Rome 2:16 - Nǫ̀htsı̨ Nı̨htł'è

¹⁶ Eyıt'à Nǫ̀htsı̨ dǫ-sınìyaehtıı-dzęę̀ k'e nı̨dè dǫ ayìı nàgeehɂį̀ eyıts'ǫ ededzeè t'à dàgı̨ı̨wǫǫ sìı Nǫ̀htsı̨, Zezì-Krı wet'ǫ̀ǫ̀ gosınìyaehtı ha hǫt'e. Dıı godı nezı̨ı̨ t'à gohdee sìı hotıì wek'ę̀ę̀ agode ha hǫt'e.

Rome 2:16 ပူးပေါင်းရင်းမြစ်များ

Dànì Kèhoį̀wo 18:25

Hanì kǫ̀godeè wedıhoı̨htsı̨ ha honàedı nıìle. Dǫ ehkw'ı geedaa sìı dǫ hołı̨ı̨ k'ę̀ę̀ geedaa xè ełaàgį̀ı̨hde ha dìì. Dǫ ehkw'ı geedaa eyıts'ǫ dǫ hołı̨ı̨ k'ę̀ę̀ geedaa ełèht'eè gıghàlaı̨da ha dìì hǫt'e. Hanì ha honàedı nıìle. Dıı nèk'e t'asìı hazǫǫ̀ yesınìyahtıı elı̨ı̨ sìı ehkw'ı eghàlaeda ha nıìle nì?” Abraham yèhdı.

Matthew 16:27

Dǫ-wet'àaɂàa-deè sìı detà wets'ǫ t'asìı nàtsoo xè enıìyah deè t'à edets'ǫ yak'eet'ı̨į̀ goxè nììtła ha. Eyıts'ǫ dǫ hazǫǫ̀ dànì eghàlagı̨ı̨dà k'ę̀ę̀ goghàhòɂà ha.

Luke 8:17

T'asìı deɂı̨į̀ wheɂǫǫ sìı ts'ǫwheɂǫǫ̀ ade ha eyıts'ǫ dǫ naàhtǫ dàts'et'ı̨ı̨ sìı wègoèt'į̀ ha.

John 12:48

Dǫ segı̨ı̨hwhǫ-le xè seyatıì gıgha ehkw'ı-ahodı-le sìı gıgha dǫ sınìyahtıı gǫ̀hłı̨ hǫt'e. Yatı nezı̨ı̨ t'à goıhdee sìı wedę agį̀į̀là t'à, nǫǫde dzęę̀ k'e nı̨dè hoìla agedle ha.

Zezì Wecheekeèdeè 10:42

‘Dǫ ts'ǫ̀ goahde,’ Zezì gòhdı. ‘Dǫ geedaa eyıts'ǫ ełaı̨dèe sìı gısınìyahtı gha Nǫ̀htsı̨ sį̀į̀hchì hǫt'e. Seghǫ godıì t'à dǫ gıts'ǫ̀ goahde ha,’ gòhdı ı̨lè.

Zezì Wecheekeèdeè 17:31

Dǫ hazǫǫ̀ ehkw'ı gısınìyaetı gha dzę whehɂǫǫ̀ ayı̨į̀là hǫt'e, eyı gha dǫ ı̨łè yį̀į̀hchì hǫt'e. Eyı wììchıı sìı dǫ hazǫǫ̀ gıgha ehkw'ı-ahodı ha t'à Nǫ̀htsı̨ naìdà ayį̀į̀là,” Paul gòhdı.

Rome 2:5

Hanìkò naxıkwì nàtso xè naxıdzeè t'à edek'eahłı̨-le t'à, Nǫ̀htsı̨ naxıts'ǫ̀ wek'èch'a aahłà hǫt'e. Nǫ̀htsı̨ edenàowoò ehkw'ıı k'ę̀ę̀ dǫ-sınìyaehtıı-dzęę̀ k'e nı̨dè, deɂǫ̀ǫ̀ hoìla anaxedle ha hǫt'e.

Rome 3:6

Hanì honàedı nıìle! Nǫ̀htsı̨ ehkw'ı-le eghàlaeda at'ı̨ nı̨dè, dànì Nǫ̀htsı̨ dǫ hazǫǫ̀ gosınìyaehtı welì?

1 Corınth 15:1

Sèot'ı̨ı̨, godı nezı̨ı̨ t'à naxıts'ǫ̀ goıhdee sìı wenaahdì ha dehwhǫ. Eyı godı nezı̨ı̨ sìı naxıgha ehkw'ı-ahodı xè hotıì wek'ę̀ę̀ aahda ha dahwhǫ hǫt'e.

