Yoni 8:12 - Loina Tabu Auwauna NT

¹² Ta Yesu 'ediya 'iona limana, 'igwae, “'Abo'agu me bale'u 'idi maedana, be 'enega yaita tauna 'imuliyegu maedana nina yawasina 'ena 'ida sae, ta geya'abo wate guguyoi 'ena 'itautauya.”

Yoni 8:12 ပူးပေါင်းရင်းမြစ်များ

Madiu 5:14

Ta wate 'omi 'atuwa mayale me bale'u manudi. 'Eguma mayale taloe'abiya geya'abo 'ule 'enega ta'au'aukabobo, ta esi 'ebesa'u etaninaya tasa'u be anuwa maibo'ana 'ida maedana. Wate nadigega 'eguma 'oya debanaya talo'asa, nigeya kapekapeyana be 'asa nina takwaiye.

Luke 2:32

ta tauna taudi nigeya me Yudia 'adi togiemaedana, ta 'abo'ama 'imu tomotaiyao me Isileli 'ima 'ebe tupu.”

Yoni 12:35

'Enega Yesu 'ieonedi, “Tuta gidalinamo 'ena maedana 'emiya 'imiyami, 'enega gete tuga maedana nina 'ena watatauya, manuna 'abo guguyoi 'imamai geya'abo 'eda wa'ita'ita. Manuna 'abo yaita tauna guguyoi 'ena 'itautauya nigeya 'imwalamwalatoni mwa'o 'ena 'itautauya.

Yoni 12:36

Ta 'abo maedana 'emiya 'imiyami, maedana nina 'ena wada emisa, be 'enega 'omi maedana natunao ga maemaedanimi. Yesu 'ina ona gete 'i'inanedi ga 'ipilisinedi ta 'ediyega 'ikwaiya.

Yoni 12:46

Ta 'abo'agu maedana nina gete yamai bale'uya be 'enega yaisigedi 'omi waemisegu geya'abo wate guguyoi 'ena wamiyami.

Yoni 14:6

Ta Yesu Tomasi 'ieonena, 'igwae, “'Abo'agu 'eda nina, ta wate ona 'ai'aila, be yawasimi 'aledi. 'Abo yaita nuwanuwana be 'itatauya Tamagu 'ena, nigeya 'ebweu wate 'eda 'imiyami, nate namo tuga 'abo'agu.”

Yoni 3:19

Gete loina nina 'alena manuna maedana ni'atu bale'uya 'imai ta tomotai guguyoi nuwanuwadi, ta maedana siguitoyasena manuna 'idi bubuna to'umalina.

Yoni 7:17

Ta 'omi wate 'abo nuwanuwami be Yaubada 'ina nuwena wada guinuwe, 'omi 'igu e'ita wada mwalatoni 'aene Yaubada 'enega, ta nigeya taugu 'igu nuwanuwa 'enega.

Yoni 9:5

'Enega 'abo'agu tuta nina bale'u 'ena yamiyami, 'abo'agu bale'u 'ana maedana.”

Guinuwa 13:47

“Manuna 'Inapwana ni'atu 'iemataluwema, 'igwae, ‘'Imi guinuwa ni'atu ya'ebwa'emi be 'aene 'omi taudi nigeya me Yudia 'idi mayale, be sena maibo'adi 'ediya 'adi 'etoseyana watauye.’ ”

Guinuwa 26:23

nate 'aene To'etoseyana nina 'elouya 'ida loba be mwawasa 'enega 'ida gimitoolo, be maedana 'ida lelewane me Yudia be taudi nigeya me Yudia 'ediya.”

2 Pita 2:17

Ta toe'ita kabokabo nidi 'idi bubuna 'atuwa nadigega bwasi gaula nigeya bwasi dimo, ta taudi wate nadigega pwana, nigeya sida miyabaula, 'enega Yaubada 'ida sa'umwa'utedi gaula guguyoi 'ena be nada sida miyaataya.

2 Pita 2:4

Manuna Yaubada aniloseyao to'umalidi nigeya 'i'ate'atenuwa 'ole'oleyedi, ta esi gaula guguyoi 'ena 'iula mwa'utedi, ga simiyami be 'ana laba bwa'omatana 'ana tuta.

1 Yoni 1:6

'Enega 'abo sena guguyoi 'enaya tamiyami, geya'abo takabokabo be tagwae 'aene, “Yaubada ma'edai taegosiyana.” Nate nigeya bubuna palupaluna.

Yude 1:13

Ta wate 'adi 'ita 'atuwa lisu sinabwadi mabusobosodi 'idi guinuwao to'umalidi 'ediyega, ta wate 'adi 'ita 'atuwa kwadima siadadana besobeso be 'enega guguyoi 'ina senaya simiya ataya.

Yude 1:6

Aniloseyao wate wanuwa'i'isidi, manuna lowa 'aidi taudimo sigitu'eyedi, ga 'idi 'ebe miyao sipilisinedi, 'enega Yaubada 'iyonidi ga sena guguyoi ni'uya 'ena 'isa'udi, ga nada 'aene simimi be 'ana laba bwa'omatana 'ana 'asiyata 'iapwesa.

E'ita'ita 21:24

Ta maedana nina 'enega me bale'u sida lopilidadana, be bale'u 'ana kiniyao 'adi tupu sida me'e 'asa nina 'enaya.