj yanaparqayki. Noqa waqaychasqayki, qannejtataj uj tratota tukuy runawan ruwasaj. Chay suyuta watej mosojyachisaj, saqerpayasqa jallp'akunatataj watej rak'irasaj.

Isaías 50:9

Tukuyta Kamachej Tata Diosmin yanapawan. Pitaj juchachawanqari? Tukuy awqaykuna phirisqa kanqanku, imaynatachus thutaj k'utusqan p'acha t'akakapun, ajinata.

Isaías 52:7

Pichus orqo patanta jamuspa sumaj willaykunata apamojta rikunaqa may kusiymin. Payqa allin kawsaymanta, qhespichisqa kaymanta ima sumaj willaykunata apamushan, Sionmantaj nin: Diosniykeqa kamachishanña, nispa.

Isaías 60:19

Chaypacha mana intichu, nitaj killachu k'anchamusonqa, manachayqa noqa Tata Diosmin wiñaypaj k'anchaykamusqayki. Noqa Diosniykirayku jatunchasqapuni kanki.

Lamentaciones 3:57

Qhaparikamorqayki, chay p'unchay qayllaykamuwaspa, niwarqanki: Ama manchachikuychu, nispa.

Daniel (hebreo) 10:12

Chantá niwarqa: Daniel, ama mancharikuychu. Qanqa ñawpaj p'unchaymantapacha, mana entiendey atina imakunata yachayta munaspa, Diosman k'umuykuyta yuyaychakorqanki. Chaymantapacha Diosqa mañakusqaykita uyarishasorqa, chayraykutaj noqa jamuni.

Daniel (hebreo) 6:16

16 (17) Chantá kuraj kamachejqa Danielta pusachimuspa, kamacherqa leonkunaj t'oqonkuman wijch'uykunankuta. Chaywanpis manaraj payta wijch'uykushajtinku, kuraj kamachejqa Danielta nerqa: Pitachus tukuy sonqo kasuspa yupaychanki, chay Diosniyki leonkunamanta waqaychasuchun, nispa.

Oseas 1:9

Chaypacha Tata Diosqa Oseasta nerqa: Chay wawata Loamí sutiwan sutichay, imaraykuchus Israelqa manaña aylluychu kanqa, nitaj noqapis Diosninkuñachu kasaj, nispa.

Hageo 1:13

Chantá Tata Diospa kachan Hageo paykunaman Diospa sutinpi kay jinata parlarqa: Tata Dios nisunkichej: Noqa qankunawan kashani, nispa.

Hageo 2:5

Tata Dios nillantaj: Imaynatachus Egiptomanta llojsimushajtiykichej, qankunawan tratota ruwarqani, chayman jina Espírituy qankunawan kanqa. Ama manchachikuychejchu, nispa.

Zacarías 10:12

Aylluytarí noqa kallpachasaj, paykunataj sutiypi ñawpajllamanpuni renqanku. Noqa Tata Diosmin ajinata nini.

Zacarías 10:6

Tata Dios nillantaj: Noqaqa Judáj mirayninta kallpachasaj, jinallataj Joséj miraynintapis kacharichisaj. Paykunamanta khuyarikusqayrayku, watej paykunata llajtankuman kutichisaj. Manapis ni jayk'aj paykunata qhesachaymanchu karqa, ajina kanqa. Noqa, Tata Diosninku kani, mañakuwasqankutataj uyarisaj.

Zacarías 13:9

Chay qhepakojkunarí ninawan ch'uwanchasqa kanqanku. Imaynatachus runa qolqe metalta ninapi ch'uwanchan, chayrí qorita ch'uwanchan, ajinata noqapis paykunata llimphuchasaj. Chaypacha paykunaqa sutiyta oqharenqanku Diosninkupaj rejsikapuwasqankurayku, noqataj mañakuwasqankuta uyarisaj. Chantá paykunata nisaj: Qankuna aylluy kankichej, nispa. Paykunataj kutichiwanqanku: Tata Diosqa Diosninchej, nispa. Noqa Tata Diosmin chayta nini.

San Lucas 1:13

Chantá ángel payta nerqa: Zacarías, ama mancharikuychu. Mañakusqaykita Diosqa uyarinña. Warmiyki Elisabet wawayoj kanqa, paytataj Juan sutiwan sutichanki.

San Lucas 1:30

Angeltajrí nerqa: María, ama mancharikuychu. Dios sumajta qhawarimusunki.

Romanos 8:31

Astawan ima nisunmantajri? Sichus Dios noqanchejman kutisqa kashan chayqa, mana pipis contranchejpi sayaykuyta atiwasunmanchu.

2 Corintios 12:9

Diostajrí niwarqa: Chay ñak'ariyniykita awantanaykipaj k'acha yanapaynillay yanapasonqa, imaraykuchus atiyneyqa pisi kallpayojkunapi astawan rikuchikun, nispa. Chayrayku kusiywan pisi kallpayoj kasqaymanta jatunchakusaj, Cristoj atiynin noqapi imatachus ruwasqan sut'ita rikukunanpaj.

Efesios 3:16

Dioswan parlarikuspataj, mañakuni Santo Espiritunejta jatun kayninpa qhapaj kayninman jina, chantá atiyninwan ima sonqoykichejta kallpachasunaykichejta.

Deuteronomio 20:1

Awqaykichejwan maqanakoj llojsispa, ichapis rikuwajchej paykuna ashkha caballoyoj, ashkha carretayoj kasqankuta, jinataj qankunamanta nisqa aswan ashkha soldadoyoj kasqankuta. Chayta rikuspa, ama manchachikunkichejchu, imaraykuchus pichus Egiptomanta orqhomusorqachej, chay Tata Diosniykichejqa qankunawan kashan.

Filipenses 4:13

Tukuy imaymana rikhurimojtin, noqaqa sinch'ita sayayta atini Cristo kallpachawasqanrayku.

Josué 1:9

Noqamin kamachiyki: Sumajta kallpachakuy, waputaj kay. Ama manchachikuychu, nitaj q'ewakuychu. Noqa Tata Diosniyki qanwanpuni kasaj, maymanchá rinki, chaypi, nispa.

Jueces 6:16

Chantá Tata Dios kuticherqa: Atinkipuni, imaraykuchus noqa qanwan kasaj. Madianitakunataqa uj sapan runallapis kanman jina atipanki, nispa.