Rome 15:16 - Nǫ̀htsı̨ Nı̨htł'è

¹⁶ Zezì-Krı wegha yahtıı wılaà ghàlaehda sììchì hǫt'e. Dǫ eyıì-le xàɂaa Nǫ̀htsı̨ wegodıì nezı̨ı̨ t'à hoghàgeehtǫ ha asį̀į̀là. Hanì-ı̨dè dǫ eyıì-le xàɂaa sìı Nǫ̀htsı̨ ghàgets'ele ha. Yedàyeh Nezı̨ı̨ wedahxà degaı agììdlà t'à Nǫ̀htsı̨ goghǫ sìghà anıwǫ ha.

Rome 15:16 ပူးပေါင်းရင်းမြစ်များ

Zezì Wecheekeèdeè 13:2

Įłàà yagehtı xè edegegǫ ekò Yedàyeh Nezı̨ı̨ gots'ǫ̀ goı̨de, hadı, “Barnabas eyıts'ǫ Saul segha eghàlageeda ha t'à, seghàgıahłe,” gòhdı.

Zezì Wecheekeèdeè 20:24

Hanìkò edegha ehda ha segha wet'àaɂà-le. Gots'ǫ̀ K'àowo la nechàa seghàı̨ɂǫǫ sìı welǫ ts'ǫ̀ weghǫ naht'è ha, eyı zǫ dehwhǫ. Nǫ̀htsı̨ gots'ǫ̀ sǫnıwǫǫ sìı eyı godı nezı̨ı̨ t'à dǫ ts'ǫ̀ gohde ha hǫt'e.

Zezì Wecheekeèdeè 20:32

“Hòt'a Nǫ̀htsı̨ ghànaxèehła, eyıts'ǫ naxıts'ǫ̀ wesǫnıwǫǫ godı t'à naxınì nàtsoò awede. Hanì-ı̨dè ı̨daà Nǫ̀htsı̨ dǫ hazǫǫ̀ edegha gòį̀hchìı sìı gıxè ayìı godawhehłaa sìı naxıghàyele ha hǫt'e.

Zezì Wecheekeèdeè 22:21

“Hanìkò gots'ǫ̀ K'àowo sets'ǫ̀ hadı, ‘Nıį̀tła, nıwàa nèk'e dǫ eyıì-le xàɂaa gıts'ǫ̀ anehłe ha,’ sèhdı,” Paul hadıì dǫ hazǫǫ̀ ts'ǫ̀ goı̨de.

Zezì Wecheekeèdeè 9:15

Hanìkò gots'ǫ̀ K'àowo Ananıas ts'ǫ̀ hadı, “Ekǫ nàątła! Eyı dǫ wììhchì hǫt'e, wet'ǫ̀ǫ̀ dǫ hazǫǫ̀ xàɂaa sıızì k'ègeezǫ ha. Dǫ eyıì-le xàɂaa gha k'aodèe ts'ǫ̀ gode ha eyıts'ǫ Israel got'ı̨į̀ sı ts'ǫ̀ gode ha, eyı gha wììhchì hǫt'e.

Rome 1:1

Sı̨ Paul aht'e, Zezì-Krı wegha eghàlaehda. Wecheekeèdeè ehłı̨ gha eyıts'ǫ Nǫ̀htsı̨ wegodıì nezı̨ı̨ dǫ ts'ǫ̀ haehsı̨ gha Nǫ̀htsı̨ sį̀į̀hchì hǫt'e.

Rome 11:13

Naxı̨ Israel got'ı̨į̀ aaht'e-le sìı naxıts'ǫ̀ gohde hǫt'e. Nǫ̀htsı̨ Israel got'ı̨į̀ agı̨ı̨t'e-le sìı gıts'ǫ̀ sı̨ı̨hɂà aht'e, eyıt'à godı nezı̨ı̨ gıts'ǫ̀ ahłe ha hòtł'ò eghàlaehda hǫt'e.