1 Corınth 4:5

Eyıt'à eyı nèhòkw'ı kwe t'asìı wesınìyaahtı-le, hanìkò gots'ǫ̀ K'àowo nììtła ts'ǫ̀ naahɂı̨. Togoòtł'òo t'à t'asìı deɂı̨į̀ whelaa sìı wègaat'ı̨į̀ ayele ha, eyıts'ǫ dǫ dàgı̨ı̨wǫ t'à k'ehogı̨ı̨ɂaa sìı wek'èedzǫǫ̀ ayele ha. Eyı dzęę̀ k'e nı̨dè dànì godzeè t'à ehkw'ı nànıts'edèe sìı k'ę̀ę̀ Nǫ̀htsı̨ goghǫ sìghà adı ha.

2 Corınth 5:10

Ehkw'ı anaxèehsı̨, goxı̨ hazǫǫ̀ Zezì-Krı wenadąą̀ nìts'edè gà gosınìyaehtı ha hǫt'e. Dǫ hazǫǫ̀ ı̨łaà edezhį̀į̀ yìı geeda et'ıì ayìı hogehtsı̨ k'èxa gıghàhòt'à ha. Ehkw'ı gı̨ı̨dà, hanì-le-ı̨dè ehkw'ı gı̨ı̨dà-le k'èxa goghàhòɂà ha.

Galatıa 1:11

Sèot'ı̨ı̨, hotıì dıı wek'èahsǫ ha dehwhǫ: godı nezı̨ı̨ t'à naxıts'ǫ̀ gohdee sìı dǫ yèhtsı̨ nıìle.

2 Tımothy 2:8

Zezì-Krı wenaądì: k'àowocho Davıd wets'ıhɂǫ̀ǫ-dǫǫ̀ elı̨ eyıts'ǫ ełaı̨wo gots'ǫ naìdà. Eyı godı nezı̨ı̨ sìı wet'à dǫ hoghàehtǫ,

2 Tımothy 4:1

Nǫ̀htsı̨ wenadąą̀ eyıts'ǫ Zezì-Krı wenadąą̀ nets'ǫ̀ eehtł'è. Zezì ededı̨ sìı dǫ geedaa eyıts'ǫ dǫ ełaı̨dèe gosınìyaehtı ha. Gots'ǫ̀ wègoèht'į̀ ha eyıts'ǫ wenàowoò k'ę̀ę̀ hòɂǫǫ̀ ayele ha. Wedahxà dıı yatı neghàıhɂǫ hǫt'e:

2 Tımothy 4:8

Ehkw'ı gha sııtà xè hoehnǫ ts'ıhɂǫ̀ t'asìı sǫǫ̀mbaekwo t'à hòèlı̨ı̨ nǫǫde dzęę̀ k'e seghǫ̀t'à ha. Gots'ǫ̀ K'àowo ededı̨ zǫ ehkw'ı dǫ sınìyaehtı hǫt'e eyıts'ǫ ayìı dehnǫǫ sìı seghàyııɂà ha. Sı̨ zǫ hasele ha nıìle, hanìkò dǫ hazǫǫ̀ wègoèht'į̀ gha kànegı̨ı̨ɂaa sìı ededı̨ sı hagole ha hǫt'e.

Hebrew 9:27

Dǫ ı̨łàà zǫ ełaàwı ha hǫt'e, eyı tł'axǫǫ̀-ı̨dè Nǫ̀htsı̨ nadąą̀ wesınìyaetı ha.

1 Peter 4:5

Hanìkò Nǫ̀htsı̨ nadąą̀ edek'e xàyagehtı ha hǫt'e. Dǫ hazǫǫ̀ geedaa eyıts'ǫ dǫ hazǫǫ̀ ełaı̨dèe sìı hòt'a Nǫ̀htsı̨ gosınìyaehtı ha nìkw'o hǫt'e.

2 Peter 2:9

Hanì hòɂǫ nı̨dè gots'ǫ̀ K'àowo dǫ Nǫ̀htsı̨ wınì k'ę̀ę̀ geedaa sìı dànì hoìla ch'à edaxàgohtè ha sìı yek'èezǫ hǫt'e, hanìkò amìı ehkw'ı geeda-le sìı nàgoehkwa hǫt'e eyıts'ǫ gısınìyaetıı dzęę̀ gha gok'èdì.