7 ‘Inapwana Ieoba ‘i da lemegu ta ‘enega; ta ‘enega nigea ia nuaowana: ta ‘enega maninigu ia sa‘u ‘ai‘aila ginausa ‘atua, ta ia mwaramwaratoni gea‘abo ia da omaiamaia.
‘Igu ‘ari‘e wa da ‘ita, tauna a gi‘ete; ‘agu ‘esi‘esinua, tauna ‘ena iaruiaruagu ‘i guausoara: iaruiaruagu ia sa‘u ‘enaia; etara ‘i da me‘ena ‘Asa‐apwesa ‘edia.
Ta kiniao si da tamamuao to amwamwa, ta ‘idi kuiniao sinamuao to amwamwa: si da bwagobwago sana mwa‘uta bare‘uia ‘emuia, ta ‘aeio ‘ina kau si da loiamosi: ta ‘u da mwaratoni ‘abo‘agu Ieoba, ta taudi si iamwaiamwa manugu gea‘abo si da omaiamaia.
Gete nadigega Ieoba ‘i gwae, Tuta bobo‘ana ‘enega ni‘atu ia onalimana ‘emuia, ta ‘etoseana ‘ana asiata ‘enega ni‘atu ia lememu: ta ia da egagareio, ta ia da ‘ebwaea‘eio tomota ‘idi ona‘upa‘upa manuna, be bare‘u ‘u da sa‘u ‘ai‘aili, be ‘u da loinedi be ‘egu‘eguia waboreboreao si da ‘ewa:
Wa ‘ita, ‘Inapwana Eaubada ‘i da lemegu; ‘iaita tauna ‘i da ‘awato‘umaliegu? wa ‘ita, iauiaudi si da ekadekaderidi ‘atua ‘oama; manumanuao si da ‘e‘egumwaridi.
Gea‘abo ‘u matauta; gea‘abo ‘u da omaiamaia ta ‘enega: nai nuaio ‘i da owana; gea‘abo ‘amu omaiamaiamo ta ‘enega: ‘imu tuta gomagweine ‘ina omaiamaia ‘u da nuapupure ta ‘enega, ta ‘imu tuta ‘oabura ‘ana ‘ebesinara gea‘abo wate ‘u da nua‘i‘isina.