Rome 15:18

Edeghǫ xàdahohdì ha dehwhǫ-le. Zezì-Krı sı̨ set'à ayìı ghàlaı̨dàa sìı eyı zǫ weghǫ xàdahohdì ha dehwhǫ. Dǫ eyıì-le xàɂaa ts'ǫ̀ goıhdeè asį̀į̀là t'à, ayìı dàhłà eyıts'ǫ ayìı dàehsı̨ ts'ıhɂǫ̀ dǫ eyıì-le xàɂaa sìı Nǫ̀htsı̨ ts'ǫ̀ agèhłà xè gık'èı̨t'eè agejà.

Rome 15:19

Yedàyeh Nezı̨ı̨ wedahxà nàhtsoò asììdlà ts'ıhɂǫ̀ enıìyah łǫ hòwhıhtsı̨ t'à dıı hanì eghàlaıhdà hǫt'e. Eyıt'à kǫ̀ta Jerusalem gots'ǫ nıwàa nèk'e Ilırıcum ts'ǫ̀ Zezì-Krı wegodıì nezı̨ı̨ deghàà dǫ hazǫǫ̀ ts'ǫ̀ wek'ayawhıhtı hǫt'e.

Rome 15:20

Dǫ ı̨łaà Zezì-Krı ghǫ gıìkw'o-le sìı godı nezı̨ı̨ t'à gıts'ǫ̀ gohde ha dehwhǫ hǫt'e. Hanì-ı̨dè dǫ eyıì-le sekwe eyı eghàlagı̨ı̨dàa sìı gılaà k'e eghàlaehda ha dehwhǫ-le.

Rome 15:29

Naxıts'àwhıhtła nı̨dè Zezì-Krı sexè eghàlaeda t'à naxıxè deghàà sìghà ayele ha wek'èehsǫ.

Rome 5:5

Eyı gogha ehkw'ı-ahodı nı̨dè gotł'ahk'e agode ha nıìle. Nǫ̀htsı̨ Yedàyeh Nezı̨ı̨ godzeè yìı nàdè ha goghàhòı̨ɂǫ t'à sıì goghǫneètǫǫ sìı wek'èts'eezǫǫ̀ agǫ̀ǫ̀là.

1 Corınth 3:5

Apollos eyıts'ǫ Paul, ayìı gı̨ı̨lı̨ı̨ ghǫ aahdı? Ekìı Nǫ̀htsı̨ wecheekeè awììt'e. Nǫ̀htsı̨ naxıts'ǫ̀ goı̨hɂà t'à naxıgha ehkw'ı-ahodıì aahjà hǫt'e. Goxı̨ ı̨łak'aà Nǫ̀htsı̨ la goghàı̨ɂǫ k'ę̀ę̀ weghàlawìda hǫt'e.

1 Corınth 4:1

Eyıt'à dǫ Zezì-Krı wecheekeè ats'ı̨ı̨t'e k'ę̀ę̀ gogıhtà welì, eyıts'ǫ Nǫ̀htsı̨ ts'ǫǫ̀hk'e t'asìı deɂı̨į̀ whelaa sìı wek'èts'eezǫ ats'ı̨ı̨t'e, gogı̨ı̨hwhǫ welì.

1 Corınth 6:19

Naxızhį̀į̀ sìı Yedàyeh Nezı̨ı̨ wekǫ̀ lanì hǫt'e wek'èahsǫ-le nì? Ededı̨ sìı naxıdzeè yìı nàdè hǫt'e, ededı̨ sìı Nǫ̀htsı̨ naxıghàyı̨ı̨ɂǫ hǫt'e. Eyıt'à naxızhį̀į̀ sìı xàè naxıts'ǫ nıìle.

2 Corınth 11:23

Zezì-Krı wecheekeè agı̨ı̨t'e nì? Sı̨ gınahk'e wecheekeèdeè aht'e. (Sıì ezhı̨ne k'ę̀ę̀ gohde laehsı̨.) Gınahk'e hòtł'ò eghàlaıhdà, gınahk'e dǫ-danìı̨laa-kǫ̀ ıhdà, gınahk'e nàsegı̨ı̨hkwa, eyıts'ǫ gınahk'e gǫı̨tłǫǫ̀ ełaıhwho-t'e.

2 Corınth 5:20

Eyıt'à goxı̨ sìı Zezì-Krı wegha dǫ ts'ǫ̀ gots'edee ats'ı̨ı̨t'e. Goxı̨ got'à Nǫ̀htsı̨ naxıts'ǫ̀ gode lanì hǫt'e. Zezì-Krı wedahxà naxıghǫnàdats'eetì: Nǫ̀htsı̨ wexè ts'èwhı̨į̀ aahda, naxèts'edı.

2 Corınth 8:5

Haı̨hcho ts'ǫ̀ dǫ ts'àgedı ha ts'ı̨ı̨wǫ-le ı̨lè. T'akwełǫ̀ǫ̀ gots'ǫ̀ K'àowo ghàdegį̀ı̨la, eyı tł'axǫǫ̀ Nǫ̀htsı̨ wınì k'ę̀ę̀ goxı̨ sı goghàdegį̀ı̨la.

Galatıa 3:5

Moses wenàowoò k'èahdì t'à Nǫ̀htsı̨ edets'ǫ Įnì Degaı naxıghàı̨ɂǫ xè naxıta enıìyah hòèhtsı̨ nì? Hanì-le-ı̨dè ayìı aàhkw'oo sìı naxıgha ehkw'ı-ahodı t'à Nǫ̀htsı̨ hanì naxıts'ǫ̀ eghàlaı̨dà nì?

Ephesus 2:18

Goxı̨ dǫ nàke xàɂaa ts'ı̨ı̨lı̨ı̨ sìı ededı̨ wet'à Yedàyeh Nezı̨ı̨ goghàı̨ɂǫ t'à, Nǫ̀htsı̨-Gotà ts'ǫ̀ ats'ede ha gogha dìì-le ayį̀į̀là hǫt'e.

Ephesus 2:22

Naxı̨ sı Zezì-Krı wet'à kǫ̀ ełexè naxıhòèlı̨ı̨ laaht'e, eyıts'ǫ wets'ǫ Įnì Degaı t'à Nǫ̀htsı̨ eyı kǫ̀ yìı nàdè hǫt'e.

Ephesus 5:2

Zezì dànì goghǫneètǫ xè gogha ełaı̨wo k'ę̀ę̀, t'aats'ǫǫ̀ ełeghǫnıahtǫ k'ę̀ę̀ aahda. Zezì gogha ełaàwı gha Nǫ̀htsı̨ ghàdìtı̨ t'à yınì k'ę̀ę̀ eghàlaı̨dà.

Phılıppı 2:17

Naxıgha ehkw'ı-ahodı t'à, Nǫ̀htsı̨ wecheekeè aahłı̨ ha weghàdeahła, eyıts'ǫ sı̨ sìı Nǫ̀htsı̨ gha ełaehwhı ha tahkò. Eyıt'à Nǫ̀htsı̨ ts'ǫ̀ t'asìı k'eek'ǫ̀ lanì, wegha sezhį̀į̀ k'ehowı. Ełexè Nǫ̀htsı̨ t'asìı weghàts'eɂà ne t'à, naxıxè sınà hǫt'e.

Phılıppı 4:18

Hòt'a deghàà naxıt'à hoehwhì hǫt'e, eyıts'ǫ deɂǫ̀ǫ̀ seghàahła hǫt'e. Epaphrodıtus wetł'aà sǫǫ̀mba sedanìahła t'à t'asìı seɂǫ̀atłǫ whelaà ajà. T'asìı sets'ǫ̀ aahłàa sìı Nǫ̀htsı̨ wets'ǫ̀ t'asìı łekǫǫ k'ets'eehk'ǫ̀ lanì, eyı sìı Nǫ̀htsı̨ yeghǫ sìghà anıwǫ hǫt'e.

1 Thessalonıca 2:2

Naxıts'àts'ede kwe kǫ̀ta Phılıppı dǫ nàgedèe sìı gok'adageedè xè dagogį̀ı̨hɂa ı̨lè wek'èahsǫ hǫt'e. Sıì dǫ gok'èch'a agı̨ı̨wǫ kò, Nǫ̀htsı̨ gots'àı̨dì t'à, Nǫ̀htsı̨ wegodıì nezı̨ı̨ naxıts'ǫ̀ hats'edı ha ts'ejı̨-le ı̨lè.

1 Thessalonıca 2:9

Sèot'ı̨ı̨, dànì hòtł'ò eghàlats'ı̨ı̨dà xè gogha hoìla ı̨lèe sìı wenaahdì sǫnı. Nǫ̀htsı̨ wegodıì nezı̨ı̨ t'à naxıts'ǫ̀ gots'ı̨ı̨de ekò, t'asìı t'à gots'àahdı ha-le naxets'ı̨ı̨hwhǫ t'à toò, dzęę̀, ehk'ę̀ę̀ hòtł'ò eghàlats'ı̨ı̨dà ı̨lè.

1 Thessalonıca 5:23

Nǫ̀htsı̨ ts'èwhı̨į̀ wehòhɂǫǫ sìı deghàà degaı k'ę̀ę̀ anaxııle. Gots'ǫ̀ K'àowo Zezì-Krı nììtła gots'ǫ̀ naxıts'ǫ ı̨nì hazǫǫ̀, naxıdą̀ązhį̀ı̨ hazǫǫ̀, eyıts'ǫ naxızhį̀į̀ hazǫǫ̀ hołı̨ı̨ ch'à wek'èhodì ha welì.

1 Tımothy 2:7

Eyı weghǫ gohde ha t'à wecheekeèdeè ehłı̨ ha sìhchì, eyıts'ǫ dǫ Israel got'ı̨į̀ agı̨ı̨t'e-le sìı nàowo ehkw'ıı k'ę̀ę̀ Nǫ̀htsı̨ gıgha ehkw'ı-ahodı ha hoghàgeehtǫ. Ehkw'ı naxıts'ǫ̀ haehsı̨, hohts'ì gohde nıìle.

2 Tımothy 1:11

Godı nezı̨ı̨ dǫ ts'ǫ̀ haehsı̨ ha, eyıts'ǫ wet'à dǫ hoghàehtǫ ha, eyı gha wecheekeèdeè ehłı̨ ha sį̀į̀hchì hǫt'e.

Hebrew 13:16

Nàowo nezı̨ı̨ ghàlaahda xè ełets'àahdıı sìı t'aats'ǫǫ̀ wenaahdì. Hanì ełets'ǫ̀ eghàlats'eeda nı̨dè Nǫ̀htsı̨ wınà hots'ehtsı̨ hǫt'e.

1 Peter 1:12

Edegha eghàlageeda nıìle hanìkò ayìı ghǫ gogı̨ı̨dee sìı naxıgha agedıı gık'èezǫǫ̀ agììdlà hǫt'e. Dıì godı nezı̨ı̨ t'à naxıts'ǫ̀ gogedee sìı yak'e gots'ǫ Yedàyeh Nezı̨ı̨ gıts'ǫ̀ adlàa sìı wedahxà agedı hǫt'e. Ayìı ghǫ gogı̨ı̨dee sìı yak'eet'ı̨į̀ kò gıgòhɂà ha gı̨ı̨wǫ.

1 Peter 2:5

Eyı lanì naxı̨ sı kwe edaa laaht'e. Naxı̨ sìı Nǫ̀htsı̨ wekǫ̀ gocho laaht'e eyıts'ǫ yahtıı degaı lanì wegha k'ehoahɂa. Zezì-Krı naxıgha ehkw'ı adı t'à, Nǫ̀htsı̨ wınì k'ę̀ę̀ weghàdeahła.